🌹 “ഇന്നത്തെ ചിന്താവിഷയം” 🌹 – 2024 | സെപ്റ്റംബർ 27 | വെള്ളി ✍ പ്രൊഫസ്സർ എ.വി. ഇട്ടി മാവേലിക്കര

നമുക്കു ദൈവീകരാകാൻ ശ്രമിക്കാം
————————————————————-

അപരിചിതമായ ഒരുൾഗ്രാമത്തിൽ ഒരു രാത്രിയിൽ എത്തിച്ചേർന്ന യാത്രീകൻ ഒരു സന്യാസിയുടെ വാതിലിൽ മുട്ടി. അൽപം വൈകിയാണെങ്കിലും ഇറങ്ങി വന്ന സന്യാസിയോട്, തനിക്ക് ആ രാത്രിയിൽ അഭയം നൽകണെമന്നയാൾ അഭ്യർത്ഥിച്ചു. സന്യാസി അദ്ദേഹത്തെ അകത്തു വിളിച്ചു കയറ്റി. ഭക്ഷണമൊരുക്കി നൽകിയതിനു ശേഷം കിടക്കയും വിരിച്ചു നൽകി. പ്രാതലും നൽകിയാണ്, രാവിലെ സന്യാസി അയാളെ യാത്രയാക്കിയത്.

കവലയിൽ എത്തിയ അയാളോട് ആളുകൾ ചോദിച്ചു: “നിങ്ങൾ എവിടെയാണ് ഇന്നലെ അന്തിയുറങ്ങിയത് ?” “സന്യാസിയുടെ വീട്ടിൽ”, അയാൾ പറഞ്ഞു. “ആ വീട്ടിൽ നടന്ന മരണം നിങ്ങൾ അറിഞ്ഞില്ലെ? സന്യാസിയുടെ സഹോദരൻ ഇന്നലെ മരിച്ചു. മരണ വീട്ടിൽ ഒന്നും പാകം ചെയ്യാറില്ല. അപരിചതരെ രാത്രി താമസിപ്പിക്കാറുമില്ല”. യാത്രീകൻ തിരികെയെത്തി, സന്യാസിയുടെ കാലിൽ വീണു വന്ദിച്ചു!

സമയവും സൗകര്യവുമുള്ളപ്പോൾ മാത്രം ചെയ്യുന്ന പ്രവൃത്തികളൊന്നും സൽക്കർമ്മങ്ങളല്ല. അവ സൽപേർ നിലനിർത്താൻ ചെയ്യുന്ന ചടങ്ങുകൾ മാത്രം. സഹായിക്കുന്നവൻ്റെ സാഹചര്യങ്ങളല്ല, സഹായിപ്പെടേണ്ടവൻ്റെ ആവശ്യമാണ് പ്രധാനം. എല്ലാ അനുകൂല ഘടകങ്ങളും ഒത്തുവന്നതിനു ശേഷം, ആർക്കും ആരേയും സംരക്ഷിക്കാനാകണമെന്നില്ല. ഇടപെടലുകൾ തക്ക സ്ഥാനത്തും സമയത്തും നടത്തണം. അല്ലാത്തതെല്ലാം, ആളാകാൻ നടത്തുന്ന നാട്യങ്ങൾ മാത്രം.

കാര്യങ്ങൾ കണ്ടറിഞ്ഞു ചെയ്യുന്നവരുണ്ട്. മറ്റുള്ളവരെല്ലാം ചെയ്തിട്ടും, താൻ മാത്രം ചെയ്യാതിരുന്നാൽ മോശമാണെന്നു കരുതി ചെയ്യുന്നവരുമുണ്ട്. മിച്ചമുള്ളപ്പോൾ ദാനം ചെയ്യുന്നത്, മാനുഷീകം. ഒന്നുമില്ലാത്തപ്പോഴും, ആവശ്യത്തിലിരിക്കുന്നവന് എല്ലാമുണ്ടാക്കി നൽകുന്നത് ദൈവീകം. നമുക്കു ദൈവീകരാകുവാൻ പരിശ്രമിക്കാം

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര