🌹 “ഇന്നത്തെ ചിന്താവിഷയം” 🌹 – 2024 | നവംബർ 23 | ശനി ✍ പ്രൊഫസ്സർ എ.വി. ഇട്ടി മാവേലിക്കര

നന്മയും നാണയവും ഒരേ തട്ടിൽ തൂക്കി നോക്കരുത്
—————————————————————————–

ഒരാൾ വിചിത്രമായ ഒരു സ്വപ്നം കണ്ടു. അയാൾ ഒരു സൂപ്പർ മാർക്കറ്റിലാണ്. അവിടെ, ഓരോ സാധനത്തിലും എഴുതി തൂക്കിയിരുന്ന വില വിവരം കണ്ട് അയാൾ അത്ഭുതപ്പെട്ടു. ജീൻസിന്, അഞ്ഞൂറു രൂപ. തുവാലയ്ക്ക്, അയ്യായിരം! മുന്തിയ ഇനം വാച്ചിന്, മൂവായിരം രൂപ. റ്റൈം പീസിന്, മുപ്പതിനായിരം! അയാൾ സെയിൽസു മാനോടു കാര്യം തിരക്കി. അയാൾ പറഞ്ഞു: “കഴിഞ്ഞ രാത്രിയിൽ, ആരോ വികൃതികൾ അകത്തു കയറി ‘പ്രൈസ് ടാഗുകൾ’ പരസ്പരം മാറ്റി വച്ചു. ആളുകൾക്കു ഭ്രാന്താണെന്നു തോന്നുന്നു. അവർ, ഒരു വിലയുമില്ലാത്തവയ്ക്ക് വലിയ വില നൽകി വാങ്ങുന്നു. ഉയർന്ന മൂല്യമുള്ളവയെ, തിരിഞ്ഞു നോക്കുന്നു പോലുമില്ല!”

ആരൊക്കെയോ കെട്ടിത്തൂക്കിയ വിലവിവരപ്പട്ടികയുമായി സഞ്ചരിച്ച്
ജീവിതം പാഴാക്കരുത്. ആരുടെയൊക്കെയോ പ്രേരണകൾക്കും, എന്തൊക്കെയോ പ്രവണതകൾക്കും വഴങ്ങി, തിരുത്തിയെഴുത്തു നടത്തി, പാഴാക്കാനുള്ളതല്ല ജീവിതം. മറ്റുള്ളവരുടെ അഭിപ്രായങ്ങർക്കും, തീരുമാനങ്ങൾക്കും അനുസരിച്ചു മാത്രം വേഷം കെട്ടുന്നവർക്കു നടത്താൻ കഴിയുന്നതു പാവക്കൂത്തു മാത്രമായിരിക്കും?

മൂല്യമറിഞ്ഞു വേണം, ഓരോന്നിനും വിലയിടുവാൻ. ആവശ്യവും, അത്യാവശ്യവും, അനാവശ്യവും തമ്മിലുള്ള അന്തരം മനസ്സിലാക്കുമ്പോഴാണ് ഏതിൻ്റെയും മൂല്യം മനസ്സിലാക്കാനാകുന്നതും, ശരിയായ തെരഞ്ഞെടുപ്പു നടത്താനാകുന്നതും.
അപ്രധാനമായതിനെല്ലാം ജീവിതത്തിൽ മൂല്യം കല്പിച്ചു തുടങ്ങിയാൽ, നാം നഷ്ടപ്പെടുത്തുന്നത് വിലമതിക്കാനാകാത്തവയാകും.

മാതാപിതാക്കളെ ഡിസ്ക്കാണ്ടു വിലയിൽ,
വൃദ്ധസദനങ്ങൾക്കു കൈമാറുന്നതും, ബന്ധങ്ങളും നിലപാടുകളുമെല്ലാം, താൽക്കാലിക നേട്ടങ്ങൾക്കു വേണ്ടി, പണയം വയ്ക്കുന്നതും, മൂല്യമറിഞ്ഞു വില നിശ്ചയിക്കാനറിയാത്തതു കൊണ്ടാണ്. അതായിരിക്കരുത് നമ്മുടെ സമീപനം. നന്മയും നാണയവും, ഒരേ തട്ടിൽ തൂക്കി നോക്കരുത്.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര