🌹 “ഇന്നത്തെ ചിന്താവിഷയം” 🌹 – 2024 | ഒക്ടോബർ 20 | ഞായർ ✍ പ്രൊഫസ്സർ എ.വി. ഇട്ടി മാവേലിക്കര

വകതിരിവോടെ വിളമ്പി നൽകാം
—————————————————–

തൻ്റെ ഉദ്യാനത്തിൽ നിൽക്കുന്ന മരം അപശകുനമാണെന്നും, അതു വെട്ടി വിറകായി ഉപയോഗിക്കണമെന്നും, വീട്ടുടമസ്ഥനോട് അയൽക്കാരൻ കൂടിയായ സുഹൃത്ത് ഉപദേശിച്ചു. സുഹൃത്തിൻ്റെ ഉപദേശം സ്വീകരിച്ച വീട്ടുടമസ്ഥൻ, മരം വെട്ടി വിറകാക്കി, തൻ്റെ ഉദ്യാനത്തിൽ കുട്ടിയിട്ടു. വിറകവിടെ ഇട്ടിരുന്നാൽ, ഉദ്യാനത്തിൻ്റെ ഭംഗി നഷ്ടപ്പെടുമെന്നും, കുറച്ചു വിറക് താൻ വീട്ടിൽ കൊണ്ടു പൊയ്ക്കൊള്ളാമെന്നും സുഹൃത്തു പറഞ്ഞപ്പോൾ, അതു ശരിയെന്നു തോന്നിയ വീട്ടുടമസ്ഥൻ, കുറച്ചു വിറക് അയാൾക്കു കൊടുത്തു വിട്ടു. ഒരോ ദിവസവും ഇങ്ങനെ ഓരോ കാരണങ്ങൾ പറഞ്ഞ് സുഹൃത്ത് വിറകു മുഴുവൻ കൊണ്ടുപോയി. അവസാന കഷണവും തീർന്നപ്പോഴാണ് താൻ കബളിയ്ക്കപ്പെടുകയായിരുന്നുവെന്നു വീട്ടുടമസ്ഥനു മനസ്സിലായത്.

അന്യൻ്റെ പറമ്പിലെ വിറകു കൊണ്ടു മാത്രം ജീവിക്കുന്നവരുണ്ട്. പുകഴ്ത്തൽ കൊണ്ടും, പ്രീണനം കൊണ്ടും, അങ്ങനെയുള്ളവർ തങ്ങളുടെ വിശ്വാസ്യത ഉറപ്പാക്കും. നേടിയെടുക്കേണ്ട കാര്യത്തിന് അനുസൃതമായി, അവർ കഥകൾ മെനഞ്ഞു കൊണ്ടേയിരിക്കും. എല്ലാ അളവുകോലുകൾക്കും അപ്പുറമായിരിക്കും, അവരതിനു വേണ്ടി കാണിക്കുന്ന ആത്മാർത്ഥതയും, ഉപയോഗിക്കുന്ന അനുനയ വാക്കുകളും.

ആലോചനയാണ് അറിവിനേക്കാൾ പ്രധാനം. അടുത്തുകൂടി വരുന്നവരെല്ലാം നമ്മുടെ സംരക്ഷകരാകണമെന്നില്ല. ഉയരങ്ങളിലെത്താൻ ചവിട്ടുപടികൾ അന്വേഷിക്കുന്നവരാകും, പലരും. ചവിട്ടിക്കയറിയ പടികൾ മറിച്ചിട്ടിട്ടാകും അവരുടെ മുന്നോട്ടുള്ള യാത്ര.

അന്യന് ഉതകും വിധം, ജീവിതത്തെ ചിട്ടപ്പെടുത്തുന്നതും, അപരൻ്റ അത്താണിയായി തീരുന്നതും, പുണ്യം തന്നെ. എന്നാൽ, വീണ്ടു വിചാരമില്ലാത്ത വിളമ്പി നൽകൽ, അവനവൻ്റെ ആത്മ നാശത്തിലേക്കുള്ള പോക്കായി, ഭവിക്കരുത്.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര