🌹 “ഇന്നത്തെ ചിന്താവിഷയം” 🌹 – 2024 | ജൂലൈ 15 | തിങ്കൾ✍ പ്രൊഫസ്സർ എ.വി. ഇട്ടി മാവേലിക്കര

നമ്മൾ നമ്മളായിരിക്കാൻ ആണ് സൃഷ്ടിക്കപ്പെട്ടിരിക്കുന്നത്
————————————————————————————–

തൻ്റെ ചുണ്ട് വളഞ്ഞു ഭംഗിയില്ലാത്തതാണെന്ന് നിരന്തരം പരാതിയായിരുന്നു കുഞ്ഞിത്തത്തയ്ക്ക്. തത്തമ്മച്ചുണ്ടിൻ്റെ ഭംഗിയേപ്പറ്റി അമ്മത്തത്ത പറഞ്ഞു കൊടുത്തെങ്കിലും, കുഞ്ഞിത്തത്ത അതംഗീകരിക്കാൻ തയ്യാറായില്ല. “പൊൻമാൻറെ ചുണ്ടുകൾ നോക്ക്, നീളമുള്ളവയല്ലെ? കാക്കയുടെ ചുണ്ടുകൾ നോക്ക്, എന്തു ബലമാണ്? കോഴിയുടെ ചുണ്ടു കണ്ടിട്ടുണ്ടോ, എത്ര മൂർച്ചയുള്ളതാണ്?”, അവൾ തെളിവുകൾ നിരത്തി.

സഹികെട്ട അമ്മ കുഞ്ഞിത്തത്തയോടു പറഞ്ഞു: “നീ പോയി പക്ഷികളുടെ രാജാവിനെ കാണ് . അദ്ദേഹം എന്തെങ്കിലും പരാഹാരം ഉണ്ടാക്കും”. കുഞ്ഞിത്തത്ത തൻ്റെ പരാതി , പക്ഷിരാജാവിൻ്റെ മുമ്പിൽ നിരത്തി. അദ്ദേഹം ചോദിച്ചു: “നിനക്ക് മീൻ ഇഷ്ടമാണോ?” കുഞ്ഞിത്തത്ത പെട്ടന്നു തന്നെ മറുപടി പറഞ്ഞു: “അല്ല”. “നീ എലിയെ തിന്നുമോ?” രാജാവു വീണ്ടും ചോദിച്ചു. ” അയ്യേ, ചിന്തിക്കാൻ പോലും പറ്റില്ല” കുഞ്ഞിത്തത്ത പ്രതിവചിച്ചു. “നീ പുഴുക്കളെ തിന്നുമോ?”, പക്ഷി രാജൻ അടുത്ത ചോദ്യമെറിഞ്ഞു. “എനിക്കവയെ കാണുന്നതുപോലും അറപ്പാണ് ”, ഉടൻ വന്നു കുഞ്ഞിത്തത്തയുടെ മറുപടി.

“പൊൻമാൻറെ ചുണ്ട് മീൻപിടിക്കാനും, കാക്കയുടേത്, എലികളെ തിന്നാന്നും, കോഴിയുടേത്, പുഴുക്കളെ കൊത്തിയെടുക്കാനുമാണ്. നിൻ്റെ സുന്ദരമായ ചുണ്ടുകൾ, പഴങ്ങളും കായ്കനികളും ഭക്ഷിക്കാനുള്ളതാണ്. അവരുടെ ചുണ്ടുകൾ വച്ചു നിനക്ക് ഒന്നും ചെയ്യാനാകില്ല”, പക്ഷി രാജാവ് കുഞ്ഞിത്തത്തയെ ആശ്വസിപ്പിച്ചു.

ഓരോ ജീവിതത്തിനും വ്യത്യസ്ഥമായ ഓരോ ലക്ഷ്യമുണ്ട്. ആരും മറ്റൊരാളെപ്പോലെയല്ല: അറിവിലും, കഴിവിലും, അഭിരുചിയിലും ഒന്നും. അങ്ങനെയെങ്കിൽപ്പിന്നെ, എന്തിനാണ് ഒരാൾ മറ്റൊരാളെപ്പോലെയാകാൻ നോക്കുന്നത്?

സുഹൃത്തുക്കളുടെ ഗുണങ്ങൾ നമ്മുടെ പരാതികളാകേണ്ട കാര്യമില്ല. അവരുടെ, ചില പ്രത്യേകതകളോടുള്ള മമത, നമ്മുടെ കഴിവുകളെ കാർന്നു തിന്നേണ്ട ആവശ്യവുമില്ല. ഒരാളുടെ വലംകയ്യും, മറ്റൊരാളുടെ ഇടംകാലും, മൂന്നാമതൊരാളുടെ തലച്ചോറും, നമുക്കു മാറ്റി വെച്ചാൽ, നമ്മൾ നമ്മളല്ലാതാകുകയേ ഉള്ളൂ. നമ്മൾ നമ്മളാകാൻ മാത്രമായാണ് സൃഷ്ടിക്കപ്പെട്ടിരിക്കുന്നത്. നമുക്കതാകാം.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര