📱വാർത്തകൾ ഒറ്റനോട്ടത്തിൽ📱 – 2026 | മാർച്ച് 08 | ഞായർ ✍ കപിൽ ശങ്കർ

🔹ഇറാനെതിരെ ഇസ്രയേലും അമേരിക്കയും ചേർന്ന് നടത്തുന്ന ക്രൂരമായ യുദ്ധാക്രമണങ്ങൾക്കെതിരെ ഇടതുമുന്നണി സംഘടിപ്പിക്കുന്ന സംസ്ഥാനതല യുദ്ധവിരുദ്ധ സമാധാന റാലി ഇന്ന് തിരുവനന്തപുരത്ത് നടക്കും. വൈകിട്ട് 5.30-ന് കിഴക്കേക്കോട്ട ഇ.കെ. നായനാർ പാർക്കിൽ നടക്കുന്ന പ്രതിഷേധ സംഗമം മുഖ്യമന്ത്രി പിണറായി വിജയൻ ഉദ്ഘാടനം ചെയ്യും. ലോകത്തെയാകെ വൻ യുദ്ധത്തിലേക്ക്‌ നയിക്കുന്ന അമേരിക്കൻ സാമ്രാജ്യത്വത്തിന്റെ നയങ്ങൾക്കെതിരായി ജനങ്ങളാകെ കൈകോർക്കണമെന്ന് എൽഡിഎഫ് നേതാക്കൾ അഭ്യർത്ഥിച്ചു.
അമേരിക്കയുടെയും ഇസ്രയേലിന്റെയും യുദ്ധക്കൊതിക്കെതിരെ കേരളത്തിൽ എൽഡിഎഫിന്റെ ആഭിമുഖ്യത്തിൽ മൂന്ന് പ്രധാന ബഹുജന റാലികളാണ് സംഘടിപ്പിക്കുന്നത്. എൽഡിഎഫ് കൺവീനർ ടി.പി. രാമകൃഷ്ണനാണ് ഇക്കാര്യം അറിയിച്ചത്. ഇതിന്റെ ഭാഗമായി മാർച്ച് ആറിന് കോഴിക്കോട് മുതലക്കുളത്തും ഏഴിന് കൊച്ചി മറൈൻ ഡ്രൈവിലും റാലികൾ നടന്നിരുന്നു. ഇതിന് പിന്നാലെയാണ് പരമ്പരയിലെ മൂന്നാമത്തെ റാലി ഇന്ന് തിരുവനന്തപുരത്ത് നടക്കുന്നത്.
യുദ്ധവിരുദ്ധ സമാധാന റാലിയിൽ ആയിരക്കണക്കിന് ആളുകൾ പങ്കെടുക്കുമെന്ന് എൽഡിഎഫ് അറിയിച്ചു. ബഹുജന കൂട്ടായ്മയായി റാലി സംഘടിപ്പിക്കു
മെന്നും കേരളത്തിലുട നീളം യുദ്ധത്തിനെതിരെ ജനങ്ങളെ അണിനിരത്തു
ന്നതിനായി എല്ലാ പരിശ്രമങ്ങളും നടത്തുമെന്നും ടി.പി. രാമകൃഷ്ണൻ വ്യക്തമാക്കി. അമേരിക്കൻ സാമ്രാജ്യത്വ ശക്തികൾക്കെതിരെ ശക്തമായ ജനരോഷം ഉയർത്താനാണ് ഇടതുമുന്നണിയുടെ നീക്കം.

🔹അന്താരാഷ്ട്ര വനിതാദിനാചരണത്തിന്‍റെ ഭാഗമായി വനിതാ – ശിശു വികസനവകുപ്പിന്‍റെ നേതൃത്വത്തിൽ സംഘടിപ്പിച്ച വനിതാദിനാചരണ ജില്ലാതല ഉദ്ഘാടനം കളക്ടർ ശിഖ സുരേന്ദ്രൻ നിർവഹിച്ചു. കളക്ടറേറ്റ് അനക്സ് ഹാളിൽ നടന്ന ചടങ്ങിൽ അസിസ്റ്റന്‍റ് കളക്ടർ സ്വാതി മോഹൻ റാത്തോഡ് അധ്യക്ഷത വഹിച്ചു.പ്രതികൂലസാഹചര്യങ്ങളെ അതിജീവിച്ച് ജീവിതവിജയം നേടിയ അനീഷ അഷറഫിനെയും കായികമേഖലയിൽനിന്നു സി.ഡി. എൽസിയെയും ജില്ലാ കളക്ടർ ആദരിച്ചു.
പോഷ് ആക്ട് ആൻഡ് ഡൊമസ്റ്റിക് വയലൻസ് ആക്ട് എന്ന വിഷയത്തിൽ അഡ്വ. ജോർജ് പുലികുത്തിയിൽ, സ്ത്രീധനനിരോധനനിയമം, ശൈശവവിവാഹ നിരോധനനിയമം എന്ന വിഷയത്തിൽ അഡ്വ. എ.എം സിമ്മി, സൈബർ സുരക്ഷ എന്ന വിഷയത്തിൽ സിറ്റി സൈബർ സെൽ അസിസ്റ്റന്‍റ് സബ് ഇൻസ്പെക്ടർ സി. സുജിത് എന്നിവർ ബോധവത്കരണ ക്ലാസെടുത്തു. വനിതാ-ശിശു വികസന ഓഫീസർ പി. മീര, ജില്ലാ വനിതാ ശിശുവികസന ഓഫീസ് ഹെഡ് അക്കൗണ്ടന്‍റ് സി.വി സുമ, ജില്ലാ ശിശുസംരക്ഷണ ഓഫീസർ ടി.യു. സ്മിത, സങ്കല്പ് ഹബ് ഫോർ എംപവർമെന്‍റ് ഓഫ് വുമണ്‍ ജെൻഡർ സ്പെഷലിസ്റ്റ് ദീപ ജോസ് തുടങ്ങിയവർ പ്രസംഗിച്ചു.

🔹റോഡ് കയ്യേറി പ്രധാനമന്ത്രിയുടെ ഫ്ലക്സ് ബോർഡ് സ്ഥാപിച്ച വിഷയത്തിൽ തിരുവനന്തപുരം കോർപ്പറേഷൻ ചുമത്തിയ പിഴ അടയ്ക്കാൻ ബിജെപി തയ്യാറാകുന്നില്ല. 19,97,000 രൂപ പിഴ ഈടാക്കിയെങ്കിലും ഒരു രൂപ പോലും ബിജെപി ഇതുവരെ അടച്ചിട്ടില്ലെന്ന് വിവരാവകാശ രേഖകൾ വ്യക്തമാക്കുന്നു.
ബിജെപിയിൽ നിന്ന് പിഴ ഈടാക്കാൻ നടപടി സ്വീകരിക്കാത്ത കോർപ്പറേഷൻ, പിഴ ചുമത്തിയ ഉദ്യോഗസ്ഥയെ തൽസ്ഥാനത്തു നിന്ന് നീക്കിയതായും വിവരാവകാശ രേഖയിൽ സമ്മതിക്കുന്നുണ്ട്. എറണാകുളം സ്വദേശിയായ വിവരാവകാശ പ്രവർത്തകൻ രാജു വാഴക്കാല നൽകിയ അപേക്ഷയിലാണ് കോർപ്പറേഷന്റെ ഈ മറുപടി. 2026 ജനുവരി 23ന് പ്രധാനമന്ത്രി തിരുവനന്തപുരം സന്ദർശിച്ചപ്പോൾ പ്രചരണാർത്ഥം റോഡുകളും നടപ്പാതകളും കയ്യേറി ഫ്ലക്സ് ബോർഡുകൾ സ്ഥാപിച്ചതിനാണ് കോർപ്പറേഷൻ പിഴ ചുമത്തിയത്. 19,97,000 രൂപ പിഴ ചുമത്തിയിട്ടുണ്ടോ എന്ന ചോദ്യത്തിന് ‘ഉണ്ട്’ എന്ന് മറുപടി നൽകിയ കോർപ്പറേഷൻ, എന്നാൽ നാളിതുവരെയായി തുക അടച്ചിട്ടില്ലെന്നും വ്യക്തമാക്കി. പിഴത്തുക ഈടാക്കുന്നതിനായി കോർപ്പറേഷൻ അടിയന്തര നിയമനടപടികൾ സ്വീകരിക്കണമെന്ന് രാജു വാഴക്കാല ആവശ്യപ്പെട്ടു.

🔹തിരുവനന്തപുരം മെഡിക്കൽ കോളജ് ആശുപത്രിയിലെ ലിഫ്റ്റിനുള്ളിൽ ആറ് പേർ കുടുങ്ങി. രോഗികളും കൂട്ടിരിപ്പുകാരും ഉൾപ്പെടെ ആറ് പേരാണ് ലിഫ്റ്റിനുള്ളിൽ കുടുങ്ങിയത്. ഒരു മണിക്കൂറിന് ശേഷമാണ് ആറ് പേരെയും പുറത്തിറക്കിയത്.വൈദ്യുതി തകരാറിനെ തുടർന്നാണ് ലിഫ്റ്റ് പ്രവർത്തന രഹിതമായതെന്നാണ് ആശുപത്രി അധികൃതരുടെ വാദം. സുരക്ഷാ ജീവനക്കാരെത്തി താക്കോൽ ഉപയോഗിച്ച് ലിഫ്റ്റ് തുറന്നു ആറുപേരെയും പുറത്തിറക്കുകയായിരുന്നു.കഴിഞ്ഞ ഒരു മാസത്തിനിടെ മൂന്ന് തവണ ഇത്തരത്തിൽ രോഗികളും കൂട്ടിരിപ്പുകാരും ലിഫ്റ്റിൽ കുടുങ്ങിയിരുന്നു. ആശുപത്രിയിലെ ജനറേറ്റൽ ഉൾപ്പെടെയുള്ള സംവിധാനങ്ങൾ കൃത്യമായി പ്രവർത്തിക്കാത്തതാണ് ഇടയ്ക്കിടെ ഇത്തരം സംഭവങ്ങൾ ആവർത്തിക്കുന്നതെന്നാണ് ആരോപണം.ജനുവരിയിൽ ആശുപത്രിയിലെ ലിഫ്റ്റിൽ 42 മണിക്കൂർ രോഗി കുടുങ്ങിയ സംഭവത്തിൽ 5,00,000 രൂപ സർക്കാർ നഷ്ടപരിഹാരം നൽകണമെന്ന് മനുഷ്യാവകാശ കമ്മീഷൻ ചെയർപേഴ്സൺ ജസ്റ്റിസ് അലക്സാണ്ടർ തോമസ് ഉത്തരവിട്ടിരുന്നു.

🔹നിയമസഭയിലേക്ക് ഇതേവരെ തെരഞ്ഞെടുക്കപ്പെട്ടിട്ടുള്ളത് 51 വനിതകള്‍ മാത്രം. 1957 മുതല്‍ 15 നിയമസഭാ തെരഞ്ഞെടുപ്പുകളാണ് കേരളത്തില്‍ നടന്നത്. ഇതില്‍ മത്സരരംഗത്തു വന്നിട്ടുള്ളത് 624 പേരാണ്. ഒന്നിലേറെ തവണ ജയിച്ചവരാണ് ഏറെപ്പേരും. ഒരു സഭയില്‍പോലും മൊത്തം അംഗസംഖ്യയുടെ പത്തു ശതമാനംപോലും വനിതകള്‍ ഉണ്ടായിരുന്നില്ല. തദ്ദേശ സ്ഥാപനങ്ങളില്‍ 50 ശതമാനത്തിലേറെ വനിതാ സംവരണമുള്ള സംസ്ഥാനമാണിത്.കാലാവധി കഴിയുന്ന പതിനഞ്ചാം കേരള നിയമസഭയില്‍ 12 വനിതാ അംഗങ്ങളാണുണ്ടായിരുന്നത്. ഇവരില്‍ കൊയിലാണ്ടി എംഎല്‍എ കാനത്തില്‍ ജമീല അന്തരിച്ചു. കോണ്‍ഗ്രസിലെ ഉമാ തോമസ് തൃക്കാക്കര ഉപതെരഞ്ഞെടുപ്പിലൂടെ വിജയിച്ചെത്തിയതാണ്. 2021ലെ നിയമസഭാ തെരഞ്ഞെടുപ്പില്‍ 103 വനിതകളാണ് മത്സരരംഗത്തുണ്ടായിരുന്നത്. കോണ്‍ഗ്രസിന് ഒരു വനിതയെപോലും ജയിപ്പിച്ചെടുക്കാനായില്ല. ആര്‍എംപിയുടെ കെ.കെ. രമ മാത്രമായിരുന്നു യുഡിഎഫ് പക്ഷം. ഉമാ തോമസ് കൂടി എത്തിയതോടെ പ്രതിപക്ഷ നിരയില്‍ രണ്ടു പേർ.വിവിധ കാലയളവുകളിലായി 103 വനിതാ എംഎല്‍എമാരുണ്ടായിട്ടുണ്ട്. ഏറെപ്പേരും ഒന്നിലേറെ തവണ തെരഞ്ഞെടുക്കപ്പെട്ടതിനാല്‍ എണ്ണം 51 ല്‍ ഒതുങ്ങുകയാണ്.ഏറ്റവും കൂടുതല്‍ വനിതകള്‍ ഉണ്ടായിരുന്നത് 1996-2021 പത്താം കേരള നിയമസഭയിലായിരുന്നു. 13 പേർ. അപ്പോഴും മൊത്തം അംഗസംഖ്യയുടെ 9.3 ശതമാനം. വനിതാ സ്ഥാനാര്‍ഥികള്‍ ഏറ്റവും കൂടുതല്‍ ഉണ്ടായിരുന്നത് 2016ലെ തെരഞ്ഞെടുപ്പിലാണ്. 110 പേര്‍ മത്സരിച്ചതില്‍ എട്ടുപേര്‍ വിജയിച്ചു. ഒരാള്‍ ഉപതെരഞ്ഞെടുപ്പിലൂടെയും എത്തി.

🔹കൊല്ലത്ത് നിന്ന് മത്സ്യബന്ധനത്തിനു പോയ ബോട്ട് കപ്പലുമായി കൂട്ടിയിടിച്ചുണ്ടായ അപകടത്തിൽ കാണാതായ മത്സ്യത്തൊഴിലാളികൾക്കായി തെരച്ചിൽ തുടരുന്നു. അപകടത്തെ തുടർന്ന് രണ്ട് അന്യസംസ്ഥാന തൊഴിലാളികളെയാണ് കാണാതായത്.
വിയറ്റ്നാം കപ്പലുമായി കൂട്ടിയിടിച്ചാണ് അപകടമുണ്ടായത്. ശക്തികുളങ്ങരയിൽ നിന്ന് പോയ സെന്‍റ് ജോസഫ് എന്ന ബോട്ടാണ് അപകടത്തിൽപ്പെട്ടത്. വെള്ളിയാഴ്ചയാണ് ആഴക്കടൽ മത്സ്യബന്ധനത്തിന് പോയ ബോട്ട് കപ്പലുമായി കൂട്ടിയിടിച്ചത്.
ഹാർബറിൽ നിന്ന് 120 നോട്ടിക്കൽ മൈൽ അകലെ വച്ച് കപ്പലുമായി ഇടിച്ചാണ് അപകടം. ഇടിയിൽ മത്സ്യബന്ധന ബോട്ട് പൂർണമായും മുങ്ങി. കന്യാകുമാരി ഭാഗത്തുവച്ച് വിയറ്റ്നാം കപ്പലുമായി ഇടിച്ചായിരുന്നു അപകടം. ബോട്ടിൽ 11 തൊഴിലാളികൾ ഉണ്ടായിരുന്നു.ഒൻപതുപേരെ രക്ഷപ്പെടുത്തി. എന്നാൽ കടലിൽ മുങ്ങി താഴ്ന്ന രണ്ട് തൊഴിലാളികളെ രക്ഷപ്പെടുത്താനായില്ല. തമിഴ്നാട്, വെസ്റ്റ് ബംഗാൾ സ്വദേശികളായ തൊഴിലാളികളാണ് ബോട്ടിൽ ഉണ്ടായിരുന്നത്.

🔹നെയ്യാറ്റിൻകരയിൽ പത്താംക്ലാസുകാരിയെ കുളത്തിൽ മരിച്ചനിലയിൽ കണ്ടെത്തി. മരുതത്തൂർ സ്വദേശി സുരേഷ്-സിന്ധു ദമ്പതികളുടെ ഇളയ മകൾ അനഘയെയാണ് കുളത്തിൽ മരിച്ച നിലയിൽ കണ്ടെത്തിയത്. സുരേഷ് വിദേശത്താണ്.അമ്മയും സഹോദരിയും മാത്രമായിരുന്നു വീട്ടിൽ. സംഭവദിവസം ആരും വീട്ടിൽ ഉണ്ടായിരുന്നില്ല. അനഘയെ കാണാത്തതിനെത്തുടർന്ന് നടത്തിയ തെരച്ചിലിലാണ് കുളത്തിൽ നിന്ന് മൃതദേഹം കണ്ടെത്തിയത്.കുളക്കടവിൽ ചെരിപ്പ് കണ്ടെത്തിയതിനെത്തുടർന്ന് കുളത്തിൽ തെരച്ചിൽ നടത്തുകയായിരുന്നു. ഫയർഫോഴ്സ് എത്തിയാണ് മൃതദേഹം പുറത്തെടുത്തത്. മൃതദേഹം നെയ്യാറ്റിൻകര മോർച്ചറിയിൽ സൂക്ഷിച്ചിരിക്കുകയാണ്. അസ്വാഭാവിക മണരത്തിന് മാരായമുട്ടം പോലീസ് കേസെടുത്തു.

🔹മകൾക്ക് ജോലി വാഗ്ദാനം ചെയ്ത് എറണാകുളം ചെറായി സ്വദേശിയിൽ നിന്നും സ്വർണാഭരണങ്ങൾ ഉൾപ്പെടെ ഏഴ് ലക്ഷം രൂപയോളം തട്ടിയെടുത്ത കേസിൽ അമ്മയും മകളും അറസ്റ്റിൽ. പ്രതികളായ പൂമ്പാറ്റ സിനി എന്നറിയപ്പെടുന്ന പള്ളുരുത്തി തണ്ടാശേരി സിനി (50), രണ്ടാം വിവാഹത്തിലെ മകൾ അശ്വിനി (24) എന്നിവരെ മുനമ്പം പോലീസ് അറസ്റ്റു ചെയ്തു.ഒളിവിൽ കഴിയുകയായിരുന്ന പ്രതികളെ വെള്ളിയാഴ്ച പുതുക്കാട് പോലീസ് സ്റ്റേഷനിൽ വാറണ്ട് കേസിൽ അറസ്റ്റിലായി കോടതിയിൽ നിന്നും ജാമ്യം ലഭിച്ച് ഇറങ്ങുന്ന സമയത്താണ് മുനമ്പം പോലീസ് കസ്റ്റഡിയിലെടുത്തത്.എറണാകുളം തൃശൂർ ജില്ലകളിലായി 28 ഓളം പണം തട്ടിപ്പ് കേസുകളിൽ പ്രതിയായ പൂമ്പാറ്റ സിനി ഒല്ലൂർ പോലീസ് സ്റ്റേഷനിലെ റൗഡി ലിസ്റ്റിൽ ഉൾപ്പെട്ടയാളും കാപ്പ നടപടികൾ നേരിട്ടയാളുമാണെന്ന് പോലീസ് അറിയിച്ചു.

🔹തിരുവനന്തപുരം വർക്കലയിൽ പിരിഞ്ഞുതാമസിച്ചിരുന്ന ഭാര്യയെ കാറിനുള്ളിൽ വച്ച് മർദിച്ച് കൊലപ്പെടുത്താൻ ശ്രമിച്ച് ഭർത്താവ്. മകനെ കാട്ടി തരാമെന്ന് വാഗ്ദാനം ചെയ്താണ് യുവതിയെ ഭർത്താവ് തന്ത്രപരമായി കാറിനുള്ളിൽ കയറ്റിയത്.തുടർന്ന് യുവതിയെ വാഹനത്തിനുള്ളിൽ വച്ച് മർദിക്കുകയായിരുന്നു. യുവതിയുടെ പരാതിയിൽ ഭർത്താവ് സിജു സോമനെതിരെ പോലീസ് കേസെടുത്തു. ഡോറുകളും വിൻഡോ ഗ്ലാസുകളും ലോക്ക് ചെയ്ത ശേഷമായിരുന്നു പ്രതി യുവതിയെ മർദിച്ചത്. ഇതിനിടെ ഇയാൾ യുവതിയുടെ വായിൽ തുണിയും തിരികിയിരുന്നു.കുഞ്ഞിനെ കാണിക്കാമെന്ന് അറിയിച്ചതനുസരുിച്ച് യുവതി മകന് നൽകാൻ ഭക്ഷണവുമായി മറ്റൊരു വാഹനത്തിലാണെത്തിയത്. വഴിയരികിൽ നിന്ന് ഭക്ഷണം നൽകുന്നതെങ്ങനെയെന്ന് ചോദിച്ച് ഇയാൾ യുവതിയെ കാറിൽ കയറ്റുകയായിരുന്നു.

🔹സംസ്ഥാന ഓർഫനേജ് കണ്‍ട്രോൾ ബോർഡിൽ രജിസ്റ്റർ ചെയ്തിട്ടുള്ള ക്ഷേമസ്ഥാപനങ്ങളിലെ അന്തേവാസികൾക്കുള്ള സർക്കാർ ഗ്രാന്‍റ് 1375 രൂപയാക്കി ഉയർത്തി ഉത്തരവിറക്കി.ആളൊന്നിന് 1100 രൂപ നിരക്കിലാണ് നിലവിൽ നൽകി വരുന്നത്. ഇത് ഉയർത്താൻ കഴിഞ്ഞ ആഴ്ച ചേർന്ന മന്ത്രിസഭാ യോഗം തീരുമാനിച്ചിരുന്നു.

🔹മുടിവെട്ടിയതിന്‍റെ പ്രതിഫലം ആവശ്യപ്പെട്ട ബാർബറുടെ കൈ തല്ലിയൊടിച്ച സംഭവത്തിൽ രണ്ട് പേർ പിടിയിൽ. ഓച്ചിറ വലിയകുളങ്ങര മീനാക്ഷി ഭവനത്തിൽ അജയ് (24), പായിക്കുഴി ഒയാസിസ് വീട്ടിൽ ഇൻസാഫ് (25) എന്നിവരാണ് പിടിയിലായത്.ചവറ പോരൂക്കര സ്വദേശി ഷഫീക്കിന് നേരെയാണ് ആക്രമണമുണ്ടായത്. പ്രതികൾ പാറക്കല്ലുകൊണ്ട് ഷഫീക്കിന്‍റെ വലത് കൈ തല്ലിയൊടിക്കുകയായിരുന്നു. ആക്രമണത്തിൽ കൈപ്പത്തിക്ക് പൊട്ടലുണ്ട്. ഓച്ചിറ പോലീസ് ആണ് പ്രതികളെ പിടികൂടിയത്.
ഓച്ചിറ മുണ്ടുകോട്ടയിലെ ഷഫീക്കിന്‍റെ ബാർബർ ഷോപ്പിലെത്തി മുടി വെട്ടിച്ച പ്രതികൾ പണം പിന്നീട് നൽകാമെന്ന് അറിയിച്ച് പോയിരുന്നു. തുടർന്ന് ദിവസങ്ങൾ കഴിഞ്ഞിട്ടും പണം നൽകാത്തതിനെ തുടർന്ന് ഷഫീക്ക് ഇരുവരോടും കൂലി ആവശ്യപ്പെട്ടു. ഇതിൽ പ്രകോപിതരായ പ്രതികൾ ഷഫീക്കിന്‍റെ കടയിൽ അതിക്രമിച്ചു കയറി ആക്രമിക്കുകയായിരുന്നു. പിടിയിലായ പ്രതികളിൽ ഒരാളായ അജയ് നേരത്തേ കാപ്പ നിയമപ്രകാരം അറസ്റ്റിലായിട്ടുണ്ട്.

🔹പഴകിയ സാമ്പാർ വിളമ്പിയതിനെ ചൊല്ലി ഭർത്താവുമായുണ്ടായ തർക്കത്തെത്തുടർന്ന് യുവതി ജീവനൊടുക്കി. ബംഗളൂരു സ്വദേശിനിയായ കാവ്യ (27)യാണ് ആത്മഹത്യ ചെയ്തത്.മൂന്ന് ദിവസം മുമ്പ് ഉണ്ടാക്കിയ സാമ്പാർ ചൂടാക്കി വീണ്ടും വിളമ്പുകയായിരുന്നു. ഇതേ ചൊല്ലി ഭർത്താവ് രംഗസ്വാമിയുമായുണ്ടായ തർക്കം കൈയേറ്റത്തിലേക്ക് എത്തി. ഇതിൽ മനംനൊന്ത് യുവതി കൃഷി ആവശ്യത്തിനായി സൂക്ഷിച്ചിരുന്ന കീടനാശിനി എടുത്ത് കുടിക്കുകയായിരുന്നു.കാവ്യക്ക് ശാരീരിക പ്രശ്‌നങ്ങളും ഛർദ്ദിയും ശ്രദ്ധയിൽപ്പെട്ട ബന്ധു വിവരം തിരക്കിയതോടെയാണ് കീടനാശിനി കഴിച്ച വിവരം പുറത്തറിയുന്നത്. ഉടൻ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. പോസ്റ്റ്‌മോർട്ടത്തിലും മരണകാരണം കീടനാശിനി കഴിച്ചതാണെന്ന് കണ്ടെത്തി. പോലീസ് കേസെടുത്ത് അന്വേഷണം ആരംഭിച്ചു. അഞ്ച് വർഷം മുമ്പാണ് രംഗസ്വാമിയും കാവ്യയും വിവാഹിതരായത്. ഇരുവർക്കും നാല് വയസുള്ള കുട്ടിയുണ്ട്.

🔹വിധവയായ യുവതിയുടെ വിവാഹത്തിൽ സംശയം തോന്നിയ പോലീസ് നടത്തിയ അന്വേഷണത്തിൽ തെളിഞ്ഞത് ഭർത്താവിന്‍റെ കൊലപാതകം. കർണാടകയിലെ തുംകൂർ ജില്ലയിൽ ഹൃദയാഘാതം മൂലം മരിച്ചെന്നു കരുതിയ പരമേഷിന്‍റെ (50) കൊലപാതകമാണ് അന്വേഷണത്തിൽ തെളിഞ്ഞത്. ഭർത്താവ് മരിച്ച് മൂന്നാഴ്ചയ്ക്കുള്ളിലാണ് യുവതി പാചകക്കാരനെ വിവാഹം കഴിച്ചത്.കൂലിപ്പണിക്കാരനായ പരമേഷ് ജനുവരി 29ന് രാത്രിയാണ് മരിച്ചത്. തുടർന്ന് ഭാര്യയായ ആശ (46) പരമേഷിന്‍റെ മരണം ഹൃദയാഘാതം മൂലമാണെന്ന് ബന്ധുക്കളെ വിശ്വസിപ്പിക്കുകയും മൃതദേഹം സംസ്കരിക്കുകയും ചെയ്തു.തുടർന്ന് ഫെബ്രുവരി 19ന് ആശ പാചകക്കാരനായ ചന്ദ്രപ്പയെ വിവാഹം കഴിച്ചു. ഇയാളുമായി നേരത്തേ ആശയ്ക്ക് ബന്ധമുണ്ടായിരുന്നു. ഈ വിവാഹത്തിൽ സംശയം തോന്നിയ പരമേഷിന്‍റെ സഹോദരിമാർ പോലീസിൽ പരാതി നൽകുകയായിരുന്നു. തുടർന്ന് പരമേഷിന്‍റെ മൃതദേഹം പുറത്തെടുത്തു പോസ്റ്റുമോർട്ടം നടത്തിയതോടെ മരണം ശ്വാസംമുട്ടിയാണെന്നു കണ്ടെത്തി. തുടർന്ന് നടത്തിയ ചോദ്യം ചെയ്യലിൽ ആശയും കാമുകനും മുൻ ഭർത്താവിനെ കൊലപ്പെടുത്തിയെന്നു സമ്മതിക്കുകയായിരുന്നു. പരമേഷ് ഉറങ്ങിക്കിടക്കുമ്പോൾ തലയണ ഉപയോഗിച്ച് ശ്വാസംമുട്ടിച്ച് കൊലപ്പെടുത്തുകയായിരുന്നു.

🔹 നിയമസഭാ തെരഞ്ഞെടുപ്പ് നടക്കാനിരിക്കെ വൻ പ്രഖ്യാപനങ്ങളുമായി നടൻ വിജയ് നേതൃത്വം നൽകുന്ന തമിഴ് വെട്രി കഴകം പാർട്ടി. മാമല്ലപുരത്ത് അന്താരാഷ്‌ട്ര വനിതാ ദിനത്തിന്‍റെ ഭാഗമായി നടത്തിയ പരിപാടിയിലാണു വിജയ് പ്രഖ്യാപനങ്ങൾ നടത്തിയത്. ടിവികെ അധികാരത്തിലെത്തിയാൽ സർക്കാർ ജീവനക്കാരല്ലാത്ത 60 വയസ് വരെയുള്ള എല്ലാ സ്ത്രീകൾക്കും മാസം 2500 രൂപ വീതം നൽകും. യുവതികൾക്ക് വിവാഹത്തിന് ഒരുപവൻ സ്വർണവും പട്ടുസാരിയും നൽകും. എല്ലാ കുടുംബങ്ങൾക്കും വർഷം ആറ് പാചകവാതക സിലിണ്ടറുകൾ സൗജന്യമായി നൽകും.സ്‌കൂളുകളിലെ കൊഴിഞ്ഞുപോക്ക് തടയാൻ അമ്മ അല്ലെങ്കിൽ രക്ഷകർത്താവിന് പ്രതിവർഷം 15,000 രൂപ നൽകുമെന്നും വിജയ് വാഗ്ദാനം ചെയ്തു.

🔹കപ്പ് ഉയർത്താൻ ടീം ഇന്ത്യ ഇന്ന് ഇറങ്ങുകയാണ്. ട്വന്‍റി-20 ലോകകപ്പ് ക്രിക്കറ്റ് കിരീടപ്പോരാട്ടത്തില്‍ ഇന്ത്യ ഇന്നു ന്യൂസിലന്‍ഡിനെ നേരിടും. അഹമ്മദാബാദിലെ നരേന്ദ്ര മോദി സ്‌റ്റേഡിയത്തില്‍ രാത്രി ഏഴിനു മത്സരം തുടങ്ങും.ഇതേ സ്റ്റേഡിയത്തിൽ 2023 ഏകദിന ലോകകപ്പ് ക്രിക്കറ്റ് ഫൈനലില്‍ ഓസ്‌ട്രേലിയയോട് പരാജയപ്പെട്ടതും ഇത്തവണ സൂപ്പര്‍ എട്ട് പോരാട്ടത്തില്‍ ദക്ഷിണാഫ്രിക്കയോട് 70 റണ്‍സിന് പരാജയപ്പെട്ടതും മറക്കാൻ ലോകകിരീടം അനിവാര്യം.ഓപ്പണറായി സഞ്ജു സാംസണും സ്റ്റാര്‍ പേസര്‍ ജസ്പ്രീത് ബുംറയും ഓള്‍റൗണ്ടര്‍ ഹാര്‍ദിക് പാണ്ഡ്യയും അടങ്ങുന്ന ത്രിമൂര്‍ത്തികളിലാണ് ഇന്ത്യയുടെ പ്രതീക്ഷ. ടൂര്‍ണമെന്‍റിലുടനീളം നിരാശപ്പെടുത്തിയ അഭിഷേക് ശര്‍മ അവസാന മത്സരത്തിലെങ്കിലും ക്ലിക്കായാൽ വിജയം അനായാസമാകും.
ടൂര്‍ണമെന്‍റില്‍ രണ്ടുതവണയാണ് ടീം ഇന്ത്യ 250 കടന്നത്, ആദ്യം ചെന്നൈയില്‍ സിംബാബ്‌വെയ്‌ക്കെതിരേയും പിന്നീട് വാങ്കഡെയില്‍ ഇംഗ്ലണ്ടിനെതിരെയും. ബുമ്രയും അര്‍ഷദീപും ഹാര്‍ദിക്കും അക്ഷര്‍ പട്ടേലും അടങ്ങുന്ന ബോളിംഗ് നിരയും ന്യൂസിലൻഡിനു വലിയ വെല്ലുവിളിയാണ്.സ്പിന്നര്‍ വരുണ്‍ ചക്രവര്‍ത്തിയുടെ പ്രകടനം മാത്രമാണ് ഇന്ത്യക്ക് ആശങ്ക.വിജയത്തിൽ കുറഞ്ഞതൊന്നും ന്യൂസിലൻഡും ലക്ഷ്യമിടുന്നില്ല. 2015നുശേഷം രാജ്യാന്തര ടൂർണമെന്‍റിൽ അഞ്ചാംതവണ കലാശപ്പോരിനിറങ്ങുന്നതുതന്നെ കിവികളുടെ സ്ഥിരത വ്യക്തമാക്കുന്നു. കോല്‍ക്കത്തയിലെ ഈഡനിൽ സെമിയില്‍ ദക്ഷിണാഫ്രിക്കയ്ക്കെതിരേ 33 പന്തില്‍ സെഞ്ചുറി നേടിയ ഫിന്‍ അലന്‍റെ നേതൃത്വത്തിലുള്ള ബാറ്റിംഗ് നിര തന്നെയാണ് എതിരാളികളുടെ കരുത്ത്. 2019ല്‍ മാഞ്ചസ്റ്ററില്‍ നടന്ന ഐസിസി ഏകദിന ലോകകപ്പ് സെമിഫൈനലിലും 2021ല്‍ സതാംപ്ടണില്‍ നടന്ന ഐസിസി വേള്‍ഡ് ടെസ്റ്റ് ചാമ്പ്യന്‍ഷിപ്പ് ഫൈനലിലും ഇന്ത്യയെ തോൽപ്പിച്ചതിന്‍റെ ആത്മവിശ്വാസവും കീവികൾക്കുണ്ട്.

🔹രജിഷ വിജയൻ കേന്ദ്ര കഥാപാത്രമായി ഫെബ്രുവരി 27ന് തിയേറ്ററുകളിൽ എത്തിയ ചിത്രമാണ് ‘മസ്തിഷ്ക മരണം’. റിലീസായി ഒരാഴ്ച പിന്നിടുമ്പോൾ തിയേറ്ററിൽ കാര്യമായ ചനലം ഉണ്ടാക്കാൻ ചിത്രത്തിനാകുന്നില്ലെന്നാണ് പുറത്തുവരുന്ന കണക്കുകൾ പറയുന്നത്. സിനിമാപ്രേമികളിൽ നിന്ന് മികച്ച അവലോകനങ്ങൾ ചിത്രം നേടുന്നുണ്ടെങ്കിലും സാധാരണ പ്രേക്ഷകരെ ആകർഷിക്കുന്നതിൽ ചിത്രം പിന്നോട്ട് പോവുകയാണ്. പുറത്തു വരുന്ന റിപ്പോർട്ടുകൾ പ്രകാരം, റിലീസ് ചെയ്ത് ആദ്യ 7 ദിവസങ്ങൾ പൂർത്തിയാക്കിയ ‘മസ്തിഷ്ക മരണം’ ഇപ്പോൾ ബോക്സ് ഓഫീസിൽ ശരാശരിയിലും താഴെയുള്ള പ്രകടനമാണ് കാഴ്ചവയ്ക്കുന്നത്. ലോകമെമ്പാടുമായി ഏകദേശം മൂന്ന് കോടിയോടടുത്ത് കളക്ഷൻ ‘മസ്തിഷ്ക മരണം നേടിയെന്നാണ് ട്രേഡ് വിദഗ്ധരുടെ ഏറ്റവും പുതിയ അപ്‌ഡേറ്റുകൾ സൂചിപ്പിക്കുന്നത്. കേരളത്തിൽ നിന്ന് ഏകദേശം 2.03 കോടി രൂപയുടെ ഗ്രോസ് കളക്ഷൻ നേടിയതായി റിപ്പോർട്ടുണ്ട്. കർണാടകയിൽ നിന്ന് ഏകദേശം 12.50 ലക്ഷം രൂപയും തമിഴ്‌നാട്ടിൽ നിന്ന് 7.60 ലക്ഷം രൂപയും തെലുങ്കാന – ആന്ധ്ര സംസ്ഥാനങ്ങളിൽ നിന്ന് 2.80 കോടി രൂപയും ഇന്ത്യയുടെ മറ്റ് ബോക്‌സ് ഓഫീസിൽ നിന്ന് 4.50 ലക്ഷം രൂപയും ഇതുവരെ നേടിയിട്ടുണ്ട്. ചിത്രത്തിന്റെ ആഭ്യന്തര കളക്ഷൻ ഇപ്പോൾ 2.30 കോടി രൂപയാണ്. അതേസമയം വിദേശ ബോക്സ് ഓഫീസ് കളക്ഷൻ വെറും 52.82 ലക്ഷം രൂപയാണ്. സിനിമയുടെ ലോകമെമ്പാടുമുള്ള ബോക്സ് ഓഫീസ് കളക്ഷൻ 5 കോടിയിൽ താഴെയാകുമെന്നാണ് പ്രതീക്ഷിക്കുന്നത്. കൃഷാന്ദ് ആണ് ഈ ചിത്രത്തിന്റെ സംവിധായകൻ. പുരുഷ പ്രേതം എന്ന സിനിമയ്ക്ക് ശേഷം കൃഷന്ദ് അണിയിച്ചൊരുക്കിയ ചിത്രമാണിത്. 2046ലെ കൊച്ചിയെ പശ്ചാത്തലമാക്കി സ്വകാര്യതയുടെ അതിരുകടന്ന ലംഘനങ്ങളെ വിമർശിക്കുകയാണ് കൃഷാന്ദ് ഈ സിനിമയിലൂടെ. പാപ്പരാസി മാധ്യമങ്ങളെയും, യൂട്യൂബർമാരെയും, ഓൺലൈൻ ശല്യക്കാരെയും ചിത്രം പരിഹസിക്കുന്നുണ്ട്. രജിഷ വിജയന് പുറമെ നിരഞ്ജ് മണിയന്‍പിള്ള രാജു, സുരേഷ് കൃഷ്ണ, ജഗദീഷ് എന്നിവരും ഈ ചിത്രത്തിൽ പ്രധാന വേഷങ്ങളിലുണ്ട്.

💦 ഗുരുജിയുടെ വാക്കുകൾ

അതിരുകൾ വരയ്ക്കുന്ന യുദ്ധങ്ങൾ എന്നും തോൽപ്പിക്കുന്നത് മനുഷ്യത്വത്തെയാണ്. ബോംബുകൾക്ക് മതമോ ജാതിയോ ഇല്ല, അവയ്ക്ക് ഇല്ലാതാക്കാൻ അറിയുന്നത് ജീവൻ മാത്രമാണ്.
ഓരോ സ്ഫോടനവും തകർക്കുന്നത് കെട്ടിടങ്ങളെ മാത്രമല്ല, ലക്ഷക്കണക്കിന് മനുഷ്യരുടെ സ്വപ്നങ്ങളെയും പ്രതീക്ഷകളെയുമാണ്. അധികാരം നേടാനുള്ള പോരാട്ടത്തിൽ അനാഥമാകുന്നത് നിഷ്കളങ്കരായ കുഞ്ഞുങ്ങളാണ്
നാം ഓർക്കേണ്ടത്: ആയുധങ്ങൾ കൊണ്ട് നേടുന്ന വിജയം താൽക്കാലികമാണ്, പക്ഷേ സമാധാനം കൊണ്ട് നേടുന്നത് തലമുറകളുടെ സുരക്ഷിതത്വമാണ്.
യുദ്ധമില്ലാത്ത ലോകത്തിനായി നമുക്ക് കൈകോർക്കാം.

തയ്യാറാക്കിയത്: കപിൽ ശങ്കർ

123 Likes

📱വാർത്തകൾ ഒറ്റനോട്ടത്തിൽ📱 – 2026 | മാർച്ച് 08 | ഞായർ ✍ കപിൽ ശങ്കർ

💦 ഗുരുജിയുടെ വാക്കുകൾ

തയ്യാറാക്കിയത്: കപിൽ ശങ്കർ

📱വാർത്തകൾ ഒറ്റനോട്ടത്തിൽ📱 – 2026 | മാർച്ച് 09 | തിങ്കൾ ✍ കപിൽ ശങ്കർ

ഫോർഡ് വാഹനങ്ങൾ തിരിച്ചുവിളിക്കുന്നു; റിയർ ക്യാമറയിൽ തകരാർ

ഡെന്റണിൽ പോലീസിനു നേരെ ഇരുമ്പ് വടികൊണ്ട് ആക്രമണത്തിന് മുതിർന്നയാൾ വെടിയേറ്റ് മരിച്ചു.

1 COMMENT

Leave a Reply to Saima sankar Cancel reply

Most Popular

സംസ്ഥാനത്തു കേരപദ്ധതി : ഒരു കോടി രൂപ വിതരണം ചെയ്തു

ഗതാഗതമന്ത്രി കെ ബി ഗണേഷ്‌ കുമാറിനെതിരെ ഡിജിപിക്ക് പരാതി

സംസ്ഥാനത്തെ ടൂറിസ്റ്റ് ബസുകൾക്ക് കർശനമാക്കിയ ഏകീകൃത വെള്ളനിറം പിൻവലിക്കാൻ തീരുമാനം

യുവദമ്പതികളെ വാടക വീട്ടിൽ മരിച്ച നിലയിൽ കണ്ടെത്തി

Recent Comments

EDITOR PICKS

സംസ്ഥാനത്തു കേരപദ്ധതി : ഒരു കോടി രൂപ വിതരണം ചെയ്തു

ഗതാഗതമന്ത്രി കെ ബി ഗണേഷ്‌ കുമാറിനെതിരെ ഡിജിപിക്ക് പരാതി

സംസ്ഥാനത്തെ ടൂറിസ്റ്റ് ബസുകൾക്ക് കർശനമാക്കിയ ഏകീകൃത വെള്ളനിറം പിൻവലിക്കാൻ തീരുമാനം

POPULAR POSTS

രാജ്യത്ത് പെട്രോള്‍, ഡീസല്‍ വില വര്‍ധിപ്പിക്കില്ല കേന്ദ്രസര്‍ക്കാർ.

ട്രംപുമായി ഫോണിൽ സംസാരിച്ച് യുഎഇ പ്രസിഡൻ്റ്.

POPULAR CATEGORY

ABOUT US

FOLLOW US