📱വാർത്തകൾ ഒറ്റനോട്ടത്തിൽ📱 – 2026 | ഫെബ്രുവരി 06 | വെള്ളി ✍ കപിൽ ശങ്കർ

🔹പാതിവില തട്ടിപ്പില്‍ ബിജെപി നേതാവ് എ. രാധാകൃഷ്ണൻ അടക്കമുള്ളവർക്കെതിരെ വീണ്ടും കേസ്. തൃക്കാക്കര പോലീസാണ് കേസെടുത്തത്. ചെങ്ങമനാട് സ്വദേശിയുടെ പരാതിയിലാണ് കേസ്.
പാതി വിലയ്ക്ക് ഇരുചക്ര വാഹനം നൽകാമെന്ന് പ്രലോഭിപ്പിച്ച് പണം കൈപ്പറ്റിയ ശേഷം രണ്ട് വർഷം പിന്നിട്ടിട്ടും തുകയോ വാഹനമോ നൽകാതെ കബളിപ്പിച്ചതായിട്ടാണ് പരാതി. ചെങ്ങമനാട് സ്വദേശി സുമേഷ്, വാഴക്കാല സ്വദേശികളായ എ.എൻ. രാധാകൃഷ്ണൻ, രൂപേഷ് മേനോൻ, കെ.ടി. ബിനീഷ് എന്നിവർക്കെതിരെയാണ് പോലീസ് കേസെടുത്തിരിക്കുന്നത്.

🔹ശബരിമലയിൽ ആടിയ ശിഷ്ടം നെയ്യിൽ ക്രമക്കേട് നടത്തിയ കേസിൽ അറസ്റ്റിലായ 13-ാം പ്രതി കെ.ആർ. സുനിൽകുമാർ പോറ്റിയുടെ വീട്ടിൽ വിജിലൻസ് സംഘം പരിശോധന നടത്തി. സുനിൽകുമാർ വാടകയ്ക്ക് താമസിച്ചിരുന്ന പിറവം പാഴൂരിലെ വീട്ടിലാണ് പരിശോധന നടത്തിയത്.
പിറവം പോലീസ് സ്റ്റേഷന് സമീപവും പിന്നീട് പാഴൂരിലും സുനിൽകുമാർ പോറ്റി വാടകയ്ക്ക് താമസിച്ചിരുന്നുവെന്ന വെളിപ്പെടുത്തലിനെ തുടർന്നാണ് വിജിലൻസ് സംഘം പിറവത്തെത്തിയത്. ബുധനാഴ്ച വൈകുന്നേരം ആറോടെയാണ് വിജിലൻസ് സംഘം പാഴൂരിലെത്തിയത്. പിറവം പോലീസിനെ പോലും അറിയിക്കാതെ അതീവ രഹസ്യമായി എത്തിയ സംഘം നാല് മണിക്കൂറോളം വീട്ടിൽ പരിശോധന നടത്തി. വീട്ടിൽ രണ്ട് കുട്ടികൾ മാത്രമേ അപ്പോൾ ഉണ്ടായിരുന്നുള്ളു.സുനിൽകുമാർ പോറ്റി എന്ന പേരിൽ അറിയപ്പെടുന്ന സുനിൽകുമാർ ഭാര്യയും മൂന്ന് കുട്ടികളുമൊത്താണ് പാഴൂർ ക്ഷേത്രത്തിന് സമീപം വാടകയ്ക്ക് താമസിച്ചിരുന്നത്. രണ്ട് കൊല്ലത്തോളം ക്ഷേത്രത്തോട് ചേർന്ന വാടക വീട്ടിൽ താമസിച്ചു. പിന്നീട് ഒരു കൊല്ലം മുൻപാണ് ക്ഷേത്രത്തിനും മാമ്മലക്കവലയ്ക്കുമിടയിലുള്ള ഇപ്പോഴത്തെ വീട്ടിലേക്ക് മാറിയത്.ആടിയ ശിഷ്ടം നെയ്യിലെ ക്രമക്കേട് ദേവസ്വം വിജിലൻസ് വിഭാഗമാണ് കണ്ടെത്തിയത്. ആടിയ ശിഷ്ടം നെയ്യ് പായ്ക്കറ്റുകൾ വിറ്റുകിട്ടിയ തുക മുഴുവനായും കൗണ്ടറിലെ ജോലിക്കാർ ബോർഡിൽ അടച്ചില്ലെന്നും സ്റ്റോക്കിൽ ക്രമക്കേട് നടത്തിയെന്നുമാണ് വിജിലൻസ് കണ്ടെത്തിയത്. ഈ വകയിൽ ബോർഡിന് 36,24,400 രൂപയുടെ നഷ്ടമുണ്ടായതായും വിജിലൻസ് കണ്ടെത്തി.
വിജിലൻസ് റിപ്പോർട്ടിനെ തുടർന്ന് ജനുവരി 14നാണ് സുനിൽകുമാറിനെ സസ്പെൻഡ് ചെയ്തത്. കഴിഞ്ഞ ദിവസം പത്തനംതിട്ട വിജിലൻസ് ഓഫീസിൽ വിളിച്ചുവരുത്തിയാണ് സുനിൽകുമാറിനെ അറസ്റ്റ് ചെയ്തത്.

🔹ബീച്ച് ഹോട്ടലിന്‍റെ പാർക്കിംഗിൽനിന്ന് ബൈക്ക് മോഷ്ടിച്ച പ്രതി പിടിയിൽ. മോഷ്ടിച്ച ബൈക്ക് അപകടത്തിൽപ്പെട്ടതോടെയാണ് യുവാവ് പിടിയിലായത്. പാലക്കാട് മേലേപട്ടാമ്പി സ്വദേശി കുറുപ്പംതൊടി വീട്ടിൽ മുഹമ്മദ് റഫീക്ക് (35) ആണ് പിടിയിലായത്.
ഫെബ്രുവരി നാലിന് കോഴിക്കോട് ബീച്ച് ഹോട്ടലിന്‍റെ പാർക്കിംഗിൽ എലത്തൂർ സ്വദേശി അക്ഷയ് കുമാർ നിർത്തിയിട്ട ബൈക്കാണ് മുഹമ്മദ് റഫീക്ക് കടത്തിക്കൊണ്ടുപോയത്.
അക്ഷയ് കുമാർ നൽകിയ പരാതിയിൽ ടൗൺ പോലീസ് കേസ് രജിസ്റ്റർ ചെയ്ത് അന്വേഷണം നടത്തുകയായിരുന്നു. സംഭവസ്ഥലത്തെയും സമീപ പ്രദേശങ്ങളിലെയും നിരവധി സിസിടിവി ദൃശ്യങ്ങൾ പരിശോധിച്ച് അന്വേഷണം നടത്തുന്നതിനിടെ പ്രതി മോഷണം നടത്തിയ ബൈക്കുമായി ചാലപ്പുറത്ത് വച്ച് അപകടത്തിൽപ്പെടുകയായിരുന്നു.

🔹വയനാട്ടിൽ കാറിന് തീപിടിച്ച് യുവാവ് മരിച്ച സംഭവം ആത്മഹത്യ ശ്രമമെന്ന് പ്രാഥമിക നിഗമനം. കണ്ണൂർ ഇരിട്ടി സ്വദേശി സജീർ(42) ആണ് മരിച്ചത്. വാഹനത്തിലുണ്ടായിരുന്ന സജീറിന്‍റെ ഭാര്യയും മൂന്ന് കുട്ടികളും പൊള്ളലേറ്റ് ചികിത്സയിലാണ്.
വ്യാഴാഴ്ച രാത്രിയാണ് സംഭവം. സജീറിന്‍റെ ഭാര്യയ്ക്ക് 50 ശതമാനത്തോളം പൊള്ളലേറ്റതായാണ് വിവരം. ഇയാളുടേതായി ഒരു വീഡിയോ പുറത്തുവന്നിട്ടുണ്ടെന്നും റിപ്പോർട്ടുകളുണ്ട്. തനിക്ക് വലിയ സാമ്പത്തിക പ്രതിസന്ധികളുണ്ടെന്നതാണ് ദൃശ്യങ്ങളുടെ ഉള്ളടക്കം. പോണ്ടിച്ചേരി രജിസ്ട്രേഷനിലുള്ള കാറാണ് തീപിടിച്ചത്. മാനന്തവാടി എരുമത്തെരുവിലെ ഒരു വീട്ടിലേക്ക് കാറിടിച്ച് കയറുകയായിരുന്നു. പിന്നാലെയാണ് വാഹനത്തിന് തീപിടിച്ചതെന്ന് നാട്ടുകാർ പറയുന്നു.

🔹ഒൻപതു വയസുകാരിയെ പീഡിപ്പിച്ച സംഭവത്തിൽ ആർഎസ്എസ് പ്രവർത്തകൻ അറസ്റ്റിൽ. മുക്കം തേച്ച്യാട് മുറിയൻ കണ്ടത്തിൽ ബാബുരാജ് (50) ആണ് അറസ്റ്റിലായത്.സ്കൂളിൽ നടത്തിയ കൗൺസിലിങ്ങി
ലാണ് വിദ്യാർഥിനി പീഡന വിവരം തുറന്നുപറഞ്ഞത്. മുൻപും പല തവണ കുട്ടി ഇയാളിൽ നിന്ന് പീഡനത്തിന് ഇരയായി
ട്ടുണ്ട് എന്നാണ് അന്വേഷണത്തിൽ കണ്ടെത്തിയത്. കോടതിയിൽ ഹാജരാ
ക്കിയ പ്രതിയെ റിമാൻഡ് ചെയ്തു.

🔹ആറ്റിങ്ങൽ സ്വദേശി യുകെയിൽ തടാകത്തിൽ മരിച്ച നിലയിൽ. അവനവഞ്ചേരി സ്മൃതിയിൽ ജയകുമാർ ഷിംന ദമ്പതികളുടെ മൂത്ത മകൻ വിഷ്ണു ജയകുമാറിനെ(26)യാണ് യുകെയിലെ സ്വാൻ വൈൽ തടാകത്തിൽ മരിച്ച നിലയിൽ കണ്ടെത്തിയത്. ശനിയാഴ്ചയാണ് വിഷ്ണു തന്‍റെ മുൻ സുഹൃത്തുക്കളുമായി പുറത്തേയ്ക്കു പോയത്.
ഞായറാഴ്ച വൈകിയിട്ടും തിരിച്ചു താമസ സ്ഥലത്ത് എത്താതിരുന്നതിനെ ത്തുടർന്നു കൂടെ താമസിക്കുന്നവർ തൊട്ടടുത്ത പോലീസ് സ്റ്റേഷനിൽ പരാതി നൽകുകയായിരുന്നു. തിങ്കളാഴ്ച വിഷ്ണുവിനോടപ്പം യാത്ര ചെയ്ത സുഹൃത്ത് തന്നെയാണ് വിവരം വീട്ടിൽ വിളിച്ചറിയിച്ചത്. പിന്നീട് ചൊവ്വാഴ്ച പൊലീസ് സ്വാൻ തടാകത്തിൽനിന്നു വിഷ്ണുവിന്‍റെ മൃതദേഹം കണ്ടെത്തുകയായിരുന്നു.

🔹അർധരാത്രിയിൽ റോഡ് വെട്ടിപ്പൊളിച്ച് കുടിവെള്ള പൈപ്പ് തകർത്ത ദേശീയപാത കരാറുകാർക്കെതിരെ നാട്ടുകാരുടെ പ്രതിഷേധം.തൃത്തല്ലൂർ ഏഴാംകല്ലിൽ നിന്നുള്ള പുതിയ ദേശീയപാതയുടെ ബൈപ്പാസ് ക്രോസ് ചെയ്യുന്ന തൃത്തല്ലർ കിഴക്കേ ടിപ്പുസുൽത്തൻ റോഡാണ് അർധരാത്രി ഒരു മുന്നറിയിപ്പുമില്ലാതെ ദേശീയപാത 66 നിർമാണ കരാറുകമ്പനിക്കാർ ജെസിബികൾ ഉപയോഗിച്ച് വെട്ടിപ്പൊളിച്ചത്.
ബസ് സർവിസുള്ള റോഡിലൂടെയാണ് ആശുപത്രി, സ്കൂൾ, റേഷൻകടകൾ, ബാങ്ക്, ആരാധനാലയങ്ങൾ, മറ്റു വ്യാപാര സ്ഥാപനങ്ങളിലേക്കുള്ള യാത്രക്കാരും പോയിരുന്നത്. രാവിലെ ഇതുവഴി പോയിരുന്നവരാണ് റോഡ് വെട്ടിപ്പൊളിച്ചത് കണ്ട് പകച്ചുനിന്നുപോയത്.
ജെസിബി ഉപയോഗിച്ച് റോഡ് വെട്ടിപ്പൊളിച്ചപ്പോൾ റോഡിന് അടിയിലൂടെ വലിച്ചിരുന്ന വാട്ടർ അതോറിറ്റിയുടെ പൈപ്പുകളും പൊട്ടി കുടിവെള്ളം കുത്തിയൊഴുകുകയായിരുന്നു.

🔹ചെലവ് കുറഞ്ഞതും പരിസ്ഥിതി സൗഹൃദവുമായ നഗര ഗതാഗത മാതൃകയായ കൊച്ചി വാട്ടർ മെട്രോ (കെഡബ്ല്യുഎം) പദ്ധതി രാജ്യത്തെ 21 സ്ഥലങ്ങളിൽ നടപ്പാക്കാനൊരുങ്ങുന്നു. ഇതിന്‍റെ ഭാഗമായി ഉത്തർപ്രദേശ്, ബീഹാർ, അസം, ഗുജറാത്ത്, ജമ്മു കശ്മീർ എന്നിവിടങ്ങളിലെ പത്ത് നഗരങ്ങളിലെ സാധ്യതാ പഠനങ്ങൾ ഇതിനകം പൂർത്തിയായി. മറ്റ് പത്ത് നഗരങ്ങളിലെ സാധ്യതാ പഠനങ്ങൾ പുരോഗമിക്കുകയാണ്.മുംബൈയിലെ വാട്ടർ മെട്രോ സേവനത്തിനായി വിശദമായ പദ്ധതി റിപ്പോർട്ട് (ഡിപിആർ) തയാറാക്കുന്നതിനുള്ള ടെൻഡർ കൊച്ചി വാട്ടർ മെട്രോയ്ക്ക് ലഭിച്ചു.കേന്ദ്രത്തിന്‍റെ ഏറ്റവും പുതിയ സാമ്പത്തിക സർവേയിൽ കാര്യക്ഷമമായ നഗര അടിസ്ഥാന സൗകര്യമായി പ്രശംസിക്കപ്പെട്ട കെഡബ്ല്യുഎം വൈപ്പിൻ, മട്ടാഞ്ചേരി, ബോൾഗാട്ടി തുടങ്ങിയ കൊച്ചി നഗരത്തിന് ചുറ്റുമുള്ള 10 ദ്വീപുകളിലെ താമസക്കാരുടെ യാത്രാ ദുരിതങ്ങൾ പരിഹരിക്കുന്നു.

🔹തലസ്ഥാനത്ത് നടനും നിർമാതാവുമായ മണിയൻ പിള്ള രാജു ഓടിച്ച ആഢംബര കാറിടിച്ച് രണ്ട് ബൈക്ക് യാത്രക്കാർക്ക് ഗുരുതര പരിക്ക്. വ്യാഴാഴ്ച രാത്രി 10ഓടെ വഴുതക്കാട് ശ്രീമൂലം ക്ലബിന് മുൻപിലായിരുന്നു അപകടം.
അപകടത്തിന് ശേഷം മണിയൻ പിള്ള രാജു വാഹനം നിർത്താതെ പോകുകയായിരുന്നു. നിവേദിത് കൃഷ്ണ, സൂരജ് എന്നീ യുവാക്കൾക്കാണ് അപകടത്തിൽ പരിക്കേറ്റത്. നിവേദിതിന് കാലുകൾക്കും സൂരജിന് നട്ടെല്ലിനും പൊട്ടലുണ്ടെന്നുമാണ് ലഭിക്കുന്ന വിവരം. ഇരുവരും സ്വകാര്യ മെഡിക്കൽ കോളജ് ആശുപത്രിയിൽ ചികിത്സയിലാണ്.

🔹ദേശീയപാത 66 തൃപ്രയാർ ബൈപാസിൽ വലപ്പാട് ആനവിഴുങ്ങി മേൽപ്പാലത്തിനു സമീപം കാർ ഡിവൈഡറിലും ഫ്രിക്്ഷൻ സ്ലാബിലും ഇടിച്ചുമറിഞ്ഞ് ഡ്രൈവർക്കു ഗുരുതരമായി പരിക്കേറ്റു. വ്യാഴാഴ്ച ഉച്ചയ്ക്ക് രണ്ടോടെ നടന്ന അപകടത്തിൽ കാർ പൂർണമായും തകർന്നു.
വടക്കുഭാഗത്തുനിന്ന് അമിതവേഗത്തിൽ വന്ന കാറാണ് റോഡിനു കുറുകെ വച്ചിരുന്ന ഫ്രിക്്ഷൻ സ്ലാബിലും ഡിവൈഡറിലും ഇടിച്ചത്. പാലത്തിൽ നിർമാണജോലികൾ നടക്കുന്നതിനാലാണ് ഗതാഗതം വഴി തിരിച്ചുവിടുന്നതുവേണ്ടി ഫ്രിക്്ഷൻ സ്ലാബുകൾ സ്ഥാപിച്ചിരുന്നത്.

🔹രാഷ്‌ട്രീയ വിരോധത്തിന്‍റെ പേരിൽ നിർധന കുടുംബം നടത്തുന്ന തട്ടുകട ഇരിട്ടി നഗരസഭ പൂട്ടിച്ചതായി യുഡിഎഫ് നേതാക്കൾ ആരോപിച്ചു. ഇരിട്ടി കീഴൂർകുന്നിൽ ചായക്കട എന്ന പേരിൽ തുടങ്ങിയ തട്ടുകടയാണ് നഗരസഭ അധികൃതർ ഇടപെട്ട് പൂട്ടിച്ചത്. തട്ടുകട തുടങ്ങുന്നതിൽ പരാതി ലഭിച്ചിട്ടുണ്ടെന്നും അതിനാലാണ് പൂട്ടാൻ നിർദേശിച്ചതെന്നുമാണ് നഗരസഭാ അധികൃതർ പറയുന്നത്.
എല്ലാ നിബന്ധനകളും പാലിച്ചാണ് കട തുടങ്ങിയതെന്നും, എന്നാൽ കഴിഞ്ഞ നഗരസഭ തെരഞ്ഞെടുപ്പിൽ യുഡിഎഫ് സ്ഥാനാർഥിക്ക് വേണ്ടി പ്രവർത്തിച്ച കാരണത്താലാണ് കട പൂട്ടിക്കാനുള്ള തീരുമാനം ഉണ്ടായതെന്നും യുഡിഎഫ് നേതാക്കൾ പത്രസമ്മേളനത്തിൽ ആരോപിച്ചു.

🔹ജൈവ വൈവിധ്യങ്ങളുടെ കലവറയായ മാടായിപ്പാറയിൽവീണ്ടും തീപിടിത്തം. ഏക്കറുകണക്കിന് ജൈവ വൈവിധ്യങ്ങളും അപൂർവം സസ്യയിടങ്ങളും പുൽമേടുകളും അഗ്നിക്കിരയായി. ഇന്നലെ വൈകുന്നേരം നാലോടെയാണ് മാടായി കോളജിന് മുൻവശത്തെ സ്ഥലത്ത് തീപിടിത്തം ഉണ്ടായത്.
കഴിഞ്ഞ ദിവസം ഉച്ചയോടെ ഇതിന് സമീപത്ത് വൻ അഗ്നിബാധ ഉണ്ടായിരുന്നു. ചൂട് കാറ്റിൽ നിയന്ത്രിക്കാൻ കഴിയാത്ത വിധത്തിൽ തീ പടർന്നത് നാട്ടുകാരിലും പരിഭ്രാന്തി പടർത്തിയിരുന്നു. മാടായിപ്പാറയിൽ അടിക്കടി ഉണ്ടാവുന്ന തീപിടിത്തത്തിനു പിന്നിൽ സാമൂഹ്യ വിരുദ്ധരുടെ ഇടപെടലാണെന്ന ആരോപണം ഉയരുന്നുണ്ട്.

🔹 എറണാകുളത്ത് 21 ഗ്രാം ഹെറോയിനുമായി ഒരാൾ പിടിയിൽ. കഴിഞ്ഞ ദിവസം എക്സൈസിന്‍റെ പിടിയിലായ ലഹരി ശൃംഖലയിലെ പ്രധാന കണ്ണി കബൂത്തർ ഭായിയുടെ സഹായിയാണ് പിടിയിലായ മസൂദ് ആലം.കബൂത്തർ ഭായി എന്ന ജുഹിദുൽ ഇസ്ലാമിന് അസമിൽ നിന്നും ഹെറോയിൻ എത്തിച്ചുകൊടുത്തിരുന്നത് മസൂദ് ആലം ആണെന്ന് എക്സൈസ് വ്യക്തമാക്കി. ആസാമിൽ നിന്നാണ് മസൂദ് ആലം ഹെറോയിൻ എത്തിച്ചുനൽകിയിരുന്നത്.എറണാകുളം കെഎസ്ആർടിസി സ്റ്റാൻഡ് പരിസരത്ത് നിന്നാണ് മസൂദ് ആലം പിടിയിലായത്. ചൈന വൈറ്റ് ഹെറോയിനുമായി കബൂത്തർ ഭായിയെ കൊച്ചിയിൽ നിന്നാണ് എക്സൈസ് പിടികൂടിയത്. കാക്കനാട് ഭാരത് മാത കോളജിന് സമീപമുള്ള വാടക കെട്ടിടത്തിലായിരുന്നു പ്രതിയുടെ താമസം.
16 ഗ്രാം ചൈന വൈറ്റ് ഹെറോയിൻ, ഒരു ഗ്രാം എംഡിഎംഎ, 30 ഗ്രാം കഞ്ചാവ് എന്നിവയാണ് എക്സൈസ് ഇയാളിൽ നിന്ന് പിടികൂടിയത്.

🔹ഐസിസി അണ്ടർ19 പുരുഷ ഏകദിന ലോകകപ്പ് ക്രിക്കറ്റ് കിരീടം റിക്കാർഡ് നേട്ടത്തോടെ ഇന്ത്യ സ്വന്തമാക്കുമോ? അതോ, ഇംഗ്ലണ്ട് രണ്ടാം കപ്പുയർത്തുമോ എന്ന് ഇന്നറിയാം. ഇന്ത്യൻ സമയം ഉച്ചയ്ക്ക് ഒന്നിന് ഹരാരെ സ്പോർട്സ് ക്ലബ് സ്റ്റേഡിയത്തിലാണ് മത്സരം.ചാന്പ്യൻ പട്ടത്തിൽ അഞ്ച് കിരീടവുമായി ഒന്നാമതുള്ള ഇന്ത്യയുടെ ലക്ഷ്യം ആറാം കിരീടമാണ്. ടൂർണമെന്‍റിൽ അപരാജിതരായി മുന്നേറുന്ന ഇന്ത്യക്ക് നിലവിലെ ഫോമിൽ അത് അപ്രാപ്യമല്ല. സെമിയിൽ റിക്കാർഡ് റണ്‍ ചേസിലുടെ അഫ്ഗാനിസ്ഥാനെ പരാജയപ്പെടുത്തി. 311 റണ്‍സ് വിജയലക്ഷ്യം വെറും 41.1 ഓവറിൽ മൂന്നു വിക്കറ്റ് നഷ്ടത്തിൽ ഇന്ത്യ മറികടന്നു. എന്നാൽ, ടൂർണമെന്‍റിൽ അപരാജിതരായി എത്തുന്ന ഇംഗ്ലണ്ട് ശക്തമായ വെല്ലുവിളിയുയർത്തും.
നിലവിൽ അഞ്ച് പ്രാവശ്യം കപ്പുയർത്തിയ ഇന്ത്യ ഒന്നാം സ്ഥാനത്താണ്. രണ്ടാമതുള്ള ഓസ്ട്രേലിയ നാല് പ്രാവശ്യം ചാന്പ്യൻമാരായി. 2000, 2008, 2012, 2018, 2022 വർഷങ്ങളിൽ ഇന്ത്യ കപ്പുയർത്തിയപ്പോൾ 2024ൽ ഫൈനലിൽ കാലിടറി.

🔹പെൻഡുലം എന്ന ചിത്രത്തിനു ശേഷം റെജിൻ എസ്. ബാബു തിരക്കഥ രചിച്ച് സംവിധാനം ചെയ്യുന്ന പുതിയ ചിത്രത്തിന്‍റെ ചിത്രീകരണം കളമശേരിയിൽ ആരംഭിച്ചു.ആറ്റസ് ഫിലിംസ് പ്രൈവറ്റ് ലിമിറ്റഡിന്‍റെ ബാനറിൽ ബസം കാദിയാറാണ് ഈ ചിത്രം നിർമിക്കുന്നത്. എക്സിക്കുട്ടീവ് പ്രൊഡ്യൂസർ – ഡാനിഷ്. ജെമിനി സുധീർ ബാബു ആദ്യ ഭദ്രദീപം തെളിയിച്ചു. നിർമാതാവ് ബസം കാദിയാർ ഫസ്റ്റ് ക്ലാപ്പ് നൽകി.
മിസ്റ്ററി ത്രില്ലർ ജോണറിൽ അവതരിപ്പിക്കുന്ന ഈ ചിത്രത്തിൽ ദിലീഷ് പോത്തൻ, സാഗർ സൂര്യ, രേവതി ശർമ്മ (തലവര ഫെയിം), ജഗദിഷ്, ജനാർദ്ദനൻ, മധുപാൽ, കനി കുസൃതി, മണിക്കുട്ടൻ, ഭഗത് മാനുവൽ, ഷോബി തിലകൻ, ബിനോജ് വില്ല്യ, കാവ്യാ ഭാനു, അനിതാ നായർ, എന്നിവർ പ്രധാന വേഷങ്ങളിലെത്തുന്നു.ശരൺ വേലായുധനാണ് ഛായാഗ്രാഹകൻ. എഡിറ്റിംഗ്- സൂരജ് ഇ.എസ്. പ്രൊഡക്ഷൻ ഡിസൈനർ – അപ്പുണ്ണി സാജൻ. കലാസംവിധാനം – കഥ- ഡോണി കടമ്മനിട്ട, നിബിൻ വർഗീസ്, മേക്കപ്പ് – റോണി വെള്ളത്തൂവൽ, കോസ്റ്റ്യും ഡിസൈൻ – ഗോപിക ഉണ്ണികൃഷ്ണൻ, സ്റ്റിൽസ് – ജിതിൻ എസ്. ബാബു, ചീഫ് അസോസിയേറ്റ് ഡയറക്ടർ – ഏബ്രഹാം സൈമൺ (അബ്രു), ഫിനാൻസ് കൺട്രോളർ – രാഹുൽ പിള്ള, പ്രൊഡക്ഷൻ – മാനേജർ – ജസ്റ്റിൻ ടോണി തോമസ്, പ്രൊഡക്ഷൻ എക്സിക്കുട്ടിവ് – ഷെറിൻ സ്റ്റാൻലി, പ്രൊഡക്ഷൻ കൺട്രോളർ – ജോബ് ജോർജ്. കൊച്ചി പീരുമേട് എന്നിവിടങ്ങളിലായി ഈ ചിത്രത്തിന്‍റെ ചിത്രീകരണം പൂർത്തിയാകും. പിആർഒ-വാഴൂർജോസ്.

💦 ഗുരുജിയുടെ വാക്കുകൾ

ഒരു കാലത്ത് മലയാളിയുടെ ചൂടേറിയ ചര്‍ച്ചകള്‍ക്കും സംവാദങ്ങള്‍ക്കും വേദിയായിരുന്നു ചായക്കടകളും ഗ്രാമീണ വായനശാലകളുമൊക്കെ. എന്നാല്‍ ഇന്ന് സോഷ്യല്‍ മീഡിയ രംഗം കൈയടക്കിയിരിക്കുന്നു. യുവതലമുറ ആശയവിനിമയത്തിനും സംവാദങ്ങള്‍ക്കും സാമൂഹിക മാധ്യമങ്ങളെയാണ് ഉപയോഗപ്പെടുത്തുന്നത്. മുഖ്യധാരാ മാധ്യമങ്ങള്‍ മനപ്പൂര്‍വം തിരസ്‌കരിക്കുന്ന വാര്‍ത്തകള്‍ സോഷ്യല്‍ മീഡിയയില്‍ ‘വൈറലാ’കുന്ന കാലം. മുഖ്യധാര മാധ്യമങ്ങളേക്കാള്‍ വേഗത്തില്‍ സമൂഹത്തിന്റെ സ്പന്ദനങ്ങള്‍ക്കൊത്ത് ചലിക്കാന്‍ സാധിക്കുന്നു എന്നത് തന്നെയാണ് സോഷ്യല്‍ മീഡിയയുടെ പ്രത്യേകത. ആശയ സംവേദനത്തിന്റെ അനന്തമായ ഈ സാധ്യതയെ മുതലെടുത്താണ് പ്രസ്ഥാനങ്ങളും വ്യക്തികളും സോഷ്യല്‍ മീഡിയയെ ഉപയോഗപ്പെടുത്തുന്നത്. സംഗീതവും സിനിമയും സംസ്‌കാരവും മതവുമെല്ലാം ഇത്തരത്തില്‍ ചര്‍ച്ച ചെയ്യപ്പെട്ടുകൊണ്ടിരിക്കുന്നു. ചിലപ്പോൾ മാന്യതയുടെ സകല സീമകളും ലംഘിച്ചു കൊണ്ടുള്ള പോസ്റ്റുകളും വിരളമല്ല. എന്നാല്‍ ദുഃഖകരമായ സംഗതി അതൊന്നുമല്ല. യുവത്വം വിമര്‍ശനങ്ങളോട് പ്രതികരിക്കുന്ന രീതിയാണ് വ്യാകുലപ്പെടുത്തുന്നത്. സഭ്യതയുടെ എല്ലാ അതിര്‍ വരമ്പുകളും ലംഘിച്ചാണ് ഭൂരിഭാഗവും കമന്റുകള്‍ രേഖപ്പെടുത്തുന്നത്.

തയ്യാറാക്കിയത്: കപിൽ ശങ്കർ

6 Likes

📱വാർത്തകൾ ഒറ്റനോട്ടത്തിൽ📱 – 2026 | ഫെബ്രുവരി 06 | വെള്ളി ✍ കപിൽ ശങ്കർ

💦 ഗുരുജിയുടെ വാക്കുകൾ

തയ്യാറാക്കിയത്: കപിൽ ശങ്കർ

“ഡാർക്ക് ട്രാക്കിംഗ്” പൂർത്തിയായി. തീയേറ്ററിലേക്ക് .

പ്രണയ മന്ദാരം – പ്രണയിനികൾക്ക് വിരുന്നുമായി ഒരു ആൽബം.

ഇന്ത്യ- യു എസ് വ്യാപാര കരാർ: സംയുക്ത പ്രസ്താവന അഞ്ച് ദിവസത്തിനകം പുറത്തിറക്കും

LEAVE A REPLY Cancel reply

Most Popular

സി.കെ. നായിഡു ട്രോഫി: ഗോവയ്ക്കെതിരെ കേരളം 255 റൺസിന് പുറത്ത്

ചെങ്ങറ പുനരധിവാസ പദ്ധതി : പട്ടികജാതി വിഭാഗ ഗുണഭോക്താക്കള്‍ സമ്മതപത്രം നല്‍കണം

‘അക്ഷരം ആരോഗ്യം’ പത്തനംതിട്ട ജില്ലയില്‍ തുടക്കം

പത്തനംതിട്ട : 55 തദ്ദേശസ്ഥാപനങ്ങളുടെ വാര്‍ഷിക പദ്ധതി ഭേദഗതിക്ക് അംഗീകാരം

Recent Comments

EDITOR PICKS

സി.കെ. നായിഡു ട്രോഫി: ഗോവയ്ക്കെതിരെ കേരളം 255 റൺസിന് പുറത്ത്

ചെങ്ങറ പുനരധിവാസ പദ്ധതി : പട്ടികജാതി വിഭാഗ ഗുണഭോക്താക്കള്‍ സമ്മതപത്രം നല്‍കണം

‘അക്ഷരം ആരോഗ്യം’ പത്തനംതിട്ട ജില്ലയില്‍ തുടക്കം

POPULAR POSTS

ഇന്ത്യ- യു എസ് വ്യാപാര കരാർ: സംയുക്ത പ്രസ്താവന അഞ്ച് ദിവസത്തിനകം പുറത്തിറക്കും

നൈപുണ്യ വികസനം;ഇന്ത്യയിൽ എഡ്യുക്കേഷൻ ഹബ് ആരംഭിച്ച് ആപ്പിൾ.

ഗ്രീക്ക് തീരത്ത് വൻ ദുരന്തം; കോസ്റ്റ് ഗാർഡ് കപ്പലും കുടിയേറ്റ ബോട്ടും കൂട്ടിയിടിച്ച് 14 മരണം.

POPULAR CATEGORY

ABOUT US

FOLLOW US