📱വാർത്തകൾ ഒറ്റനോട്ടത്തിൽ📱 – 2026 | ഫെബ്രുവരി 01 | ഞായർ ✍ കപിൽ ശങ്കർ

🔹ഇന്ത്യയുടെ ചരിത്രത്തിൽ പുതിയൊരു അധ്യായം കുറിച്ചുകൊണ്ട് 2026-ലെ കേന്ദ്ര ബജറ്റ് ധനമന്ത്രി നിർമ്മല സീതാരാമൻ ഇന്ന് അവതരിപ്പിക്കും. കഴിഞ്ഞ 75 വർഷമായി ബജറ്റ് അവതരണത്തിൽ തുടർന്നുപോരുന്ന കീഴ് വഴക്കങ്ങൾ തിരുത്തിക്കൊണ്ട്, ബജറ്റിന്‍റെ രണ്ടാം ഭാഗമായ ‘പാർട്ട്-ബി’ ഇന്ത്യയുടെ വരാനിരിക്കുന്ന സാമ്പത്തിക ഭാവിയുടെ സമഗ്രമായ റോഡ്‌മാപ്പ് അവതരിപ്പിക്കാനായി മന്ത്രി ഉപയോഗിക്കുമെന്നാണ് റിപ്പോർട്ടുകൾ.
സാധാരണയായി ബജറ്റിന്‍റെ ഒന്നാം ഭാഗത്തിൽ പദ്ധതി പ്രഖ്യാപനങ്ങളും രണ്ടാം ഭാഗത്തിൽ (നികുതി നിർദ്ദേശങ്ങളുമാണ് ഉണ്ടാകാറുള്ളത്. എന്നാൽ ഇത്തവണ, ഇന്ത്യയുടെ ഹ്രസ്വകാല ലക്ഷ്യങ്ങളും ദീർഘകാല സാമ്പത്തിക കാഴ്ചപ്പാടുകളും വിശദീകരിക്കാൻ പാർട്ട്-ബി ഉപയോഗിക്കും. ആഗോള വിപണിയിലെ തിരിച്ചടികളെ പ്രതിരോധിക്കാനുള്ള ‘താരിഫ് പ്രൂഫ്’ നയങ്ങളും ഈ ഭാഗത്താകും വിശദീകരിക്കുക. ധനമന്ത്രി നിർമല സീതാരാമന്‍റെ തുടർച്ചയായ ഒൻപതാം ബജറ്റ് അവതരണമാണിത്. ഇത്തവണയും പേപ്പർ രഹിത ബജറ്റാണ് ധനമന്ത്രി അവതരിപ്പിക്കുക.

🔹കോൺഫിഡന്‍റ് ഗ്രൂപ്പ് ഉടമ സി.ജെ. റോയ് ജീവനൊടുക്കിയ സംഭവത്തിൽ ആദായനികുതി ഉദ്യോഗസ്ഥരെ ചോദ്യം ചെയ്യാൻ അന്വേഷണ സംഘം. റോയ്‌യുടെ മരണത്തെ കുറിച്ച് അന്വേഷിക്കാൻ കർണാടക സർക്കാർ പ്രത്യേക അന്വേഷണ സംഘം രൂപീകരിച്ചിരുന്നു.വെസ്റ്റ് സോൺ ജോയിന്‍റ് പോലീസ് കമ്മീഷണർ സി. വംശി കൃഷ്ണയ്ക്കാണ് എസ്ഐടിയുടെ ചുമതല. സൗത്ത് ഡിവിഷൻ ഡെപ്യൂട്ടി പോലീസ് കമ്മീഷണർ ലോകേഷ് ജഗൽസാറാണ് മുഖ്യ അന്വേഷണ ഉദ്യോഗസ്ഥൻ.ഇന്ന് ആദായനികുതി ഉദ്യോഗസ്ഥരെ ചോദ്യം ചെയ്യാനുള്ള നടപടികളിലേക്ക് അന്വേഷണസംഘം കടക്കുമെന്നാണ് റിപ്പോർട്ടുകൾ. റോയ് ജീവനൊടുക്കാൻ കാരണം ആദായനികുതി വകുപ്പ് ഉദ്യോഗസ്ഥരുടെ സമ്മർദം ആണെന്നാണ് കുടുംബത്തിന്‍റെ ആരോപണം.ഇതുസംബന്ധിച്ച് സഹോദരൻ സി.ജെ. ബാബു പോലീസിൽ പരാതി നൽകിയിട്ടുണ്ട്. എന്നാൽ, എല്ലാ നിയമങ്ങളും പാലിച്ചാണ് റെയ്ഡ് നടന്നതെന്ന് ഉദ്യോഗസ്ഥര്‍ അവകാശപ്പെടുന്നു. അന്വേഷണവുമായി ബന്ധപ്പെട്ട് റോയിയുടെ മൊഴിയെടുപ്പ് ഉള്‍പ്പെടെയുള്ള നടപടികള്‍ സ്വതന്ത്ര സാക്ഷിയുടെ സാന്നിധ്യത്തില്‍ വ്യാഴാഴ്ച പൂര്‍ത്തിയാക്കിയിരുന്നുവെന്നും ഉദ്യോഗസ്ഥർ അവകാശപ്പെട്ടു.

🔹 ഒരുവശത്ത് ബിസിനസ് സാമ്രാജ്യം കെട്ടിപ്പടുത്തപ്പോൾ ആത്മവിശ്വാസത്തിന്‍റെയും പ്രതീക്ഷയുടെയും സന്ദേശങ്ങൾ പങ്കുവച്ച് സമൂഹമാധ്യമങ്ങളിലും സി.ജെ. റോയ് സജീവമായിരുന്നു. രണ്ടു ലക്ഷത്തിലേറെ പേരാണ് ഇൻസ്റ്റഗ്രാമിൽ അദ്ദേഹത്തെ പിന്തുടർന്നിരുന്നത്. ഒരു രൂപപോലും കടമില്ലാതെയാണു തന്‍റെ ബിസിനസ് മുന്നോട്ടുപോകുന്നതെന്ന് അഭിമുഖങ്ങളിലെല്ലാം അഭിമാനത്തോടെ അദ്ദേഹം പറയുമായിരുന്നു.
പ്രമുഖ ചാനലുകളുടെ റിയാലിറ്റി ഷോകളുടെയും സംഗീതമത്സരങ്ങളുടെയും മുഖ്യസ്പോൺസറായി നിരവധി പേർക്കാണ് അദ്ദേഹം പുതുജീവിതം നൽകിയത്.
ആത്മവിശ്വാസത്തോടെ കർമമേഖലയിൽ കുതിച്ചുയരവേ അദ്ദേഹത്തിനുണ്ടായ അപ്രതീക്ഷിത ദുരന്തം വ്യവസായ ലോകത്തെയാകെ ഞെട്ടിച്ചിരിക്കുകയാണ്. റോയ്‌യുടെ അപ്രതീക്ഷിത വേർപാടിന്‍റെ ഞെട്ടലിൽനിന്ന് റിയൽ എസ്റ്റേറ്റ് മേഖല ഇനിയും മുക്തമായിട്ടില്ല.
ആദായനികുതി വകുപ്പ് ഉദ്യോഗസ്ഥർക്കെതിരേ ഗുരുതരമായ ആരോപണങ്ങളാണു റോയ്‌യുടെ കുടുംബം ഉന്നയിച്ചത്. ഐടി ഉദ്യോഗസ്ഥർ ഡിസംബറിൽ രണ്ടു തവണ ഓഫിസ് സന്ദർശിച്ചിരുന്നു. റെയ്ഡുകൾക്കിടെ റോയ് രേഖകൾ സമർപ്പിക്കുകയും ചെയ്തിരുന്നു. തുടർന്ന് വെള്ളിയാഴ്ച ഉദ്യോഗസ്ഥർ വീണ്ടുമെത്തി. ഡിസംബർ അവസാനവാരം റെയ്ഡിനായി എത്തുമെന്ന് റോയ്‌യിയെ മുന്പ് അറിയിച്ചിരുന്നതായും അദ്ദേഹം അവർക്കായി കാത്തിരിക്കുകയായിരുന്നുവെന്നും കുടുംബം പറഞ്ഞു. റെയ്ഡുകളെത്തുടർന്ന് താൻ അനുഭവിച്ചിരുന്ന ഉത്കണ്ഠയും മാനസികസമ്മർദവും അദ്ദേഹം പങ്കുവച്ചിരുന്നതായി റോയ്‌യുമായി അടുപ്പമുള്ളവർ ചൂണ്ടിക്കാട്ടി.

🔹ആദായനികുതി വകുപ്പിന്‍റെ റെയ്ഡിനിടെ സ്വയം വെടിവച്ചു മരിച്ച കോൺഫിഡന്‍റ് ഗ്രൂപ്പ് ചെയർമാൻ ഡോ.സി.ജെ. റോയ്‌യുടെ പോസ്റ്റ്മോർട്ടം റിപ്പോർട്ട് പുറത്ത്. വെടിയുണ്ട ഇടതുനെഞ്ചിൽ തുളച്ചുകയറി റോയ്‌ തത്‌ക്ഷണം മരിച്ചതായി പോസ്റ്റ്മോർട്ടം നടത്തിയ ബൗറിംഗ് ആശുപത്രിയിലെ മെഡിക്കൽ സൂപ്രണ്ട് ഡോ. എം.എൻ. അരവിന്ദ് പറഞ്ഞു.നെഞ്ചിൽ തുളച്ചുകയറിയ വെടിയുണ്ട ഹൃദയത്തെയും ശ്വാസകോശത്തെയും കീറിമുറിച്ച് പിൻഭാഗത്തുകൂടി പുറത്തു കടന്നു. 6.35 എംഎം വലിപ്പമുള്ള വെടിയുണ്ട കണ്ടെത്തി. നെഞ്ചിൽ തോക്ക് ചേർത്തുവച്ച് ഒറ്റത്തവണയാണു വെടിവച്ചത്. വിശദമായ പോസ്റ്റ്മോർട്ടം റിപ്പോർട്ടിനായി കാക്കുകയാണ് പോലീസ്. സംഭവസ്ഥലത്തുനിന്ന് ശേഖരിച്ച രക്തസാന്പിളുകളുടെയും മറ്റും പരിശോധന നടത്തിവരികയാണ്.റിച്ച്മണ്ട് സർക്കിളിലെ കോണ്‍ഫിഡന്‍റ് ഗ്രൂപ്പ് കോർപറേറ്റ് ഓഫീസിൽ വെള്ളിയാഴ്ച ഉച്ചകഴിഞ്ഞ് ആദായനികുതി വകുപ്പിന്‍റെ റെയ്ഡ് നടന്നുകൊണ്ടിരിക്കെ അമ്മയെ ഫോണിൽ വിളിക്കാൻ അനുവാദം ചോദിച്ചാണു റോയി തന്‍റെ കാബിനിലേക്കു പോയത്. എന്നാൽ ആ വിളി ഒരു വിടവാങ്ങലായിരിക്കുമെന്ന് ആരും കരുതിയില്ല. സ്വന്തം ലൈസൻസുള്ള തോക്ക് ഉപയോഗിച്ച് അദ്ദേഹം ജീവനൊടുക്കിയപ്പോൾ സൈലൻസർ ഘടിപ്പിച്ചിരുന്നതിനാൽ ആ വെടിയൊച്ചപോലും പുറത്താരും കേട്ടില്ല. 15 മിനിറ്റുകൾക്കുശേഷം ജീവനക്കാർ മുറിയിലെ കസേരയിൽ രക്തത്തിൽ കുളിച്ച് മരിച്ചിരിക്കുന്ന റോയ്‌യെയാണ് കണ്ടത്‌.

🔹കോ‍ഴിക്കോട്: ആകാശവാണി പ്രാദേശിക വാർത്താ വിഭാഗം അടച്ചുപൂട്ടാനുള്ള കേന്ദ്ര സർക്കാരിന്‍റെ ആസൂത്രിത നീക്കത്തിനെതിരെ ശ്രോതാക്കളുടെ നേതൃത്വത്തിൽ പ്രതിഷേധം ശക്തമാകുന്നു. പൊതുജനങ്ങളുടെ ദൈനംദിന ജീവിതവുമായി നേരിട്ട് ബന്ധപ്പെട്ട വാർത്തകളും പരിപാടികളും ഇല്ലാതാക്കുന്ന നടപടി അംഗീകരിക്കാനാവില്ലെന്ന് പ്രതിഷേധക്കാർ അറിയിച്ചു. ആകാശവാണി വാർത്താ വിഭാഗം നിലനിർത്തണമെന്ന് ആവശ്യപ്പെട്ട് റേഡിയോ ലിസണേഴ്സ് ഫോറവും രംഗത്തെത്തി.
പ്രാദേശിക വാർത്തകൾ ജനങ്ങളിലേക്ക് എത്തിക്കുന്നതിൽ ആകാശവാണി വലിയ പങ്ക് വഹിക്കുന്നുണ്ട്. എന്നാൽ, പ്രാദേശിക വാർത്താ വിഭാഗം അടച്ചുപൂട്ടാനാണ് കേന്ദ്ര സർക്കാരിൻ്റെ തീരുമാനം. വലിയ പ്രതിഷേധമാണ് കേന്ദ്രസർക്കാരിന്റെ നീക്കത്തിനെതിരെ ജനങ്ങളിൽ നിന്ന് ഉയരുന്നത്.

🔹അടുത്തവർഷംമുതൽ പത്താംക്ലാസിലെ സിലബസ് 25ശതമാനം കുറയ്ക്കുമെന്ന് വിദ്യാഭ്യാസമന്ത്രി വി. ശിവൻകുട്ടി. തേവലക്കരയിൽ വൈദ്യുതാഘാതമേറ്റ് മരിച്ച വിദ്യാർഥി മിഥുന്‍റെ കുടുംബത്തിന് കേരള സ്റ്റേറ്റ് ഭാരത് സ്‌കൗട്ട്സ് ആൻഡ് ഗൈഡ്സ് നിർമിച്ചുനൽകിയ വീടിന്‍റെ താക്കോൽദാനം നിർവഹിച്ച് പ്രസംഗിക്കുന്പോഴാണ് മന്ത്രി ഇക്കാര്യം അറിയിച്ചത്.
പത്താംക്ലാസിലെ സോഷ്യൽസയൻസ് സിലബസ് കുറയ്ക്കണമെന്നാവശ്യപ്പെട്ട് മൂന്നുകുട്ടികൾ മന്ത്രിക്ക് നിവേദനം നൽകിയിരുന്നു.
“പത്താംക്ലാസിലെ സിലബസ് കൂടുതലാണെന്ന് കുട്ടികൾക്ക് പൊതുവിലുള്ള
പരാതിയാണ്. അതിനാൽ അടുത്തവർഷത്തെ സിലബസിൽ ഇപ്പോൾ പഠിപ്പിച്ചുകൊണ്ടിരിക്കുന്നതിൽ 25 ശതമാനം കുറയും എന്നുള്ള കാര്യംകൂടി പറയുകയാണ്. അത് കരിക്കുലം കമ്മിറ്റി അംഗീകരിച്ചുകഴിഞ്ഞു. ഉള്ളടക്കത്തിൽ വലിയ വ്യത്യാസമൊന്നും ഉണ്ടാവില്ല. പക്ഷേ, വലിപ്പം 25 ശതമാനം കുറയും’’- മന്ത്രി പറഞ്ഞു.

🔹തിരുനാവായിൽ എസ്ഐആർ അപേക്ഷ പൂരിപ്പിക്കാനെന്ന വ്യാജേന സ്ത്രീവേഷത്തിലെത്തി വീട്ടമ്മയുടെ സ്വർണാഭരണങ്ങൾ കവർന്ന സംഭവത്തിൽ പ്രതി പിടിയിൽ. പുത്തൻപീടിയേക്കൽ ഷാക്കിർ (34) ആണ് പിടിയിലായത്. കരിങ്കപ്പാറ ഹംസ ഹാജിയുടെ ഭാര്യ നഫീസയുടെ ആഭരണങ്ങളാണ് പ്രതി മോഷ്ടിച്ചത്. ഇവരുടെ അയൽവാസിയാണ് പിടിയിലായ ഷാക്കിർ. വെള്ളിയാഴ്ചയാണ് കേസിന് ആസ്പദമായ സംഭവം. ഹംസ ഹാജി പള്ളിയിൽ പോയതിന് പിന്നാലെയാണ് ഷാക്കിർ സ്ത്രീ വേഷത്തിൽ വീട്ടിലെത്തിയത്.
എസ്ഐആറുമായി ബന്ധപ്പെട്ട അപേക്ഷ പൂരിപ്പിക്കണമെന്ന് പ്രതി നഫീസയോട് ആവശ്യപ്പെട്ടു. തുടർന്ന് ഇതിനാവശ്യമായ രേഖകളെടുക്കാൻ നഫീസ മുറിയിലേക്ക് പോയപ്പോൾ, പ്രതി പിന്നാലെയെത്തി വീട്ടമ്മയെ ഉപദ്രവിച്ച് ആഭരണങ്ങൾ കവരുകയായിരുന്നു.

🔹മലപ്പുറം ചെറുമുക്കിൽ ടുവീലർ വർക്‌ഷോപ്പിൽ
വൻ തീപിടിത്തം. ചെറുമുക്കിൽ പ്രവർത്തിച്ചിരുന്ന ഫ്ലൈവീൽസ് എന്ന
ടുവീലർ വർക്‌ഷോപ്പിലാണ് അപകടമുണ്ടായത്. രാത്രി ഒരു മണിക്ക് ശേഷമായിരുന്നു തീപിടിത്തം. അപകടത്തിൽ 26 ബൈക്കുകൾ പൂർണമായും കത്തി നശിച്ചു. വർക്‌ഷോപ്പിൽ നിന്ന് സമീപത്ത് പ്രവർത്തിക്കുന്ന മൃഗാശുപത്രിലേക്കും തീ പടർന്നു. ആശുപത്രിയിലെ മരുന്നുകളും രേഖകളും ഉൾപ്പെടെ കത്തി നശിച്ചു. താനൂർ, തിരൂർ എന്നിവടങ്ങളിൽ നിന്ന് അഗ്നിശമന സേനയെത്തി തീ കെടുത്തി.

🔹ഉദയംപേരൂരിൽ തെരുവുനായയുടെ ആക്രമണത്തിൽ രണ്ടു ദിവസത്തിനിടെ അഞ്ചുപേർക്ക് കടിയേറ്റു. എംഎൽഎ റോഡിൽ ഉദയഗിരി നഗറിനു സമീപമാണ് വെള്ളിയാഴ്ചയും ഇന്നലെയുമായി തെരുവുനായയുടെ ആക്രമണമുണ്ടായത്.ഉദയഗിരി നഗറിനു സമീപം താമസിക്കുന്ന തമിഴ്‌നാട് സ്വദേശി വേലുവിന്‍റെ മകൻ ഭുവനേശ്വർ (നാല്), തെക്കേ പുളിപ്പറമ്പിൽ സതി (52), ഉദയനഗറിൽ അന്നമ്മ ഈശപ്പൻ എന്നിവർക്കാണു നായയുടെ ആക്രമണത്തിൽ ഗുരുതരമായി പരിക്കേറ്റത്. കടിയേറ്റ ബാക്കി രണ്ടുപേരുടെ വിവരം പുറത്തുവിട്ടിട്ടില്ല. വെള്ളിയാഴ്‌ച ഉച്ചയോടെയാണ് അന്നമ്മയ്ക്കു കടിയേറ്റത്.വീട്ടുമുറ്റത്ത് നിൽക്കുകയായിരുന്ന ഇവരുടെ ഇരു കൈകളിലും നായ കടിക്കുകയായിരുന്നു. മുറിവിൽനിന്നു രക്തം നിലയ്ക്കാത്തതിനാൽ ജനറൽ ആശുപത്രിയിൽ ചികിത്സ തേടി.വെള്ളിയാഴ്‌ച വൈകുന്നേരം അമ്മയോടൊപ്പം സഹോദരനെ സ്‌കൂളിൽനിന്ന് വിളിക്കാൻ പോകുന്നതിനിടെയായിരുന്നു ഭുവനേശ്വറിനെ നായ ആക്രമിച്ചത്. റോഡരികിൽ നിന്ന കുഞ്ഞിന്‍റെ പിന്നിലൂടെ എത്തിയ നായ ചാടിവീണ് കടിക്കുകയായിരുന്നു.വീഴ്‌ചയിൽ കുട്ടിയുടെ ഒരു പല്ല് കൊഴിഞ്ഞു. മുഖത്തും ചെവിയിലും പരിക്കേറ്റു.
ഇന്നലെ രാവിലെ മുറ്റമടിക്കുന്നതിനിടെയാണ് സതിക്കു കടിയേറ്റത്. പാഞ്ഞെത്തിയ നായ തലയിലും നെറ്റിയിലും കടിക്കുകയായിരുന്നു. ഇവരെ എറണാകുളം മെഡിക്കൽ കോളജിൽ പ്രവേശിപ്പിച്ചു.

🔹ചികിത്സാ പിഴവിനെ തുടർന്ന് വലത് കൈ മുറിച്ചുമാറ്റേണ്ടി വന്ന പാലക്കാട് പല്ലശന സ്വദേശിയായ ഒൻപത് വയസുകാരിക്ക് ഇന്ന് കൃത്രിമ കൈ ഘടിപ്പിക്കും. കൊച്ചിയിലെ സ്വകാര്യ ആശുപത്രിയിൽ ഇന്ന് രാവിലെ 11ന് ആണ് കുട്ടിക്ക് കൃത്രിമ കൈ വയ്ക്കുക.
പ്രതിപക്ഷ നേതാവ് വി.ഡി. സതീശനാണ് കുട്ടിക്ക് കൃത്രിമ കൈ വയ്ക്കാനുള്ള സാമ്പത്തിക സഹായം വാഗ്ദാനം ചെയ്തത്. കഴിഞ്ഞ സെപ്റ്റംബർ 24ന് സഹോദരനൊപ്പം കളിക്കുന്നതിനിടെ നിലത്ത് വീണതിനെ തുടർന്നാണ് കുട്ടിയെ ചികിത്സയിൽ പ്രവേശിപ്പിക്കുന്നത്.ഇതേ തുടർന്നുണ്ടായ ചികിത്സ പിഴവിന് പിന്നാലെയാണ് കുട്ടിയുടെ കൈ മുറിച്ചുമാറ്റിയത്. കൈ മാറ്റിവയ്ക്കുന്നതിനുള്ള സാമ്പത്തികം കുടുംബത്തിന് ഇല്ലെന്നും കളക്ടറെ കണ്ട് പരാതി അറിയിച്ചിട്ടുണ്ടെന്നും കുട്ടിയുടെ അമ്മ പറഞ്ഞിരുന്നു.കുടുംബത്തിന് ആകെ ലഭിച്ചത് 2 ലക്ഷം രൂപ മാത്രമായിരുന്നു. എന്നാൽ സർക്കാരിന്‍റെ ഭാഗത്ത് നിന്ന് അനുകൂല നിലപാട് ഉണ്ടാകാതിരുന്നതോടെയാണ് വിഷയത്തിൽ പ്രതിപക്ഷ നേതാവ് ഇടപെടുന്നത്. വി.ഡി. സതീശൻ ഇന്ന് ആശുപത്രിയിലെത്തി കുട്ടിയെ സന്ദർശിക്കും.

🔹ആസാമിൽ നിന്നുള്ള നാല് അതിഥിത്തൊഴിലാളികളെ ബംഗളുരുവിലെ വാടകക്കെട്ടിടത്തിൽ ശ്വാസംമുട്ടി മരിച്ചനിലയിൽ കണ്ടെത്തി.ഹോസ്കോട്ടിൽ വെള്ളിയാഴ്ച രാത്രിയുണ്ടായ അത്യാഹിതത്തിൽ ജയന്ത് ഷിൻഡെ, നിരേന്ദ്രനാഥ്, ഡി. ധനഞ്ജയ് ടൈഡ് എന്നിവരാണ് മരിച്ചത്. എല്ലാവർക്കും ഇരുപതിനോടടുത്താണു പ്രായം.

🔹ബോളിവുഡ് സംവിധായകൻ രോഹിത് ഷെട്ടിയുടെ മുബൈ ജുഹുവിലെ വീടിന് മുന്നിൽ വെടിവയ്പ്പ്. നാലു തവണ വെടിയൊച്ച കേട്ടതായി പോലീസ് സ്ഥിരീകരിച്ചു. സംഭവത്തെതുടര്‍ന്ന് വീടിന് പ്രത്യേക പോലീസ് സുരക്ഷ ഏര്‍പ്പെടുത്തി. സംഭവത്തിൽ മുബൈ പോലീസ് അന്വേഷണം ആരംഭിച്ചു.ജുഹുവിലെ നടന്‍റെ വീടും പരിസരവും പോലീസ് നിരീക്ഷണത്തിലാണ്. അന്വേഷണ ഉദ്യോഗസ്ഥരും ഫോറൻസിക് സംഘങ്ങളും സംഭവ സ്ഥലത്ത് പരിശോധന തുടരുകയാണ്. ഇതുവരെ ആർക്കും പരിക്കുകൾ റിപ്പോർട്ട് ചെയ്തിട്ടില്ല.

🔹മഹാരാഷ്ട്ര മുൻ ഉപമുഖ്യമന്ത്രി അജിത് പവാറിന്‍റെ മരണത്തിന് ഇടയാക്കിയ ചാര്‍ട്ടര്‍ ഓപ്പറേറ്റര്‍ വി എസ് ആർ വെഞ്ചേഴ്സ് ഗുരുതരമായ സുരക്ഷാ വീഴ്ചയ്ക്ക് ഇതിന് മുൻപും നോട്ടീസ് ലഭിച്ചിരുന്ന സ്ഥാപനം. യൂറോപ്യന്‍ യൂണിയന്‍ ഏവിയേഷന്‍ സേഫ്റ്റി ഏജന്‍സിയാണ് സുരക്ഷാ വീഴ്ചയെ തുടർ‌ന്ന് വിഎസ്ആർ വെഞ്ചേഴ്സിനെ നേരത്തെ വിലക്കിയിരുന്നത്
സുരക്ഷാ മാനദണ്ഡങ്ങള്‍ പാലിക്കാത്തതിനെത്തുടര്‍ന്ന് ഒരു വര്‍ഷം മുന്‍പ് തന്നെ ഈ കമ്പനിയുടെ പ്രവര്‍ത്തനാനുമതി യൂറോപ്യന്‍ യൂണിയന്‍ ഏവിയേഷന്‍ സേഫ്റ്റി ഏജന്‍സി റദ്ദാക്കിയിരുന്നു.ഏറ്റവും ഗുരുതരമായ സുരക്ഷാ വീഴ്ചകള്‍ക്ക് നല്‍കുന്ന ‘ലെവല്‍ 1’ വിഭാഗത്തിലാണ് ഈ കമ്പനിയെ ഉള്‍പ്പെടുത്തിയിരുന്നത്.2023 സെപ്റ്റംബറില്‍ മുംബൈയില്‍ നടന്ന ഒരു വിമാനാപകടവുമായി ബന്ധപ്പെട്ട രേഖകളും സുരക്ഷാ വിവരങ്ങളും കൈമാറാന്‍ കമ്പനി തയ്യാറായിരുന്നില്ല. പലതവണ ആവശ്യപ്പെട്ടിട്ടും സഹകരിക്കാത്തതിനെത്തുടര്‍ന്നാണ് യൂറോപ്യൻ യൂണിയൻ ഏവിയേഷൻ സേഫ്റ്റി വിഭാഗം നടപടിയെടുത്തത്.

🔹79-ാമത് സന്തോഷ് ട്രോഫി ഫുട്‌ബോളിന്‍റെ ഫൈനല്‍ റൗണ്ട് ഗ്രൂപ്പ് ഘട്ടത്തില്‍ ഇന്നലെ നടക്കേണ്ടിയിരുന്ന കേരളത്തിന്‍റെ മത്സരം ഇന്നത്തേക്കു മാറ്റിവച്ചു. സര്‍വീസസ് ആണ് കേരളത്തിന്‍റെ എതിരാളികള്‍. ഫൈനല്‍ റൗണ്ട് ഗ്രൂപ്പ് ഘട്ടം ഇന്നലെ സമാപിക്കേണ്ടതായിരുന്നു.കേരള ടീം ഹോട്ടലില്‍നിന്ന് മൈതാനത്തേക്ക് എത്താനായുള്ള അവസാനവട്ട തയാറെടുപ്പിനിടെയാണ് മത്സരം മാറ്റിവച്ചതായുള്ള അറിയിപ്പ് എത്തിയത്. മസിംഗ് ഗോത്രത്തിന്‍റെ ഗ്രാമത്തില്‍ യുവജനോത്സവം നടക്കുന്ന പശ്ചാത്തലത്തില്‍ ഗുതാഗതക്കുരുക്ക് ഉണ്ടായതാണ് മത്സരം മാറ്റിവയ്ക്കാനുള്ള കാരണം.നാലു മത്സരങ്ങളില്‍നിന്ന് 10 പോയിന്‍റുള്ള കേരളം ഗ്രൂപ്പ് ബി ചാമ്പ്യന്മാരായി ക്വാര്‍ട്ടര്‍ ബെര്‍ത്ത് ഉറപ്പിച്ചതാണ്. ക്വാര്‍ട്ടറില്‍ ഗ്രൂപ്പ് എയിലെ നാലാം സ്ഥാനക്കാരായ ആസാം ആണ് കേരളത്തിന്‍റെ എതിരാളികള്‍.ഗ്രൂപ്പ് ബിയില്‍ ഇന്നലെ നടന്ന മറ്റു മത്സരങ്ങളില്‍ റെയില്‍വേസ് 2-2ന് മേഘാലയയുമായി സമനിലയില്‍ പിരിഞ്ഞപ്പോള്‍ പഞ്ചാബ് 5-2ന് ഒഡീഷയെ തകര്‍ത്തു. അഞ്ച് മത്സരങ്ങള്‍ പൂര്‍ത്തിയാക്കി ഏഴ് പോയിന്‍റുമായി റെയില്‍വേസും പഞ്ചാബും ക്വാര്‍ട്ടറില്‍ പ്രവേശിച്ചു.പോയിന്‍റ് തുല്യമാണെങ്കിലും ഗോള്‍ ശരാശരിയില്‍ മുന്‍തൂക്കമുള്ള റെയില്‍വേസ് രണ്ടാമതാണ്. ഗ്രൂപ്പില്‍നിന്ന് ക്വാര്‍ട്ടറില്‍ പ്രവേശിക്കുന്ന നാലാമത് ടീമിനെ കേരളം x സര്‍വീസസ് മത്സരത്തിനു ശേഷമേ വ്യക്തമാകൂ.കേരളത്തെ ചുരുങ്ങിയത് 1-0നു പരാജയപ്പെടുത്തിയാല്‍ സര്‍വീസസിന് ആറ് പോയിന്‍റുമായി നാലാം സ്ഥാനത്ത് ഫിനിഷ് ചെയ്യാം. അഞ്ച് മത്സരവും പൂര്‍ത്തിയാക്കിയ മേഘാലയ ആറ് പോയിന്‍റുമായി നിലവില്‍ നാലാമതാണ്. മൂന്നു പോയിന്‍റുള്ള സര്‍വീസസ് അഞ്ചാമതും.

🔹ടൂറിസ്റ്റ് ഫാമിലി സിനിമയുടെ സംവിധായകൻ അഭിഷൻ ജീവിന്തും അനശ്വര രാജനും പ്രധാന കഥാപാത്രങ്ങളായി എത്തുന്ന വിത്ത് ലവ് എന്ന തമിഴ് ചിത്രത്തിന്‍റെ ട്രെയിലർ റിലീസ് ചെയ്തു.സ്കൂൾകാല പ്രണയവും സൗഹൃദവും പ്രമേയമാകുന്ന ചിത്രം റൊമാന്‍റിക് കോമഡി എന്‍റർടെയ്നറാണ്. മോനിഷ എന്ന കഥാപാത്രമായാണ് ചിത്രത്തിൽ അനശ്വര എത്തുന്നത്. സ്കൂൾകാലഘട്ടം അനായാസമായാണ് അനശ്വര അവതരിപ്പിക്കുന്നതെന്നാണ് ആരാധകരുടെ കമന്‍റുകൾ. രണ്ടു കാലഘട്ടങ്ങളിലൂടെ കടന്നുപോകുന്ന സിനിമയിൽ രണ്ടു ഗെറ്റപ്പിൽ അഭിഷയും അനശ്വരയും പ്രത്യക്ഷപ്പെടുന്നുണ്ട്.

🔹ആരാധകർ ഏറെ ആവേശത്തോടെ കാത്തിരുന്ന ബിഗ് ബജറ്റ് ചിത്രം ‘പരാശക്തി’ ഒടിടി റിലീസിന് ഒരുങ്ങുന്നു. ബോക്സ് ഓഫീസിൽ 100 കോടി ക്ലബ്ബിൽ ഇടംപിടിച്ച ഈ ആക്ഷൻ ഡ്രാമ അടുത്ത മാസം ഏഴാം തീയതി മുതൽ പ്രമുഖ ഡിജിറ്റൽ പ്ലാറ്റ്‌ഫോമായ സീ 5-ലൂടെ സ്ട്രീമിംഗ് ആരംഭിക്കുമെന്നാണ് റിപ്പോർട്ടുകൾ. ‘സൂരറൈ പോട്ട്രു’ എന്ന സൂപ്പർ ഹിറ്റിന് ശേഷം സുധാ കൊങ്കര സംവിധാനം ചെയ്ത ഈ ചിത്രം തമിഴ്‌നാടിന്റെ രാഷ്ട്രീയ ചരിത്രത്തിലെ നിർണ്ണായകമായ ഹിന്ദി വിരുദ്ധ പ്രക്ഷോഭങ്ങളുടെ പശ്ചാത്തലത്തിലാണ് ഒരുക്കിയിരിക്കുന്നത്.
ശിവകാർത്തികേയന്റെ കരിയറിലെ ഏറ്റവും ചെലവേറിയ ചിത്രമായി കണക്കാക്കപ്പെടുന്ന പരാശക്തി ഏകദേശം 150 കോടി രൂപയുടെ ബജറ്റിലാണ് നിർമ്മിച്ചത്. തിയേറ്ററുകളിൽ വമ്പിച്ച സ്വീകാര്യത ലഭിച്ച സിനിമ ഇതിനോടകം തന്നെ നൂറ് കോടി രൂപ ബോക്സ് ഓഫീസിൽ നിന്ന് തിരിച്ചുപിടിച്ചു കഴിഞ്ഞു.
മലയാളി പ്രേക്ഷകരുടെ പ്രിയതാരം ബേസിൽ ജോസഫ് ഒരു പ്രധാന വേഷത്തിൽ എത്തുന്നു എന്ന പ്രത്യേകതയും ഈ ചിത്രത്തിനുണ്ട്. ശ്രീലീല നായികയായി എത്തിയ ചിത്രത്തിൽ അഥർവ, രവി മോഹൻ എന്നിവരും ശ്രദ്ധേയമായ പ്രകടനമാണ് കാഴ്ചവെച്ചത്. ‘അമരൻ’ എന്ന ചിത്രത്തിന് ശേഷം ജി.വി. പ്രകാശ് കുമാറും ശിവകാർത്തികേയനും വീണ്ടും ഒന്നിച്ച ഈ ചിത്രം സംഗീത മികവുകൊണ്ടും ശ്രദ്ധിക്കപ്പെട്ടിരുന്നു.
റിലീസ് സമയത്ത് വലിയ വിവാദങ്ങൾക്കും ഈ സിനിമ വഴിവെച്ചിരുന്നു. വിജയ് നായകനാകുന്ന ‘ജനനായകൻ’ എന്ന ചിത്രത്തിനൊപ്പം റിലീസ് ചെയ്യാനിരുന്ന പരാശക്തി, ജനനായകന്റെ സെൻസർ പ്രശ്നങ്ങൾ മൂലം തനിച്ചാണ് തിയേറ്ററുകളിൽ എത്തിയത്. ഇതിനെത്തുടർന്ന് വിജയ് ആരാധകർ മനഃപൂർവം നെഗറ്റീവ് കമന്റുകൾ പ്രചരിപ്പിച്ച് സിനിമയെ തകർക്കാൻ ശ്രമിക്കുന്നുവെന്ന് അണിയറപ്രവർത്തകർ പരസ്യമായി ആരോപിച്ചിരുന്നു. തിയേറ്ററിൽ കാണാൻ കഴിയാത്തവർക്ക് ഇനി വീട്ടിലിരുന്ന് സീ 5-ലൂടെ പരാശക്തി ആസ്വദിക്കാം

💦 ഗുരുജിയുടെ വാക്കുകൾ

നിങ്ങളുടെ വലതു കയ്യിലെ മുഷ്‌ടി ചുരുട്ടി പിടിക്കുക. മറ്റൊരാൾ‍ വന്ന്‌ നിങ്ങളുടെ മുഷ്‌ടി തുറക്കട്ടെ. നിങ്ങൾ മുഷ്‌ടി എങ്ങിനെയാണ്‌ പിടിച്ചിരിക്കുന്നത്‌. ചിലപ്പോ‍ൾ നിങ്ങ‍ൾ ശക്തിയായി പിടിച്ചിരിക്കാം. ഒരു മൽപിടിത്തം തന്നെ നിങ്ങൾ‍ പരസ്‌പരം നടത്തിയിട്ടുണ്ടാകും. നിങ്ങളോട്‌ മുഷ്‌ടി ചുരുട്ടി പിടിക്കുവാൻ‍ മാത്രമാണ്‌ പറഞ്ഞത്‌. ശക്തിയിൽ‍ പിടിക്കുവാ‍ൻ പറഞ്ഞില്ല. നമ്മുടെ മുഷ്‌ടി തുറക്കുവാൻ‍ വരുന്ന ആ‍ൾക്ക്‌ മുഷ്‌ടി തുറന്നു കൊടുക്കുവാ‍ൻ‍ മനസ്സുണ്ടായിരുന്നെങ്കിൽ‍ ഒരു മത്സരം ഒഴിവാക്കാമായിരുന്നു. കുടുംബാംഗങ്ങ‍ൾ എല്ലാവരും ഒരുമിച്ചിരിക്കുവാനും, ആടുവാനും, പാടുവാനും, പ്രതീക്ഷകളും, പ്രശ്‌നങ്ങളും പങ്ക്‌ വെയ്‌ക്കുവാനും കഴിയണം. കൂട്ടായ്‌മയിലുടെ ആശയ വിനിമയത്തിലൂടെ നമുക്ക്‌ പരിപൂർ‍ണ്ണത കൈവരിക്കുവാൻ‍ കഴിയണം. ഇവിടെ വാശി, പിണക്കം, അഹങ്കാരം എന്നിവ ഒഴിവാക്കികൊണ്ടുവേണം കൂട്ടായ്‌മയുടെ ഒത്തുകൂടലിനു നേതൃത്വം നൽകാൻ.

തയ്യാറാക്കിയത്: കപിൽ ശങ്കർ

8 Likes

📱വാർത്തകൾ ഒറ്റനോട്ടത്തിൽ📱 – 2026 | ഫെബ്രുവരി 01 | ഞായർ ✍ കപിൽ ശങ്കർ

💦 ഗുരുജിയുടെ വാക്കുകൾ

തയ്യാറാക്കിയത്: കപിൽ ശങ്കർ

🌹 “ഇന്നത്തെ ചിന്താവിഷയം” 🌹 – 2026 | ഫെബ്രുവരി 02 | തിങ്കൾ ✍ പ്രൊഫസ്സർ എ.വി. ഇട്ടി മാവേലിക്കര

🌹 ചിന്താ പ്രഭാതം 🌹 – 2026 | ഫെബ്രുവരി 02 | തിങ്കൾ ✍ ബേബി മാത്യു അടിമാലി

മസ്കത്തിൽ മലയാളി വിദ്യാർഥി കെട്ടിടത്തിൽ നിന്ന് വീണ് മരിച്ച നിലയിൽ.

LEAVE A REPLY Cancel reply

Most Popular

👨‍👨‍👦‍👦മലയാളി മനസ്സ് — ആരോഗ്യ വീഥി 👨‍👨‍👦‍👦 – 2026 | ഫെബ്രുവരി 02 | തിങ്കൾ ✍തയ്യാറാക്കിയത്: ആസിഫ അഫ്രോസ്, ബാംഗ്ലൂർ

🌹 “ഇന്നത്തെ ചിന്താവിഷയം” 🌹 – 2026 | ഫെബ്രുവരി 02 | തിങ്കൾ ✍ പ്രൊഫസ്സർ എ.വി. ഇട്ടി മാവേലിക്കര

🌹 ചിന്താ പ്രഭാതം 🌹 – 2026 | ഫെബ്രുവരി 02 | തിങ്കൾ ✍ ബേബി മാത്യു അടിമാലി

2026-27 ലെ കേന്ദ്ര ബജറ്റ് : പ്രധാന വിവരങ്ങള്‍ ( 01/02/2026 )

Recent Comments

EDITOR PICKS

👨‍👨‍👦‍👦മലയാളി മനസ്സ് — ആരോഗ്യ വീഥി 👨‍👨‍👦‍👦 – 2026 | ഫെബ്രുവരി 02 | തിങ്കൾ ✍തയ്യാറാക്കിയത്: ആസിഫ അഫ്രോസ്, ബാംഗ്ലൂർ

🌹 “ഇന്നത്തെ ചിന്താവിഷയം” 🌹 – 2026 | ഫെബ്രുവരി 02 | തിങ്കൾ ✍ പ്രൊഫസ്സർ എ.വി. ഇട്ടി മാവേലിക്കര

🌹 ചിന്താ പ്രഭാതം 🌹 – 2026 | ഫെബ്രുവരി 02 | തിങ്കൾ ✍ ബേബി മാത്യു അടിമാലി

POPULAR POSTS

2026-27 ലെ കേന്ദ്ര ബജറ്റ് : പ്രധാന വിവരങ്ങള്‍ ( 01/02/2026 )

ഷാഹി ഈദ്ഗാഹ് മസ്ജിദ് കേസ്: അലഹാബാദ് ഹൈക്കോടതി വാദം മാറ്റിവച്ചു.

ഇറാനിൽ രണ്ടിടങ്ങളിൽ സ്ഫോടനം: അഞ്ച് മരണം.

POPULAR CATEGORY

ABOUT US

FOLLOW US