ദുബായ്: ട്വന്റി-20 ലോകകപ്പിലെ തകര്പ്പന് പ്രകടനത്തിനു പിന്നാലെ ഐസിസി റാങ്കിങ്ങിലും നേട്ടം കൊയ്ത് സഞ്ജു സാംസണ്. ലോകകപ്പിനു പിന്നാലെ പുറത്തുവന്ന റാങ്കിങ്ങില് 22-ാം സ്ഥാനത്താണ് സഞ്ജു. താരത്തിന്റെ കരിയറിലെ ഏറ്റവും മികച്ച റാങ്കാണിത്. 18 സ്ഥാനങ്ങള് മെച്ചപ്പെടുത്തിയാണ് സഞ്ജു ഐസിസി റാങ്കിങ്ങിലെ 22-ാം നമ്പര് ബാറ്ററായത്. 637 എന്ന മികച്ച റേറ്റിങ് പോയന്റോടെയാണ് താരം 22-ാം റാങ്കിലെത്തിയിരിക്കുന്നത്.
ലോകകപ്പിന് മുമ്പ് ന്യൂസിലന്ഡിനെതിരായ പരമ്പരയില് വെറും 46 റണ്സ് മാത്രമാണ് സഞ്ജുവിന് നേടാനായിരുന്നത്. ഇതോടെ താരം 65-ാം സ്ഥാനത്തായിരുന്നു. എന്നാല് ലോകകപ്പില് തുടര്ച്ചയായി മൂന്ന് കളികളില് അര്ധ സെഞ്ചുറിയുമായി തിളങ്ങിയതോടെ സഞ്ജു 43 സ്ഥാനങ്ങള് മെച്ചപ്പെടുത്തി.
ലോകകപ്പില് അഞ്ചു കളികളില് നിന്ന് 321 റണ്സ് നേടിയ സഞ്ജു ടൂര്ണമെന്റിലെ താരമായി തിരഞ്ഞെടുക്കപ്പെട്ടിരുന്നു.അതേസമയം ഫൈനലില് തകര്ത്തടിച്ച അഭിഷേക് ശര്മ ബാറ്റിങ് റാങ്കിങ്ങില് ഒന്നാം സ്ഥാനം നിലനിര്ത്തി. ലോകകപ്പില് 317 റണ്സുമായി ഇന്ത്യന് റണ്വേട്ടക്കാരില് രണ്ടാമനായ ഇഷാന് കിഷന് രണ്ട് സ്ഥാനങ്ങള് മെച്ചപ്പെടുത്തി രണ്ടാം റാങ്കിലെത്തി.
