👬👫കുട്ടീസ് കോർണർ 👬👫 (അമ്പത്തിയൊമ്പതാം വാരം)

ഹായ് കുട്ടീസ്!!
ഈ ആഴ്ച നമുക്ക് A)തീപ്പെട്ടി ചിത്രം കണ്ടൊരു വിശദീകരണം, B) പദ ലളിതം (വാക്കുകളെ കുറിച്ചൊരു വിശദീകരണം), C)സ്ഥലനാമ കഥകൾ പിന്നെ കുറച്ചു D) കടംകഥകളും, കൂടാതെ ഈ ആഴ്ചയും എളുപ്പത്തിൽ(E) സ്റ്റെപ് ബൈ സ്റ്റെപ് ആയി വരയ്ക്കുന്ന ഒരു ചിത്രം കൂടി കാണാം ട്ടോ 😍 കുട്ടീസ് ഒഴിവു സമയങ്ങളിൽ അവ വരച്ചു നോക്കണെ ..😍

എന്ന് സ്വന്തം
ശങ്കരിയാന്റി.

👫A) തീപ്പെട്ടി ചിത്രം (4)

ഡോറ

കുട്ടീസ്….!.

ഡോറയുടെ ചിത്രമുള്ള തീപ്പെട്ടി ചേർക്കുന്നു…

നിക്കലോഡിയോൺ കേബിൾ ടെലിവിഷൻ നെറ്റ് വർക്കിലെ പ്രശസ്തമായ ഒരു കാർട്ടൂൺ പരമ്പരയാണ് ഡോറ ദി എക്സ്പ്ലോറർ. ക്രിസ് ഗിഫോർഡ്, വലേരി വാൽഷ്, എറിക് വെയ്നർ എന്നിവരാണ് ഇതിന്റെ സ്രഷ്ടാക്കൾ. 2000 മുതൽക്കാണ് കുട്ടികൾക്ക് ഉള്ള ഈ പരമ്പര പതിവായി നിക്ക് ജൂനിയർ പോലെയുള്ള ചാനലുകളിൽ പ്രത്യക്ഷപ്പെട്ടു തുടങ്ങിയത്. പ്രദേശിക ഭാഷകളിലും ഡോറ കാർട്ടൂൺ സംപ്രേഷണം ചെയ്യുന്നുണ്ട്. മലയാളത്തിൽ ഡോറയുടെ പ്രയാണം എന്നാണ് പേര്.
ഡോറ മാർക്വെസ് എന്ന 8 വയസ്സുകാരിയാണ് പ്രധാന കഥാപാത്രം. ലാറ്റിനമേരിക്കൻ വംശജയാണ് ഡോറ. ഓരോ കഥയിലും ഡോറ ഓരോ ദൗത്യവുമായി യാത്ര തിരിക്കുന്നു. കൂട്ടിന് മിക്കപ്പോഴും ഡോറയുടെ പ്രിയസുഹൃത്തായ ബൂട്ട്സ് (മലയാളത്തിൽ ബുജി) എന്ന കുരങ്ങനും ഉണ്ടാകും. തന്റെ ബാക്ക്പാക്കിലെ ഭൂപടം, മറ്റുപകരണങ്ങൾ എന്നിവയുടെ സഹായത്തോടെ, പ്രേക്ഷകരായ കുട്ടികൾക്കും സംവദിക്കാൻ അവസരം നൽകി ഡോറ ദൗത്യങ്ങൾ വിജയകരമായി പൂർത്തിയാക്കുന്നു. ഡോറയ്ക്ക് എന്നും ഒരേ പ്രായമാണ്. അവൾക്ക് ഒരിക്കലും വയസ് കൂടുന്നില്ല. 2000-ൽ തുടങ്ങുമ്പോൾ ഡോറ എങ്ങനെയുണ്ടായിരുന്നോ അങ്ങനെ തന്നെയാണ് അവൾ ഇന്നും. അന്നത്തെപ്പോലെ ഇന്നും ഡോറ രാവിലേ തന്നെ ഇറങ്ങിപ്പുറപ്പെടും, ബുജിയും തന്റെ പിങ്ക് ബാക്ക് പാക്കുമായി. പുതിയ എന്തെങ്കിലും ആക്ടിവിറ്റിയുമായി, അല്ലെങ്കിൽ അറിയാത്ത ഏതെങ്കിലും നാടുകൾ തേടി. ഡോറയുടെ ബാക്ക് പാക്കിനുള്ളിൽ യാത്രയിൽ ഉപകരിക്കുന്ന പല സാധനങ്ങളും ഉണ്ടാവും. ഓരോ എപ്പിസോഡും കടന്നുപോവുന്നത് ഡോറയുടെ ഈ പ്രയാണങ്ങളിൽ അവൾക്കുമുന്നിൽ വരുന്ന ചലഞ്ചുകളിലൂടെയാണ്. അതൊക്കെ സോൾവ് ചെയ്യാൻ ഡോറയ്ക്ക് കാണുന്ന കുഞ്ഞുകൂട്ടുകാരുടെ സഹായം കൂടിയേ തീരൂ.

📗📗

👫B) പദ ലളിതം

അധരം

. നമുക്ക് അധരമെന്ന പദത്തെക്കുറിച്ച് ചിന്തിക്കാം. ഈ പദത്തിന് ചുണ്ടെന്ന് പൊതുവിൽ അർത്ഥം നാം പറയാറുണ്ട്. അധ: യെന്ന സംസ്കൃത പദത്തിന് കീഴ് എന്നാണർത്ഥം. ആ നിലയിൽ അധരം ചൂണ്ടല്ല, കീഴ്ചുണ്ടാണ്.

📗📗

👫C) സ്ഥലനാമ കഥകൾ

കുട്ടീസ് ഈ ആഴ്ചയിലും ചില സ്ഥലങ്ങൾക്ക് എങ്ങനെ ആ പേര് വന്നു എന്ന് കൗതുകത്തോടെ വായിച്ചറിഞ്ഞോളൂ 😍

ചമ്പ്രാണിക്കോടി

അഷ്ടമുടിക്കായലിലെ ഒരു മുനമ്പ് ആണ് ഇത്. മുനമ്പിന് എങ്ങനെ ഈ പേര് കിട്ടിയെന്നു ചിന്തിച്ചു നോക്കാം. പണ്ട് കൊല്ലത്തിന് ചൈനയുമായി വ്യാപാരബന്ധമുണ്ടായിരുന്നു. ചൈനക്കാരുടെ ചെറിയ കപ്പലുകളെ ചമ്പ്രാണികളെന്നാണ് അറിയപ്പെട്ടിരുന്നത്.അഷ്ടമുടിക്കായലിൽ ചൈനക്കാരുടെ ചമ്പ്രാണിയെന്ന ചെറിയ കപ്പലുകൾ അടുത്തിരുന്ന സ്ഥലമാവാം ചമ്പ്രാണിക്കോടി. ഉണ്ണിനീലിസന്ദേശത്തിൽ ചമ്പ്രാണിയെ കുറിച്ച് പരാമർശമുണ്ട്.

📗📗

👫D) കടങ്കഥകൾ (15)

1)ഇങ്ങേല വട്ട ചെമ്പ് അങ്ങേലയ്ക്കും, അങ്ങേലെ വട്ട ചെമ്പ് ഇങ്ങേലേയ്ക്കും കൊണ്ടുപോകാന്‍ സാധിക്കില്ല-
കിണര്‍.

2)ഇടത്തൊട്ടില്‍ കരിമീന്‍-
കണ്ണിലെ കൃഷ്ണമണി.

3)ഇടവഴിയിലൂടെ കരിവടിയോടി-
പാമ്പ് .

4)ഇടയ്ക്കിടയ്ക്ക് കെട്ടു കെട്ടി, മാനത്തേയ്ക്ക് വാലു നീട്ടി-
മുള .

5)ഇട്ടാല്‍ പൊട്ടാത്ത ഇംഗ്ലീഷ് മുട്ട-
കടുകുമണി.

6)ഇട്ട പായ് മടക്കില്ല, ചെറു പോത്തിനെ പൂട്ടില്ല, ചെറു കുളംവറ്റില്ല-
റോഡ്, ആന, കടല്‍.

7)ഇട്ടിലിടുക്കിലിളുക്കാശി തെങ്ങിന്മേല്‍ പത്തു നൂറു കൊട്ടത്തേങ്ങ-
ഈന്തപ്പന.

8)ഇട്ടു മൂടാന്‍ തുണിയുണ്ട്. കൈ വശം കെട്ടാന്‍ തുണിയില്ല-
കോഴിത്തൂവല്‍.

9)ഇത്തിരിക്കുഞ്ഞന്‍ കുട്ട്യേ കരയിച്ചു-
കുരുമുളക്.

10)ഇത്തിരി കുഞ്ഞന്റെ വാലിന്മേലെല്ല്-
വറ്റല്‍മുളക്.

📗📗

👫E) എളുപ്പത്തിൽ ഒരു ചിത്രം വരയ്ക്കാം (43)

അവതരണം:

സൈമ ശങ്കർ, മൈസൂർ

➖➖➖➖➖➖➖➖➖➖➖
👬👭👫👭👬👭👫👭👬👭