🌹 “ഇന്നത്തെ ചിന്താവിഷയം” 🌹 – 2024 | മെയ് 23 | വ്യാഴം ✍ പ്രൊഫസ്സർ എ.വി. ഇട്ടി മാവേലിക്കര

തനിച്ചിറങ്ങുന്നവനേ വിജയിക്കാൻ ആകൂ
——————————————————————

ആ കർഷകൻ കഠിനാദ്ധ്വാനി ആയിരുന്നു. അദ്ദേഹത്തിൻ്റെ വിളവെടുപ്പിനു പാകമായ വയലിൽ, ഒരു കുരുവി കൂടു കൂട്ടിയിരുന്നു. അടുത്തുള്ള പാടത്ത് കൊയ്ത്തു നടക്കുന്നതു കണ്ട് കുരുവിക്കുഞ്ഞുങ്ങൾ അമ്മയോടു പറഞ്ഞു: ” നമുക്കു രക്ഷപെടാം” അമ്മ പറഞ്ഞു: “നമ്മുടെ കർഷകൻ ഉടൻ കൊയ്യില്ല!” പിറ്റേ ദിവസം കർഷകൻ പറയുന്നതവർ കേട്ടു: “നാളെ അയൽക്കാരെക്കൂട്ടി പാടം കൊയ്യണം”. കുഞ്ഞുങ്ങൾ ഭയന്നെങ്കിലും, അമ്മക്കുരുവി സമാധാനിപ്പിച്ചു: “നമ്മുടെ കർഷകൻ പാടം ഉടൻ കൊയ്യില്ല”. അടുത്ത ദിവസവും കൃഷിക്കാരൻ്റെ വാക്കുകൾ അവർ ശ്രദ്ധിച്ചു: “നാളെ ബന്ധുക്കളെയും സുഹൃത്തുക്കളേയും കൂട്ടി പാടം കൊയ്യണം”. അമ്മക്കുരുവി പറഞ്ഞു. “നമ്മുടെ കർഷകൻ നാളെയും പാടം കൊയ്യില്ല”. അതിടുത്ത ദിവസം കർഷകൻ പറയുന്നതവർ കേട്ടു: “നാളെ ഞാനിറങ്ങി പാടം കൊയ്യും!” കുരുവി ഉടൻ തന്നെ, കുഞ്ഞുങ്ങളെയും കൊണ്ട് സ്ഥലം വിട്ടു.

സ്വയം വിലമതിക്കുന്നവനെ മാത്രമേ, മറ്റുള്ളവർ വില മതിക്കൂ. അവനവനു വേണ്ടി നിലകൊള്ളാത്ത ഒരാൾക്കു വേണ്ടിയും, ലോകം പ്രവർത്തനനിരതമാകില്ല. അപരൻ, ഒരു സഹായവും സാന്നിദ്ധ്യവും മാത്രമാണ്. മുന്നിട്ടിറങ്ങാൻ തയ്യാറാകാത്തവനു വേണ്ടി, മറ്റാരും മുന്നൊരുക്കം നടത്തില്ല. സ്വന്തം കാര്യശേഷിയുടെ ബാക്കിപത്രം മാത്രമായിരിക്കും, ഓരോ സഹചാരിയും. സ്വന്തം പരിശ്രമത്തെയും, കൈമിടുക്കിനെയും മറികടക്കുന്ന ഒരു സഹായഹസ്തവും ഒരിടത്തുനിന്നും നീട്ടപ്പെടില്ല. ആത്മബലം ഉള്ളവനു മാത്രമേ, ആൾബലം ഉപകാരപ്പെടൂ.

അന്യരെക്കണ്ടു കൃഷിയിറക്കിയാൽ, കള അധികവും, വിള അല്പവുമാകും. പരസഹായം, ഒരു നിർബ്ബന്ധിത സേവനമല്ല; അതൊരാനുകൂല്യം മാത്രമാണ്. എല്ലാ സാഹചര്യങ്ങളും ഒത്തിണങ്ങുമ്പോഴും, എല്ലാ സഹപ്രവർത്തകരും പച്ചക്കൊടി കാണിക്കുമ്പോഴും മാത്രം, കർമ്മനിരതനാകാൻ കാത്തിരിക്കുന്നവൻ, അവസാനം വിധിയെ പഴിക്കേണ്ടി വരും. ഒഴിവാകാൻ കാരണങ്ങൾ തേടുന്നവരുടെ അടുത്തേക്ക് അവർ ആഗ്രഹിക്കുന്നതിനേക്കാൾ കൂടുതൽ കാരണങ്ങൾ എത്തിക്കൊണ്ടിരിക്കും. പക്ഷെ, അവ ഓരോന്നും ചെന്നെത്തുന്നതു ശൂന്യതയിലായിരിക്കും.

തനിച്ചിറങ്ങാനുള്ള തീരുമാനവും സന്നദ്ധതയുമാണ് വിജയം വരിക്കുന്നവരുടെ പിൻബലം. കാഴ്ചക്കാർക്ക് ഒരിക്കലും, കരുക്കൾ നീക്കുന്നവൻ്റെ വിശ്വാസമോ, വികാരമോ ഉണ്ടാകണമെന്നില്ല.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര✍