🌹 “ഇന്നത്തെ ചിന്താവിഷയം” 🌹 – 2024 | ജൂലൈ 26 | വെള്ളി ✍ പ്രൊഫസ്സർ എ.വി. ഇട്ടി മാവേലിക്കര

ആത്മബലം: വിജയത്തിൻ്റെ രഹസ്യം
——————————————————-–

ജൂലിയസ് സീസർ ഇംഗ്ലണ്ട് ആക്രമിക്കാൻ, പതിന്നാലു കപ്പലുകൾ നിറയെ സൈനീകരുമായി പുറപ്പെട്ടു. മൂന്നിരട്ടിയിലധികം വരുന്ന സുസജ്ജമായ ബ്രിട്ടിഷ് സൈന്യത്തെക്കണ്ട് റോമൻ സൈന്യം അമ്പരന്നു. ഇതു മനസിലാക്കിയ സീസർ ഉടൻ സൈന്യാധിപരോടു കല്പിച്ചു: “നാം വന്ന കപ്പലുകൾ എല്ലാം തീവെച്ചു നശിപ്പിക്കുക”. മനസില്ലാമനസ്സോടെ, അവരതു ചെയ്തു.

കപ്പലുകൾ കത്തിക്കൊണ്ടിരിക്കുമ്പോൾ, സീസർ തൻ്റെ സൈനീകരെയെല്ലാം അടുക്കെ വിളിച്ചിട്ടു പറഞ്ഞു: “നമ്മുടെ മുമ്പിൽ, ഇനി രണ്ടു വഴികൾ മാത്രം. ഒന്നുകിൽ ഇവിടെ കിടന്നു മരിക്കാം. അല്ലെങ്കിൽ, ഇംഗ്ലണ്ടിനെ കീഴടക്കി, അവരുടെ കപ്പലുകളിൽ നാട്ടിലേക്കു മടങ്ങാം”. റോമൻ സൈന്യം ആഞ്ഞടിച്ചു. ശത്രു രാജ്യത്തെ കീഴടക്കി; അവരുടെ കപ്പലുകളിൽ നാട്ടിൽ തിരികെയെത്തി.

എല്ലാ അവസ്ഥാന്തരങ്ങൾക്കും പ്രതിബന്ധം, നിലവിലുള്ള അവസ്ഥകളാണ്. പഴയതിനോടു വിടപറയാതെ പുതിയവ നേടിയെടുക്കാനാവില്ല. അത്, സ്വപ്നങ്ങളായാലും, സാമ്രാജ്യങ്ങൾ ആയാലും. ഉറവിടങ്ങൾ വിട്ടുപോകാനാവാത്തതിൻ്റെ പേരിൽ, ഒരിടത്തും എത്താൻ കഴിയാതെ പോയവർ, ഒട്ടേറെയാണ്.

പടക്കപ്പലുകളിൽ വിശ്വസിക്കാതെ, പട നയിക്കുന്നവരിൽ വിശ്വസിക്കണം. എല്ലാ മുന്നൊരുക്കങ്ങളും പ്രതികൂല സാഹചര്യങ്ങളിൽ അപ്രസക്തമാകുമ്പോൾ, മുമ്പിൽ നിന്നു നയിക്കുന്നവൻ്റെ ആത്മവിശ്വാസമാകും അവസാനത്തെ പിടിവള്ളി. ആൾബലം കൊണ്ടു നേടാൻ പറ്റാത്തത് ആത്മബലം കൊണ്ടു നേടാനാകും.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര