🌹 “ഇന്നത്തെ ചിന്താവിഷയം” 🌹 – 2024 | ഒക്ടോബർ 27 | ഞായർ ✍ പ്രൊഫസ്സർ എ.വി. ഇട്ടി മാവേലിക്കര

അടിമകളെ സൃഷ്ടിക്കുകയല്ല ഗുരുധർമ്മം
————————————————————

ഒരു ഗുരുവിൻ്റെ ജന്മദിനം ശിഷ്യൻ ആഘോഷിക്കുകയായിരുന്നു. മറ്റുള്ളവർ ശിഷ്യനോടു ചോദിച്ചു: “ഗുരു ഒരിക്കലും നിങ്ങളെ ഒരു ശിഷ്യനായി അംഗീകരിച്ചിട്ടില്ലായെന്നു ഞങ്ങൾക്കറിയാം. അദ്ദേഹം നിങ്ങളെ ശാസിച്ചിട്ടുണ്ട്, ശിക്ഷിച്ചിട്ടുണ്ട്. എന്നാൽ, അദ്ദേഹത്തിൻ്റെ ജീവിതരീതിയല്ല നിങ്ങളുടേത്. പിന്നെന്തിനാണ് നിങ്ങൾ അദ്ദേഹത്തെ ഗുരുവായി സ്വീകരിക്കുന്നതും, അദ്ദേഹത്തിൻ്റെ ജന്മദിനം ആഘോഷിക്കുന്നതും?”

ശിഷ്യൻ അവരോടു പറഞ്ഞു: “ഗുരു എന്നെ എൻ്റെ ഇഷ്ടത്തിനു വിട്ടു. എന്നാൽ, ആവശ്യമുള്ളപ്പോൾ ശാസിച്ചു തിരുത്തി. സ്വന്തം കാലിൽ നിൽക്കുവാൻ അദ്ദേഹം എന്നെ പ്രാപ്തനാക്കി. അല്ലായിരുന്നെങ്കിൽ, ഞാൻ ഇപ്പോഴും ഇരുട്ടിൽത്തപ്പി നടന്നേനേ”.

അനന്യതയെ മാനിക്കുന്നവരായിരിക്കണം യഥാർത്ഥ ഗുരുക്കൾ! തനതു രീതികളും സവിശേഷതകളുമുള്ളവരെ, ഒരേ വഴിയിലൂടെ നടത്താൻ ശ്രമിക്കുന്നത് ശരിയായ ശിക്ഷണം നൽകലല്ല. അവരവർ ചെയ്തുപോയ തെറ്റുകൾ തിരുത്തി, രുപപ്പെടുത്തിയെടുത്ത വഴികൾക്കു്ക്ക് ഏറെ ശ്രേഷ്ഠതയുണ്ടായിരിക്കും. പക്ഷെ, സ്വന്തം രീതികളോടുള്ള ആഭിമുഖ്യം, അപരൻ്റെ രീതികളോടുള്ള അനിഷ്ടമാകരുത്. അനു കരിക്കുന്നവരെ മാത്രം സൃഷ്ടിക്കുക എന്നതല്ല, സ്വന്തം വഴികൾ കണ്ടത്തുന്നവരെ പ്രോത്സാഹിപ്പിക്കുക എന്നതായിരിക്കണം, യഥാർത്ഥ ഗുരുധർമ്മം.

പകർപ്പുകൾക്ക് ഒരിക്കലും മൗലീകതയുണ്ടാകുകയില്ല. പകർത്തിയെഴുതപ്പെടുന്ന ആശയങ്ങൾക്കു്ക്ക് അവ പകർത്തിയെഴുതിയ ആളുടെ കൈപ്പടയുടെ സ്വാധീനം മാത്രമേയുണ്ടാകുകയുള്ളു. വ്യതിരിക്തതയെ നിഷേധിക്കുന്നവർക്കു മാർഗദർശകരാകാൻ കഴിയില്ല . അനുഗമിക്കുക എന്നതിൻ്റെ അർത്ഥം അടിമയാകുക എന്നല്ല. പിന്തുടരുക എന്നതിൻ്റെ അർത്ഥം, സ്വന്തം ചിന്തകളെയും കാഴ്ചപ്പാടുകളെയും പണയം വയ്ക്കുക എന്നുമല്ല. അന്ധമായി അനുഗമിക്കുന്നവർക്ക് ഒരിക്കലും തങ്ങളുടെ സവിശേഷതകളെ വളർത്തിയെടുക്കാനാകില്ല.

പ്രകാശം പരത്തുന്നവർ കുറച്ചൊക്കെയുണ്ടാകും. എന്നാൽ, മറ്റുള്ളവരുടെ ഉള്ളിലെ പ്രകാശം പുറത്തു കൊണ്ടുവരുവാൻ അവരെ പ്രാപ്തരാക്കാൻ കഴിവുള്ളവർ അപൂർവ്വമായിരിക്കും. അവർക്കു മാത്രമേ, യഥാർത്ഥ ഗുരുസ്ഥാനീയരായിരിക്കുവാൻ
അർഹത ഉണ്ടാകൂ.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര