🌹 “ഇന്നത്തെ ചിന്താവിഷയം” 🌹 – 2024 | സെപ്റ്റംബർ 06 | വെള്ളി ✍ പ്രൊഫസ്സർ എ.വി. ഇട്ടി മാവേലിക്കര

കർമ്മത്താൽ ജന്മത്തെ സാധൂകരിക്കാൻ ആകട്ടെ
———————————————————————–

ഒട്ടകത്തിൻ്റെ കുഞ്ഞു ചോദിച്ചു: “അമ്മേ, നമ്മുടെ മുതുകിലെന്താണീ വലിയ മുഴ?”
അമ്മ പറഞ്ഞു: “നമ്മൾ മരുഭുമിയിലെ മൃഗങ്ങളാണ്. അതുകൊണ്ട് വെള്ളം ശേഖരിച്ചു വയ്ക്കാനാണാ മുഴ”. കുഞ്ഞു വീണ്ടും ചോദിച്ചു: “നമുക്കെന്തിനാണീ നീളമുള്ള കാലുകളും, ഉരുണ്ട പദങ്ങളും?” അമ്മ പറഞ്ഞു: “അതു പൊള്ളുന്ന മണലിൽക്കൂടി നടക്കുന്നതിനു വേണ്ടിയാണ് “. “എന്തിനാണ് ഇത്രയും കട്ടിയുള്ള കൺപോള?” കുഞ്ഞിൻ്റെ ജിജ്ഞാസ വീണ്ടും തലപൊക്കി. “അതു മരുഭൂമിയിലെ പൊടിക്കാറ്റിൽ നിന്നും രക്ഷനേടാനാണ് ”, അമ്മ വീണ്ടും പറഞ്ഞു. പക്ഷെ, അടുത്ത ചോദ്യത്തിന് അമ്മയ്ക്ക് ഉത്തരം
ഇല്ലായിരുന്നു: “കണ്ണും, കാലും, മുഴയുമെല്ലാം മരുഭുമിയിൽ ജീവിക്കാൻ വേണ്ടി. പിന്നെന്തിനാണു നമ്മൾ ഈ മൃഗശാലയിൽ കിടക്കുന്നത് ?”

ജന്മസിദ്ധമായതെല്ലാം കർമ്മ ഭുമിയിൽ സാധൂകരിക്കപ്പെടുന്നില്ലെങ്കിൽ പിന്നെ, ജന്മം കൊണ്ടെന്തു ഫലം? ഓരോ ജനനവും വിശിഷ്ടമാകുന്നത് സൃഷ്ടിയിലെ അനന്യത കൊണ്ടു തന്നെ. ഒരാളും മറ്റൊരാളെപ്പോലെയല്ല എന്നതാണു പ്രകൃതി നിയമം. സഹജമായവ, സഞ്ചരിക്കുന്ന വഴികളെ സൗന്ദര്യപൂർണമാക്കണം. കർമം, ജന്മത്തിൻ്റെ സാധൂകരണമാകണം. ജന്മം, കർമ്മത്തിനുള്ള സാദ്ധ്യതയും.

എന്താണ് എന്നതുപോലെ പ്രധാനമാണ് എവിടെയാണ് എന്നതും. ദിശ മനസ്സിലാവാത്തതു മൂലമോ, വണ്ടിയിൽ മാറിക്കയറിയതു കൊണ്ടോ, തനിച്ചാകാതിരിക്കാൻ ആളുകൾ ഉള്ളിടത്തു തള്ളിക്കയറിയതു കൊണ്ടോ, ആദ്യം കണ്ട സ്ഥലത്തു ചാടിയിറങ്ങിയതു മൂലമോ, ആഗ്രഹിച്ച സ്ഥലങ്ങളിൽ എത്തിച്ചേരാനാകാതെ പോയവരേപ്പോലെയാണു പലരും.

മത്സ്യം വളരേണ്ടത് വെള്ളത്തിലും, മനുഷ്യർ വളരേണ്ടതു കരയിലുമാണ്‌. തിരിച്ചായാൽ, നൈസർഗീകത നഷ്ടപ്പെടുമെന്നു മാത്രമല്ല, ജീവനം പോലും അസാദ്ധ്യമാകും. ജന്മം പോലെ തന്നെ പ്രധാനമാണു കർമ്മവും. കർമ്മമാണു ജന്മത്തെ സാധൂകരിക്കുന്നത്.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര