🌸”ഇന്നത്തെ ചിന്താവിഷയം”🌸 2024 | മാർച്ച് 10| ഞായർ ✍പ്രൊഫസ്സർ എ.വി. ഇട്ടി മാവേലിക്കര

പരാതിരഹിത ജീവിതം
__________________________

ആ ആശ്രമത്തിൽ ഒരു പ്രത്യേക നിയമമുണ്ടായിരുന്നു. പുതുതായി വരുന്ന അംഗങ്ങൾക്കു്, പത്തു വർഷത്തേക്ക്, ആണ്ടിൽ ഒരിക്കൽ മാത്രമായിരുന്നു സംസാരിക്കാൻ അനുമതി. അതും രണ്ടു വാക്കുകൾ, ആശ്രമശ്രേഷ്ഠനോടു മാത്രം.

ഒരു വർഷത്തെ പരിശീലനത്തിനു ശേഷം, ഒരു യുവാവ് ഗുരുവിനടുത്തെത്തി രണ്ടു വാക്കുകൾ പറഞ്ഞു: “ഭക്ഷണം മോശം”!
അടുത്ത വർഷം, അയാൾ വീണ്ടുമെത്തിപ്പറഞ്ഞു: ” കിടക്ക കടുപ്പമാണ് ”. മൂന്നാം വർഷം അയാൾ പറഞ്ഞു: ” ഞാൻ പോകുകയാണ് !” ഗുരു പറഞ്ഞു: “എനിക്കതിൽ അത്ഭുതമില്ല. ഇതു വരെ, നീ എൻ്റെയടുക്കൽ വന്നത് പരാതി പറയാൻ മാത്രമായിരുന്നുവല്ലോ?” ജീവിതത്തെ രണ്ടു വാക്കുകളിൽ സംഗ്രഹിക്കാൻ പറഞ്ഞാൽ, നാം എങ്ങനെ പ്രതികരിക്കും: പരാതിയുടെ പുറം ചട്ട കൊണ്ടോ; സംതൃപ്തിയുടെ താക്കേൽ കൊണ്ടോ? ജീവിതം എന്താകണമെന്ന് നാം ആഗ്രഹിക്കുന്ന അവസ്ഥയും, അതായിരിക്കേണ്ട അവസ്ഥയുമുണ്ട് . ഇവ രണ്ടും തമ്മിലുള്ള സന്തുലനത്തിലാണ് നാം ആയിരിക്കുന്ന അവസ്ഥ രൂപപ്പെടുന്നത് . എല്ലാ പരാതികളും രണ്ടു തരത്തിൽ പരാഹരിക്കാം. ഒന്നുകിൽ, ആ സാഹചര്യം മാറണം. അല്ലെങ്കിൽ, ആ സാഹചര്യത്തോടുള്ള നമ്മുടെ മനോഭാവം മാറണം.
അനിതരസാധാരണമായ ഔന്നിത്യവും വ്യക്തിപ്രഭാവവും പുലർത്തുന്നവരെ കാണുമ്പോൾ, നമുക്ക് അസൂയയും, അനുകരണ ഭ്രമവും ഉണ്ടാകും. അവരോടൊപ്പം നാം യാത്ര തുടങ്ങുമ്പോൾ നമുക്കു മനസ്സിലാകും: അവരുടെ കർമ്മ വഴികളെല്ലാം, കനൽ വഴികൾ ആയിരുന്നു
വെന്ന്.

പൊരുത്തപ്പെടാൻ കഴിയാത്തവയെല്ലാം, പരാതികളായി മാറുമ്പോൾ, യാത്ര പാതി വഴിയിൽ അവസാനിപ്പിക്കുകയേ മാർഗ്ഗമുള്ളു. എന്നാൽ, അവയെ തൻ്റേടത്തോടെ അഭിമുഖീകരിക്കുകയും, സ്വയം പുനഃക്രമീകരണത്തിനു തയ്യാറാകുകയും ചെയ്താൽ, പുതിയ വഴിത്തിരിവുകൾ, സ്വഭാവികമായും പ്രത്യക്ഷപ്പെടും.

സർവ്വശക്തൻ കൂടെയിരുന്നനുഗ്രഹിക്കട്ടെ..  എല്ലാവർക്കും നന്മകൾനേരുന്നു. നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര✍