🌹 “ഇന്നത്തെ ചിന്താവിഷയം” 🌹 – 2024 | നവംബർ 20 | ബുധൻ ✍ പ്രൊഫസ്സർ എ.വി. ഇട്ടി മാവേലിക്കര

കാണുന്നതെല്ലാം പാടി നടക്കാതിരിക്കാം
————————————————————

ഒരു രാജാവിൻ്റെ ചെവി സാധാരണയിൽക്കവിഞ്ഞു നീണ്ടു വളർന്നു.
അതാരും കാണാതിരിക്കാൻ, അദ്ദേഹം വലിയ ഒരു തൊപ്പി വച്ചു. പക്ഷെ, കൊട്ടാരത്തിലെ ഒരു സേവകൻ അതു കണ്ടു. പുറത്തു പറഞ്ഞാൽ, രാജാവു തലയറുക്കും. അതിനാൽ, അയാളത് ആരോടും പറഞ്ഞില്ല. എന്നാൽ, ആ രഹസ്യം, അയാളുടെ മനസ്സിലിരുന്നു വിങ്ങിപ്പൊട്ടാനാരംഭിച്ചു. അവസാനം, അയാളത് കാറ്റിനോടു പറഞ്ഞു. കാറ്റത് നാട്ടിലെങ്ങും പാട്ടാക്കി. കാലക്രമത്തിൽ അതു രാജാവിൻ്റെ ചെവിയിലുമെത്തി. സേവകൻ്റെ തലയും പോയി!

എല്ലാ സത്യങ്ങളും, എല്ലാവരോടും വിളിച്ചു പറയാനുള്ളതല്ല. സ്വകാര്യതകളുടെ രഹസ്യാത്മക ഭാവമാണ്, ഓരോ മനുഷ്യനേയും താങ്ങി നിർത്തുന്നതും, മുന്നോട്ടു പോകാൻ പ്രേരിപ്പിക്കുന്നതും. പരസ്യമാകാത്ത അവഹേളനങ്ങളെ, സ്വകാര്യതയിൽ അതിജീവിച്ചാൽ മതി. എന്നാൽ, വിസിലൂതി അതു പ്രചരിപ്പിച്ചാൽ, അതിൻ്റെ ആഘാതം, ആർക്കും അതിജീവിക്കാനാകണമെന്നില്ല.

നന്മയ്ക്കും, സവിശേഷതകൾക്കും, പ്രസരണശേഷി കുറവാണ്. എന്നാൽ, വൈകൃതങ്ങളുടെ കാര്യം അങ്ങനെയല്ല. അവ അതിവേഗം അന്യരുടെ ചെവിയിലെത്തും. ചെവി വലുതായവൻ്റെ മറ്റെല്ലാ ഇന്ദ്രീയങ്ങളും, ശേഷികൊണ്ട് അസാധാരണമായിരുന്നിരിക്കാം. എന്നാൽ, അതു പ്രചരിപ്പിക്കാനാളുകൾ കാണില്ല. ഒരാളുടെ ഒരു നന്മയെങ്കിലും പ്രചരിപ്പിക്കുവാൻ, എല്ലാവരും ശ്രമിച്ചിരുന്നെങ്കിൽ, ഭൂമിയിൽ സ്വർഗ്ഗം സൃഷ്ടിക്കപ്പെടുമായിരുന്നു.

ചെവികൊടുക്കുന്നവനിലാണ്, പറഞ്ഞു നടക്കുന്നവൻ്റെ പ്രതീക്ഷ. എല്ലാ ചൂടുള്ള വാർത്തകളും, കൃത്യമായി തങ്ങളുടെ ചെവിയിലെത്തുമെന്നു വീരവാദം മുഴക്കുന്നവർ ഒന്നോർക്കണം: ഒരാൾ എന്താണോ കൈമാറുന്നത്, അതുതന്നെയാ
യിരിക്കും അയാൾക്കും തിരികെ ലഭിക്കുക. പറന്നു വരുന്ന കഥകളെ, ഒരാളെങ്കിലും പടിക്കു പുറത്തു നിർത്തിയിരുന്നെങ്കിൽ, ചില നിരർത്ഥക കഥകളെങ്കിലും, പാതിവഴിയിൽ അവസാനിച്ചേനേ. മനസ്സിൽ സൂക്ഷിക്കാൻ കഴിയാത്തതൊന്നും കേൾക്കാതിരിക്കുക. കേൾക്കാൻ ഇമ്പമില്ലാത്തതൊന്നും പറയാതിരിക്കുക. കാണുന്നതും കേൾക്കുന്നതുമെല്ലാം, പാടി നടക്കാതിരിക്കുക.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര