👬👫കുട്ടീസ് കോർണർ 👬👫 (അമ്പത്തിനാലാം വാരം) ✍സൈമ ശങ്കർ, മൈസൂർ

ഹായ് കുട്ടീസ്!! ഇന്ന് നമുക്ക്(A)മുല്ല തമാശ (B)പൊതു അറിവ്
(C)പദ്യം (D)പഴഞ്ചൊല്ലും കൂടാതെ ഈ ആഴ്ചയും എളുപ്പത്തിൽ(E) സ്റ്റെപ് ബൈ സ്റ്റെപ് ആയി വരയ്ക്കുന്ന ഒരു ചിത്രം കൂടി കാണാം ട്ടോ 😍 കുട്ടീസ് ഒഴിവു സമയങ്ങൾ അവ വരച്ചു നോക്കാറുണ്ടോ…😍

എന്ന് സ്വന്തം
ശങ്കരിയാന്റി.

👫A) ഹോജ മുല്ല തമാശ (12)

മരുഭൂമിയിൽ നടന്നത്‌

‘ഞാൻ മരുഭൂമിയിലൂടെ യാത്രചെയ്യുമ്പോൾ,’ മുല്ലാ ഒരു ദിവസം പറഞ്ഞു, ‘ക്രൂരന്മാരും രക്തദാഹികളുമായ ഒരു പറ്റം മുഷ്കരന്മാരെ ഞാനിട്ടോടിച്ചു.’
‘അതെങ്ങനെ മുല്ലാ?’
‘അതെളുപ്പമായിരുന്നെന്നേ. അവരെക്കണ്ടപ്പോൾ ഞാൻ ഒരോട്ടം വച്ചുകൊടുത്തു. അവർ എന്റെ പിന്നാലെയും ഓടി!’

📗📗

👫B) പൊതു അറിവ്

കുട്ടീസ് ഈ ആഴ്ച പൊതു അറിവിൽ കഴിഞ്ഞ ആഴ്ച്ചകളുടെ തുടർച്ചയായി നാനാർത്ഥം അറിയാം… ട്ടോ.

നാനാർത്ഥം

1) ശ്രുതി –കേൾവി, ചെവി, സംഗീതത്തിന്റെ ശ്രുതി

2) സമയം -അവസരം, കാലം, ഉപദേശം, ആജ്ഞ

3) സാധനം – നിർവ്വഹണം, വസ്ത, കേതു

4) സാധു – സന്ന്യാസി, പാവപ്പെട്ടവൻ, ഗുണവാൻ

5) സാരം – അർത്ഥം, സത്ത്, ധനം

6) സിദ്ധി – സാധന, നിർവ്വഹണം, വിജയം

7) സുഖം – ക്ഷേമം, ആരോഗ്യം, സ്വർഗ്ഗം

8) സ്ഥാനം – പാർപ്പിടം, നില, അവസ്ഥ

9) ഹരി – വിഷ്ണു, സിംഹം, രശ്മി

10) ഹസ്തം – കൈ, തുമ്പിക്കെ, ഒരുപിടി

📗📗

👫C) പണ്ടേ പ്രചാരത്തിലുള്ള പദ്യങ്ങൾ (23)

ഹായ് കുട്ടീസ് ഈ വാരവും നമുക്ക് പണ്ടേ നാട്ടിൽ പാടുന്ന കുട്ടി കവിതകളിൽ ഒന്ന് കൂടി വായിക്കാം… ട്ടോ ഈ ആഴ്ചയിൽ, ആഴ്ചയെ കുറിച്ച് തന്നെ രസകരമായ ഒരു കവിതയാണ്‌ കുട്ടീസ്. 😍

ഏഴുപേർ

ഞായർ ഞാൻ
തിങ്കൾ ഞാൻ
ഞാൻ ചൊവ്വ
ഞാൻ ബുധൻ
വ്യാഴമെന്നെന്റെ പേര്
ഞാൻ വെള്ളി, ഞാൻ ശനി
ഞങ്ങളെന്നും ക്രമം തെറ്റാതെ
നിൽക്കുന്നു.
ഞങ്ങൾ വട്ടത്തിൽ നടന്നു
കളിയ്ക്കുന്നു
ഞങ്ങളുണ്ടേഴുപേർ
ഞങ്ങളാണാഴ്ച്ചകൾ

👫D) പഴഞ്ചൊല്ലുകളും വ്യാഖ്യാനവും (16)

1) ചക്കിന് വെച്ചത് കൊക്കിന് കൊണ്ടു:

ഏറ്റവും കൂടുതൽ ആളുകൾ തെറ്റായി പ്രയോഗിക്കുന്ന ഒരു നാടൻ ചൊല്ല്. പഴയ നാടൻ ചക്ക് (എണ്ണയാട്ടുന്നതിനുള്ള യന്ത്രം) ഉരൽ നിർമ്മിക്കുന്നതിനായി സൂക്ഷിച്ച തടി ഉപകാരപ്പെട്ടത് ചക്കിന്റെ ഏറ്റവും ചെറിയ ഘടകമായ കൊക്ക് (ചെറിയ കൊളുത്ത്) നിർമ്മിക്കുന്നതിനായിട്ടാണ്.
സാരം: വളരെ വലിയ കാര്യത്തിനായി സൂക്ഷിച്ച ഒരു വസ്തു ഉപകാരപ്പെട്ടത് തീരെ ചെറിയ ഒരു ആവശ്യം സാധിക്കാനാണ്.

2) ചക്കിക്കൊത്ത ചങ്കരൻ:

പരസ്പരം ചേർച്ചയുള്ളവരെക്കുറിച്ചു പറയുമ്പോൾ ഉപയോഗിക്കുന്നതാണ് ഈ ചൊല്ല് പ്രത്യേകിച്ച് ഭാര്യാ ഭർത്താക്കന്മാരെക്കുറിച്ച്.

3) ചങ്ങാതി നന്നായാൽ കണ്ണാടി വേണ്ട:

നിങ്ങൾക്ക് ഒരു നല്ല സുഹൃത്ത് ഉണ്ടെങ്കിൽ നിങ്ങളുടെ നല്ലതും ചീത്തയും മനസ്സിലാക്കാൻ വേറെ അന്വേഷിക്കേണ്ടതില്ല അവർ നിങ്ങളെ സഹായിക്കുന്നതായിരിക്കും.

4) ചന്ദനം ചാരിയാൽ ചന്ദനം മണക്കും, ചാണകം ചാരിയാൽ ചാണകം മണക്കും. :

നല്ല സുഹൃത്തുക്കളോട് കൂടിയാൽ നല്ല സ്വഭാവം കാണിക്കും, ചീത്തക്കൂട്ട്കെട്ട് ചീത്ത സ്വഭാവത്തിനും കാരണമാകും.

5) ചാട്ടം പിഴച്ചാൽ കൂട്ടം പിഴയ്ക്കും:

ചാട്ടം പിഴച്ച കുരങ്ങനെ മറ്റു കുരുങ്ങുകൾ കൂട്ടത്തിൽ കൂട്ടില്ല എന്നപോലെ സാമൂഹിക നിയമങ്ങളും കീഴ് വ ഴക്കങ്ങളും ലംഘിക്കുന്നവർക്ക് ആ സമൂഹത്തിൽ സ്ഥാനമുണ്ടാവില്ല.

6) ചാത്തപ്പനെത്ത് മഹസറ:

ചാത്തപ്പൻ എന്നാൽ മതമില്ലാത്തവൻ എന്നും മഹസറ എന്നാൽ പരലോകം എന്നുമാണ് അർത്ഥം. മതമില്ലാത്തവനെന്ത് പരലോകം എന്നാണ് നേരിട്ടുള്ള അർത്ഥം. ഒരു കാര്യത്തെ കുറിച്ച് ഗൗരവമായി ചിന്തിക്കാത്തവന് അതിന്റെ പ്രാധാന്യം മനസ്സിലാവില്ല എന്ന് ധ്വനിപ്പിക്കാനാണ് ഈ ചൊല്ല് ഉപയോഗിക്കുന്നത്.

7) ചെമ്മീൻ തുള്ളിയാൽ മുട്ടോളം പിന്നെയും തുള്ളിയാൽ ചട്ടീല്:

അഹങ്കാരിയെ കുറിച്ചുള്ളതാണ് ഈ ചൊല്ല്. കറിക്കു നന്നാക്കുന്ന ചെമ്മീൻ ആവേശം മൂത്ത് ചാടിയാൽ ആദ്യം (നന്നാക്കുന്നയാളുടെ) മുട്ടുവരെയെത്തും, വീണ്ടും ചാടുകയാണെങ്കിൽ (അടുപ്പത്തിരിക്കുന്ന) ചട്ടിയിലും വീഴും. അഹങ്കാരികളുടെ അവസാനം നാശമായിരിക്കും എന്ന് സാരം.

8) ചൊട്ടയിലെ ശീലം ചുടല വരെ:

ചെറുപ്പകാലത്ത് ശീലിച്ചത് മരണം വരെ മാറാതെ കൂടെക്കാണും.

9) ചൊല്ലും പല്ലും പതുക്കെ മതി:

കുട്ടികൾ സംസാരിക്കാൻ പഠിക്കുന്നതും അവർക്ക് പല്ലു മുളയ്ക്കുന്നതും വൈകുന്നത് ശുഭലക്ഷണമാണ്‌.

10) ചുക്കില്ലാത്ത കഷായമില്ല:

ഒഴിവാക്കാൻ കഴിയാത്ത കാര്യത്തെക്കുറിച്ച് സൂചിപ്പിക്കാൻ.

📗📗

👫E) എളുപ്പത്തിൽ ഒരു ചിത്രം വരയ്ക്കാം (38)

അവതരണം:
സൈമ ശങ്കർ, മൈസൂർ
➖➖➖➖➖➖➖➖➖➖➖

👬👭👫👭👬👭👫👭👬👭