🌹 “ഇന്നത്തെ ചിന്താവിഷയം” 🌹 – 2024 | ജൂലൈ 16 | ചൊവ്വ ✍ പ്രൊഫസ്സർ എ.വി. ഇട്ടി മാവേലിക്കര

പ്രയത്നത്തിനാകണം പ്രതിഫലം
——————————————-

കുട്ടികളുടെ പഠന നിലവാരം ഉറപ്പു വരുത്തുവാൻ, അദ്ധ്യാപകൻ ഒരു പുതിയ പദ്ധതി ആവിഷ്ക്കരിച്ചു. “ഇനി മുതൽ പരീക്ഷകൾക്ക് എല്ലാ കുട്ടികൾക്കും ഒരേ ഗ്രേഡ് ആയിരിക്കും നൽകുക. മുഴുവൻ കുട്ടികൾക്കും ലഭിക്കുന്ന മാർക്കിൻ്റെ ശരാശരി കണ്ട്, ആ ഗ്രേഡ് എല്ലാവർക്കും നൽകും”, അദ്ദേഹം പ്രഖ്യാപിച്ചു.

എല്ലാവരേയും തുല്യരായി കാണുമ്പോൾ, കുട്ടികൾ കൂടുതൽ ആവേശത്തോടെ പഠിച്ചു കൂടുതൽ മാർക്കുകൾ സ്വന്തമാക്കും എന്നതായിരുന്നു അദ്ദേഹത്തിൻ്റെ വിശ്വാസം. എന്നാൽ, അതല്ല സംഭവിച്ചത്. ആദ്യ പരീക്ഷയുടെ ശരാശരി ‘ബി’ ഗ്രേഡ് എല്ലാവർക്കും ലഭിച്ചു. പഠിക്കാത്തവർക്കു സന്തോഷവും, പഠിച്ചവർക്കു വിഷമവും തോന്നി. അടുത്ത പരീക്ഷയിൽ മിടുക്കർ വിചാരിച്ചു : “ഞാൻ കഷ്ടപ്പെട്ടു പഠിച്ചിട്ട് അവർ മാർക്കു വാങ്ങേണ്ട”. ഉഴപ്പന്മാർ ചിന്തിച്ചു: “പഠിച്ചില്ലെങ്കിലും, മാർക്കു കിട്ടും. അതുകൊണ്ടു് ഒട്ടും പഠിക്കണ്ട”. അങ്ങനെ, അടുത്ത പരീക്ഷയുടെ ശരാശരി, ‘സി’ ഗ്രേഡ് ആയി. അടുത്ത പരീക്ഷയും കൂടി കഴിഞ്ഞപ്പോൾ, അതു് ‘ഈ’ ഗ്രേഡ് ആയി. എല്ലാവരും തോറ്റു.

അവരവർ കഷ്ടപ്പെടുന്നതിൻ്റെ ഫലമാകണം ഓരോരുത്തർക്കും ലഭിക്കേണ്ടത്. ഒന്നും ചെയ്തില്ലെങ്കിലും ജീവിക്കാം; ഒന്നും ചെയ്തിട്ടും കാര്യമില്ല; എന്നീ ചിന്തകൾ, സമൂഹത്തെ മുമ്പോട്ടു നയിക്കുകയില്ല. അർഹമായ അംഗീകരവും, പ്രതിഫലവുമാണ്, ഓരോരുത്തരുടെയും കർമ്മശേഷി പൂർണമായും പുറത്തു കൊണ്ടു വരുന്നതിനു മുഖാന്തരമാകുക.

മറ്റുള്ളവർ പണിയെടുക്കുന്നതിലൂടെ എനിക്കും വളരാം എന്നത് വികലമായ കാഴ്ചപ്പാടാണ്. എൻ്റെ പ്രയത്നത്തിൻ്റെ നേട്ടങ്ങൾ എൻ്റെ അനുവാദം കൂടാതെ തന്നെ മറ്റുള്ളവർ കൊണ്ടു പോകും എന്ന ചിന്ത ക്ഷണിച്ചു വരുത്തുന്നത് നിഷ്ക്രിയതയായിരിക്കും.

എല്ലാ കാര്യങ്ങളും എല്ലാവരുമായും പങ്കുവയ്ക്കാൻ സാദ്ധ്യമല്ല. പ്രയത്നം വ്യക്തിപരമാണെങ്കിൽ പ്രതിഫലവും വ്യക്തിനിഷ്ഠമാകണം. തുല്യത പോലെ തന്നെ പ്രധാനപ്പെട്ടതാണ് അർഹതയും.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര