🌹 “ഇന്നത്തെ ചിന്താവിഷയം” 🌹 – 2024 | ഒക്ടോബർ 12 | ശനി ✍ പ്രൊഫസ്സർ എ.വി. ഇട്ടി മാവേലിക്കര

അവസരോചിതമാകട്ടെ നമ്മുടെ ഇടപെടലുകൾ
————————————————————————–

ഉദ്യാനത്തിലെ ഒരു ബഞ്ചിലിരുന്ന് കൂട്ടുകാരുടെ കളി കണ്ട് രസിക്കുകയായിരുന്നു, ഒരഞ്ചു വയസ്സുകാരൻ. ഒപ്പം തൻ്റെ കയ്യിലെ ചോക്ലേറ്റുകൾ തിന്നുകൊണ്ടുമിരുന്നു അവൻ ഇതിങ്ങനെ തുടർന്നു കൊണ്ടിരുന്നപ്പോൾ, അടുത്തിരുന്ന ഒരു വയോധികൻ പറഞ്ഞു: “മോനെ, മതിയാക്ക്; ഇത്രയധികം ചോക്ലേറ്റുകൾ തിന്നുന്നത് നല്ലതല്ല”. കുട്ടി അയാളോടു പറഞ്ഞു: “എൻ്റെ അപ്പുപ്പൻ 101 വയസ്സു വരെ ജീവിച്ചു”. അയാൾ ചോദിച്ചു: “നിൻ്റെ അപ്പുപ്പനും, എന്നും ചോക്ലേറ്റ് ഇതുപോലെ തിന്നുമായിരുന്നോ?” കുട്ടിയുടെ മറുപടി പെട്ടന്നായിരുന്നു.
“ഇല്ല. പക്ഷെ, അപ്പൂപ്പൻ ഇതു പോലെ, മറ്റാരുടെയും കാര്യത്തിൽ, ഇടപെടില്ലായിരുന്നു!”

നിസ്സംഗത ശരിയല്ല. പക്ഷെ, മറ്റുള്ളവരുടെ നീരസം പിടിച്ചുപറ്റുന്ന വിധത്തിൽ പര കാര്യങ്ങളിൽ ഇടപെടുന്നതും, നന്നല്ല. ഓരോ ഇടപെടലും അവസരോചിതവും, സംഗതവുമായിരിക്കണം. ഒരാളുടെ ഇഷ്ടങ്ങളിലേക്കും, സ്വകാര്യതയിലേക്കും കടന്നു ചെല്ലാൻ, അവരുടെ പ്രീയപ്പെട്ടവർക്കു മാത്രമായിരിക്കും അനുമതി. അർഹതയില്ലാത്തവരുടെ അനുമതിയില്ലാത്ത ഇടപെടൽ, ആരേയും അലോസരപ്പെടുത്തി എന്നു വരാം. നമ്മുടെ ചുറ്റുപാടും നടക്കുന്ന കാര്യങ്ങളെ, അതുമായി ബന്ധപ്പെട്ടവരുടെ മനസ്സീകാവസ്ഥയിൽ നിന്നു കൊണ്ടു വേണം, നോക്കിക്കാണാനും പ്രതികരിക്കാനും.

സ്വന്തം പ്രായവും, പ്രാപ്തിയുമനുസരിച്ച് എല്ലാവരേയും അളക്കരുത്. ഒരേ കാര്യം തന്നെ, പലരും പല കാഴ്ചപ്പാടോടും, ഉദ്ദേശ്യത്തോടു കൂടെയുമായിരിക്കും ചെയ്യുന്നത്. അന്യൻ്റെ പ്രവൃത്തികളെ വിമർശിക്കുമ്പോൾ, അവർ എന്തുകൊണ്ടങ്ങനെ ചെയ്യുന്നു എന്നുകൂടി മനസ്സിലാക്കാൻ ശ്രമിച്ചാൽ, എടുത്തു ചാടിയുള്ള പ്രതികരണങ്ങൾ പലതും, ഒഴിവാക്കാനായേക്കും.

അപര താൽപര്യങ്ങളെയും അഭിരുചികളേയും മനസ്സിലാക്കാനും, ബഹുമാനിക്കാനും പഠിക്കുക എന്നതാണ്. നല്ല ബന്ധങ്ങളുടെ തുടക്കത്തിനും, തുടർച്ചക്കും
ആവശ്യമായ ആദ്യപാഠം. അവസരോചിതമായി മാത്രം ഇടപെടാനാവട്ടെ നമുക്ക് .

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര