🌹 “ഇന്നത്തെ ചിന്താവിഷയം” 🌹 – 2024 | നവംബർ 17 | ഞായർ ✍ പ്രൊഫസ്സർ എ.വി. ഇട്ടി മാവേലിക്കര

നാം തന്നെ നമുക്കു വരുത്തി വയ്ക്കുന്ന വിനകൾ
———————————————————————–

നാട്ടിലെങ്ങും ക്ഷാമം വരാൻ പോകുകയാണെന്ന വാർത്ത ആരോ പരത്തി. എന്നാൽ, അപ്പോൾ കാലാവസ്ഥ തികച്ചും അനുകൂലമായിരുന്നു. കൃഷി നല്ല രീതിയിൽ പുരോഗമിക്കുന്നുമുണ്ടായിരുന്നു. പക്ഷെ, ക്ഷാമം വരുന്നുവെന്ന വാർത്ത കർഷകരെ പരിഭ്രാന്തരാക്കി. അവരിൽ ഭൂരിപക്ഷവും കൃഷിയുപേക്ഷിച്ച് പട്ടണത്തിലേക്കു ചേക്കേറി. വിളവെടുപ്പു പരാജയമായി. ഗ്രാമത്തിൽ ശേഷിച്ചവരെല്ലാം
പട്ടിണിയിലായി. ക്ഷാമം വരുന്നുവെന്ന വാർത്ത, സത്യമായി.

എല്ലാ വിപത്തുകളും സ്വയമേവ വന്നു ചേരുന്നവയല്ല. പലതും നാം തന്നെ വരുത്തി വയ്ക്കുന്നവയാണ്. ഓരോ വ്യാജ പ്രചരണവും അവശേഷിപ്പിക്കുന്നത് ചില സംശയങ്ങളും, അപായ സൂചനകളുമായിരിക്കും. തങ്ങൾ പറഞ്ഞതെല്ലാം ശരിയായിരുന്നുവെന്ന് വരുത്തിത്തീർക്കേണ്ടത്, അതു പ്രചരിപ്പിച്ചവരുടെ ഉത്തരവാദിത്തമാകും. തങ്ങൾ പറഞ്ഞു നടന്നതു സത്യമാണെന്നു തെളിയിക്കാനുള്ള ശ്രമമായിരിക്കും, പിന്നീടുള്ള അവരുടെ ജീവിതം?

സ്വന്തം വിശ്വാസപ്രമാണങ്ങൾ ഇല്ലാത്തവർ, മറ്റുള്ളവരുടെ വിവാദ പ്രസ്താവനകളിൽ വീഴും. മറ്റുള്ളവർ പറഞ്ഞു പരത്തുന്ന അസത്യങ്ങൾക്കു മുമ്പിൽ, സ്വന്തം സ്വപനങ്ങളും ശേഷികളും അടിയറവു വച്ചു കഴിഞ്ഞാൽ, അവർ പറഞ്ഞതെല്ലാം എപ്പോഴെങ്കിലും സത്യമാകും. അപരർ രൂപപ്പെടുത്തുന്ന വലയങ്ങൾക്കുള്ളിൽ കുടുങ്ങി, ജീവിതമവസ്സാനിപ്പിക്കുന്നവർക്കു്ക്ക് സ്വന്തമായി പറയാൻ ഒരു കഥ പോലും ബാക്കി ഉണ്ടാകില്ല.

വിയർപ്പൊഴുക്കി വളർത്തിയെടുത്ത വിളകൾ, കരയ്ക്കിരുന്നു കല്പിക്കുന്നവരുടെ
ജല്പനങ്ങൾക്കേട്ട്, ഇല്ലാതാക്കരുത് =. കളനാശിനികളുടെ രൂപത്തിൽ പ്രത്യക്ഷപ്പെടുന്ന പലതും, വിളനാശിനികളായി ഭവിക്കാം.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര