🌹 “ഇന്നത്തെ ചിന്താവിഷയം” 🌹 – 2024 | ജൂൺ 03 | തിങ്കൾ ✍ പ്രൊഫസ്സർ എ.വി. ഇട്ടി മാവേലിക്കര

വീണവനു ബലമേകുന്നവർ ആകാം
———————————————————

പട്ടിക്കുട്ടികളെ വിൽക്കുന്ന ഒരു കടയിൽ, ഒരഞ്ചുവയസ്സുകാരൻ തൻ്റെ കയ്യിലുണ്ടായിരുന്ന അൻപതു രൂപയുമായി കയറിച്ചെന്നു. ആയിരം രൂപ മുതൽ മുകളിലേക്കായിരുന്നു, പട്ടിക്കുട്ടികളുടെ വില. കൂട്ടത്തിൽ നിന്നും മാറിക്കിടന്നിരുന്ന ഒരു നായ്ക്കുട്ടിയോട് ഇഷ്ടം തോന്നിയ ബാലൻ, അതിൻ്റെ വില ചോദിച്ചു.

അവനോടു താൽപര്യം തോന്നിയ കടക്കാരൻ പറഞ്ഞു: “അതിനെ ഞാൻ നിനക്കു വെറുതേ തന്നേക്കാം. അതു മുടന്തുള്ളതാണ് ”. ബാലൻ പറഞ്ഞു: “എനിക്കതിനെ വെറുതേ വേണ്ട. മറ്റു പട്ടിക്കുട്ടികൾക്കുള്ള വില ഞാൻ തന്നേക്കാം. ഇതാ 50 രൂപ. ബാക്കി ഞാൻ തവണകളായി തരാം. കടക്കാരൻ അവനെ നിരുത്സാഹപ്പെടുത്തി. “അതു നിൻ്റെ കൂടെ ഓടുകയും കളിക്കുകയുമൊന്നുമില്ല”, അയാൾ പറഞ്ഞു. അവൻ തൻ്റെ പാൻ്റസുയർത്തി, വലതുവശത്തെ ക്യത്രിമക്കാലു കാണിച്ചു കൊണ്ടു പറഞ്ഞു: “ഇവൻ്റെ വില ഏറ്റവും നന്നായി മനസ്സിലാക്കാൻ പറ്റുന്നത് എനിക്കാണ്”.

മുറിവേറ്റവൻ്റെ മനസ്സറിയാൻ, മുറിവേറ്റവനു മാത്രമേ കഴിയൂ. വീഴ്ചകളിൽ നിന്നു കരകയറിയവനു മാത്രമേ, വീണവനു ബലം എകാനാകൂ. ഒപ്പം നിൽക്കാൻ ശേഷിയില്ലാത്തവരെല്ലാം, ഒന്നിനും കൊള്ളരുതാത്തവരാണെന്ന ധാരണ അപക്വവും അബദ്ധവുമാണ്. വൈകല്യങ്ങൾക്കല്ല വിലയിടേണ്ടത്; വൈകല്യങ്ങളെ അതിജീവിച്ചു നേടുന്ന മനോ ദൃഢതയ്ക്കാണ്.

ഒറ്റപ്പെടുമ്പോൾ തളർന്നുവീഴാതിരിക്കാൻ, ഒറ്റയ്ക്കു നടന്നു ശീലിക്കണം. ബലഹീനത കൊണ്ടോ, വൈകല്യം കൊണ്ടോ, നിസ്സഹായത മുലമോ ഒറ്റപ്പെടാം. എന്നാൽ ഒന്നിച്ചു നിൽക്കുന്നവരുടെ ഒറ്റതിരിഞ്ഞുള്ള ആക്രമണങ്ങളാണ് പലരേയും മുറിവേറ്റവരും, മുടന്തുള്ളവരുമാക്കുന്നത്. മാറ്റി നിർത്തുന്നവൻ്റെ മന:ശാസ്ത്രത്തിന് അനുസരിച്ചല്ല, മാറ്റി നിർത്തപ്പെടുന്നവൻ്റെ മനസ്സു രൂപം കൊള്ളേണ്ടത്. തളർച്ചകളിൽ നിന്ന് ഉയർത്തെഴുന്നേറ്റാൽ മാത്രം പോരാ, തളർന്നവർക്ക് ഉണർത്തുപാട്ടാകാനും നമുക്കു കഴിയണം. മുറിവുണ്ടാക്കുന്നവരേയല്ല, മുറിവുണക്കുന്നവരേയാണ് ലോകത്തിനാവശ്യം.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര✍