🌹 “ഇന്നത്തെ ചിന്താവിഷയം” 🌹 – 2024 | ഒക്ടോബർ 31 | വ്യാഴം ✍ പ്രൊഫസ്സർ എ.വി. ഇട്ടി മാവേലിക്കര

ശരിയായ നേതൃത്വ ശൈലി
——————————————–

ഗുരു തൻ്റെ ശിഷ്യരോടൊപ്പം ഭക്ഷണത്തിനിരുന്നു. തൻ്റെ ശിഷ്യർക്കു വിളമ്പിയതിനേക്കാൾ മെച്ചപ്പെട്ട ഭക്ഷണമാണു തനിക്കു വിളിമ്പിയത് എന്നു മനസ്സിലാക്കിയ ഗുരു, ഭക്ഷണം കഴിക്കാതെ മുറിയിലേക്കു പോയി. ഇനി രണ്ടു ദിവസത്തേക്കു തനിക്കു ഭക്ഷണം വേണ്ടെന്ന് അദ്ദേഹം അവരെ അറിയിച്ചു. ദു:ഖിതരായ ശിഷ്യർ, ഗുരുവിൻ്റെ അടുത്തെത്തിപ്പറഞ്ഞു: “അങ്ങു ഭക്ഷണം കഴിച്ചില്ലെങ്കിൽ, ഞങ്ങൾക്കും ഭക്ഷണം കഴിക്കാനാകില്ല. രണ്ടു ദിവസം ഒന്നും കഴിക്കാതിരിക്കാൻ ഞങ്ങൾക്കാവില്ല. അതു കേട്ടു മനസ്സു മാറിയ ഗുരു, അവരുടെ ആഗ്രഹം മാനിച്ച് അവരോടൊപ്പം, അതേ ഭക്ഷണം കഴിച്ചു.

മുൻപന്തിയിൽ നിൽക്കേണ്ടവരും മുന്തിയതു ലഭിക്കേണ്ടവരുമാണു തങ്ങൾ എന്ന ചിന്ത മാറ്റുകയാണ് ഓരോ നേതാവും ആദ്യം ചെയ്യേണ്ട കാര്യം. നേതൃത്വത്തിൻ്റെ അജപാലന –ശുശ്രൂഷാ സങ്കല്പങ്ങളെല്ലാം പൊതുവേ, പoനക്കളരികളിൽ മാത്രമേ ഉണ്ടാകൂ. പ്രവൃർത്തിപഥത്തിൽ അവയെല്ലാം അപ്രായോഗിക സങ്കല്പങ്ങളായി അവസാനിക്കും.

മുൻനിരയിൽ മാത്രം നടന്നു ശീലിക്കുന്നവർക്ക്, തങ്ങളുടെ പിന്നിൽ എന്തു സംഭവിക്കുന്നു എന്നു പോലും അറിവുണ്ടാകണമെന്നില്ല. വന്ന വഴികൾ മറക്കുന്നവരും, പുറകോട്ടു നോക്കാൻ മടിയുള്ളവരും, മനുഷ്യത്വമുള്ള നേതാക്കളാകില്ല. അണികൾ എപ്പോഴും തങ്ങൾക്കു പിന്നിലായിരിക്കണമെന്ന മിഥ്യാ സങ്കല്പങ്ങൾ, സ്വയം പൊളിച്ചെഴുതാൻ തയ്യാറാകുന്ന നേതാക്കൾക്കു മാത്രമേ,
ജനഹൃദയങ്ങളിൽ ഇടം പിടിക്കാനാകയുള്ളൂ.

ഗുരു ശിഷ്യരോടൊപ്പം ചേർന്നു നിന്നാൽ മാത്രം പോരാ, അവരെ ബോധപൂർവ്വം തന്നോടൊപ്പം ചേർത്തു നിർത്തുകയും സമന്മാരായി കരുതി പ്രവർത്തിക്കുകയും വേണം. ശ്രേഷ്ഠമായവയുടെ കരുതൽ ശേഖരങ്ങളാകുകയല്ല, അതിശ്രേഷ്ഠമായവയുടെ പങ്കിട്ടുകൊടുക്കലും കൂടിയാണ് യഥാർത്ഥ നേതൃത്വ ധർമ്മം.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര