🌹 “ഇന്നത്തെ ചിന്താവിഷയം” 🌹 – 2024 | ഡിസംബർ 08 | ഞായർ ✍ പ്രൊഫസ്സർ എ.വി. ഇട്ടി മാവേലിക്കര

അറച്ചു നിൽക്കാതെ എടുത്തു ചാടാൻ ആകട്ടെ
———————————————————————-

ദാഹിച്ചു വലഞ്ഞ് ഒരാൾ ഒരു കുളക്കരയിൽ എത്തി. ആഴമേറെയുണ്ടായിരുന്നതിന്നാലും, പടവുകൾ ഇല്ലാതിരുന്നതിനാലും, താഴേക്കിറങ്ങാൻ എന്തു ചെയ്യണമെന്നാലോചിച്ച് അയാൾ കുളക്കരയിൽ നില്പായി. അപ്പോൾ, വെള്ളം കിട്ടാതെ വലഞ്ഞ ഒരു നായും അവിടെയെത്തി. കുളത്തിൽ നോക്കിയ നായ, വെള്ളത്തിനടിയിലെ തൻ്റെ പ്രതിബിംബം കണ്ടു പേടിച്ചു കുരച്ചു. അപ്പോൾ പ്രതിബിംബവും കുരച്ചു. എങ്കിലും, ദാഹം സഹിക്കാനാവാതെ, അതു രണ്ടും കല്പിച്ച്, കുളത്തിലേക്കെടുത്തുചാടി. അയാളും പുറകെ ചാടി!

ഒരുങ്ങി പുറപ്പെടുന്നതിനേക്കാൾ, ഒരുമ്പെട്ടിറങ്ങുമ്പോഴാണ്, പല കാര്യങ്ങളും ഫലപ്രാപ്തിയിലെത്തുക. തയ്യാറെടുപ്പിൻ്റെ വഴികളിലൂടെ മാത്രം സഞ്ചരിക്കുന്നവർക്ക് പലപ്പോഴും പ്രതിസന്ധികളെ അതിജീവിക്കുവാൻ കഴിയണമെന്നില്ല. സുരക്ഷിതത്വത്തെക്കുറിച്ചു മാത്രം ആലോചിച്ചു നിന്നാൽ, സാഹസീകതയുടെ
ആഴങ്ങളിലേക്കെടുത്തുചാടാനാകില്ല! വിവേകത്തോടെയുള്ള എടുത്തു ചാട്ടം ഒരു അബദ്ധമല്ല. ഇറങ്ങാൻ പടവുകളില്ലാത്തിടത്ത് എടുത്തു ചാടിയേ മതിയാകൂ.

വഴിയുടെ അവസാനം കണ്ടെത്തി, ഒരു യാത്രയും ആരംഭിക്കാനാകില്ല. വഴികൾ ഒരിക്കലും അവസാനിക്കുന്നില്ല. അവസാനിക്കുന്നതു യാത്രകൾ മാത്രം. എത്തിച്ചേരേണ്ട സ്ഥലമാകുമ്പോൾ, യാത്ര തനിയെ അവസാനിക്കും. എന്നാൽ, വഴികൾ തുടർന്നു കൊണ്ടേയിരിക്കും. വഴിവക്കിൽ, പ്രതിബിംബങ്ങൾ കണ്ടേക്കാം. ഭയത്തിൻ്റെ രൂപഭേദങ്ങളായ പ്രതിബിംബങ്ങൾ! വെറും പ്രതിഛായകൾ മാത്രമാണവ. അറച്ചു നിൽക്കാതെ, എടുത്തു ചാടിക്കഴിയുമ്പോൾ, അവ താനേ അപ്രത്യക്ഷമായിക്കൊള്ളും.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര