🌹 “ഇന്നത്തെ ചിന്താവിഷയം” 🌹 – 2024 | നവംബർ 24 | ഞായർ ✍ പ്രൊഫസ്സർ എ.വി. ഇട്ടി മാവേലിക്കര

വലിയ സ്വപ്നങ്ങൾ കാണാൻ ആകട്ടെ
———————————————————-

അയാൾ എന്നും മീൻ പിടിക്കാൻ പോകുമായിരുന്നു. തിരിച്ചെത്തുമ്പോൾ, കുറച്ചു ചെറുമീനുകൾ മാത്രമേ വഞ്ചിയിലുണ്ടാകൂ. മീൻ പിടിക്കാൻ പോകുന്ന മറ്റുള്ളവരുടെ വഞ്ചിയിലാകട്ടെ, വിവിധയിനങ്ങളിൽപ്പെട്ട ഒട്ടേറെ മീനുകളുണ്ടാകും.

കാരണം കണ്ടു പിടിക്കാനായി ഒരു ദിവസം ഒരു സുഹൃത്തും ആയാൾക്കൊപ്പം പോയി. സുഹൃത്ത്, വിചിത്രമായൊരു കാഴ്ചയാണു കണ്ടത്: വലയിൽ കുടുങ്ങുന്ന മീനുകളിലേറയും, അയാൾ കടലിലേലക്കു തന്നെ വലിച്ചെറിയുന്നു. എന്താണിത് ?
ആശ്ചര്യ മടക്കാനാവാതെ, സുഹൃത്ത് അയാളോടു ചോദിച്ചു. അയാളുടെ മറുപടി രസകരമായിരുന്നു: “എൻ്റെ വറചട്ടി തീരെ ചെറുതാണ് !”

പരിമിതികൾ നിശ്ചയിക്കുന്നതു പാരമ്പര്യമോ, പരിസ്ഥിതികളോ അല്ല. മുൻകൂട്ടി തീരുമാനങ്ങൾ എടുക്കുന്ന മനസ്സാണ്. മനസ്സു പറയുന്നതനുസരിക്കാനുള്ള ശേഷി മാത്രമേ ശരീരത്തിനുള്ളു. താൻ കണ്ട സ്വപ്നങ്ങൾക്കപ്പുത്തേക്കു വളരാൻ, ഇതുവരെ ഒരാൾക്കും കഴിഞ്ഞിട്ടില്ല. വലുതായവരെല്ലാം ആദ്യം വലുതായതു മനസ്സിലാണ്. പിന്നീടാണവർ പ്രവൃത്തിയിൽ വലുതായത്. വളരാനുള്ള പരിധി ആദ്യമേ നിശ്ചയിച്ചു കഴിഞ്ഞാൽപ്പിന്നെ, വളർച്ച ആ പരിധിക്കുള്ളിൽ മാത്രമാകും. അവർ, തങ്ങളുടെ പ്രവർത്തനങ്ങളും, പ്രതികരണങ്ങളും, പരിമിത ലക്ഷ്യത്തിനായി മാത്രം, പരിമിതപ്പെടുത്തും.

അതിർത്തിക്കപ്പുറത്തേക്കു യാത്ര ചെയ്യാൻ തീരുമാനിച്ചവർക്കു മാത്രമേ അസാധാരണമായ മുന്നൊരുക്കങ്ങളും, ആകസ്മീതകളെ അതിജീവിക്കാനുള്ള തയ്യാറെടുപ്പുകളും നടത്താനാകൂ. ഭയം കീഴടക്കിയവരുടെ ഒരു ഇന്ദ്രീയവും, അതിനു ശേഷം പ്രവർത്തന ക്ഷമമാകയില്ല. അവസാനം ആരംഭത്തിൽത്തന്നെ കാണണമെന്നു വാശി പിടിച്ചാൽ, ഒരു യാത്രയും തുടങ്ങാനാവില്ല. വലിയ സ്വപനങ്ങൾ കാണാനാകട്ടെ നമുക്ക്.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര