🌹 “ഇന്നത്തെ ചിന്താവിഷയം” 🌹 – 2024 | സെപ്റ്റംബർ 02 | തിങ്കൾ ✍ പ്രൊഫസ്സർ എ.വി. ഇട്ടി മാവേലിക്കര

കണക്കു നോക്കാത കൊടുക്കാൻ ആകട്ടെ
————————————————————-

‘ദ കപ്പ് ‘ എന്ന ചലച്ചിത്രം, ഫുട്ബോൾ കമ്പം തലയ്ക്കു പിടിച്ച, ഒരു ബുദ്ധാശ്രമത്തിലെ കുട്ടികളുടെ ചെയ്തികളെ ആധാരമാക്കിയാണ് നിർമ്മിച്ചിരിക്കുന്നത്. ലോക കപ്പ് കാണാൻ അവർ ഒരു ടെലിവിഷൻ വിലയ്ക്കു മേടിച്ചു. കയ്യിലുള്ള പണം തികയാഞ്ഞിട്ട് ഒരാളുടെ വാച്ച് പണയം വയ്ക്കേണ്ടി വന്നു. വാച്ച് പണയം വച്ച കുട്ടി മാത്രം കളി നടക്കുമ്പോൾ ദുഃഖിതനായിരുന്നു. അക്കൂട്ടത്തിലെ ഒരു കുസൃതിക്കുട്ടൻ അതു ശ്രദ്ധിച്ചു. വാച്ച് തിരികെ വാങ്ങാൻ തൻ്റെ കയ്യിലുണ്ടായിരുന്നതെല്ലാം, ആവശ്യമുള്ളതിൻ്റെ ഇരട്ടി, വാരിക്കെട്ടി അവൻ പുറത്തേക്കോടുമ്പോൾ, ആശ്രമാധിപൻ്റെ മുന്നിൽ വന്നുപെട്ടു. അദ്ദേഹം അവനെ ചേർത്തു പിടിച്ചുകൊണ്ടു പറഞ്ഞു: “നിനക്ക് കണക്കൊട്ടും അറിയില്ല. അതു കൊണ്ടു നീ ഒരു സന്യാസിയാകണം”.

കണക്കു പുസ്തകങ്ങൾക്കു വികാരങ്ങളില്ല. ലാഭം, നഷ്ടം, സമ്പാദ്യം തുടങ്ങിയ വാക്കുകൾ പണത്തിൻ്റെ പര്യായങ്ങളായി മാത്രം വിശകലനം ചെയ്യുമ്പോൾ, നമുക്കു നഷ്ടമാകുന്നതു ചിലതുണ്ട്: സ്നേഹം, കരുതൽ, കരുണ്യം ഇവ. എല്ലാ നഷ്ടങ്ങളും എപ്പോഴും, പണം കൊണ്ടു നികത്താനാവില്ല.

കണക്കു നോക്കാതെ കൊടുക്കുന്നവരാണ് സമൂഹത്തിൻ്റെ നേട്ടം. അവരവർക്ക് ആദായം നൽകുന്ന പദ്ധതികളേക്കാൾ അന്യർക്ക് അനുഗ്രഹമാകുന്ന പ്രവർത്തനങ്ങളാണ് ഒരാളുടെ ജീവിതത്തെ ധന്യമാക്കുന്നത്. സ്വന്തമായി ചില ലാഭങ്ങൾ വേണ്ടെന്നു വയ്ക്കുന്നവരാണ് സ്പൂഹത്തിന് ലാഭമുണ്ടാക്കിക്കൊടുക്കുന്നവർ.

ആഘോഷങ്ങൾക്കും, ആരവങ്ങൾക്കുമിടയിലെ ഒറ്റപ്പെട്ട നൊമ്പരങ്ങൾ അവഗണിക്കപ്പെടരുത്. ഒരായിരം ആർപ്പുവിളികൾക്കിടയിലും, ഒരാളുടെ നിലവിളി, അതു നിശബ്ദമാണെങ്കിൽപ്പോലും, തിരിച്ചറിയുന്നവരിലാണ് ദൈവത്തിൻ്റെ പ്രതീക്ഷ.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര