🌹 “ഇന്നത്തെ ചിന്താവിഷയം” 🌹 – 2024 | സെപ്റ്റംബർ 16 | തിങ്കൾ ✍ പ്രൊഫസ്സർ എ.വി. ഇട്ടി മാവേലിക്കര

തനതു നിയോഗങ്ങളും കർമ്മങ്ങളും നിറവേറ്റി ശ്രേഷ്ഠരാകാം
——————————————————————————————–

ഒരു കാക്കയ്ക്ക് പരുന്തിനോടു കടുത്ത അസൂയ തോന്നി. പരുന്തിൻ്റെ താമസം മലമുകളിലുള്ള ഉയർന്ന മരക്കൊമ്പുകളിലാണ്. എത്ര ഉയരത്തിലും അതിനു പറന്നെത്താനാകും. ചിറകനക്കാതെ, അതു വായുവിൽ ഒഴുകി നടക്കും. വളരെ ഉയരത്തിൽ നിന്നും പാഞ്ഞെത്തി അത് ഇരകളെ റാഞ്ചിയെടുക്കും. കാക്കയും അവസാനം പരുന്താകാൻ തീരുമാനിച്ചു.

കാക്ക മലമുകളിലേക്കു ചിറകടിച്ചു കയറി. ഉയരങ്ങളിലേക്കതു പറക്കാനാരംഭിച്ചു. എന്നാൽ, കുറച്ചു ദൂരം പിന്നിട്ടപ്പോൾ, അതിന് കൂടുതൽ മുകളിലേക്കു പറക്കാനാകാതെ വന്നു. അപ്പോഴതു ചിറകടിക്കാതെ പറക്കാൻ ശ്രമിച്ചു. പെട്ടന്ന് ചിറകുകൾ കുഴയാൻ തുടങ്ങി. അപ്പോഴത് താഴോട്ട് കുതിക്കാൻ ശ്രമിച്ചു. ദൗർഭാഗ്യം എന്നു പറയട്ടെ: സ്വയം നിയന്തിക്കാനാകാതെ, അതു തലതല്ലി താഴെ വീണു ചത്തു.

വലുതാകണമെങ്കിൽ വളരണം: ശരീരവും മനസ്സും ബുദ്ധിയും. ആഗ്രഹം കൊണ്ടു മാത്രമല്ല ആരും ഉന്നതങ്ങളിലെത്തുന്നത്. നിരന്തര പരിശ്രമം കൊണ്ടു കൂടിയാണ്. ഓരോ പടിയും ചവുട്ടിക്കയറുമ്പോഴാർജിക്കുന്ന, ശേഷിയും കരുത്തുമാണ് അടുത്ത ചുവടിനുള്ള ആത്മബലമേകുന്നത്. മലമുകളിലൂടെ സഞ്ചരിക്കാനാകത്തവന് അവിടെ പാർപ്പിടമൊരുക്കാനാവില്ല. അഥവാ, സാധിച്ചാൽത്തന്നെ, അപരിചിത്വം കൊണ്ടും, ആലസ്യം കൊണ്ടും അവിടെ തുടരാനാകാതെ വരും.

ആഗ്രഹിക്കുന്നിടത്തെത്തിച്ചേരണമെങ്കിൽ, ഇല്ലാത്ത പലതും ആർജിക്കേണ്ടി വരും; ഉള്ളതു പലതും, ഉപേക്ഷിക്കേണ്ടിയും വന്നേക്കാം. ആവശ്യമായതിനെ കൂട്ടിച്ചേർക്കുകയും, അധികമായതിനെ അകറ്റി നിർത്തുകയും ചെയ്യുന്ന ഒരു തുടർപ്രവർത്തനത്തിൻ്റെ ഫലമാണ്  വളർച്ച.

അന്യൻ്റെ ജീവിതത്തിലെ സുന്ദര നിമിഷങ്ങളെ, സ്വന്തം ചട്ടക്കൂടുകളിലേക്കു സംവഹിച്ചെടുക്കാൻ ശ്രമിക്കുമ്പോഴുണ്ടാകുന്ന വീഴ്ചകൾക്ക് മറ്റുള്ളവരെ പഴിച്ചിട്ടു കാര്യമില്ല. തനതു നിയോഗങ്ങളും കർമ്മങ്ങളുമാണ് ഓരോ ജീവിതത്തേയും ശ്രേഷ്ഠമാക്കുന്നത്.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര