🌹 “ഇന്നത്തെ ചിന്താവിഷയം” 🌹 – 2024 | ഒക്ടോബർ 28 | തിങ്കൾ ✍ പ്രൊഫസ്സർ എ.വി. ഇട്ടി മാവേലിക്കര

പ്രലോഭനങ്ങളിൽ വീഴാതെ യാത്ര ചെയ്യാൻ ആകട്ടെ
—————————————————————————

നഗരത്തിൽ ഉപരി പഠനത്തിനെത്തിയതായിരുന്നു ഒരു ഗ്രാമീണ കൃഷിക്കാരൻ്റെ മകൻ. മറ്റുള്ളവരുടെ ആഡംബര ജീവിതവും, ധാരാളിത്വവും കണ്ട് അവനു ഭയമായി. അവൻ അച്ഛനെഴുതി: “ഞാൻ ഇവിടെ നിൽക്കുന്നത് അപകടമാണ്. എനിക്ക്, എന്നെത്തന്നെ നിയന്ത്രിക്കാനാകുന്നില്ല”. അവധിയെടുത്തു വീട്ടിൽ വന്ന മകൻ്റെ കയ്യിൽ, അച്ഛൻ ഒരു ഫോട്ടോ കൊടുത്തു: പാടത്ത് ചേറിൽ പണിയെടുക്കുന്ന അവൻ്റെ അച്ഛൻ്റെ പടം.
എന്നിട്ട് അദ്ദേഹം അവനോടു പറഞ്ഞു: “നിനക്കു വഴിതെറ്റുന്നു എന്നു തോന്നുമ്പോൾ, നീ ഈ പടത്തിൽ നോക്കണം”. പിന്നീടൊരിക്കലും അവന്, അവനേത്തന്നെ
അവിശ്വസിക്കേണ്ടി വന്നിട്ടില്ല.

വഴുതി വീഴാതിരിക്കാൻ പ്രേരകമായ ചില കാര്യങ്ങളാണു്ണ് നമ്മുടെ ജീവിതത്തിൻ്റെ ഗതി നിയന്ത്രിക്കേണ്ടത്. എത്ര തളർന്നാലും പിടിച്ചു നിൽക്കാതിരിക്കാനാവില്ല എന്ന തിരിച്ചറിവാണ്, ഏതു പ്രലോഭനത്തേയും അതിജീവിക്കാൻ സഹായിക്കുന്നത്. തുടരാനുള്ള കാരണം, തകരാനുള്ള കാരണത്തേക്കാൾ ശക്തമാകണം. ആ കാരണം, എല്ലായ്പോഴും മുന്നിലുണ്ടായിരിക്കണം. സഞ്ചാരപഥങ്ങൾ തെറ്റിപ്പോകുന്നത് മുന്നോട്ടുള്ള വഴിയുടെ തെളിമ നഷ്ടപ്പെടുന്നതിനാലാണ്.

വഴിതെറ്റി എന്ന തിരിച്ചറിവാണ് മടങ്ങിവരവിലേക്കുള്ള ആദ്യപടി. തെറ്റിപ്പോയ പലരും, തെറ്റായ വഴികളിൽത്തന്നെ തുടരുന്നത്, തങ്ങൾക്കു വഴിതെറ്റി എന്നു മനസ്സിലാക്കാൻ കഴിയാത്തതിനാലാണ്. “എന്നെ നോക്കി യാത്ര ചെയ്യൂ എന്നു പറയാൻ കഴിയുന്നതാകും” ഒരാളുടെ ആത്മവിശ്വാസത്തിൻ്റെ പരകോടി. വഴി തെറ്റാതിരിക്കാനായി എപ്പോഴും കൂടെ നടക്കുന്നവരല്ല യഥാർത്ഥ വഴികാട്ടികൾ. തനിച്ചു പറക്കാനുള്ള ഉൾക്കരുത്തു നൽകി,
അദൃശ്യ സാന്നിദ്ധ്യമായി ഒപ്പം നിൽക്കുന്നവരായിരിക്കും അവർ.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര