👬👫കുട്ടീസ് കോർണർ 👬👫 (നാല്പത്തിനാലാം വാരം) ✍സൈമ ശങ്കർ, മൈസൂർ

ഹായ് കുട്ടീസ്!! ഇന്ന് നമുക്ക് (A)കടം കഥകൾ (B)പൊതു അറിവ്
(C)പദ്യം (D)സ്റ്റാമ്പിന്റെ കഥ കൂടാതെ ഈ ആഴ്ചയും എളുപ്പത്തിൽ(E) സ്റ്റെപ് ബൈ സ്റ്റെപ് ആയി വരയ്ക്കുന്ന ഒരു ചിത്രം കൂടി കാണാം ട്ടോ കുട്ടീസ് ഒഴിവു സമയങ്ങൾ അവ വരച്ചു നോക്കാറുണ്ടോ ..?

എന്ന് സ്വന്തം
ശങ്കരിയാന്റി.

A) കടംകഥകൾ (7)

1)അടിക്കുല പൂക്കുമ്പം പന്തീരായിരം –

നക്ഷത്രങ്ങള്‍.

2)അടിയില്ലാത്ത ഭരണി-

കിണര്‍.

3)അഞ്ചുനായരും കുഞ്ചുനായരും കൂടി ഗുഹ കാണാന്‍ പോയി അഞ്ചു നായര്‍ ഇങ്ങോട്ടും പോന്നു, കുഞ്ചുനായര്‍ അങ്ങോട്ടും പോയി-

ഊണ് കഴിക്കല്‍.

4)അടി മുള്ള്, നടുന്ന കാട്, തല പൂവ്-

പൂവന്‍ക്കോഴി.

5)അതെടുത്തതിലേക്കിട്ടു,ഇതെടുത്തിതിലേക്കിട്ടു-

പായനെയ്യുക.

6)അനിയത്തി ചോന്നിട്ട്, ഏട്ടത്തി പച്ചച്ച്, അമ്മച്ചി മഞ്ഞച്ച്-

തളിരില, പച്ചില, പഴുത്ത ഇല.

7)അന്തണന്‍ വെന്തു, പൂണൂല് കരിഞ്ഞില്ല-

കാട്ടിലെ നടപ്പാത.

8)അന്തിയാവോളം അകത്തോ പുറത്തോ, അന്തിയായാല്‍ പുറത്തു തന്നെ

– വാതില്‍പ്പടി.

9)അങ്ങുചെന്നു കിരുകിരുക്കും, ഇങ്ങുചെന്നു കിരുകിരുക്കും, പിന്നെ മിണ്ടാതെ മുക്കിലിരിക്കും-

ചൂല്.

10)അങ്ങേതിലെ ചങ്ങാതിക്ക് ഊണുകഴിഞ്ഞാല്‍ പിന്നെ കായ്ക്കാത്ത, പൂക്കാത്ത,ചെടിയുടെ ഇല വേണം-

വെറ്റില.

B) പൊതു അറിവ്

കുട്ടീസ് ഈ ആഴ്ച പൊതു അറിവിൽ കഴിഞ്ഞ ആഴ്ച്ചകളുടെ തുടർച്ചയായി നാനാർത്ഥം അറിയാം… ട്ടോ.

നാനാർത്ഥം

പിടി – പെണ്ണാന, മുഷ്ടി, സ്വാധീനം

ബലം – ശക്തി, ശരീരം, ഇന്ദ്രിയം

ഭേദം – ക്ഷേമം, സ്വർണ്ണം, കറുത്ത ആമ്പൽ

ഭൂതം – ഭവിച്ചത്, കഴിഞ്ഞകാലം, പഞ്ചഭൂതം

മണി – രത്നം, നാഴികമണി, കൃഷ്ണമണി

മതം – അഭിപ്രായം, വിശ്വാസം, സിദ്ധാന്തം

മാനം – അളവ്, ആകാശം, അഭിമാനം

മൃഗം – മാൻ, നാൽക്കാലികൾ, ചന്ദ്രന്റെ കളങ്കം.

യുഗം – നുകം, ജോഡി, തലമുറ

യോഗം – പ്രയോഗം, അവസരം, കഴിവ്

C) പണ്ടേ പ്രചാരത്തിലുള്ള പദ്യങ്ങൾ(13)

ഹായ് കുട്ടീസ് ഈ വാരവും നമുക്ക് പണ്ടേ നാട്ടിൽ പാടുന്ന കുട്ടി കവിതകളിൽ ഒന്ന് കൂടി വായിക്കാം… ട്ടോ ഈ ആഴ്ചയിൽ കുറുക്കനെ ക്കുറിച്ചൊരു കവിതയാണ്‌ കുട്ടീസ്.

കുറുക്കൻ

കുഞ്ഞിക്കുഞ്ഞിക്കുറുക്കാ…
നിനക്കെന്തു ജോലി?

പാടത്ത് പോകണം
ഞണ്ടിനെ പിടിക്കണം
കറുമുറു തിന്നണം
പാറമേൽ കേറണം
മാനം നോക്കണം
കൂവി വിളിക്കണം
കൂ… കൂ… കൂ…

D) സ്റ്റാമ്പിന്റെ കഥ (22)

കൈത്തറി

1980-ൽ പോസ്റ്റൽ ഡിപ്പാർട്ട് മെന്റ് പുറത്തിറക്കിയ 2 രൂപ മുഖവിലയുള്ള സ്റ്റാമ്പിൽ ഒരു കൈത്തറിനെയ്ത്ത് തൊഴിലാളിയെ ചിത്രീകരിച്ചിരിക്കുന്നു.

ഇന്ത്യയിൽ, കാർഷിക മേഖല കഴിഞ്ഞാല്‍ 43 ലക്ഷത്തിലേറെ പേര്‍ക്ക് നെയ്ത്തിലും അനുബന്ധ ജോലികളിലുമായി പ്രത്യക്ഷമായോ പരോക്ഷമായോ തൊഴില്‍ നല്‍കുന്ന മേഖലയാണ് കൈത്തറി മേഖല. രാജ്യത്തെ തുണി ഉത്പാദനത്തിന്റെ ഏകദേശം 15 ശതമാനവും ഈ മേഖലയില്‍ നിന്നാണ്. മാത്രമല്ല, രാജ്യത്തെ കയറ്റുമതി വരുമാനത്തിലും പ്രസ്തുത മേഖലയുടെ സംഭാവന വിലപ്പെട്ടതാണ്. യഥാർത്ഥത്തിൽ കൈത്തറി തുണിത്തരങ്ങളില്‍ ലോകത്തിലെ 95 ശതമാനവും ഉല്പാദിപ്പിക്കപ്പെടുന്നത് ഇന്ത്യയിലാണ്

കേരളത്തിന്റെ പരമ്പരാഗത വ്യവസായങ്ങളില്‍ തൊഴിലവസരങ്ങള്‍ സൃഷ്ടിക്കുന്ന കാര്യത്തില്‍ കയര്‍ മേഖല കഴിഞ്ഞാല്‍ രണ്ടാം സ്ഥനം കൈത്തറി മേഖലയ്ക്കാണ്. സംസ്ഥാനത്തെ കൈത്തറി മേഖല പ്രധാനമായും തിരുവനന്തപുരം, കണ്ണൂര്‍ ജില്ലകളിലും കോഴിക്കോട്, പാലക്കാട്, തൃശ്ശൂര്‍, എറണാകുളം, കൊല്ലം, കാസര്‍കോട് ജില്ലകളുടെ ചില ഭാഗങ്ങളിലുമാണ് പ്രവര്‍ത്തിക്കുന്നത്. ഈ മേഖലയിലെ 96 ശതമാനം തറികളും സഹകരണ മേഖലയിലാണ് പ്രവര്‍ത്തിക്കുന്നത്. ബാക്കി 4 ശതമാനം വ്യവസായ സംരംഭകരുടെ കൈകളിലാണ്. ഫാക്ടറി മാതൃകയിലും കുടില്‍ മാതൃകയിലുമുള്ള സംഘങ്ങള്‍ ഉള്‍ക്കൊള്ളുന്നതാണ്.