പശ്ചിമേഷ്യയിലെ അമേരിക്കന് സൈനിക കേന്ദ്രങ്ങള്ക്ക് നേരെ ഇറാന് നടത്തിയ പ്രത്യാക്രമണങ്ങളില് 200-ലധികം യുഎസ് സൈനികര് കൊല്ലപ്പെട്ടതായി ഇറാന് സൈനിക വക്താവ്. മേഖലയിലെ വിവിധ രാജ്യങ്ങളിലുള്ള അമേരിക്കന് താവളങ്ങളെ ലക്ഷ്യം വെച്ചായിരുന്നു ഇറാന്റെ മിസൈല്-ഡ്രോണ് പ്രഹരങ്ങള്.
ഇറാന്റെ ആക്രമണങ്ങളില് ഇരുന്നൂറിലധികം അമേരിക്കന് സൈനികര്ക്ക് ജീവാപായമോ ഗുരുതരമായ പരിക്കോ സംഭവിച്ചതായി ഇറാന് സായുധ സേനയുടെ വക്താവ് ശനിയാഴ്ച ഔദ്യോഗികമായി പ്രസ്താവിച്ചു. ബഹ്റൈന്, കുവൈത്ത്, ഖത്തര്, സൗദി അറേബ്യ എന്നിവിടങ്ങളിലെ പ്രധാന യുഎസ് താവളങ്ങള് ഇറാന്റെ ബാലിസ്റ്റിക് മിസൈലുകളുടെയും ചാവേര് ഡ്രോണുകളുടെയും ലക്ഷ്യമായി.
കുവൈത്തിലെ അലി അല്-സലേം എയര് ബേസില് മാത്രം നിരവധി സൈനികര് കൊല്ലപ്പെട്ടതായി നേരത്തെ റിപ്പോര്ട്ടുകള് വന്നിരുന്നു. അമേരിക്ക തങ്ങളുടെ ഭാഗത്തുണ്ടായ നാശനഷ്ടങ്ങള് കുറച്ചുകാണിക്കുകയാണെന്നും യഥാര്ത്ഥ മരണസംഖ്യ ഇനിയും ഉയര്ന്നേക്കാമെന്നും ഇറാന് വക്താവ് അവകാശപ്പെട്ടു. പരിക്കേറ്റ സൈനികരെ മേഖലയിലെ താവളങ്ങളില് നിന്ന് രഹസ്യമായി മാറ്റുന്നതായും അദ്ദേഹം കൂട്ടിച്ചേര്ത്തു. ഇറാന് പരമാധികാരത്തിന് നേരെ അമേരിക്കയും ഇസ്രയേലും നടത്തുന്ന ആക്രമണങ്ങള്ക്ക് തക്കതായ മറുപടി നല്കുന്നത് തുടരുമെന്ന് ഇറാന് ആവര്ത്തിച്ചു. ‘ഓപറേഷന് ട്രൂ പ്രോമിസി’ന്റെ ഭാഗമായാണ് ഈ പ്രത്യാക്രമണങ്ങള് നടക്കുന്നത്.
അതേസമയം, ഇറാന്റെ അവകാശവാദത്തെക്കുറിച്ച് പെന്റഗണ് ഇതുവരെ ഔദ്യോഗികമായി പ്രതികരിച്ചിട്ടില്ല. അമേരിക്കന് സൈനിക താവളങ്ങള്ക്ക് വലിയ തോതിലുള്ള നാശനഷ്ടങ്ങള് സംഭവിച്ചതായി വ്യക്തമാക്കുന്ന ഉപഗ്രഹ ദൃശ്യങ്ങള് കഴിഞ്ഞ ദിവസം പുറത്തുവന്നിരുന്നു.
