🌹 “ഇന്നത്തെ ചിന്താവിഷയം” 🌹 – 2024 | ഒക്ടോബർ 23 | ബുധൻ ✍ പ്രൊഫസ്സർ എ.വി. ഇട്ടി മാവേലിക്കര

തിരുത്തലുകൾ കരുതലോടെ ആകട്ടെ
———————————————————–

ഒരു ദേവാലത്തിലെ ആരാധനയുടെ മദ്ധ്യത്തിൽ, ഒരാളുടെ മൊബൈൽ ഫോൺ തുടരെ ശബ്ദിച്ചു. അവിടെയുണ്ടായിരുന്ന എല്ലാവരും അയാളെ കുറ്റപ്പെടുത്തി. വീട്ടിലേക്കു മടങ്ങുന്നതിനിടെ, അയാളുടെ ശ്രദ്ധക്കുറവിനെക്കുറിച്ച് ഭാര്യയും അയാളെ ശകാരിച്ചു. നാണക്കേടു മൂലം അയാൾ ഏറെ ദു:ഖിതനായി. മദ്യം കഴിച്ച് ദുഃഖം മറക്കാനായി, അയാൾ വൈകിട്ട് മദ്യശാലയിലെത്തി. മദ്യപിക്കുന്നതിനിടെ, ഗ്ലാസ്സ് അയാളുടെ കയ്യിൽ നിന്നും താഴെ വീണുടഞ്ഞു. പരിചാരകൻ ഓടിയെത്തി അവിടം വൃത്തിയാക്കുകയും, “അറിയാതെ സംഭവിച്ചതല്ലെ, സാരമില്ല” എന്നു പറഞ്ഞ് അയാളെ സമാശ്വസിപ്പിക്കുകയും ചെയ്തു. അതോടെ, അയാൾ അവിടത്തെ നിത്യസന്ദർശകനായിത്തീർന്നു.

പ്രകാശം പരത്തേണ്ടവർതന്നെ, വിളക്കണച്ചു കളഞ്ഞാൽ, അന്ധകാരമല്ലാതെ മറ്റു പോംവഴി ഒന്നുമില്ല. മൂല്യങ്ങൾ പരിശീലിപ്പിക്കുന്നതിന് നിയമങ്ങൾ മാത്രം പോരാ, അനുകമ്പയും സഹാനുഭൂതിയും കൂടി ആവശ്യമാണ്. അവർത്തിച്ചുള്ള ഓർമ്മപ്പെടുത്തലുകൾക്കു ശേഷവും തെറ്റുകളും പിഴവുകളും സംഭവിക്കാം? മറ്റുള്ളവരുടെ അബദ്ധങ്ങളെ മന:പ്പൂർവമുള്ള വീഴ്ചയായി വ്യാഖ്യാനിക്കാതെ, സഹിഷ്ണതയോടെ സമീപിക്കാൻ, നമുക്കു കഴിയണം.

തെറ്റുകൾ സംഭവിക്കുന്നത് അജ്ഞത കൊണ്ടോ ആലോചനയില്ലായ്മ കൊണ്ടോ ആകാം. സൗമ്യമായ, സ്വകാര്യമായ തിരുത്തലുകളാണു വേണ്ടിയതു്ത്. പരസ്യമായ ശാസനകളല്ല. ആശ്വാസവും അനുകമ്പയും ലഭിക്കേണ്ടിടത്തു നിന്ന് അപമാനമുണ്ടായാൽ, അതിൻ്റെ അനന്തരഫലം വിനാശകരമായിരിക്കും.

ഒരാൾ തെറ്റു ചെയ്യുമ്പോൾ, മറ്റുള്ളവർ അയാളോടു കാണിക്കുന്ന സമീപനമാണ് ആ വ്യക്തിയിൽ മാറ്റത്തിൻ്റെ വിളക്കു തെളിയിക്കുന്നത്. വിശുദ്ധനും സദ്ഗുണ സമ്പുർണ്ണനും, അനുകമ്പയും ആനുകൂല്യവും, വേണമെന്നില്ല. എന്നാൽ, തെറ്റുകാരനും കുറ്റവാളിക്കും പിന്തുണ കൂടിയേ തീരൂ: തിരുത്താനും, തിരിച്ചു വരാനും.

കരുണയില്ലാത്ത വിമർശനങ്ങൾ, തിരുത്തലുകൾ രൂപപ്പെടുത്തുകയില്ല. വിശുദ്ധിയിലെ വാഴ്ത്തലിനേക്കാൾ, വീഴ്ചകളിലെ കരുതലാണ്, ഒരാളുടെ മനോഭാവത്തിലും, സ്വഭാവത്തിലും, വ്യതിയാനങ്ങൾ രൂപപ്പെടുത്തുക.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര