🌹 “ഇന്നത്തെ ചിന്താവിഷയം” 🌹 – 2024 | ജൂലൈ 10 | ബുധൻ ✍ പ്രൊഫസ്സർ എ.വി. ഇട്ടി മാവേലിക്കര

ചിലതിനെ അവഗണിക്കാനും കഴിയണം
————————————————————-

ഒരു ഒറ്റയാൻ ആന, നദിയിലെ കുളിയും കഴിഞ്ഞ് വരികയായിരുന്നു. ഒരു പാലത്തിനടിയിൽ എത്തിയപ്പോൾ, ചെളിയിൽ പുതഞ്ഞ ഒരു പന്നി എതിരെ വരുന്നു. അതു മുരളിക്കൊണ്ടു പ്രകോപിപ്പിക്കാൻ നോക്കിയെങ്കിലും, ആന അതു ഗൗനിക്കാതെ മറുവശം ചേർന്നു നടന്നു പോയി. പന്നി അഹങ്കാരത്തോടെ സുഹൃത്തുക്കളോടെല്ലാം പറഞ്ഞു: “ആനയ്ക്ക് എന്നെ പേടിയാണ്!” ഇതു കേട്ടു രോഷം പൂണ്ട മറ്റാനകൾ, ഒറ്റയാനെ ചോദ്യം ചെയ്തു: “നിങ്ങളെന്തിനാണ്, ആ ചെറുപന്നിയുടെ മുൻപിൽ തോറ്റു കൊടുത്തത് ?” ഒറ്റയാൻ്റെ മറുപടി ഇതായിരുന്നു: “എനിക്കവനെ ഒരു ചവിട്ടിനു ശരിയാക്കാമായിരുന്നു. പക്ഷെ, കുളി കഴിഞ്ഞു വന്ന ഞാൻ, ചെളിയിൽ കുളിച്ചു നിൽക്കുന്ന അവനെ ചവിട്ടാൻ പോയാൽ എൻ്റെ ദേഹത്തും ചെളി പുരളുമായിരുന്നു!”

വഴിയിൽ കാണുന്ന എല്ലാറ്റിനോടും അങ്കത്തിനു പോകരുത്. എല്ലാവരുടെയും അഭിപ്രായങ്ങൾക്കു ചെവി കൊടുക്കേണ്ട കാര്യവുമില്ല. എല്ലാ കവലകളിലും നിന്നു നേരമ്പോക്കു പറയുന്നവരും, വാഗ്വാദം നടത്തുന്നവരും, ഒരിക്കലും ലക്ഷ്യസ്ഥാനത്ത് എത്താറില്ല.

ഒരാളുടെ നിലവാരം തീരുമാനിക്കുന്നത് അയാളുടെ സുഹൃത്തുക്കൾ മാത്രമല്ല, എതിരാളികൾ കൂടിയാണ്. മാന്യനായ പ്രതിയോഗി മാന്യമായി മത്സരിക്കും. നിലവാരം കുറഞ്ഞവരോ, എതിരാളിയുടെ മാന്യതയേപ്പോലും ചവുട്ടിക്കാഴ്ത്തും. ചെളിയിൽ നിൽക്കുന്നവരുമായി ഒരിക്കലും മത്സരത്തിനു പോകരുത്. നമ്മുടെ ദേഹത്തു ചെളി പറ്റും എന്നതുകൊണ്ടു മാത്രമല്ല; എതിരാളിക്ക് ചെളി മാത്രമാണിഷ്ടം എന്നതുകൊണ്ടും കൂടിയാണത്.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര