കടലിൻ്റെ ഓളവും
ആഴിതൻ തീരവും
നമുക്കായ് തീർത്തൊരാ
സായം സന്ധ്യയും
കനവുകൾ ഉതിരുന്ന
നറുനിലാവേറി നീ
എന്നിൽ നിറഞ്ഞതും
പ്രണയം പൊഴിച്ചതും..
ഓർക്കുന്നുവോ പ്രിയ സഖീ..
നീ ഓർത്തീടുന്നുവോ.
ഹിമകണം പേറിയാ
ഇളവെയിൽ കൊണ്ട് നീ
കവിതകൾ നെയ്യവേ
പൂത്തുലഞ്ഞീടവേ
മൃദലമാം തന്ത്രികൾ മീട്ടിയാ രാഗവും
എന്നിൽ പൊഴിച്ചൊരാ
പദനിസ്വനങ്ങളും
മിഴിയിതൾ ബാഷ്പവും..
ഓർക്കുന്നുവോ പ്രിയ സഖീ..
നീ ഓർത്തീടുന്നുവോ.
രാത്രിതൻ യാമങ്ങൾ
താരകം കോർത്തു
നാം
ഇരുളിൻ കയങ്ങളിൽ
കനൽനാളമായതും
അമ്പിളി ചൂടിയും
മൺചിരാതേറിയും
ജീവിതതാളങ്ങൾ
ഒന്നായ് തുഴഞ്ഞതും..
ഓർക്കുന്നുവോ പ്രിയ സഖീ..
നീ ഓർത്തീടുന്നുവോ.
എൻ മനോതീരത്ത്
പരിഭവംപേറി നീ
കിരണങ്ങളുതിരുന്ന
കതിരോനുമായി നീ
കാവ്യമായ് നിറയുന്ന
രാക്കുയിലായി നീ
മഴവില്ല് തീർത്തതും
മഴമേഘമായതും..
ഓർക്കുന്നുവോ പ്രിയ സഖീ..
നീ ഓർത്തീടുന്നുവോ.
നോവിത്ര മധുരമായ്
എന്നിൽ നിറച്ചിട്ട്
പ്രണയപേമാരിയിൽ
എന്നെ നനച്ചിട്ട്
നിന്നെ നിനച്ചു ഞാൻ
കാത്തൊന്നിരുന്നിട്ട്..
മരവിച്ച മനസ്സിൻ്റെ..
മരണമൊന്നറിയുന്നുവോ സഖീ നീ..
നീ അറിഞ്ഞീടുന്നുവോ.
ഇഷ്ടം…