ത്യാഗങ്ങളേറെ സഹിച്ചുമീ പൃഥ്വിയിൽ
തനതായ കർമ്മങ്ങൾ നിർവഹിക്കാൻ
പലവേഷധാരിയായ് ജീവിതം ഹോമിച്ച്
പുണ്യം പ്രവഹിക്കും സ്ത്രീയാണവൾ..
അരുമക്കിടാങ്ങളെ പെറ്റുവളർത്താൻ
ഉദരത്തിലറയൊന്നൊരുക്കി വെച്ച്
കരുത്തോടെ പത്തുമാസം ചുമക്കും
അത്ഭുതസൃഷ്ടിയാണമ്മയവൾ..
കൂടെപ്പിറപ്പെന്നവകാശമായ് എന്നും
ഇണങ്ങിയും പിണങ്ങിയുമകലാതെയും
കൂട്ടുകൂടിക്കളിച്ചിടാൻ കൊതിപ്പവൾ
കണ്മണിയാണെന്നും പെങ്ങളവൾ..
പ്രകൃതി കനിഞ്ഞൊരാ സൗന്ദര്യത്തിൽ
പ്രണയവർണ്ണങ്ങൾക്ക് നിറം പകരാൻ
മനതാരിൽ പ്രതിഷ്ഠിച്ച ഇണയായവൾ
ജീവിതപങ്കാളിയാം പത്നിയവൾ…
തട്ടിയും മുട്ടിയും പകലന്തി മായുന്ന
ജീവിതയാത്രതൻ ദാമ്പത്യമേന്മയിൽ
സ്ത്രീജന്മ പുണ്യത്തിനർഹമായി
പിറന്നുവീഴുന്നത് പുത്രിയവൾ…
സ്വയമുരുകിത്തീർന്നാലും മടിക്കാതവൾ
വീടിൻ വിളക്കായ് പ്രഭചൊരിയും
നാരിയായ് ജന്മമെടുത്തതാം പെണ്ണവൾ
മാലാഖയെന്ന് സ്തുതിച്ചിടുന്നു..
നന്നായിട്ടുണ്ട്
👍