🌹 “ഇന്നത്തെ ചിന്താവിഷയം” 🌹 – 2024 | ഡിസംബർ 09 | തിങ്കൾ ✍ പ്രൊഫസ്സർ എ.വി. ഇട്ടി മാവേലിക്കര

വ്യർത്ഥമായ തർക്കങ്ങൾ ഒഴിവാക്കുക
————————————————————

കാറ്റിലാടുന്ന കൊടിയേക്കുറിച്ചു രണ്ടു പേർ തമ്മിൽ തർക്കിക്കുകയായിരുന്നു. ഒരാൾ പറഞ്ഞു: “കൊടിയാണു ചലിക്കുന്നത് ”.
മറ്റയാൾ പറഞ്ഞു: “അല്ല, കാറ്റാണു ചലിക്കുന്നത് “. രണ്ടു പേരും വിട്ടുകൊടുക്കാൻ തയ്യാറായിരുന്നില്ല. ഇതെല്ലാം കേട്ടുകൊണ്ടു വന്ന ഒരു വഴിപോക്കൻ പറഞ്ഞു: കൊടിയുമല്ല, കാറ്റുമല്ല, നിങ്ങളുടെ മനസ്സാണു്ണ് ഇപ്പോൾ ചലിച്ചുകൊണ്ടിരിക്കുന്ന
ത് !”

ഒരാൾ, എന്തൊക്കെ തർക്കങ്ങളിൽ ഏർപ്പെടുന്നു എന്നറിഞ്ഞാൽ, അയാളുടെ മാനസ്സിക നിലവാരം നിശ്ചയിക്കാനാകും. ഇഷ്ടവിഷയങ്ങളിലോ, ഇരുകൂട്ടർക്കും അറിവില്ലാത്ത വിഷയങ്ങളിലോ ആയിരിക്കും സാധാരണ വാദപ്രതിവാദങ്ങൾ നടക്കുക. സ്വന്തം ശരികൾ വാദിച്ചുറപ്പിക്കാനും, അതപരനേക്കൊണ്ട് അംഗീകരിപ്പിക്കാനുമായിരിക്കും ഇരുകൂട്ടരും കിണഞ്ഞു പരിശ്രമിക്കുക.

താൻ ശരിയാണെന്നു സ്ഥാപിക്കുന്നതിനേക്കാൾ, അപരൻ തെറ്റാണെന്നു വരുത്തിത്തീർക്കാനുള്ള വ്യഗ്രതയായിരിക്കും ഓരോരുത്തരും വെളിപ്പെടുത്തുക. വാദിച്ചു തുടങ്ങുമ്പോൾ, വാദിക്കുന്ന വിഷയങ്ങൾക്കായിരിക്കും, പ്രാധാന്യം. എന്നാൽ, വാദം പുരോഗമിക്കുമ്പോൾ, അവർ ഉപയോഗിക്കുന്ന വാക്കുകളും, പ്രകടമാക്കുന്ന വികാരവും ആയിരിക്കും പ്രസക്തമാകുക. വാദിക്കുന്ന വിഷയത്തിൻ്റെ പ്രാധാന്യത്തേക്കാൾ, വാദിക്കുന്ന രീതിയിലെ അപക്വതയും, അതിവൈകാരികതയുമായിരിക്കും, വാദത്തെ കലാപത്തിലേക്കു നയിക്കുക.

വാദത്തിനു ശേഷം എന്നു സംഭവിക്കുന്നു എന്നതാണ്, വാദത്തിനിടയക്ക് എന്തു സംഭവിക്കുന്നു എന്നതിനേക്കാൾ പ്രധാനം. ഓരോ വാഗ്വാദവും അവസാനിക്കുന്നത്, ഇരുവരും തമ്മിലുള്ള ബന്ധം തകർത്തു കൊണ്ടാണെങ്കിൽ, തർക്കത്തിൽ താൻ ജയിച്ചു എന്ന് ഒരാൾ അഭിമാനിക്കുന്നതു കൊണ്ടെന്തു പ്രയോജനം?

എന്താണു ശരി എന്നതിനേക്കാൾ, ആരാണു ശരി എന്നു സ്ഥാപിക്കാൻ ശ്രമിക്കുമ്പോഴാണ്, തർക്കങ്ങൾ ദുരുദ്ദേശ്യപരമാകുന്നത്. സ്വന്തം ചിന്തകളുടെ ചുമരുകൾക്കുള്ളിൽ നിന്നും, അപരൻ്റെ കാഴ്ചകളുടെ ചക്രവാളങ്ങളിലേക്കു സഞ്ചരിക്കാൻ വാഗ്വാദങ്ങൾ സഹായിക്കുമെങ്കിൽ, അവ പ്രയാജനം ചെയ്യും. വ്യർത്ഥമായ തർക്കങ്ങളിൽ നിന്നൊഴിഞ്ഞു നിൽക്കാനാകും, ജ്ഞാനികൾ ശ്രമിക്കുക. നമുക്കും അതിനു കഴിയട്ടെ..

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര