🌹 “ഇന്നത്തെ ചിന്താവിഷയം” 🌹 – 2024 | ജൂലൈ 09 | ചൊവ്വ ✍ പ്രൊഫസ്സർ എ.വി. ഇട്ടി മാവേലിക്കര

വിധി സ്വയം എഴുതാം
—————————————

നെപ്പോളിയൻ തൻ്റെ ചെറുപ്പകാലത്ത് ഒരിക്കൽ സ്ക്കൂളിൽ പോകുമ്പോൾ, ഒരു ആൽമരച്ചുവട്ടിൽ ഒരു ആൾക്കൂട്ടം കണ്ടു. ഒരു കൈ നോട്ടക്കാരൻ അവിടിരുന്നു വർത്തമാനം, ഭൂതം, ഭാവി ഇവയെല്ലാം പറയുകയായിരുന്നു. നെപ്പോളിയൻ ആകാംക്ഷയോടെ, തൻ്റെ കൈ നീട്ടിക്കൊണ്ടു ചോദിച്ചു: “ഞാൻ എപ്പോഴെങ്കിലും ഒരു ചക്രവർത്തിയാകുമോ?” കൈ നോട്ടക്കാരൻ രേഖകൾ എല്ലാം വിശദമായി പരിശോധിച്ച ശേഷം, അല്പം വിഷമത്തോടെ പറഞ്ഞു: “ചക്രവർത്തിയാകാനുള്ള ഒരു രേഖയും ഈ കൈകളിലില്ല”. നെപ്പോളിയൻ പിൻ മാറിയില്ല. തൊട്ടടുത്തിരുന്ന ഒരു ചെറിയ കത്തിയെടുത്ത് കൈവെള്ളയിൽ വരഞ്ഞിട്ടു ചോദിച്ചു: “ഈ വര കൊണ്ടു ഞാൻ ചക്രവർത്തിയാകുമോ?” കൈനോട്ടക്കാരൻ പറഞ്ഞു: “ലോകത്തിൽ ഒരു ശക്തിയ്ക്കും, നീ ചക്രവർത്തിയാകുന്നതു തടയാനാകില്ല. കാരണം, ഈ വരച്ചതു നീയാണ്‌ ”.

സ്വന്തം വിധി സ്വയം തീരുമാനിക്കണം. തലവരയ്ക്കനുസരിച്ചല്ല ഒരു ജീവിതവും ക്രമപ്പെടുന്നത്. വരയില്ലെങ്കിൽ സ്വന്തമായി വരയ്ക്കണം. കൈരേഖയാണു ജീവിത രേഖ തീരുമാനിക്കുന്നതെങ്കിൽ, കൈയ്യില്ലാത്തവർ എങ്ങനെ ജീവിതം കരുപ്പിടിപ്പിക്കും.

ഒരു കാര്യം തുടങ്ങാതിരിക്കാനും, തുടങ്ങിയാൽത്തന്നെ പതിവഴിയിൽ ഉപേക്ഷിക്കാനും പ്രേരകമായ ഒട്ടേറെ കാരണങ്ങൾ കണ്ടേക്കാം. കാരണങ്ങൾപ്പുറം കാര്യങ്ങൾ ചെയ്യുന്നവരാണ്, കർമ്മശേഷിയുള്ളവർ മറ്റുള്ളവർ ചൂണ്ടിക്കാണിക്കുന്ന പരിമിതികളല്ല, അവനവൻ്റെ ഉള്ളിലെ നിശ്ചയദാർഢ്യമാണ്‌ ജീവിതത്തിൻ്റെ ഗതി നിശ്ചയിക്കുന്നത്.

സ്വന്തം ജീവിതത്തിൽ എന്തു സംഭവിക്കുമെന്നു മറ്റുള്ളവരല്ല പറയേണ്ടത്. അത്, അവനവൻ തന്നെ തീരുമാനിക്കണം. സ്വയം പ്രേരിതമായ ചില ചോദ്യങ്ങൾ, ഓരോ പുലർ കാലത്തും മനസ്സിൽ രൂപപ്പെടണം. ഓരോ സായാഹ്നത്തിലും, അവയ്ക്കുള്ള ഉത്തരങ്ങൾ നൽകുവാനും കഴിയണം. സ്വയം കണ്ടെത്തിയ ഉത്തരങ്ങളാകണം സ്വന്തം ജീവിതം.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര