🌹 “ഇന്നത്തെ ചിന്താവിഷയം” 🌹 – 2024 | ഡിസംബർ 12 | വ്യാഴം ✍ പ്രൊഫസ്സർ എ.വി. ഇട്ടി മാവേലിക്കര

സമ്മാനത്തിൻ്റെ മൂല്യം, അത് നൽകുന്നവരുടെ മൂല്യം!
——————————————————————————

സ്ഥിരമായി മദ്യപിക്കുമായിരുന്ന അയാൾ, എന്നും വൈകിട്ടു വീട്ടിലെത്തുമ്പോൾ, മക്കൾക്കായി ഒരു സമ്മാനപ്പൊതി കരുതുമായിരുന്നു. ഒരു ദിവസം ജോലി കഴിഞ്ഞ് അദ്ദേഹം വീടിനടുത്തുള്ള ബസ്സ് സ്റ്റോപ്പിൽ എത്തിയപ്പോൾ, പതിവിലധികം നേരം വൈകിയിരുന്നു. എന്നും കയറുന്ന കടയിലെത്തി, അയാൾ കടക്കാരനോടു പറഞ്ഞു: ” മക്കൾക്കു ഞാൻ ഇതുവരെ കൊടുക്കാത്ത തരം ഒരു സമ്മാനം വേണം ഇന്ന് “. അതു കേട്ട കടക്കാരൻ പറഞ്ഞു: “എങ്കിൽ, നിങ്ങളൊരു കാര്യം ചെയ്യൂ. ഇന്നു മദ്യപിക്കാതെ വീട്ടിലെത്തൂ. സുബോധത്തോടെ വീട്ടിലെത്തുന്ന അപ്പനായിരിക്കും, അവർക്കു ലഭിക്കാവുന്ന ഏറ്റവും വലിയ സമ്മാനം!”

സ്വയം സമ്മാനമാകുക എന്നതാണ്, ഒരാൾക്കു നൽകുവാൻ കഴിയുന്ന അമൂല്യ സമ്മാനം. വലിപിടിപ്പുള്ള പൊതിക്കെട്ടുകളെക്കാൾ, വലിമതിക്കാനാകാത്ത സ്വയ സാന്നിദ്ധ്യമാകും, ഏറ്റവും വലിയ സമ്മാനം.
ഹൃദയത്തിൽ സ്ഥാനമുളളവരുടെ സാമിപ്യം, ഹൃദയ സ്പർശിയാണ്. സാന്നിദ്ധ്യം തന്നെ സമ്മാനമാകുമെങ്കിൽ, പിന്നെന്തിനാണു കാഴ്ച ദ്രവ്യങ്ങൾ? ഹൃദയം കൊണ്ടു സ്നേഹിക്കാനറിയാത്തവർ, സമ്മാനം കൊണ്ടു സ്നേഹിക്കാൻ ശ്രമിക്കുന്നതിൽ എന്താണർത്ഥം?

കൊടുക്കുന്ന സമ്മാനത്തിനു നൽകുന്ന വില, അതു കൊടുക്കുന്ന കൈകൾക്കു കൂടി ഉണ്ടാകണമെന്നു നാം ശഠിച്ചിരുന്നുവെങ്കിൽ,
പാരാതോഷിക സങ്കല്പം തന്നെ മാറി മറിഞ്ഞേനേ. ഇഷ്ടമില്ലാത്തവർ നൽകുന്ന പൊൻനാണയങ്ങളേക്കാൾ വിശിഷ്ടം, ഇഷ്ടമുളളവർ നൽകുന്ന ചെമ്പുനാണയങ്ങളായിരിക്കും.

കൊടുന്നവർക്ക് ഇഷ്ടമുള്ള സമ്മാനങ്ങളേക്കാൾ, സ്വീകരക്കുന്നവർ ഇഷ്ടപ്പെടുന്ന സമ്മാനം നൽകാൻ, നാം പഠിക്കണം. ഒരു സമ്മാനവും അതു നൽകുന്ന ആളേക്കാൾ വിശിഷ്ടമല്ല. സമ്മാനത്തിൻ്റെ മൂല്യം, അതു നൽകുന്നവരുടെ മൂല്യമാണ് ! മൂല്യവർദ്ധിത സമ്മാനങ്ങൾ നൽകുന്നതിനുള്ള ഏക മാർഗ്ഗം, സ്വന്തം ഗുണനിലവാരം വർദ്ധിപ്പിക്കുക എന്നതാണ്.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര