🌹 “ഇന്നത്തെ ചിന്താവിഷയം” 🌹 – 2024 | ജൂലൈ 18 | വ്യാഴം ✍ പ്രൊഫസ്സർ എ.വി. ഇട്ടി മാവേലിക്കര

ഇഷ്ടമില്ലാ വഴികളിലേക്കു ആരേയും വലിച്ചിഴയ്ക്കരുത്
…………………………………………..

ഒരാൾ ഒരു പശുവിനെ വാങ്ങി. എന്നാൽ അതിനെ വീട്ടിലേക്കു നടത്താനാകാതെ അയാൾ കുഴങ്ങി. മുമ്പോട്ടു വലിക്കുന്തോറും, പശു പിന്നോട്ടു പോകും.
ഇതു കണ്ട ഗുരു, തൻ്റെ ശിഷ്യരോടു ചോദിച്ചു: “നിങ്ങൾക്കാ മനുഷ്യനെ സഹായിക്കാമോ?”
ശിഷ്യരിലൊരാൾ പശുവിനെ മൂക്കുകയറിട്ടു മുമ്പോട്ടു വലിക്കാനാരംഭിച്ചു. മറ്റൊരാൾ അതിനെ അടിക്കാനും തുടങ്ങി. പക്ഷെ, പശു ഒരടി മുമ്പോട്ടു നീങ്ങിയില്ല. ഒടുവിൽ ഗുരു, കുറച്ചു വൈക്കോൽ പശുവിനെ കാണിച്ചു കൊണ്ട് അതിൻ്റെ മുമ്പിൽ നടക്കാൻ തുടങ്ങി. അതു മടിയൊന്നും കൂടാതെ ഗുരുവിനെ അനുഗമിച്ചു.

തൻ്റേതല്ലാത്ത ലക്ഷ്യത്തിലേക്ക് ആരും സ്വച്ഛമായി യാത്ര ചെയ്യില്ല. മറ്റുള്ളവരുടെ ഇഷ്ടങ്ങൾക്കും, ആഗ്രഹപൂർത്തീകരണത്തിനുമായി പ്രയത്നിക്കുന്നവർ സഞ്ചരിക്കുന്നത് റിവേഴ്സ് ഗീയറിലായിരിക്കും. എത്ര കെട്ടിവലിച്ചാലും, സ്വതന്ത്ര സഞ്ചാരത്തിൻ്റെ സ്വാഭാവികതയും സ്വീകാര്യതയും ആ യാത്രകൾക്കുണ്ടാകയില്ല.

ഒരാളുടെ സ്വപ്നങ്ങളും ലക്ഷ്യങ്ങളും തകർത്തു കളയുന്നതിനേക്കാൾ വലിയ പാപം ഇല്ല. വഴികാട്ടികൾ, അവർക്കിഷ്ടമുള്ള വഴികളിലൂടെയല്ല, ഓരോരുത്തരും പോകേണ്ട വഴികളിലൂടെയാണ് ആളുകളെ നയിക്കേണ്ടത്.

തങ്ങളുടെ അഭിരുചികൾക്കുസരിച്ചുള്ള വഴികളിലൂടെയല്ലാതെ നടക്കാൻ നിർബന്ധിക്കപ്പെടുന്നവർ, അസ്വസ്ഥരാകും; അവർ അനങ്ങാനും മടിക്കും. താൻ നിശ്ചയിക്കുന്ന വഴികളിലൂടെ മാത്രം എല്ലാവരും നടക്കണം എന്നു വാശി പിടിക്കുന്നവർക്ക് കെട്ടി വലിക്കാൻ മാത്രമേ സാധിക്കൂ; യാത്രയ്ക്കായി പ്രചോദിപ്പിക്കാനാകില്ല.

ആളറിഞ്ഞ് j അന്നം വിളമ്പുന്നവരെല്ലാം ആകർഷണീയരാകും. അവരെ അനുഗമിക്കാനും ആളുകൾ കാണും. ആളുകളെയും അവരുടെ പ്രകൃതങ്ങളെയും മാനിക്കാനറിയുന്നവർ മാത്രമേ മറ്റുള്ളവർക്കു സ്വീകാര്യരും പൊതുജന സമ്മതരും ആകൂ

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര