🌹 “ഇന്നത്തെ ചിന്താവിഷയം” 🌹 – 2024 | ഒക്ടോബർ 02 | ബുധൻ ✍ പ്രൊഫസ്സർ എ.വി. ഇട്ടി മാവേലിക്കര

ആത്മബലം വളർത്തിയെടുക്കാം
——————————————————-

ഒരു വ്യവസായശാലയ്ക്ക് ഒരു രാത്രി തീ പിടിച്ചു. കോടികൾ വിലയുള്ള ആ സ്ഥാപനം വെന്തു വെണ്ണീറായി! ഉടമസ്ഥനേക്കുറിച്ച് ആർക്കും ശരിയായ അറിവില്ലായിരുന്നു. ചില ദിവസങ്ങൾക്കു ശേഷം, ചാരക്കൂമ്പാരത്തിൻ്റെ നടുവിൽ നാട്ടി നിൽത്തിയിരുന്ന ബോർഡിൽ എന്തോ എഴുതിയിരിക്കുന്നതു കണ്ട് ഒരാൾ അത് ഉറക്കെ വായിച്ചു: “എല്ലാം നഷ്ടപ്പെട്ടു: ആത്മവിശ്വാസവും, അർപ്പണബോധവുമൊഴിച്ച്. വ്യവസായ ശാലയുടെ പുനർനിർമ്മാണം നാളെ ആരംഭിക്കും”.

എല്ലാം അവസാനിച്ചു എന്നു കരുതുന്നിടത്തു നിന്നാണ് പല പുത്തൻ മുന്നേറ്റങ്ങളും ആരംഭിക്കുന്നത്. തകരാത്ത ആത്മവിശ്വാസത്തിനു മുമ്പിൽ എല്ലാ പ്രതിസന്ധികളും പ്രതികൂലതകളും അടിയറവു പറയും. എല്ലാ ദുരന്തങ്ങൾക്കും ദുരിതങ്ങൾക്കും അറുതിയു ണ്ട്. അതിനുമപ്പുറം വളരാനോ, തളർത്താനോ അവയ്ക്കാകയില്ല. പിടിച്ചു നിൽക്കുന്നവൻ്റെ പടയോട്ടത്തിനു മുമ്പിൽ, ഏതു വിപത്തും കീഴടങ്ങിയേ പറ്റൂ.

മുന്നറിയിപ്പു നൽകി വരുന്നവയാകില്ല ദുരന്തങ്ങൾ. അവ എല്ലാ മുന്നൊരുക്കങ്ങളയും മറികടന്നെന്നും വരും. തളർച്ചയുടെ ദിവസങ്ങളെ തരണം ചെയ്യലാണ് ആദ്യപടി. അതു മറികടന്നു കഴിഞ്ഞാൽ, തിരിച്ചെടുക്കാവുന്നവയാണ് മറ്റെല്ലാം. ആത്മവിശ്വാസം കൈമുതലായുണ്ടായിരിക്കണം എന്നു മാത്രം

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര