ഇന്ന് പുലർച്ചെ 01.34 ന് പയ്യന്നൂരിനടുത്ത് ഭൂചലനം ഉണ്ടായിട്ടുണ്ട്. തീവ്രത മൂന്നിനടുത്ത് ആണ്. ചെറു ഭൂചലനങ്ങൾ അറബിക്കടലിൽ കേരളതീരത്തോട് ചേർന്ന് നടന്നതായും സൂചനയുണ്ട്. ഇക്കാര്യങ്ങളിൽ സ്ഥിരീകരണം വന്നിട്ടില്ല. കേരളതീരത്ത് സുനാമി മുന്നറിയിപ്പ് ഇല്ല എന്ന് സംസ്ഥാന ദുരന്തനിവാരണ അതോറിറ്റി അറിയിച്ചിട്ടുണ്ട്.
കടലിൽ സംഭവിച്ചത് ചെറിയ ഭൂചലനമായതിനാൽ ആശങ്കപ്പെടേണ്ട സാഹചര്യമില്ല. കാസർകോട് ജില്ലയിലും ഭൂചലനം അനുഭവപ്പെട്ടു. വെള്ളരിക്കുണ്ട് താലൂക്കിന്റെ പരിധിയിൽ വരുന്ന മേഖലകളിലാണ് നേരിയ പ്രകമ്പനവും മുഴക്കവും അനുഭവപ്പെട്ടത്. കോടോം ബേളൂർ, വെസ്റ്റ് എളേരി, കിനാനൂർ കരിന്തളം, ബളാൽ പഞ്ചായത്തുകളിലാണ് മുഴക്കം അനുഭവപ്പെട്ടതെന്നാണ് റിപ്പോർട്ട്.
മുഴക്കമുണ്ടായതിന് പിന്നാലെ വളർത്തുമൃഗങ്ങൾ അസ്വസ്ഥത പ്രകടിപ്പിച്ചതായും പ്രദേശവാസികൾ പറഞ്ഞു.
അതേസമയം, സുനാമി മുന്നറിയിപ്പുകളോ മത്സ്യത്തൊഴിലാളികൾക്കുള്ള മുന്നറിയിപ്പുകളോ പുറപ്പെടുവിച്ചിട്ടില്ലെന്നും അത്തരത്തിലുള്ള വാർത്തകൾ വ്യാജമാണെന്നും സംസ്ഥാന ദുരന്തനിവാരണ അതോറിറ്റി വ്യക്തമാക്കിയിട്ടുണ്ട്. അതിനാൽ തന്നെ ആശങ്കപ്പെടേണ്ട സാഹചര്യമില്ലെന്നും അധികൃതർ അറിയിച്ചു.
