📱വാർത്തകൾ ഒറ്റനോട്ടത്തിൽ📱 – 2026 | മാർച്ച് 03 | ചൊവ്വ ✍ കപിൽ ശങ്കർ

🔹പശ്ചിമേഷ്യയിൽ വർധിച്ചുവരുന്ന സംഘർഷങ്ങളെക്കുറിച്ചും ഇന്ത്യക്കാരുടെ സുരക്ഷ, തന്ത്രപരമായ കാര്യങ്ങൾ എന്നിവ സംബന്ധിച്ചും കേന്ദ്രമന്ത്രിസഭയുടെ സുരക്ഷാകാര്യ സമിതി ചർച്ച നടത്തി.ഇറാനിലും ഇസ്രയേലിലും ഗൾഫ് രാജ്യങ്ങളിലുമുള്ള ഇന്ത്യൻ പൗരന്മാരെ സംരക്ഷിക്കുന്നതിനുള്ള നടപടികളും പ്രധാനമന്ത്രി നരേന്ദ്ര മോദിയുടെ അധ്യക്ഷതയിൽ നടന്ന ഉന്നതയോഗം ചർച്ച ചെയ്തു. എന്നാൽ രക്ഷാനടപടികളെന്തെന്നു സർക്കാർ വെളിപ്പെടുത്തിയില്ല.സ്ഥിതിഗതികൾ സൂക്ഷ്മമായി നിരീക്ഷിക്കുന്നുണ്ടെന്നും പ്രവാസി ഇന്ത്യക്കാരുടെ സുരക്ഷ സംബന്ധിച്ചു മേഖലയിലെ രാജ്യങ്ങളുമായി ബന്ധപ്പെട്ടിട്ടുണ്ടെന്നും പ്രധാനമന്ത്രി മോദി വിശദീകരിച്ചു. മേഖലയിലെ എല്ലാ ഇന്ത്യൻ പൗരന്മാരുടെയും സുരക്ഷ ഉറപ്പാക്കാൻ എല്ലാ രാജ്യങ്ങളുമായും അടുത്തു പ്രവർത്തിക്കുന്നു എന്നാണു മോദി പറഞ്ഞത്.ഗൾഫ് രാജ്യങ്ങളിലുള്ള ഇന്ത്യൻ വിദ്യാർഥികളുടെ പരീക്ഷകളുടെ സ്ഥിതി, വിമാനയാത്രക്കാരുടെ പ്രശ്നങ്ങൾ, ജോലികളിലും ബിസിനസുകളിലുമുള്ള പ്രവാസികളുടെ സുരക്ഷ തുടങ്ങിയവയും സാന്പത്തിക, വാണിജ്യ പ്രതിസന്ധിയും കേന്ദ്രമന്ത്രിസഭാ സമിതി അവലോകനം ചെയ്തു. ഇന്ത്യൻ പൗരന്മാരെ സഹായിക്കാൻ ആവശ്യമായതും പ്രായോഗികവുമായ നടപടികൾ സ്വീകരിക്കാൻ ബന്ധപ്പെട്ട വകുപ്പുകളോട് മന്ത്രിസഭ നിർദേശിച്ചു.ഇതിനിടെ, ഇറാന്‍റെ കൊല്ലപ്പെട്ട പരമോന്നത നേതാവ് ഖമനെയ്‌യുമായുള്ള ഇന്ത്യയുടെ ബന്ധം മോശമായിരുന്നുവെന്ന് കേന്ദ്ര വിദേശകാര്യ മന്ത്രാലയം സൂചിപ്പിച്ചു.

🔹പശ്ചിമേഷ്യയിൽ സംഘർഷം തുടരുന്നതിനിടെ പ്രധാനമന്ത്രി നരേന്ദ്ര മോദിയുമായി ഫോണിൽ സംസാരിച്ചതായി സ്ഥിരീകരിച്ച് ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹു. ഇന്ത്യൻ ജനതയോട് ഏറെ ബഹുമാനമുണ്ടെന്നും നെതന്യാഹു പറഞ്ഞു.ഇസ്രയേലിൽ ഇറാന്‍റെ മിസൈൽ ആക്രമണമുണ്ടായ സ്ഥലം സന്ദർശിക്കുന്നതിനിടെയാണ് നരേന്ദ്ര മോദിയുമായുള്ള സംഭാഷണത്തെ കുറിച്ച് നെതന്യാഹു മാധ്യമങ്ങളെ അറിയിച്ചത്. മോദിയെ അടുത്ത സുഹൃത്തെന്നാണ് ഇസ്രയേൽ പ്രധാനമന്ത്രി വിശേഷിപ്പിച്ചത്.ഇസ്രയേലിനും ജൂത ജനതയ്ക്കും ഒപ്പം നിൽക്കുന്നതിന് അദ്ദേഹം മോദിയോട് നന്ദി അറിയിച്ചു. ഇന്ത്യൻ പ്രധാനമന്ത്രിയുമായി ദീർഘനേരം സംസാരിച്ചതായും മറ്റു പ്രാദേശിക നേതാക്കളുമായി ചർച്ചകൾ തുടരുകയാണെന്നും നെതന്യാഹു കൂട്ടിച്ചേർത്തു.ബെഞ്ചമിൻ നെതന്യാഹുവിനെ ഫോണിൽ ബന്ധപ്പെട്ടതായും, സംഘർഷത്തിൽ ആശങ്ക അറിയിച്ചതായും നേരത്തെ നരേന്ദ്ര മോദി വ്യക്തമാക്കിയിരുന്നു. സംഘർഷ സാഹചര്യത്തിൽ സാധാരണക്കാരുടെ ജീവന് മുൻഗണന നൽകണമെന്നും മോദി ആവശ്യപ്പെട്ടിരുന്നു.

🔹യുദ്ധം ഒന്നിനും പരിഹാരമല്ലെന്നും അത് മാനവികതയ്ക്ക് തീരാനഷ്ടങ്ങൾ മാത്രമാണ് സമ്മാനിക്കുന്നതെന്നും യാക്കോബായ സഭയുടെ ശ്രേഷ്ഠ കാതോലിക്ക ബസേലിയോസ് ജോസഫ് ബാവ. ലോകസമാധാനത്തിനു ഭീഷണിയുയർത്തുന്ന പശ്ചിമേഷ്യൻ യുദ്ധസാഹചര്യങ്ങൾ ആശങ്കയുണർത്തുന്നു.സമാധാനംകൊണ്ട് നേടുന്ന വിജയമാണ് ശാശ്വതം. ഗൾഫ് രാജ്യങ്ങളിലും പശ്ചിമേഷ്യയുടെ വിവിധ ഭാഗങ്ങളിലും കഴിയുന്ന ലക്ഷക്കണക്കിന് പ്രവാസികളുടെയും വിശ്വാസി സമൂഹത്തിന്‍റെയും സുരക്ഷയിൽ സഭയ്ക്ക് വലിയ ഉത്കണ്ഠയുണ്ട്.
ഇവിടങ്ങളിൽ ജോലി ചെയ്യുന്നവരും അവരുടെ കുടുംബങ്ങളും സഭാംഗങ്ങളും വലിയ മാനസിക പ്രയാസത്തിലൂടെയാണ് കടന്നുപോകുന്നത്. ഈ പ്രതിസന്ധി ഘട്ടത്തിൽ അവരെയെല്ലാം പ്രത്യേകമായി ഓർത്ത് പ്രാർഥിക്കണം.
സഭയുടെ എല്ലാ പള്ളികളിലും ലോകസമാധാനത്തിനായി പ്രത്യേക പ്രാർഥനകൾ നടത്തണമെന്നും ശ്രേഷ്ഠ ബാവ ആഹ്വാനം ചെയ്തു.

🔹ഇന്ന് ആറ്റുകാൽ പൊങ്കാല.രാവിലെ 9:45ന് പൊങ്കാലയുടെ അടുപ്പുവെട്ട് ചടങ്ങുകൾ ആരംഭിച്ചു. നേരത്തെ തന്നെ നഗരത്തിന്‍റെ വിവിധ ഭാഗങ്ങളിൽ സ്ത്രീകൾ‌ ഇഷ്ടിക നിരത്തി സ്ഥാനം ഉറപ്പിച്ചിരുന്നു. ഉച്ചയ്ക്ക് 2.15ന് ആണ് പൊങ്കാല നിവേദിക്കുന്നത്. ചന്ദ്രഗ്രഹണമായതിനാൽ ഉച്ച കഴിഞ്ഞ് 3.10 മുതൽ രാത്രി ഏഴ് വരെ ക്ഷേത്ര ദർശനം ഉണ്ടാകില്ല.
രാത്രി 8.30 ന് കുത്തിയോട്ട ബാലന്മാരെ ചൂരൽക്കുത്ത് ചടങ്ങ് നടക്കും. തുടർന്ന് രാത്രി 10.45 ന് മണക്കാട് ധർമശാസ്താ ക്ഷേത്രത്തിലേക്ക് ദേവിയുടെ എഴുന്നള്ളത്തു പുറപ്പെടും. ആറ്റുകാൽ പൊങ്കാലയുടെ പശ്ചാത്തലത്തിൽ ഇന്ന് തിരുവനന്തപുരത്ത് പ്രാദേശിക അവധി പ്രഖ്യാപിച്ചിട്ടുണ്ട്.നഗരത്തിൽ ഗതാഗത നിയന്ത്രണമുണ്ടാകും. സംസ്ഥാനത്ത് ചൂട് കൂടുന്ന സാഹചര്യത്തിൽ പൊങ്കാലയ്ക്ക് എത്തുവർ നിർദേശങ്ങൾ പാലിക്കണമെന്ന് ആരോഗ്യവകുപ്പ് അറിയിച്ചിട്ടുണ്ട്. പൊങ്കാല കഴിഞ്ഞ് മടങ്ങുന്നവർക്കായി അധിക ട്രെയിനുകൾ സർവീസ് നടത്തുമെന്ന് റെയിൽവേ അധികൃതർ അറിയിച്ചു. കെഎസ്ആർടിസിയും പ്രത്യേക സർവീസുകൾ ഏർപ്പെടുത്തിയിട്ടുണ്ട്.

🔹എസ്എസ്എൽസി പരീക്ഷയ്ക്കുള്ള ഒരുക്കങ്ങൾ പൂർത്തിയായി. കേരളത്തിലും ഗൾഫിലും ലക്ഷദ്വീപിലുമായുള്ള 3,047 പരീക്ഷാ കേന്ദ്രങ്ങളിലായി 4,18,516വിദ്യാർഥികളാണ് പരീക്ഷയ്ക്കായി രജിസ്റ്റർ ചെയ്തിരിക്കുന്നത്. ഈ മാസം അഞ്ചു മുതലാണ് പരീക്ഷ.ഉത്തരക്കടലാസുകളുടെ വിതരണം പൂർത്തിയായി. ചോദ്യപേപ്പർ 41 ജില്ലാ വിദ്യാഭ്യാസ ഓഫീസുകളിലും എത്തിച്ചതായി വിദ്യാഭ്യാസ മന്ത്രി വി. ശിവൻകുട്ടി അറിയിച്ചു. പരീക്ഷയ്ക്ക് ആവശ്യമായ ചീഫ് സൂപ്രണ്ട്, ഡെപ്യൂട്ടി ചീഫ് സൂപ്രണ്ട് എന്നിവരുടെ നിയമനം പൂർത്തീകരിച്ചു.
എസ്എസ്എൽസി പരീക്ഷയുടെ ഇൻവിജിലേഷൻ ജോലിക്കായുള്ളത് 26,000 അധ്യാപകരാണ്. ഈ മാസം 30ന് എസ്എസ്എൽസി പരീക്ഷ പൂർത്തിയാക്കിയശേഷം ഏപ്രിൽ ഏഴിന് മൂല്യനിർണയം ആരംഭിച്ച് 28ന് പൂർത്തിയാക്കും. മേയ് മൂന്നാംവാരത്തിനുള്ളിൽ ഫലപ്രഖ്യാപനം നടത്തും.

🔹മാന്നാറിൽ പിതാവ് വിഷം നൽകിയ പെണ്‍കുട്ടികളിൽ ഒരാൾ മരിച്ചു. ശിവനന്ദന (12) ആണ് മരിച്ചത്. ഇളയ മകൾ ശിവ കീർത്തന ആശുപത്രിയിൽ തുടരുകയാണ്.സംഭവത്തിൽ മാന്നാർ പോലീസ് അസ്വഭാവിക മരണത്തിന് കേസെടുത്തിരുന്നു. ശിവഗംഗ ആറാം ക്ലാസിലും ശിവ കീർത്തന രണ്ടാം ക്ലാസിലുമാണ് പഠിക്കുന്നത്.കഴിഞ്ഞ ദിവസം വൈകിട്ട് രണ്ട് കുട്ടികൾക്കും വിഷം നൽകിയ ശേഷം പിതാവ് മനോജ് ജീവനൊടുക്കുകയായിരുന്നു. സ്‌കൂളില്‍ നിന്ന് വിളിച്ചുകൊണ്ടുവരുന്ന വഴിയാണ് മനോജ് കുട്ടികൾക്ക് കാറിൽവച്ച് ജ്യൂസിൽ വിഷം കലർത്തി നൽകിയത്.സാമ്പത്തിക ബാധ്യതയാണ് സംഭവത്തിന് കാരണമെന്നാണ് പ്രാഥമിക നിഗമനം.കാറിൽ അബോധാവസ്ഥയിൽ പാലത്തിനരികിൽ കിടക്കുന്നത് കണ്ട നാട്ടുകാരാണ് ഇവരെ ആശുപത്രിയിൽ എത്തിച്ചത്. ആശുപത്രിയിൽ എത്തിക്കുന്നതിന് മുമ്പ് തന്നെ മനോജിന്‍റെ മരണം സ്ഥീരികരിച്ചിരുന്നു.

🔹ചേർത്തലയിൽ ടിപ്പർ ലോറിയും കാറും കൂട്ടിയിടിച്ചുണ്ടായ അപകടത്തിൽ രണ്ടുപേർ മരിച്ചു.ചേർത്തല പള്ളിക്കവലയിലാണ് സംഭവം. ആരവ് കൃഷ്ണ(24), നന്ദഗോപാൽ(22) എന്നിവരാണ് മരിച്ചത്.ടിപ്പർ ലോറിയും കാറും നേർക്കുനേർ ഇടിക്കുകയായിരുന്നു. അപകടത്തിന് പിന്നാലെ നാട്ടുകാർ ഇരുവരെയും ആശുപത്രിയിലെത്തിച്ചുവെങ്കിലും മരണംസംഭവിച്ചു.
മൃതദേഹം വണ്ടാനം മെഡിക്കൽ കോളജ് ആശുപത്രിയിൽ. പോസ്റ്റുമോർട്ടത്തിന് ശേഷം മൃതദേഹം ബന്ധുക്കൾക്ക് വിട്ടുനൽകും.

🔹 മുതിർന്ന കോൺഗ്രസ് നേതാവും മുൻ കേന്ദ്രമന്ത്രിയുമായ കെ.പി. ഉണ്ണികൃഷ്‌ണൻ (89) അന്തരിച്ചു. കോഴിക്കോട്ടെ സ്വകാര്യ ആശുപത്രിയിൽ ചികിത്സയിലിരിക്കെ ആയിരുന്നു അന്ത്യം.1989 മുതൽ 1990 വരെ വി.പി.സിംഗ് മന്ത്രിസഭയിൽ ടെലി കമ്യൂണിക്കേഷൻ-ഉപരിതല ഗതാഗത വകുപ്പ് മന്ത്രിയായിരുന്നു.1971ലെ ലോക്‌സഭ തെരഞ്ഞെടുപ്പിൽ കോൺഗ്രസ് സ്ഥാനാർഥിയായി വടകരയിൽ മത്സരിച്ച് വിജയിച്ചതിന് പിന്നാലെ 1991 വരെ തുടർച്ചയായി ആറു തവണ വടകരയിൽ നിന്ന് ലോക്സഭാംഗമായി തെരഞ്ഞെടുക്കപ്പെട്ടിരുന്നു.

🔹മയക്കുമരുന്ന് കേസുകളിലെ പ്രതിയെ വീടിനുള്ളിൽ മരിച്ച നിലയിൽ കണ്ടെത്തി. കൊടുവള്ളിയിലാണ് കളരാന്തിരി കോളികെട്ടിക്കുന്നുമ്മൽ മഹേഷ് കുമാറി(47)നെ മരിച്ച നിലയിൽ കണ്ടെത്തിയത്.വീട്ടിൽ നിന്നും ദുർഗന്ധം വമിച്ചതിനെ തുടർന്ന് നടത്തിയ തിരച്ചിലിൽ മഹേഷ് കുമാറിന്‍റെ മൃതദേഹം ബെഡ് റൂമിൽ നിന്ന് കണ്ടെത്തിയത്. ഇയാൾ ഒറ്റയ്ക്കാണ് വീട്ടിൽ താമസം.

🔹ആവശ്യത്തിനു ഡോക്ടർമാരില്ലാത്തതിനാൽ തൃശൂർ ജനറൽ ആശുപത്രിയിലെ ഈവനിംഗ് ഒപി നിർത്തിവച്ച് അധികൃതർ. ഇനിയൊരു അറിയിപ്പ് ഉണ്ടാകുന്നതുവരെ ഉച്ചയ്ക്കുശേഷം രണ്ടുമുതൽ രാത്രി എട്ടുവരെയുള്ള ഒപി ഉണ്ടായിരിക്കില്ലെന്ന് ആശുപത്രിയിൽ നോട്ടീസ് പതിച്ചിട്ടുണ്ട്. ഇതോടെ ജില്ലയുടെ വിവിധ ഭാഗങ്ങളിൽനിന്ന് എത്തുന്ന രോഗികൾ ദുരിതത്തിലായി.തൃശൂർ മെഡിക്കൽ കോളജ് കഴിഞ്ഞാൽ ഏറ്റവുമധികം രോഗികൾ ആശ്രയിക്കുന്ന ഇടമാണു തൃശൂർ ജനറൽ ആശുപത്രി. വിവിധ സമയങ്ങളിലായി ആറു ഡോക്ടർമാരുടെ സേവനം ആവശ്യമായ കാഷ്വാലിറ്റിയിൽ നിലവിൽ രണ്ടു ഡോക്ടർമാരാണുള്ളത്. കഴിഞ്ഞയാഴ്ചവരെ നാലു ഡോക്ടർമാർ ഉണ്ടായിരുന്നു. ഇതിൽ രണ്ടു ഡോക്ടർമാർക്കൂടി സ്ഥലം മാറിപ്പോയതോടെ ഒപി പ്രവർത്തനം പ്രതിസന്ധിയിലാവുകയായിരുന്നു.

🔹ന്യൂഡൽഹിയിലെ ഛത്തീസ്ഗഡ് സദനിലെ കാന്‍റീൻ കോൺട്രാക്ടറായ അനുരൂപ് ഗുപ്തയെ (48) തട്ടിക്കൊണ്ടുപോയി കൊലപ്പെടുത്തി ശരീരഭാഗങ്ങൾ യമുനാ നദിയിൽ തള്ളിയ സംഭവത്തിൽ നാലുപേരെ പോലീസ് അറസ്റ്റ് ചെയ്തു. സ്വർണാഭരണങ്ങൾ കവരാൻ വേണ്ടിയാണ് പ്രതികൾ ഈ ക്രൂരകൃത്യം ചെയ്തത്.ദ്വാരക സ്വദേശിയായ അനുരൂപ് ഗുപ്തയെ ഫെബ്രുവരി 23-നാണ് കാണാതായത്. ധാരാളം സ്വർണാഭരണങ്ങൾ ധരിക്കുന്ന ശീലമുണ്ടായിരുന്ന ഇദ്ദേഹത്തെ സ്വർണം തട്ടിയെടുക്കുക എന്ന ലക്ഷ്യത്തോടെ പ്രതികൾ ചതിയിൽപ്പെടുത്തുകയായിരുന്നു. മുഖ്യപ്രതിയായ സൂരജ് ഒരു വിരുന്നിനെന്ന വ്യാജേന അനുരൂപിനെ ഉത്തം നഗറിലെ തന്‍റെ വീട്ടിലേക്ക് ക്ഷണിച്ചു.
അവിടെവെച്ച് അനുരൂപിനെ കെട്ടിയിട്ട് മർദ്ദിക്കുകയും സ്വർണാഭരണങ്ങൾ കവരുകയും ചെയ്തു. കൂടുതൽ പണം ആവശ്യപ്പെട്ടെങ്കിലും നൽകാത്തതിനെത്തുടർന്ന് വെട്ടി കൊലപ്പെടുത്തുകയായിരുന്നു. കൊലപാതകത്തിന് ശേഷം മൃതദേഹം കഷ്ണങ്ങളാക്കി മുറിച്ച് മൂന്ന് പ്ലാസ്റ്റിക് ബാഗുകളിലാക്കി. തുടർന്ന് അനുരൂപിന്‍റെ തന്നെ കാറിൽ മൃതദേഹഭാഗങ്ങൾ വൃന്ദാവനിലെ യമുനാ നദിയിൽ കൊണ്ടുപോയി തള്ളി.അനുരൂപ് ജീവിച്ചിരിപ്പുണ്ടെന്ന് വരുത്തിത്തീർക്കാൻ പ്രതികൾ അദ്ദേഹത്തിന്‍റെ ഫോൺ ഉപയോഗിച്ച് വാട്സ്ആപ്പ് സന്ദേശങ്ങൾ അയക്കുകയും പഴയ ചിത്രങ്ങൾ സ്റ്റാറ്റസ് ആയി പങ്കുവെക്കുകയും ചെയ്തു. കാണാതായ രാത്രിയിൽ അനുരൂപ് ഒരു റാപ്പിഡോ ബൈക്കിൽ സൂരജിന്‍റെ വീട്ടിലേക്ക് പോയതാണ് കേസിൽ നിർണായകമായത്.സിസിടിവി ദൃശ്യങ്ങളും ടോൾ പ്ലാസ വിവരങ്ങളും കേന്ദ്രീകരിച്ച് നടത്തിയ അന്വേഷണത്തിനൊടുവിൽ ഫെബ്രുവരി 28-ന് യമുനയിൽ നിന്ന് മൃതദേഹഭാഗങ്ങൾ കണ്ടെടുത്തു. സൂരജ് (29 ), രാഖി (21), ഭൂപേന്ദർ (27 ), ബൽറാം (28 ) എന്നിവരാണ് അറസ്റ്റിലായത്. നീരജ് എന്ന ഒരാൾ കൂടി ഈ സംഘത്തിലുണ്ടെന്നും ഇയാൾക്കായി തിരച്ചിൽ തുടരുകയാണെന്നും പോലീസ് അറിയിച്ചു.

🔹ഇസ്രയേൽ – ഇറാൻ സംഘർഷത്തെ തുടർന്ന് നെടുമ്പാശ്ശേരിയിൽ നിന്നും ഗൾഫ് രാജ്യങ്ങളിലേക്കുള്ള 25 വിമാന സർവീസുകൾ റദ്ദാക്കി. നെടുമ്പാശ്ശേരിയിലേക്കുള്ള 24 സർവീസുകളും റദ്ദാക്കിയിട്ടുണ്ട്. മസ്കറ്റ് – കൊച്ചി – മസ്കറ്റ് സർവീസ്
എയർ ഇന്ത്യ എക്സ്പ്രസ് ഇന്നുമുതൽ പുനഃരാരംഭിക്കും.
അതേസമയം, ഷാര്‍ജ എയര്‍പോര്‍ട്ട് തുറന്നു. ഭാഗികമായി വിമാന സര്‍വീസുകള്‍ പുനഃരാരംഭിച്ചിട്ടുണ്ട്. നേരത്തെ ടിക്കറ്റ് ബുക്ക് ചെയ്ത യാത്രക്കാര്‍ എയര്‍ലൈനുകളുമായി ബന്ധപ്പെടണമെന്ന് എയര്‍ പോര്‍ട്ട് അതോറിറ്റി അറിയിച്ചു. പ്രാദേശിക സംഭവവികാസങ്ങളുടെ പശ്ചാത്തലത്തിൽ ഒമാൻ, കുവൈത്ത്, ദുബായ്, അബുദാബി, ദോഹ, ബഹ്റൈൻ, മോസ്കോ, പെഷാവർ എന്നിവിടങ്ങളിലേക്കും അവിടങ്ങളിൽ നിന്ന് വരുന്ന വിമാന സർവീസുകൾ റദ്ദാക്കിയ നടപടി മാർച്ച് 4 വരെ നീട്ടിയതായി സൗദിയ എയർലൈൻ അറിയിച്ചു.

🔹യുദ്ധ സാഹചര്യം നിലനിന്നതിനെ തുടർന്ന് അബുദാബിയിൽ നിന്നുള്ള വിമാനത്തിൽ എത്തേണ്ടിയിരുന്ന യാത്രക്കാരുമായി ആദ്യ വിമാനം ഇന്ന് കൊച്ചിയിലെത്തി. അതേസമയം, യുദ്ധത്തെ ന്യായീകരിച്ച് അമേരിക്കൻ പ്രസിഡന്റ് ഡൊണാൾഡ് ട്രംപ് രംഗത്തെത്തി. അമേരിക്കയുടെ മുന്നറിയിപ്പുകൾ ഇറാൻ അവഗണിച്ചിരിക്കുകയാണെന്നും, സൈനിക നടപടി ഇനിയും തുടരുമെന്നും ട്രംപ് ആഹ്വാനം ചെയ്തു.
മേഖലയിൽ തുടർന്നു വരുന്ന സംഘർഷം കണക്കിലെടുത്ത് ദോഹയിലെ വിമാനത്താവളം അടച്ചിട്ടിരിക്കുന്ന സാഹചര്യത്തിൽ, ദോഹയിൽ കുടുങ്ങിയവർക്ക് വേണ്ട താമസ ചിലവുകൾ ഖത്തർ ടൂറിസം വഹിക്കുമെന്ന് സ്ഥിരീകരിച്ചു. എയർപോർട്ട് തുറക്കുന്നത് വരെ, ഖത്തറിലെ വിവിധ ഹോട്ടലുകളിൽ താമസിക്കുന്നവരുടെ താമസം നീട്ടിക്കൊടുക്കണമെന്നും, ഫെബ്രുവരി 28-ന് ശേഷമുള്ള അധിക ചിലവുകളും ഖത്തർ ടൂറിസം വഹിക്കുമെന്നും ഹോട്ടൽ അധികൃതർക്ക് അയച്ച കത്തിൽ വ്യക്തമാക്കിയതായി റിപ്പോർട്ട്.

🔹അമേരിക്കയും ഇസ്രയേലും നടത്തിയ വ്യോമാക്രമണങ്ങൾ ഇറാനിലെ ആശുപത്രികളെയും സ്കൂളുകളെയും ബാധിച്ച സാഹചര്യത്തിൽ, അന്താരാഷ്ട്ര നടപടിക്കും ഐക്യദാർഢ്യത്തിനും ആഹ്വാനം ചെയ്ത് ടെഹ്‌റാനിലെ അധികാരികൾ. ഇരു രാജ്യങ്ങളും ആശുപത്രികൾ, സ്കൂളുകൾ, റെഡ് ക്രസന്റ് സൗകര്യങ്ങൾ, സാംസ്കാരിക സ്മാരകങ്ങളെയടക്കം ഒഴിവാക്കാതെ, ജനവാസ മേഖലകളിൽ വിവേചനരഹിതമായി ആക്രമണം തുടരുകയാണ് എന്ന് ഇറാൻ വിദേശകാര്യ മന്ത്രാലയ വക്താവ് എസ്മായിൽ ബഗായ് പറഞ്ഞു.
“അന്താരാഷ്ട്ര ശ്രദ്ധ ആകർഷിക്കുന്ന ഏറ്റവും ഹീനമായ കുറ്റകൃത്യങ്ങൾ അമേരിക്കയും ഇസ്രയേലും ബോധപൂർവ്വം ചെയ്യുകയാണ്. തുടർച്ചയായ ഈ അനീതിയോട് കാണിക്കുന്ന നിസ്സംഗത, നമ്മുടെ ആഗോള സമൂഹം നിലകൊള്ളുന്ന പൊതുവായ മൂല്യങ്ങളെ അപകടത്തിലാക്കുമെന്നും മനുഷ്യരാശിയുടെ ഭാവിയെ കൂടുതൽ ഇരുണ്ടതാക്കുമെന്നും അദ്ദേഹം സോഷ്യൽ മീഡിയയിലെ ഒരു പോസ്റ്റിൽ എഴുതി.
ആശുപത്രികൾ, വീടുകൾ, സ്കൂളുകൾ തുടങ്ങിയ സിവിലിയൻ അടിസ്ഥാന സൗകര്യങ്ങളെ ആക്രമണത്തിൽ നിന്ന് ഒഴിവാക്കണം. മെഡിക്കൽ ജീവനക്കാരെ അവരുടെ ജോലി സുരക്ഷിതമായി ചെയ്യാൻ അനുവദിക്കണമെന്നും ഐസിആർസി പ്രസിഡന്റ് മിർജാന സ്‌പോൾജാറിക് ഒരു പ്രസ്താവനയിൽ പറഞ്ഞു.

🔹ഇറാൻ – ഇസ്രയേൽ സംഘർഷത്തിനിടെ ഇന്ന് പുലർച്ചെ റിയാദിലെ യു എസ് എംബസിക്ക് നേരെ ആക്രമണമണം. രണ്ട് ഡ്രോണുകൾ ഉപയോഗിച്ചാണ് ആക്രമണമുണ്ടായത്. പിന്നാലെ എംബസിയിൽ ചെറിയ തീപിടുത്തമുണ്ടായതായി റിപ്പോർട്ട്. കഴിഞ്ഞ വാരാന്ത്യത്തിൽ ഇറാനെതിരെ അമേരിക്കയും ഇസ്രായേലും സംയുക്തമായി നടത്തിയ ആക്രമണങ്ങൾക്ക് മറുപടിയായി ഗൾഫ് രാജ്യങ്ങളിലെ യുഎസ് സൈനിക കേന്ദ്രങ്ങൾക്ക് നേരെ ഇറാൻ നടത്തിവരുന്ന മിസൈൽ-ഡ്രോൺ ആക്രമണങ്ങളുടെ തുടർച്ചയായാണ് ഈ സംഭവം.ആക്രമണത്തിൽ കെട്ടിടത്തിന് നാശനഷ്ടങ്ങൾ സംഭവിച്ചതായും തീപിടുത്തമുണ്ടായതായും സൗദി പ്രതിരോധ മന്ത്രാലയ വക്താവിനെ ഉദ്ധരിച്ച് എഎഫ്പി റിപ്പോർട്ട് ചെയ്തു. എംബസിയിൽ നിന്ന് വലിയ സ്ഫോടനശബ്ദവും തീയുമുണ്ടായതായി റോയിട്ടേഴ്സ് വാർത്താ ഏജൻസി റിപ്പോർട്ട് ചെയ്തു. ആക്രമണ സമയത്ത് എംബസി കെട്ടിടം ഒഴിഞ്ഞു കിടക്കുകയായിരുന്നതിനാൽ ആർക്കും പരിക്കേറ്റിട്ടില്ല.

🔹ഐസിസി പുരുഷ ട്വന്‍റി-20 ക്രിക്കറ്റ് ലോകകപ്പ് സെമിഫൈനൽ പോരാട്ടങ്ങൾക്കു നാളെ തുടക്കം. അപരാജിതരായി മുന്നേറുന്ന ദക്ഷിണാഫ്രിക്ക ന്യൂസിലൻഡിനെ ആദ്യ സെമിയിൽ നേരിടും.അഞ്ചിന് നടക്കുന്ന രണ്ടാം സെമിയിൽ നിലവിലെ ചാന്പ്യന്മാരായ ഇന്ത്യ ഇംഗ്ലണ്ടിനെ നേരിടും. ജയിക്കുന്ന ടീമുകൾ എട്ടിന് നടക്കുന്ന കലാശപ്പോരാട്ടത്തിൽ ഏറ്റുമുട്ടും. സെമി ഫൈനലിനും കലാശപ്പോരാട്ടത്തിനും ഐസിസി റിസർവ് ദിനം കരുതിയിട്ടുണ്ട്.സൂപ്പർ എട്ട് ഗ്രൂപ്പ് ഒന്നിൽ ഒന്നാം സ്ഥാനക്കാരായാണ് ദക്ഷിണാഫ്രിക്ക സെമിയിൽ പ്രവേശിച്ചത്. ആശങ്കകൾക്കും സമ്മർദങ്ങൾക്കും വിരാമമിട്ട് സഞ്ജു സാംസണിന്‍റെ ഒറ്റയാൾ പോരാട്ടത്തിൽ വെസ്റ്റ് ഇൻഡീസിനെ വീഴ്ത്തി ഇന്ത്യ രണ്ടാം സ്ഥാനം പിടിച്ചു. ഇന്ത്യ സൂപ്പർ എട്ടിൽ ദക്ഷിണാഫ്രിക്കയോട് തോൽവി വഴങ്ങിയിരുന്നു. ദക്ഷിണാഫ്രിക്കയാകട്ടേ പ്രാഥമിക ഗ്രൂപ്പ് ഘട്ടത്തിൽ അഫ്ഗാനിസ്ഥാനോട് രണ്ട് സൂപ്പർ ഓവർ വേണ്ടിവന്ന മത്സരത്തിൽ മാത്രമാണ് വെല്ലുവിളി നേരിട്ടത്.ഗ്രൂപ്പ് രണ്ടിൽ ചാന്പ്യന്മാരായാണ് ഇംഗ്ലണ്ട് സെമിയിൽ ഇന്ത്യയെ നേരിടാൻ എത്തുന്നത്. രണ്ടാം സ്ഥാനക്കാരായ ന്യൂസിലൻഡ് ഗ്രൂപ്പ് ഒന്ന് ചാന്പ്യന്മാരായ ദക്ഷിണാഫ്രിക്കയെ നേരിടും. ക്യാപ്റ്റൻ എയ്ഡൻ മാർക്രമാണ് പ്രോട്ടീസിന്‍റെ വജ്രായുധം. 175.16 ശരാശരിയിൽ റണ്‍സ് വാരുന്ന മാർക്രം നയിക്കുന്ന ടീം സന്തുലിതമാണ്. കഗിസോ റബാഡ നയിക്കുന്ന ബൗളിംഗ് നിര മാർക്കോ യാൻസണ്‍, ലുങ്കി എൻഗിഡി, കേശവ് മഹാരാജ് തുടങ്ങിയവരാൽ സന്പന്നം.ടോപ് ഓർഡർ ബാറ്റർമാരുടെ വീഴ്ച ലോകകപ്പിൽ ഇന്ത്യയെ വലച്ചു. സഞ്ജു സാംസണിന്‍റെ വരവോടെ ടീം ഉയിർത്തെണീറ്റു. തിലക് വർമ ഫോമിലേക്ക് തിരിച്ചെത്തി. സൂര്യകുമാർ യാദവും ഹാർദിക് പാണ്ഡ്യയും ശിവം ദുബെയും തകർത്തടിക്കാൻ സജ്ജം. അഭിഷേകിന്‍റെ ദയനീയ പ്രകടനം ടീമിനെ കുഴയ്ക്കുന്നുണ്ട്. ബുംറയ്ക്കൊപ്പം അർഷ്ദീപ് സിംഗും വരുണ്‍ ചക്രവർത്തിയും ഹാർദിക് പാണ്ഡ്യയും അകസർ പട്ടേലും ചേരുന്നതോടെ ബൗളിംഗിന് മൂർച്ചയുണ്ട്.ഫിൽ സാൾട്ട്, ജോസ് ബട്‌ലർ, ഹാരി ബ്രൂക്ക്, ജേക്കബ് ബെഥേൽ, ടോം ബാന്‍റൺ അടങ്ങുന്ന ഇംഗ്ലണ്ടിന്‍റെ ബാറ്റിംഗ് നിരയ്ക്കൊപ്പം ജോഫ്ര ആർച്ചർ നയിക്കുന്ന ബൗളിംഗ് നിര കൂടിച്ചേരുന്നതോടെ എതിരാളികൾ വിയർക്കും. ന്യൂസിലൻഡും കരുത്തുറ്റ ബാറ്റിംഗ് നിരയും ബൗളിംഗ് നിരയും ചേർന്നതാണ്.

🔹താന്തോന്നി എന്ന ചിത്രത്തിനു ശേഷം ജോർജ് വർഗീസ് സംവിധാനം ചെയ്ത് ബാബുരാജും ബിബിൻ ജോർജും ആദ്യമായി ഒന്നിക്കുന്ന സസ്പെൻസ് ത്രില്ലർ കാറ്റഗറിയിൽ ഒരുങ്ങിയ ചിത്രം ഐസിയു തിയറ്ററുകളിലെത്തി.സിനിമാമേഖലയിൽ 13 വർഷം തികയുന്ന ബിബിൻ വെടിക്കെട്ട് എന്ന ചിത്രത്തിനു ശേഷം പ്രധാന വേഷത്തിൽ എത്തുന്ന സിനിമയാണിത്. മിനി സ്റ്റുഡിയോയുടെ ബാനറിൽ ജെയിൻ പോൾ ആണ് ചിത്രത്തിന്‍റെ നിർമാണം. കഥ, തിരക്കഥ, സംഭാഷണം എന്നിവയൊരുക്കിയിരിക്കുന്നത് സന്തോഷ് കുമാർ.സൂര്യ തമിഴിൽ നിർമിച്ച ഉറിയടി എന്ന സിനിമയിലെ നായിക വിസ്മയ ആണ് ഈ ചിത്രത്തിലെ നായിക. ഗുഡ് ഫെല്ലാസിന്‍റെ ബാനറിലാണ് ചിത്രം തിയറ്ററുകളിൽ എത്തിയത്.മുരളി ഗോപി, ശ്രീകാന്ത് മുരളി, മീര വാസുദേവ്, നവാസ് വള്ളിക്കുന്ന് തുടങ്ങി വലിയൊരു താരനിര തന്നെ ചിത്രത്തിൽ അണിനിരക്കുന്നുണ്ട്. ഛായാഗ്രഹണം- സി. ലോകനാഥൻ, സംഗീതം- ജോസ് ഫ്രാങ്ക്‌ളിൻ, എഡിറ്റിംഗ്- ലിജോ പോൾ, പ്രൊഡക്ഷൻ കൺട്രോളർ- ഷിബു സുശീലൻ, കലാസംവിധാനം- ബാവ, സംഘട്ടനം- മാഫിയ ശശി, കോസ്റ്റ്യൂം ഡിസൈനർ- സ്റ്റെഫി സേവ്യർ, മേക്കപ്പ്- റോണക്സ് സേവ്യർ, സൗണ്ട് ഡിസൈൻ- വിക്കി, കിഷൻ, ശബ്‍ദമിശ്രണം- എം.ആർ. രാജാകൃഷ്ണൻ, മാർക്കറ്റിംഗ്- ബ്രിംഗ് ഫോർത്ത്, പിആർഒ- പി.ശിവപ്രസാദ്.

💦 ഗുരുജിയുടെ വാക്കുകൾ

മറ്റുള്ളവരുടെ ജീവിതവും, ചര്യകളും താരതമ്യപ്പെടുത്താതിരിക്കാന്‍ ശ്രദ്ധിക്കണം. ആരും മറ്റൊരാളെ പോലെ എന്ന് കേള്‍ക്കാന്‍ ഇഷ്ടപ്പെടില്ല. ആര്‍ക്കും മറ്റാരെയും പോലെ ആകാനും സാധിക്കില്ല, മറ്റുള്ളവര്‍ അംഗീകരിച്ചാലും ഇല്ലെങ്കിലും അവരവരുടെ ജീവിതത്തിലെ സൂപ്പര്‍ ഹീറോ അവരവര്‍ തന്നെയാണ്.
നമ്മുടെ ജീവിതത്തിൽ ഏത് നേരവും പരാതി പറഞ്ഞോ, മെസേജ് അയച്ചു കുറ്റപ്പെടുത്തിയോ യാതൊരു മാറ്റവുമുണ്ടാക്കാനാവില്ല. രണ്ടുപേര്‍ക്കും അവരവരുടേതായ പ്രൊഫഷണല്‍ ലൈഫ് ഉണ്ടാവും. സ്വകാര്യ ജീവിതത്തിലേക്ക് അതു കലര്‍ത്താതിരിക്കാന്‍ രണ്ടുപേരും ശ്രദ്ധിക്കുക മാത്രമേ വഴിയുള്ളു.
മറ്റെന്തിനെക്കാളും ഉപരി നല്ലൊരു സൗഹൃദം തമ്മില്‍ സൂക്ഷിക്കണം, കൂട്ടുകാരന്‍ / കൂട്ടുകാരി ആയിരിക്കട്ടെ, എതിര്‍വശത്തുള്ള ഉള്ള ആള്‍. ബൗദ്ധികമായി ഉയര്‍ന്ന അവസ്ഥയിലുള്ള ആള്‍ കൂടെ ആണെങ്കിലോ, പെട്ടെന്നൊരു കാര്യത്തിന് ഉത്തരം കിട്ടാതെ വന്നേക്കാം. മറ്റുള്ളവരോട് അഭിപ്രായം ചോദിക്കേണ്ട അവസ്ഥയും ഉണ്ടാകും. ആ സമയം ബുദ്ധിയും സാമര്‍ത്ഥ്യവും ഒത്തിണങ്ങിയ ഒരാളാണ് കൂടെ എങ്കില്‍ ആ പരിതസ്ഥിതികള്‍ ഒറ്റക്ക് നേരിടാനും, ഒരാള്‍ ഒന്ന് വീഴുമ്പോള്‍ താങ്ങായി നില്‍ക്കാനും സാധിക്കും.

തയ്യാറാക്കിയത്: കപിൽ ശങ്കർ

46 Likes

📱വാർത്തകൾ ഒറ്റനോട്ടത്തിൽ📱 – 2026 | മാർച്ച് 03 | ചൊവ്വ ✍ കപിൽ ശങ്കർ

💦 ഗുരുജിയുടെ വാക്കുകൾ

തയ്യാറാക്കിയത്: കപിൽ ശങ്കർ

🌹 “ഇന്നത്തെ ചിന്താവിഷയം” 🌹 – 2026 | മാർച്ച് 04 | ബുധൻ ✍ പ്രൊഫസ്സർ എ.വി. ഇട്ടി മാവേലിക്കര

ടെക്സസ് പ്രൈമറി തിരഞ്ഞെടുപ്പ്:ഇന്ന് മാർച്ച് 3-ന്

LEAVE A REPLY Cancel reply

Most Popular

ചന്ദ്രഗ്രഹണം: ഇന്ത്യൻ ക്രിക്കറ്റ് ടീം മുംബൈയിലെ പരിശീലന സെഷൻ നീട്ടിവെച്ചു

യുദ്ധഭീതിക്കിടെ വിമാനങ്ങൾ പറന്നുയരുന്നു; കുടുങ്ങിക്കിടന്ന ഇന്ത്യക്കാർ നാട്ടിലേക്ക്.

27 ഇന്ത്യൻ കപ്പലുകൾ നടുക്കടലിൽ, 10000 കോടിയുടെ നഷ്ടമുണ്ടാകും; സഹായം അഭ്യർത്ഥിച്ച് കപ്പലുടമകൾ.

പ്രശ്ന പരിഹാരത്തിനായി പൂജാരിയുടെ വീട്ടിൽ ഇടയ്ക്കിടെ എത്തി 12 പവൻ വരുന്ന സ്വർണാഭരണങ്ങൾ കവർന്ന യുവതി അറസ്റ്റിൽ

Recent Comments

EDITOR PICKS

ചന്ദ്രഗ്രഹണം: ഇന്ത്യൻ ക്രിക്കറ്റ് ടീം മുംബൈയിലെ പരിശീലന സെഷൻ നീട്ടിവെച്ചു

യുദ്ധഭീതിക്കിടെ വിമാനങ്ങൾ പറന്നുയരുന്നു; കുടുങ്ങിക്കിടന്ന ഇന്ത്യക്കാർ നാട്ടിലേക്ക്.

27 ഇന്ത്യൻ കപ്പലുകൾ നടുക്കടലിൽ, 10000 കോടിയുടെ നഷ്ടമുണ്ടാകും; സഹായം അഭ്യർത്ഥിച്ച് കപ്പലുടമകൾ.

POPULAR POSTS

ചന്ദ്രഗ്രഹണം: ഇന്ത്യൻ ക്രിക്കറ്റ് ടീം മുംബൈയിലെ പരിശീലന സെഷൻ നീട്ടിവെച്ചു

യുദ്ധഭീതിക്കിടെ വിമാനങ്ങൾ പറന്നുയരുന്നു; കുടുങ്ങിക്കിടന്ന ഇന്ത്യക്കാർ നാട്ടിലേക്ക്.

27 ഇന്ത്യൻ കപ്പലുകൾ നടുക്കടലിൽ, 10000 കോടിയുടെ നഷ്ടമുണ്ടാകും; സഹായം അഭ്യർത്ഥിച്ച് കപ്പലുടമകൾ.

POPULAR CATEGORY

ABOUT US

FOLLOW US