🌹 “ഇന്നത്തെ ചിന്താവിഷയം” 🌹 – 2024 | ജൂലൈ 03 | ബുധൻ ✍ പ്രൊഫസ്സർ എ.വി. ഇട്ടി മാവേലിക്കര

വലുപ്പമുള്ള തീരുമാനങ്ങളുടെ ഉടമകൾ ആകാം
——————————————————————-

ഒരു കാട്ടിൽ തീ പിടുത്തമുണ്ടായി. പക്ഷി മൃഗാദികൾ പരിഭ്രാന്തരായി രക്ഷപെടാനുളള ശ്രമങ്ങൾ ആരംഭിച്ചു. അക്കൂട്ടത്തിൽ ഒരു മൂങ്ങയുമുണ്ടായിരുന്നു. ഒരു ചെറിയ കുരുവി, പെട്ടന്ന് തിരിച്ചു പറക്കുന്നതു കണ്ട് മൂങ്ങാ: “മുമ്പോട്ടു പറക്കുക, ഇല്ലെങ്കിൽ അപകടമാണ് ” എന്ന് അതിനോടു പറഞ്ഞെങ്കിലും, കുരുവി കാടിൻ്റെ മറ്റൊരു വശത്തേക്കു പറന്ന പോയി. ആകാംക്ഷ മൂത്ത മൂങ്ങയും, അതിൻ്റെ പിന്നാലെ പറന്നു.

കുരുവി ഒരു അരുവിയിൽ നിന്ന് തൻ്റെ കുഞ്ഞു കൊക്കിൽ വെള്ളം നിറച്ചു തീയിലേക്ക് ഒഴിക്കാൻ തുടങ്ങി. “ഇതു കൊണ്ടു തീയണയുമോ?”, മൂങ്ങാ ചോദിച്ചു. “എനിക്കു ചെയ്യാൻ കഴിയുന്നതു ഞാൻ ചെയ്യുന്നു”, കുരുവി പറഞ്ഞു. മൂങ്ങാ എല്ലാവരേയും വിവരം അറിയിച്ചു. മറ്റു മൃഗങ്ങളും പക്ഷികളുമെല്ലാം തിരിച്ചെത്തി തീയിൽ വെള്ളമൊഴിക്കാൻ ആരംഭിച്ചു. ഏറെക്കഴിയാതെ തീയണഞ്ഞു.

ഓടി രക്ഷപെടാൻ ആർക്കും കഴിയും? ഓടിയെത്തി ഒരു കൈ നോക്കാൻ ഇച്ഛാശക്തിയും, മനോധൈര്യവും വേണം. ദുരന്തങ്ങളിൽ തൻകാര്യം മാത്രം നോക്കുന്നവർ, മറ്റുള്ളവരെ വിധിക്കു വിട്ടുകൊടുത്തിട്ടു, സ്വയം രക്ഷപെടാനാണു ശ്രമിക്കുന്നത്. അവർ സ്വാർത്ഥതയുടെ ആയുഷ്ക്കാല ഇരകളായി അവശേഷിക്കും. ‘ഞാനൊരു കൈ പിടിച്ചിരുന്നെങ്കിൽ, എൻ്റെ സഹചാരി രക്ഷപ്പെട്ടേനേ’ എന്ന ചിന്തയേക്കാൾ ദൗർഭാഗ്യകരമായി, എന്താണീ ലോകത്തിലുള്ളത് ?

ഒരാൾ, ഒരാൾക്കൂട്ടത്തിൻ്റെ തുടക്കമാകും. പുരുഷാരം, ഒന്നും തുടങ്ങി വെച്ചിട്ടില്ല; ഏറ്റെടുത്തിട്ടേയുള്ളു. എല്ലാ നല്ല തുടക്കങ്ങളും, ഏതെങ്കിലുമൊരു വ്യക്തിയിൽ നിന്നുമാണുണ്ടായിട്ടുള്ളത്. മുന്നിട്ടിറങ്ങാൻ ഒരാളുണ്ടായാൽ, പിന്നിൽ അണിനിരക്കാൻ, ഏറെ ആളുകളുണ്ടാകും.

ദീർഘവീക്ഷണവും മനോധൈര്യവുമുള്ള ഒരാൾ, അയാളാണ് മാറ്റങ്ങളുണ്ടാക്കുക. ആളിൻ്റെ വലുപ്പമല്ല, അയാളുടെ തീരുമാനത്തിൻ്റെ വലുപ്പമാണ് ജീവിതത്തിൻ്റെ ഗതി നിർണ്ണയിക്കുന്നത്. വലുപ്പമുള്ള തീരുമാനങ്ങളുടെ ഉടമകളാകാം നമുക്ക് .

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര