🌹 “ഇന്നത്തെ ചിന്താവിഷയം” 🌹 – 2024 | ഒക്ടോബർ 09 | ബുധൻ ✍ പ്രൊഫസ്സർ എ.വി. ഇട്ടി മാവേലിക്കര

ആത്മാവു പണയപ്പെടുത്തരുത്
————————————————-

കാട്ടിലെ ആസ്ഥാന ഗായികയായിരുന്നു വനമ്പാടി. ഒരിക്കൽ ഒരു പെട്ടിയുമായി വനത്തിലൂടെ വന്ന കർഷകനോട് അവൾ ചോദിച്ചു: “നിങ്ങളുടെ കയ്യിലെന്താണ് ? എങ്ങോട്ടാണു യാത്ര?” “പെട്ടിയിൽ നിറയെ പുഴുക്കളാണ്. അവയെ ചന്തയിൽ വിറ്റിട്ട് പകരം തൂവലുകൾ വാങ്ങാൻ പോകുകയാണ് “, അയാൾ പറഞ്ഞു. പക്ഷിയുടെ തൂവലുകൾ തന്നാൽ, തൻ്റെ
പുഴുക്കളെ പക്ഷിക്കു നൽകാം എന്ന നിർദ്ദേശവും കർഷകൻ മുമ്പോട്ടു വച്ചു. പക്ഷി, തൻ്റെ ഒരു തുവൽ പറിച്ചു കൊടുത്ത് പുഴുക്കളെ വാങ്ങി. പിറ്റേ ദിവസവും ഇതാവർത്തിച്ചു. എല്ലാ ദിവസവും ഇതു തുടർന്നപ്പോൾ, പക്ഷിയുടെ തൂവലുകളെല്ലാം നഷ്ടപ്പെട്ടു. തൂവലുകളില്ലാതെ, സൗന്ദര്യം നഷ്ടപ്പെട്ട പക്ഷിക്ക് തൻ്റെ ആത്മാവു തന്നെ നഷ്ടപ്പെട്ടതായി തോന്നി. അതു പാടാതായി. താമസിയാതെ അതിനു ജീവനും നഷ്ടപ്പെട്ടു.

ആത്മാവു പണയപ്പെടുത്തിയാകരുത്‌, അന്നം തേടേണ്ടത്. സ്വന്തം അനന്യതകളോടു നാം നടത്തുന്ന വിട്ടുവീഴ്ചകളെല്ലാം, സ്വയനാശത്തിലേ അവസാനിക്കൂ. ആഗ്രഹങ്ങളുടെ അടിമയായാൽപ്പിന്നെ ചിന്തയും പ്രവൃത്തിയുമെല്ലാം നഷ്ടമാകും. അവിവേകം, അതിവേഗം, മേധാവിത്വം സ്ഥാപിക്കുകയും ചെയ്യും.

വഴിയരികിലെ പ്രലോഭനങ്ങളും, എളുപ്പവഴിക്കു വേണ്ടിയുള്ള അന്വേഷണങ്ങളുമെല്ലാം സ്വത്വബോധം നഷ്ടപ്പെട്ടവരും, ജീവിത നിയോഗം മറന്നു പോയവരും അഭിമുഖീകരിക്കേണ്ടി വരുന്ന വിധി വൈപരീത്യങ്ങളാണ്. വിലപേശാം;
ക്രയവിക്രയം നടത്താം; ലാഭം കൊയ്യുകയുമാകാം. പക്ഷെ, സ്വന്തം ആത്മാവു പണയം വച്ചു നേടുന്ന സമ്പത്തുകൊണ്ടെന്തു പ്രയോജനം?

“ഒരുവൻ സർവ്വ ലോകവും നേടുകയും, തൻ്റെ ആത്മാവു നഷ്ടപ്പെടുത്തുകയും ചെയ്താൽ, അവന് എന്തു പ്രയോജനം” എന്നാണു് സർവ്വേശ്വര വചനം. അന്നവും അർത്ഥവും ഒരാളുടെ അവകാശമാണ്. പക്ഷെ, അവ അദ്ധ്യാനിച്ചു സ്വന്തമാക്കേണ്ടവയാണ്.
ആവശ്യങ്ങൾ നിറവേറ്റേണ്ടതു്, പ്രയഗ്ന ങ്ങളിലൂടെയാണു്, കൗശലങ്ങളിലൂടെയല്ല. ആത്മാവു പണയപ്പെടുത്താതിരിക്കാൻ നമുക്കാകട്ടെ.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര