🌹 “ഇന്നത്തെ ചിന്താവിഷയം” 🌹 – 2024 | ജൂലൈ 27 | ശനി ✍ പ്രൊഫസ്സർ എ.വി. ഇട്ടി മാവേലിക്കര

ആണയിടൽ അവസരവാദപരം ആക്കരുത്
—————————————————————

പ്രശ്നങ്ങളുടെ നിലയില്ലാക്കയത്തിൽ അകെപ്പട്ട അയാൾ, ഒരു നേർച്ച നേർന്നു: “പ്രശ്നങ്ങളെല്ലാം പരിഹരിക്കപ്പെട്ടാൽ, തൻ്റെ വീടു വിറ്റ് ആ പണം പാവങ്ങൾക്കു നൽകും”. ഒരു മാസത്തിനകം അയാളുടെ എല്ലാ വൈഷമ്യങ്ങളും പരിഹരിക്കപ്പെട്ടു. പക്ഷെ, അത്രയും പണം പാവപ്പെട്ടവർക്കു കൊടുക്കാൻ അയാളുടെ മനസ്സു സമ്മതിച്ചില്ല. തന്ത്രജ്ഞനായ അയാൾ, തൻ്റെ വീടിനൊപ്പം സ്വന്തം പൂച്ചയേക്കൂടി വിൽക്കാൻ തീരുമാനിച്ചു. പൂച്ചയ്ക്കു് പതിനായിരം സ്വർണ്ണ നാണയവും, വീടിന് ഒരു സ്വർണ്ണ നാണയവും അയാൾ വിലയിട്ടു. വീടു വിറ്റുകിട്ടിയ ഒരു സ്വർണ്ണ നാണയം അയാൾ പാവപ്പെട്ടവർക്കു വീതിച്ചു നൽകി. പൂച്ചയുടെ പതിനായിരം സ്വർണ്ണ നാണയം സ്വന്തമാക്കുകയും ചെയ്തു.

രക്ഷാമാർഗ്ഗമായി കണ്ടെടുത്തുന്ന വാഗ്ദാനങ്ങൾ അൽപായുസുകളാകും. അവയ്ക്കു് ആത്മാർത്ഥതയുണ്ടാകില്ല. വികാരങ്ങൾക്ക് അടിമപ്പെട്ടല്ല, വിചാരങ്ങളുടെ അടിത്തറയിൽ നിന്നു കൊണ്ടു വേണം, വാഗ്ദാനങ്ങൾ ചെയ്യുവാൻ. നിറവേറ്റാനാകാത്ത നേർച്ചകളും, പാലിക്കാനാകാത്ത ഉറപ്പുകളും വഞ്ചിക്കുന്നത് സ്വന്തം വ്യക്തിത്വത്തെയും മറ്റുള്ളവരുടെ പ്രതീക്ഷകളേയും ആയിരിക്കും. ആരവങ്ങൾക്കിടയിലെടുക്കുന്ന ശപഥങ്ങൾ, അസത്യങ്ങളായി അവശേഷിക്കാനാണു സാദ്ധ്യത.

ഉടമ്പടികൾ ഊന്നുവടികളാണ്; പരസ്പര അംഗീകാരത്തിൻ്റെയും ആദരവിൻ്റെയും.
എടുത്ത പ്രതിജ്ഞകളും, കൊടുത്ത വാക്കുകളും മനുഷ്യർ നിറവേറ്റിയിരുന്നെങ്കിൽ, ഏറെ ദൗത്യങ്ങൾ പൂർത്തിയാകുകയും, പ്രതീക്ഷകൾ പൂവണിയുകയും ചെയ്യമായിരുന്നു. പ്രതിജ്ഞകൾ രൂപപ്പെടേണ്ടത് പരിഹാര മാർഗ്ഗമായിട്ടല്ല, പരിവർത്തന സാദ്ധ്യതകളായിട്ടാണ് . പിടികൊടുക്കാതിരിക്കാനും, പിടിച്ചു നിൽക്കാനും വേണ്ടിയുള്ള ആണയിടൽ അവസരവാദപരമായിരിക്കും. നമുക്കതിൽ നിന്നും ഒഴിഞ്ഞിരിക്കാം.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര