📱വാർത്തകൾ ഒറ്റനോട്ടത്തിൽ📱 – 2026 | ഡിസംബർ 03 | ബുധൻ ✍ കപിൽ ശങ്കർ

🔹കേന്ദ്ര ബജറ്റിൽ കേരളത്തെ അവഗണിച്ചെന്ന് ആരോപിച്ച് സിപിഎം ഇന്ന് കരിദിനം ആചരിക്കും. പ്രതിഷേധത്തിന്‍റെ ഭാഗമായി ഇന്ന് എല്ലാ ബൂത്തുകളിലും കരിങ്കൊടി ഉയർത്തി പ്രതിഷേധ പ്രകടനങ്ങൾ നടത്തുമെന്നും സിപിഎം സംസ്ഥാന സെക്രട്ടറി എം.വി.ഗോവിന്ദൻ പറഞ്ഞു.
കേരളം ഇന്ത്യയുടെ ഭൂപടത്തിൽ പോലുമില്ലെന്ന തരത്തിലാണ് ധനമന്ത്രിയുടെ പ്രഖ്യാപനങ്ങൾ. സംസ്ഥാനത്തിന്‍റെ ന്യായമായ ആവശ്യങ്ങളെ കേന്ദ്രം പൂർണമായും തള്ളിക്കളഞ്ഞുവെന്നും സി പിഎം നേതൃത്വം കുറ്റപ്പെടുത്തി.കേന്ദ്ര ബജറ്റെന്നല്ല സാമ്പത്തിക ചതിയെന്നാണ് വിളിക്കേണ്ടതെന്ന് സിപിഎം ജനറൽ സെക്രട്ടറി എം.എ.ബേബി പറഞ്ഞു. ഏറെ പ്രതീക്ഷിച്ച എയിംസ്, വിഴിഞ്ഞം പദ്ധതികൾക്ക് പണം അനുവദിക്കാതെ ആമ സംരക്ഷണത്തിന് തുക മാറ്റിവെച്ചത് കേരളത്തെ അപമാനിക്കുന്നതിന് തുല്യമാണെന്നും ബേബി വ്യക്തമാക്കി.

🔹 തിരുനാവായയിൽ നടക്കുന്ന മഹാമാഘ മഹോത്സവത്തിന് ഇന്ന് സമാപനം. അമൃതസ്നാനത്തോടെയാണ് മഹാമാഘ മഹോത്സവത്തിന് സമാപനമാവുക. അമൃതസ്നാനത്തിനുശേഷം യതി പൂജയും ഭണ്ഡാര എന്ന വിശിഷ്ട ആചാരവും നടക്കും. കേരളത്തിലെ കുംഭമേളയെന്ന നിലയിൽ തിരുനാവായയിൽ നടക്കുന്ന മഹാമാഘ മഹോത്സവത്തിൽ രാജ്യത്തിന്‍റെ വിവിധ ഭാഗങ്ങളിൽ നിന്നായി ആയിരക്കണക്കിന് വിശ്വാസികളാണ് പങ്കെടുത്തത്. 15 ദിവസമായി നടന്നുവന്ന മഹാമാഘ മഹോത്സവം ജനുവരി19ന് ഗവർണർ ആണ് ഉദ്ഘാടനം ചെയ്തത്.മഹാമാഘ മഹോത്സവത്തിലെ ഏറ്റവും വിശുദ്ധമായ ആചാരങ്ങളിലൊന്നാണ് അമൃതസ്നാനം. നാഗസന്ന്യാസിവര്യന്മാർ ഉൾപ്പെടെയുള്ളവരും ഭക്തജനങ്ങളും ഇതിൽ പങ്കുചേരും. അമൃതസ്നാനത്തിനുശേഷം യതി പൂജയും ഭണ്ഡാര എന്ന വിശിഷ്ട ആചാരവും നടക്കും. സന്ന്യാസിവര്യന്മാർക്ക് നടത്തുന്ന അന്നദാനമാണ് ഭണ്ഡാര.

🔹 കണ്ണൂരിൽ ഓടിക്കൊണ്ടിരുന്ന ബസിനുള്ളിൽ വെച്ച് ലൈംഗികമായി ഉപദ്രവിച്ചു എന്നാരോപിച്ച് ഷിംജിത മുസ്തഫ എന്ന യുവതി സോഷ്യൽ മീഡിയയിൽ വീഡിയോ പങ്കുവെച്ചതിനെത്തുടർന്ന് യുവാവ് ആത്മഹത്യ ചെയ്ത സംഭവത്തിൽ സ്വതന്ത്ര അന്വേഷണം ആവശ്യപ്പെട്ട് ഓൾ കേരള മെൻസ് അസോസിയേഷൻ ഹൈക്കോടതിയെ സമീപിച്ചു.ഓൾ കേരള മെൻസ് അസോസിയേഷൻ പ്രസിഡന്‍റ് സി. അജിത് കുമാറാണ് ഹൈക്കോടതിയിൽ ഹർജി സമർപ്പിച്ചത്. കേസ് ലോക്കൽ പോലീസിൽ നിന്ന് മാറ്റി സിബിഐയോ, ക്രൈംബ്രാഞ്ചോ അല്ലെങ്കിൽ പ്രത്യേക അന്വേഷണ സംഘമോ അന്വേഷിക്കണമെന്നാണ് പ്രധാന ആവശ്യം.നിലവിലെ അന്വേഷണത്തിൽ വിശ്വാസമില്ലെന്നും ഹർജിയിൽ പറയുന്നു.

🔹കളമശേരിയിൽ സോഫ നിർമാണ യൂണിറ്റിന് തീപിടിച്ചത് പരിഭ്രാന്തി പരത്തി. എച്ച്എംടി കോളനിയിൽ പ്രവർത്തിക്കുന്ന സോഫ നിർമാണ യൂണിറ്റിനാണ് തിങ്കളാഴ്ച രാത്രിയിൽ തീപിടിച്ചത്.
കെട്ടിടത്തിൽ നിന്ന് തീ ഉയരുന്നത് കണ്ട ജോലിക്കാർ പെട്ടന്ന് പുറത്തിറങ്ങിയതുകൊണ്ട് വലിയ അപകടം ഒഴിവായി. സോഫ നിർമാണത്തിന് ഉപയോഗിക്കുന്ന ഫോം, പ്ലൈവുഡ് എന്നിവയ്ക്കാണ് തീ പിടിച്ചത്.ആറ് യൂണിറ്റ് ഫയർഫോഴ്സ് ഒന്നരമണിക്കൂറോളം സമയമെടുത്താണ് തീയണച്ചത്. തീപിടുത്തത്തിന്‍റെ കാരണം വ്യക്തമല്ല. ലക്ഷങ്ങളുടെ നഷ്ടമുണ്ടായതായി അധികൃതർ പറഞ്ഞു.

🔹 പഞ്ചായത്തിലെ ജനവാസ കേന്ദ്രങ്ങളിൽ കർഷകർക്ക് ഭീഷണിയാകുന്ന മുഴുവൻ കാട്ടുപന്നികളെയും കൊന്നൊടുക്കാൻ പുൽപ്പള്ളി പഞ്ചായത്ത് ജനജാഗ്രത സമിതി തീരുമാനിച്ചു.
കാർഷിക വിളകൾക്ക് മാത്രമല്ല ജീവനും ഭീഷണിയാകുന്ന സാഹചര്യത്തിലാണ് ഇവയെ കൂട്ടത്തോടെ കൊന്നൊടുക്കാൻ ജനജാഗ്രത സമിതി തീരുമാനിച്ചത്. വന്യജീവി ആക്രമണവുമായി ബന്ധപ്പെട്ട് ജനങ്ങൾ അനുഭവിക്കുന്ന പ്രശ്നങ്ങളെക്കുറിച്ച് ചർച്ച ചെയ്തു.
10 പേരടങ്ങിയ ഷൂട്ടേഴ്സ് പാനൽ അംഗങ്ങൾ, പിആർടി ടീമുകൾ, ഓഫ് റോഡേഴ്സ് പങ്കെടുത്തു. ഷൂട്ടേഴ്സ് പാനലിൽ അടങ്ങിയ അംഗങ്ങൾക്ക് ഗ്രാമപഞ്ചായത്ത് ഐഡി കാർഡുകൾ നൽകി.

🔹ദാരിദ്രനിർമാർജ്ജന യജ്ഞ പദ്ധതിയുടെ ഭാഗമായി വീടും സ്ഥലവും ഇല്ലാത്ത എട്ട് ഗുണഭോക്താക്കൾക്ക് നഗരസഭയുടെ വാർഷിക പദ്ധതിയിൽ ഉൾപ്പെടുത്തി വീട് നിർമിക്കുന്നതിന് തറക്കല്ലിടൽ കർമം നിർവഹിച്ചു.കുപ്പാടിയിൽ കുടുംബങ്ങൾക്ക് കണ്ടെത്തിയ സ്ഥലത്ത് നഗരസഭ ചെയർപേഴ്സണ്‍ റസീന അബ്ദുൾ ഖാദർ തറക്കല്ലിടൽ നിർവഹിച്ചു.അസിസ്റ്റന്‍റ് നോഡൽ ഓഫീസർ സജു പി. ഏബ്രഹാം അധ്യക്ഷത വഹിച്ചു.ഡെപ്യൂട്ടി ചെയർപേഴ്സണ്‍ ഇന്ദ്രജിത്ത്, സ്റ്റാൻഡിംഗ് കമ്മിറ്റി സ്ഥിരം സമിതി അധ്യക്ഷരായ പി. സംഷാദ്, ലീല പാൽപാത്ത്, പ്രമോദ് പാളാക്കര, വി.കെ. ഷിഫാനത്ത്, ഷെറീന അബ്ദുള്ള കൗണ്‍സിലർമാർ, സീനിയർ സെക്രട്ടറി കെ.എം. സൈനുദ്ധീൻ എന്നിവർ പ്രസംഗിച്ചു.

🔹അപകടങ്ങളിൽപ്പെടുന്നവർക്ക് 50,000 രൂപ വരെ സൗജന്യ ചികിത്സ ലഭിക്കുന്ന ഇൻഷ്വറൻസ് പദ്ധതിയുമായി പെരിന്തൽമണ്ണ ഇഎംഎസ് മെമ്മോറിയൽ സഹകരണ ആശുപത്രി.
ഇഎംഎസ് ആശുപത്രിയും ഇഎംഎസ് മെമ്മോറിയൽ ചാരിറ്റബിൾ മെഡിക്കൽ ട്രസ്റ്റും ന്യൂ ഇന്ത്യ അഷ്വറൻസ് കന്പനിയും സംയുക്തമായി നടപ്പാക്കുന്ന “ഇഎംഎസ് ഹെൽത്ത് കെയർ ഇൻഷ്വറൻസ് സ്കീം’ പദ്ധതിയിൽ അംഗങ്ങളാകുന്നവർക്ക് റോഡപകടങ്ങൾ, വീഴ്ച മൂലമുള്ള പരിക്കുകൾ, തീപ്പൊള്ളൽ, പാന്പ്, നായ, കടന്നൽ എന്നീ ക്ഷുദ്രജീവികളിൽനിന്നുള്ള ആക്രമണങ്ങൾ മൂലമുള്ള അപകടങ്ങളുടെ വിദഗ്ധ ചികിത്സക്കായി പെരിന്തൽമണ്ണ ഇഎംഎസ് ആശുപത്രിയിൽ പ്രവേശിപ്പിക്കുന്പോൾ 50,000 രൂപ വരെ സൗജന്യ ചികിത്സ, കൂടാതെ അപകടം മൂലം മരണപ്പെടുകയാണെങ്കിൽ ആശ്രിതർക്ക് 1,00,000 രൂപയുടെ സാന്പത്തിക സഹായവും സ്ഥിരവും പൂർണവുമായ അംഗവൈകല്യത്തിന് 1,00,000 രൂപ വരെയുള്ള ആനുകൂല്യവും ഇൻഷ്വറൻസ് നിബന്ധനകൾക്ക് വിധേയമായി ലഭിക്കും.

🔹താമരശേരി ടൗണില്‍ പട്ടാപ്പകല്‍ ബേക്കറിയുടെ ഉള്ളിലേക്ക് ഓടിക്കയറി കാട്ടുപന്നി. ബേക്കറിക്കുള്ളിലെ ഗ്‌ളാസ് ഫര്‍ണീച്ചറുകളും മറ്റു സാധനങ്ങളും തകര്‍ത്ത കാട്ടുപന്നിയെ നാട്ടുകാര്‍ ഏറെ പണിപ്പെട്ട് പുറത്തുചാടിച്ചു. സ്വകാര്യ ബസിലും കാറിലും സ്‌കൂട്ടറിലും ഇടിച്ചശേഷം കാട്ടുപന്നി സമീപത്തെ ഉല്ലാസ്‌നഗര്‍ റോഡിലൂടെ ഓടിരക്ഷപെട്ടു.ഇന്നലെ ഉച്ചക്കാണ് സംഭവം. ദേശീയ പാതയോരത്ത് താമരശേരി പോസ്റ്റാഫീസിനു സമീപം പ്രവര്‍ത്തിക്കുന്ന ജനതാ ബേക്കറിയിലേക്കാണ് കാട്ടുപന്നി ഓടിക്കയറിയത്. ബേക്കറിയില്‍ ഭക്ഷണം കഴിച്ചു കൊണ്ടിരുന്ന സ്ത്രീകള്‍ അടക്കമുള്ളവര്‍ പരിഭ്രാന്തരായി പുറത്തേക്ക് ഓടിരക്ഷപെട്ടു.
ടൈല്‍ പാകിയ തറയില്‍ കാലുറപ്പിക്കാന്‍ കഴിയാതെ കാട്ടുപന്നി തെന്നിക്കളിച്ചു. ബേക്കറിക്കുള്ളില്‍ നിന്നും രക്ഷപെടാനുള്ള കാട്ടുപന്നിയുടെ ശ്രമത്തിനിടെയാണ് ഫര്‍ണീച്ചറുകള്‍ക്ക് കേടുപാടുകള്‍ സംഭവിച്ചത്.

🔹ഓടിക്കൊണ്ടിരുന്ന ടൂറിസ്റ്റ് ബസിന് തീപിടിച്ചത് പരിഭ്രാന്തി പരത്തി. ചൊവ്വാഴ്ച പുലർച്ചെ മൂന്നിന് മുണ്ടക്കയം ടൗണിലുണ്ടായ സംഭവത്തിൽ ആർക്കും പരിക്കില്ല. മധുരയിൽ നിന്ന് എറണാകുളത്തേക്ക് പോകുകയായിരുന്നു ബസാണ് അപകടത്തിൽപ്പെട്ടത്.
അപകട സമയത്ത് 45 യാത്രക്കാര്‍ ബസിലുണ്ടായിരുന്നു. ബസിൽ നിന്ന് പുക ഉയരുന്നത് കണ്ടതിനു പിന്നാലെ ഡ്രൈവർ വാഹനം നിർത്തി യാത്രക്കാരെ പുറത്തിറക്കിയതിനാൽ വൻ ദുരന്തം ഒഴിവായി. കാഞ്ഞിരപ്പള്ളിയിൽ നിന്നും ഫയർഫോഴ്സെത്തിയാണ് തീയണച്ചത്.ബസ് പൂർണമായി കത്തിനശിച്ചു. തീപിടിത്തത്തിന്‍റെ കാരണം വ്യക്തമല്ലെന്ന് അധികൃതർ പറഞ്ഞു. അപക‌ടത്തെ തുടർന്ന് കുമളി, കട്ടപ്പന ഭാഗത്തേക്കുള്ള വാഹനങ്ങൾ വഴിതിരിച്ചു വിടുകയാണ്.

🔹ഹൃദയം തുറന്നുള്ള ശസ്ത്രക്രിയയില്ലാതെ അയോര്‍ട്ടിക് വാൽവ് മാറ്റിവയ്ക്കുന്ന ചികിത്സ കണ്ണൂർ ഗവ. മെഡിക്കൽ കോളജിൽ വിജയകരമായി നടത്തി. സംസ്ഥാനത്ത് സർക്കാർ മേഖലയിലെ ആദ്യ മോട്ടറൈസ്ഡ് ‘ടാവി’യാണ് (ട്രാൻസ് അയോർട്ടിക് വാൽവ് ഇംപ്ലാന്‍റേഷൻ) പരിയാരത്തെ കണ്ണൂർ ഗവ. മെഡിക്കൽ കോളജിലെ കാർഡിയോളജി വിഭാഗം വിജയകരമായി നിർവഹിച്ചത്.
ഹൃദയത്തിൽനിന്നു ശുദ്ധരക്തം ശരീരത്തിന്‍റെ ഇതരഭാഗങ്ങളിലേക്കെത്തിക്കുന്ന മഹാധമനിയുടെ (അയോർട്ട) വാൾവിന് രോഗം ബാധിച്ച് ഗുരതരാവസ്ഥയിൽ ആശുപത്രിയിൽ പ്രവേശിപ്പിച്ച എഴുപത്തിയഞ്ചുകാരനിലാണ് ഹൃദയം തുറന്നുള്ള ശസ്ത്രക്രിയ കൂടാതെ അയോർട്ടിക് വാൾവ് വിജയകരായി ഘടിപ്പിച്ചത്. ചികിത്സയ്ക്കുശേഷം നാലാം ദിവസം രോഗിയെ ഡിസ്ചാർജ് ചെയ്തു.
കാർഡിയോളജി വിഭാഗം മേധാവി പ്രഫ. ഡോ.വി. ജയറാമിന്‍റെ നേതൃത്വത്തിൽ അസോസിയേറ്റ് പ്രഫസർ ഡോ. വി. സുധാകുമാരി, അസിസ്റ്റന്‍റ് പ്രഫസർമാരായ ഡോ. കെ. രാകേഷ്, ഡോ. എസ്. ജി. ശ്യാം ലക്ഷ്മൺ, കാർഡിയാക് സർജറിയിലെ ഡോ. പ്രജീഷ്, ഡോ. റിജോയ്, കാർഡിയാക് അനസ്‌തെറ്റിസ്റ്റ്‌ ഡോ. ബിജു എന്നിവരടങ്ങിയ ഡോക്ടർമാരുടെ സംഘമാണ് ചികിത്സ നടത്തിയത്.സാമ്പത്തികമായി പിന്നാക്കം നിൽക്കുന്ന രോഗികൾക്കും അത്യാധുനിക ഹൃദയചികിത്സ ലഭ്യമാക്കുന്ന ഈ ശസ്ത്രക്രിയ കണ്ണൂർ ഗവ. മെഡിക്കൽ കോളജ് കാർഡിയോളജി വിഭാഗത്തിൽ സ്ഥിരമായി നടത്തുമെന്ന് അധികൃതർ അറിയിച്ചു.

🔹മഹാരാഷ്ട്രയിൽ നടക്കാനിരിക്കുന്ന പഞ്ചായത്ത് തെരഞ്ഞെടുപ്പിൽ മത്സരിക്കുന്നതിനായി മൂന്ന് മക്കളിൽ ഒരാളെ കൊലപ്പെടുത്തി പിതാവ്.നന്ദേഡ് ജില്ലയിലെ മുഖേദ് താലൂക്കിലെ കെരൂർ ഗ്രാമവാസിയായ പാണ്ഡുരംഗ് കോണ്ട്മംഗലെയാണ്, ആറു വയസുള്ള മകളെ കൊന്നത്.സംഭവത്തിൽ പാണ്ഡുരംഗ് (28), ഗ്രാമ സർപഞ്ച് ഗണേഷ് രാമചന്ദ്ര ഷിൻഡെ എന്നിവരെ അറസ്റ്റ് ചെയ്തതായി നിസാമാബാദ് പോലീസ് അറിയിച്ചു.
യെദപ്പള്ളിയിലെ നിസാം സാഗർ കനാലിൽ നിന്നാണ് പെൺകുട്ടിയുടെ മൃതദേഹം കണ്ടെത്തിയതെന്ന് നിസാമാബാദ് പോലീസ് കമ്മീഷണർ പി. സായ് ചൈതന്യ മാധ്യമങ്ങളോട് പറഞ്ഞു. അന്വേഷണത്തിൽ മരിച്ചത് മഹാരാഷ്ട്രയിലെ നന്ദേഡ് ജില്ലയിലെ കെരൂർ ഗ്രാമത്തിൽ താമസിക്കുന്ന പ്രാചി (ആറ്) ആണെന്ന് തിരിച്ചറിഞ്ഞു.കുട്ടിയുടെ പിതാവിനെ ചോദ്യം ചെയ്തപ്പോൾ മകൾ ഒരു ആരോഗ്യ കേന്ദ്രത്തിൽ ചികിത്സയിലാണെന്ന് പറഞ്ഞ് ഇയാൾ പോലീസിനെ തെറ്റിദ്ധരിപ്പിക്കാൻ ശ്രമിച്ചു. എന്നാൽ കൂടുതൽ ചോദ്യം ചെയ്യലിൽ താൻ മകളെ കൊലപ്പെടുത്തിയെന്ന് ഇയാൾ സമ്മതിക്കുകയായിരുന്നു.

🔹 ഇന്ത്യൻ നിർമിത ഉത്പന്നങ്ങൾക്ക് ചുമത്തിയിരുന്ന ഇറക്കുമതി തീരുവ 18 ശതമാനമായി കുറച്ചതിന് അമേരിക്കൻ പ്രസിഡന്‍റ് ഡോണൾ‌ഡ് ട്രംപിന് നന്ദി അറിയിച്ച് പ്രധാനമന്ത്രി നരേന്ദ്ര മോദി. സോഷ്യൽ മീഡിയയിലൂടെയാണ് ട്രംപിന് നന്ദി അറിയിച്ച് മോദി രംഗത്തെത്തിയത്. പ്രിയ സുഹൃത്ത് പ്രസിഡന്‍റ് ട്രംപുമായി സംസാരിച്ചതിൽ വലിയ സന്തോഷമുണ്ടെന്നും ഇന്ത്യൻ നിർമിത ഉത്പന്നങ്ങൾക്ക് ഇറക്കുമതി തീരുവ 18 ശതമാനമായി കുറയ്ക്കുന്നതിൽ സന്തോഷമുണ്ടെന്നും പ്രധാനമന്ത്രി കുറിച്ചു. ട്രംപിന്‍റെ പ്രഖ്യാപനത്തിൽ 140 കോടി ഇന്ത്യക്കാരെ പ്രതിനിധീകരിച്ച് നന്ദി അറിയിക്കുന്നതായും മോദി വ്യക്തമാക്കി. വലിയ രണ്ട് സമ്പദ്‌വ്യവസ്ഥകളും ഏറ്റവും വലിയ ജനാധിപത്യ രാജ്യങ്ങളും ഒരുമിക്കുമ്പോൾ ജനങ്ങൾക്ക് പ്രയോജനകരമാകുമെന്നും കൂടുതൽ അവസരങ്ങൾ ലഭിക്കുമെന്നും പ്രധാനമന്ത്രി കുറിച്ചു.

🔹 ലോകസമ്പന്നൻ ഇലോൺ മസ്കിന്‍റെ ഉടമസ്ഥതയിലുള്ള ബഹിരാകാശ ഗവേഷണ സ്ഥാപനമായ സ്‌പേസ് എക്‌സും ആർട്ടിഫിഷ്യൽ ഇന്‍റലിജൻസ് കമ്പനിയായ എക്സ്.എഐയും ഓഹരി വിപണിയിലേക്ക് പ്രവേശിക്കാൻ ഒരുങ്ങുന്നു. 2026-ന്‍റെ രണ്ടാം പകുതിയോടെ ഇരു കമ്പനികളുടെയും പ്രാഥമിക ഓഹരി വില്പന നടന്നേക്കുമെന്നാണ് സൂചനകൾ.ആഗോള നിക്ഷേപകർ ഏറെക്കാലമായി കാത്തിരിക്കുന്ന ഒന്നാണ് സ്‌പേസ് എക്‌സിന്‍റെ പ്രാഥമിക ഓഹരി വിൽപന. ഉപഗ്രഹ ഇന്‍റർനെറ്റ് സേവനമായ ‘സ്റ്റാർലിങ്കിന്‍റ’ വമ്പിച്ച വിജയമാണ് സ്‌പേസ് എക്‌സിനെ പൊതുവിപണിയിലേക്ക് എത്തിക്കാൻ മസ്കിനെ പ്രേരിപ്പിക്കുന്നത്. നിലവിൽ ഏകദേശം 250 ബില്യൺ ഡോളറിലധികം മൂല്യം കണക്കാക്കപ്പെടുന്ന സ്‌പേസ് എക്‌സ്, വിപണിയിൽ എത്തുന്നതോടെ ലോകത്തിലെ ഏറ്റവും മൂല്യമുള്ള കമ്പനികളിലൊന്നായി മാറും.മസ്കിന്റെ ആർട്ടിഫിഷ്യൽ ഇന്റലിജൻസ് സംരംഭമായ എക്സ്.എഐയും ഐപിഒയ്ക്ക് തയ്യാറെടുക്കുന്നത് ടെക് ലോകത്തെ ഞെട്ടിച്ചിരിക്കുകയാണ്. ചുരുങ്ങിയ കാലയളവിനുള്ളിൽ വലിയ വളർച്ച കൈവരിച്ച കമ്പനി, ഓപ്പൺ എഐ , ഗൂഗിൾ എന്നിവർക്ക് കടുത്ത വെല്ലുവിളിയാണ് ഉയർത്തുന്നത്. നിക്ഷേപ സമാഹരണത്തിലൂടെ എഐ സാങ്കേതികവിദ്യ കൂടുതൽ വികസിപ്പിക്കുകയാണ് മസ്കിന്‍റെ ലക്ഷ്യം.

🔹സംസ്ഥാനം കോടിക്കണക്കിന് രൂപ മുടക്കി മെസിയെ കൊണ്ടുവരുന്നതിനേക്കാൾ അതിനായി ചെലവഴിക്കേണ്ട തുക ഉപയോഗിച്ച് കായികതാരങ്ങൾക്ക് കൂടുതൽ സൗകര്യമൊരുക്കുകയാണ് വേണ്ടതെന്ന് അത്‌ലറ്റിക് ഫെഡറേഷൻ ഓഫ് ഇന്ത്യ സീനിയർ വൈസ് പ്രസിഡന്‍റ് അഞ്ജു ബോബി ജോർജ്. തിരുവനന്തപുരം എൽഎൻസിപിയിൽ നടന്ന പത്രസമ്മേളനത്തിലായിരുന്നു അഞ്ജുവിന്‍റെ പ്രതികരണം.വിവിധ കമ്പനികളുടെ സിഎസ്ആർ ഫണ്ട് ഉപയോഗിച്ചാണ് മെസിയെ കൊണ്ടുവരാൻ സംസ്ഥാനം തീരുമാനിച്ചത്. അത്തരത്തിൽ കണ്ടെത്തുന്ന പണം കായികമേഖലയുടെ അടിസ്ഥാനസൗകര്യങ്ങൾക്ക് ഉപയോഗിക്കാനാണ് ശ്രദ്ധിക്കേണ്ടത്.സ്ഥാന ബജറ്റിൽ കായിക മേഖലയ്ക്കായി കാര്യമായ തുക നീക്കിവച്ചിട്ടില്ലെന്നും ദേശീയ ചാന്പ്യൻഷിപ്പുകൾ സംഘടിപ്പിക്കാൻ കേരളം ഇപ്പോൾ താൽപര്യം പ്രകടിപ്പിക്കുന്നില്ലെനും അഞ്ജു കൂട്ടിച്ചേർത്തു.

🔹12-ാമത് ഏഷ്യന്‍ ഇന്‍ഡോര്‍ അത്‌ലറ്റിക്‌സ് ചാമ്പ്യന്‍ഷിപ്പിനുള്ള ഇന്ത്യന്‍ ടീം ഇന്നു പുറപ്പെടും. ആറ് മുതല്‍ എട്ട് വരെ ചൈനയിലെ ടിയാന്‍ജിനിലാണ് ഇന്‍ഡോര്‍ ചാമ്പ്യന്‍ഷിപ്പ് അരങ്ങേറുന്നത്.ഇന്ത്യയെ പ്രതിനിധീകരിച്ച് 18 അംഗ സംഘം ഇന്നു ചൈനയിലേക്കു യാത്രതിരിക്കും. കെ.എ. അനാമിക (പെന്‍റാത്തലണ്‍), ആന്‍സി സോജന്‍ (ലോംഗ്ജംപ്), സി.വി. അനുരാഗ് (ലോംഗ്ജംപ്) എന്നിവരാണ് ടീമിലെ മലയാളി സാന്നിധ്യങ്ങള്‍. മൂഡബിദ്രിയില്‍ കഴിഞ്ഞമാസം നടന്ന അഖിലേന്ത്യ അന്തര്‍സര്‍വകലാശാല അത്‌ലറ്റിക്‌സില്‍ ഹെപ്റ്റാത്തലണ്‍ സ്വര്‍ണ ജേതാവാണ് പാലക്കാട് സ്വദേശിയായ അനാമിക.വനിതാ ഹൈജംപിലെ മിന്നും താരം പൂജ, പുരുഷ വിഭാഗം ഹെപ്റ്റാത്തലണില്‍ തേജസ്വിന്‍ ശങ്കര്‍, ഷോട്ട് പുട്ടില്‍ തജിന്ദര്‍പാല്‍ സിംഗ്, വനിതാ ലോംഗ്ജംപില്‍ ആന്‍സി സോജന്‍ തുടങ്ങിയവരാണ് ഇന്ത്യയുടെ ഉറച്ച മെഡല്‍ പ്രതീക്ഷകള്‍.

🔹തിരുവനന്തപുരം വെഞ്ഞാറമൂട് നടന്ന കൂട്ടക്കൊലപാതകത്തെ ആസ്പദമാക്കി ഒരുക്കിയ സിനിമയുടെ റിലീസ് തടയണമെന്നാവശ്യപ്പെട്ട് ഹൈക്കോടതിയിൽ ഹര്‍ജിയുമായി പ്രതി അഫാന്‍റെ പിതാവ്. ‘‘കാലം പറഞ്ഞ കഥ’ എന്ന പേരിലാണ് ചിത്രം പുറത്തിറങ്ങുന്നത്. വെഞ്ഞാറമൂട് കൂട്ടക്കൊലകേസിലെ വിചാരണ പൂര്‍ത്തിയായിട്ടില്ലെന്നും വിചാരണക്ക് മുൻപ് സിനിമ റിലീസ് ചെയ്യുന്നത് കേസിനെ ബാധിക്കുമെന്നുമാണ് ഹര്‍ജിയിലെ വാദം. വെഞ്ഞാറമൂട് കൂട്ടക്കൊലപാതകം ആസ്പദമാക്കിയാണ് സിനിമയെന്നും ഇത് ഇപ്പോള്‍ റിലീസ് ചെയ്യുന്നത് മാധ്യമ വിചാരണയ്ക്ക് കാരണമാകുമെന്നും കേസിലെ സാക്ഷികളെ സ്വാധീനിക്കാൻ സാധ്യതയുണ്ടെന്നും ഹര്‍ജിയിൽ ചൂണ്ടികാട്ടുന്നു.സിനിമയുടെ പേരിൽ കുടുംബത്തെ സാമൂഹിക മാധ്യമങ്ങളിലൂടെ ആക്ഷേപിക്കുകയാണെന്നും വിചാരണ കഴിയുന്നതുവരെ സിനിമ റിലീസ് ചെയ്യുന്നത് തടയണമെന്നുമാണ് ഹര്‍ജിയിലെ ആവശ്യം. ഹര്‍ജി ഹൈക്കോടതി ഫയലിൽ സ്വീകരിച്ചു.
പ്രസാദ് നൂറനാട് സംവിധാനം ചെയ്ത് കരുനാഗപ്പള്ളി കൃഷ്ണൻകുട്ടി കഥയെഴുതി നിര്‍മിക്കുന്ന ചിത്രം ഫെബ്രുവരി ആറിനാണ് റിലീസ് ചെയ്യുന്നത്. നാടിനെ നടുക്കിയ വെഞ്ഞാറമൂട് കൂട്ടക്കൊലപാതകമാണ് സിനിമയുടെ ഇതിവൃത്തമെന്നാണ് സൂചന.

🔹ക്രൈം ത്രില്ലർ ഗെയിം ചർച്ച ചെയ്യുന്ന വ്യത്യസ്തമായൊരു കഥയുമായി എത്തുകയാണ് ജൂനിയേഴ്സ് ജേർണി എന്ന ചിത്രം. യുവതലമുറയുടെ വ്യത്യസ്തമായ ഈ ജീവിത കഥ പറയുന്ന ചിത്രം ഫെബ്രുവരി 13-ന് തിയറ്ററിലെത്തും.
ജെറ്റ് മീഡിയ പ്രൊഡക്ഷൻസിനു വേണ്ടി സുനിൽ അരവിന്ദ് നിർമിച്ച് ആൻസൻ ആന്‍റണി തിരക്കഥ എഴുതി സംവിധാനം ചെയ്യുന്ന ജൂനിയേഴ്സ് ജേണി എന്ന ചിത്രത്തിന്‍റെ സഹ നിർമാണം സലോമി ജോണി പുലി തൂക്കിൽ ആണ്.ദേശീയ അവാർഡ് ജേതാവായ വിജയരാഘവൻ പ്രധാന കഥാപാത്രമായി എത്തുന്ന ജൂനിയേഴ്സ് ജേണിയിൽ അഡ്വ. ശ്രീധരൻ പിള്ള എന്ന ശക്തമായ കഥാപാത്രത്തെയാണ് വിജയരാഘവൻ അവതരിപ്പിക്കുന്നത്.ലോഹിതദാസിന്‍റെ ശിക്ഷണത്തിലൂടെ കടന്നുവന്ന നവാഗതനായ സംവിധായകൻ ആൻസൻ ആന്‍റണി തിരക്കഥ എഴുതി സംവിധാനം ചെയ്യുന്ന ജൂനിയേഴ്സ് ജേർണിയിൽ മീനാക്ഷി ആദ്യമായി നായിക വേഷത്തിലെത്തുന്നു. ചിത്രത്തിൽ, നായക വേഷം അവതരിപ്പിക്കുന്നത് ശരത് ഗോപാൽ ആണ്.
അഡ്വക്കേറ്റ് ശ്രീധരൻ പിള്ളയുടെ നിർദേശപ്രകാരം മകരം തുരുത്ത് എന്ന ഗ്രാമത്തിലേക്ക് സിവിൽ സർവീസ് പഠനത്തിനായി എത്തുന്ന യുവാവിന്‍റെ ജീവിത കഥ പറയുകയാണ് ഈ ചിത്രം.ലിസ് (മീനാക്ഷി) എന്ന പെൺകുട്ടിയുടെ വേഷമാണ് മീനാക്ഷി അവതരിപ്പിക്കുന്നത്. അഡ്വക്കേറ്റ് ശ്രീധരൻ പിള്ളയായി വിജയ രാഘവൻ തിളങ്ങി. വിജയ രാഘവന്‍റെ ശക്തമായ കഥാപാത്രമായി മാറുകയാണ് അഡ്വക്കേറ്റ് ശ്രീധരൻ പിള്ള. മീനാക്ഷി, ശരത് ഗോപാൽ, സുധീർ കരമന,അരുൺ, സന്തോഷ് കീഴാറ്റൂർ, സുനിൽ സുഖദ, സൗമ്യ ഭാഗ്യംപിള്ള, ജയകൃഷ്ണൻ, ദിനേശ് പണിക്കർ, മേഘനാദൻ, സുനിൽ അരവിന്ദ്, ജീജാ സുരേന്ദ്രൻ, കോബ്രാ രാജേഷ്, വിജയൻ കാരന്തൂർ, ജോമോൻ ജോഷി, കണ്ണൻ പട്ടാമ്പി, ശാന്തകുമാരി, നീനാ കുറുപ്പ്, രശ്മി സജയൻ, ജയദേവ് കലവൂർ, ഐശ്വര്യ, വിനോഷ് ജോർജ്, ഗോപാലകൃഷ്ണ പിഷാരടി, തോമസ് ജോ പനക്കൽ, രാഹുൽ ആന്‍റണി, ഗീതിക ഗിരീഷ്, തേനി സുരേഷ്, ഖാദർ തിരൂർ, മാസ്റ്റർ അതുൽ സുരേഷ് ,ശ്രേയ പാർവതി, ലാൽകൃഷ്ണ തുടങ്ങിയവർ അഭിനയിക്കുന്നു.
ജറ്റ് മീഡിയ പ്രൊഡക്ഷൻസിനു വേണ്ടി സുനിൽ അരവിന്ദ് നിർമിക്കുന്ന ചിത്രം, ആൻസൻ ആന്‍റണി തിരക്കഥ എഴുതി സംവിധാനം ചെയ്യുന്നു. സഹനിർമ്മാണം -സലോമി ജോണി പുലിതൂക്കിൽ, എക്സിക്യൂട്ടീവ് പ്രൊഡ്യൂസർ – വത്സലാകുമാരി ചാരുമ്മൂട്, ഛായാഗ്രഹണം- ഷിനോബ്.ടി. ചാക്കോ, എഡിറ്റർ- ജോൺ കുട്ടി, സംഗീതം -ബിമൽ പങ്കജ്, ഗാനരചന – ഫ്രാൻസിസ് ജിജോ, ആലാപനം – ഡോ. മധു മേനോൻ, ഡോ. ഇ.എ.അബ്ദുൾ ഗഫൂർ, ഷൈമ അപ്പു, പശ്ചാത്തല സംഗീതം -സായ് ബാലൻ, വി.എഫ്. എക്സ്-ശ്രീനാഥ് 91 Network, ചമയം -ദേവദാസ്, ആർട്ട് -ഡാനി മുസിരിസ്. ചീഫ് അസോസിയേറ്റ് ഡയറക്ടർ – സച്ചി ഉണ്ണികൃഷ്ണൻ, സ്ക്രിപ്റ്റ് അസിസ്റ്റന്‍റ്- ഷാബിൻ ഷാ, ട്രെയിലർ – മോഷൻ എഡിറ്റർ- ഡ്രാഗൺ ജിറോഷ്, ഗായത്രി വിജയ്, സബ്ടൈറ്റിൽ -രാജേഷ് ജന, പ്രൊഡക്ഷൻ കൺട്രോളർ- സജിത് തിക്കൊടി, പ്രൊഡക്ഷൻ മാനേജർ -എബിൻ രാജ് അമ്പഴത്തിൽ, ഡിസൈൻ- പ്രശാന്ത് ഐ ഐഡിയ, സംഘട്ടനം – ബ്രൂസ്‌ലി രാജേഷ്, വസ്ത്രാലങ്കാരം- ടെൽമ ആൻറണി, കൃഷ്ണകുമാർ, വിതരണം – നന്ത്യാട്ട് ഫിലിംസ്, പി.ആർ.ഒ – അയ്മനം സാജൻ

💦 ഗുരുജിയുടെ വാക്കുകൾ

ഇഷ്ടപ്പെടുന്നതു ചെയ്യുന്നതല്ല, ചെയ്യേണ്ടതു ചെയ്യുന്നതാണു പക്വത. ദീർഘകാലനേട്ടങ്ങൾക്കായി താൽക്കാലിക അസൗകര്യങ്ങൾ സഹിക്കാൻ ക്ഷമ കാട്ടുക. അന്യരുടെ ദൗർബല്യങ്ങളോട് അസഹിഷ്ണുത കാട്ടാതിരിക്കുക. വിമർശനങ്ങളെ പുഞ്ചിരിയോടെ നേരിടുകയും കഴമ്പുണ്ടെങ്കിൽ സ്വയം തിരുത്തുകയും ചെയ്യുക. സ്വയംവിമർശനം ദൗർബല്യമല്ല, ഉന്നതമായ പക്വതയാണ് . പക്വമതികൾക്ക് തനിമ മറച്ചുവച്ച് മറ്റാരെങ്കിലുമാണെന്നു നടിക്കേണ്ടിവരില്ല. എന്റെ ദൗർബല്യങ്ങൾ ഞാൻ തിരിച്ചറിഞ്ഞ് പരിഹരിക്കുകയാണ്, അവ മറച്ചുവച്ച് അവയില്ലെന്നു നടിക്കുകയല്ല വേണ്ടത്. എന്റെ പരിമിതികൾ ഞാൻ തിരിച്ചറിഞ്ഞില്ലെങ്കിലും അവ അന്യർ തിരിച്ചറിയുമെന്നോർക്കാം. സ്വാഭിമാനം പണയപ്പെടുത്താതെ നമ്മുടെ പോരായ്മകൾ പറയാനുള്ള ആത്മവിശ്വാസം വേണം.
പണം കൈയിൽ വച്ച് ചെലവാക്കാതിരിക്കാൻ കഴിയണം. ആവശ്യത്തിനു പണം ചെലവാക്കുകയും വേണം. മേൽനോട്ടമില്ലാതെ കഠിനാധ്വാനം ചെയ്യാൻ സാധിക്കണം.

തയ്യാറാക്കിയത്: കപിൽ ശങ്കർ

0 Likes

📱വാർത്തകൾ ഒറ്റനോട്ടത്തിൽ📱 – 2026 | ഡിസംബർ 03 | ബുധൻ ✍ കപിൽ ശങ്കർ

💦 ഗുരുജിയുടെ വാക്കുകൾ

തയ്യാറാക്കിയത്: കപിൽ ശങ്കർ

പ്രശസ്ത കാർട്ടൂണിസ്റ്റും വെബ് സീരീസ് സംവിധായകനുമായ ചേർത്തല ഹാരീസ് വരച്ച കാർട്ടൂൺ

ലോക അർബുദ ദിനം. ✍അഫ്സൽ ബഷീർ തൃക്കോമല

🌹 “ഇന്നത്തെ ചിന്താവിഷയം” 🌹 – 2026 | ഫെബ്രുവരി 04 | ബുധൻ ✍ പ്രൊഫസ്സർ എ.വി. ഇട്ടി മാവേലിക്കര

LEAVE A REPLY Cancel reply

Most Popular

ബി.ജെ.പി: പ്രാഥമിക സ്ഥാനാർഥിപ്പട്ടിക കേന്ദ്ര ഘടകം വിലയിരുത്തുന്നു

കേരള സവാരി’ ഓടി നേടിയത് 27.58 കോടി

പ്രശസ്ത കാർട്ടൂണിസ്റ്റും വെബ് സീരീസ് സംവിധായകനുമായ ചേർത്തല ഹാരീസ് വരച്ച കാർട്ടൂൺ

ലോക അർബുദ ദിനം. ✍അഫ്സൽ ബഷീർ തൃക്കോമല

Recent Comments

EDITOR PICKS

ബി.ജെ.പി: പ്രാഥമിക സ്ഥാനാർഥിപ്പട്ടിക കേന്ദ്ര ഘടകം വിലയിരുത്തുന്നു

കേരള സവാരി’ ഓടി നേടിയത് 27.58 കോടി

പ്രശസ്ത കാർട്ടൂണിസ്റ്റും വെബ് സീരീസ് സംവിധായകനുമായ ചേർത്തല ഹാരീസ് വരച്ച കാർട്ടൂൺ

POPULAR POSTS

ലോക്‌സഭയിലെ പ്രതിപക്ഷ പ്രതിഷേധത്തിൽ ഡീൻ കുര്യാക്കോസ്, ഹൈബി ഈഡൻ ഉൾപ്പെടെ 8 എംപിമാർക്ക് സസ്‌പെൻഷൻ

അവിഹിത ബന്ധം ചോദ്യം ചെയ്തു; ഭർതൃപിതാവിനെ നടുറോഡിൽ തീകൊളുത്തി കൊന്ന് മരുമകളും കാമുകനും.

സംഗീത സംവിധായകൻ എസ് പി വെങ്കിടേഷ് അന്തരിച്ചു

POPULAR CATEGORY

ABOUT US

FOLLOW US