🌹 “ഇന്നത്തെ ചിന്താവിഷയം” 🌹 – 2024 | സെപ്റ്റംബർ 13 | വെള്ളി ✍ പ്രൊഫസ്സർ എ.വി. ഇട്ടി മാവേലിക്കര

യഥാർത്ഥ വിജയി ആരാണ്?
__________________________

സ്ക്കൂൾ വിട്ടു വന്ന നാലാം ക്ലാസ്സുകാരൻ വിഷമിച്ചിരിക്കുന്നതു കണ്ട അമ്മ, കാരണം അന്വേക്ഷിച്ചു ? അവൻ പരീക്ഷ പേപ്പർ അമ്മയെ കാണിച്ചിട്ടു പറഞ്ഞു: “അമ്മേ, എനിക്കാദ്യം കിട്ടിയത്, 48 മാർക്കായിരുന്നു. ടീച്ചർ, വെരി ഗുഡ് എന്നും എഴുതിയിരുന്നു. പക്ഷെ ഞാൻ മാർക്കു കൂട്ടി നോക്കിയുപ്പാൾ, 45 മാർക്കേ ഉണ്ടായിരുന്നുള്ളൂ. ഞാൻ അക്കാര്യം ടീച്ചറോടു പറഞ്ഞു. മാർക്കു കൂട്ടി നോക്കിയ ടീച്ചർ, വെട്ടിത്തിരുത്തി 45 മാർക്ക് എന്നെഴുതി. എനിക്കു നൽകിയ വെരി ഗുഡും വെട്ടിക്കളഞ്ഞു. ഞാൻ നല്ല കുട്ടി അല്ലാത്തതു കൊണ്ടാണോ, ടീച്ചർ വെരി ഗുഡു വെട്ടിയത്?”

വിജയത്തിന്റെ അതിർ വരമ്പുകൾ ഏതു മാനദണ്ഡം ഉപയോഗിച്ചാണു നിർണ്ണയിക്കപ്പെടേണ്ടത്? മാർക്കു കൊണ്ടോ, മനോവിശുദ്ധി കൊണ്ടോ? മാർക്കു കൊണ്ടു വിജയിക്കുന്നവരാണോ, മന:സാക്ഷി കൊണ്ടു വിജയിക്കുന്നവരാണോ, യഥാർത്ഥ വിജയികൾ? ജീവിത വിജയത്തെ നേട്ടങ്ങൾ കൊണ്ടും, ജീവിത വിജയങ്ങൾ കൊണ്ടും മാത്രം, അളന്നെടുക്കാൻ നോക്കുമ്പോഴാണ് മൂല്യങ്ങൾ ചോർന്നു പോകുന്നത്. ഒരാൾ വാരിക്കൂട്ടുന്നതു മാത്രം ചേർത്തു വച്ചാണ്, നാം പലപ്പോഴും മിടുക്കിന്റെ പട്ടിക തയ്യാറാക്കുന്നത്? മിഠായി പെറുക്കിലായാലും, മാർക്കു നേടലിലായാലും, അതങ്ങനെ തന്നെ. സത്യസന്ധത കൊണ്ടു മാത്രം അംഗീകാരം നഷ്ടപ്പെട്ടവരും, കുടിലത കൊണ്ടു മാത്രം ഉന്നതിയിൽ എത്തിയവരും ഉണ്ടാകും. അവരെ തമ്മിൽ തിരിച്ചറിയാൻ നമുക്കാകണം.

ഉത്തരക്കടലാസ് അടിസ്ഥാനമാക്കിയല്ലാതെയുള്ള ചില മൂല്യ നിർണ്ണയങ്ങൾ നടത്തേണ്ടതുണ്ട്. മെഡലുകൾ നേടാൻ പറ്റാത്തവരുടെ മികവും, അംഗീകരിക്കപ്പെടണം. എനിക്ക് ഒന്നു കൂടി വേണം എന്നു മുറവിളി കൂട്ടുന്നവർക്കിടയിൽ, എനിക്കിതിനർഹതയില്ല എന്നു പറയുന്നവരുടെ യഥാർത്ഥ അർഹത കൂടി നാം തിരിച്ചറിയണം. കൂടുതൽ മാർക്കു വാങ്ങുന്നവർക്കു മാത്രമേ സ്ഥാനമുള്ളുവെങ്കിൽപ്പിന്നെ, മൂല്യവും മനുഷ്യത്യവും എങ്ങനെയാണു വളരുക?

മറ്റെന്തൊക്കെ പഠിച്ചാലും, അർഹതയില്ലാത്ത തൊന്നും പിടിച്ചു വയ്ക്കാൻ പാടില്ല എന്ന പാഠം കൂടി പഠിച്ചില്ലെങ്കിൽ, അത്യാഗ്രഹത്തിന്റെ മൊത്ത വിൽപനകാരായി നാം മാറും. പിടിച്ചു വാങ്ങാൻ വരുന്നവരേക്കാൾ, തിരിച്ചു നൽകാൻ മനസ്സുളളവർ കൂടുതൽ ആദരവ് അർഹിക്കുന്നു.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര