🌹 “ഇന്നത്തെ ചിന്താവിഷയം” 🌹 – 2024 | ഓഗസ്റ്റ് 16 | വെള്ളി ✍ പ്രൊഫസ്സർ എ.വി. ഇട്ടി മാവേലിക്കര

വിലക്കുകൾ വിലങ്ങുകൾ ആകരുത്
—————————————————-

ഒരു സമുദായത്തിൽ ചേരുന്നവർക്ക് മാംസാഹാരവും പുകവലിയും മദ്യവും കർശനമായി നിഷേധിക്കപ്പെട്ടിരുന്നു. ദീർഘായുസ്സ് ഉറപ്പു വരുത്തുന്നതിനു വേണ്ടിയായിരുന്നു ആ നിയമം.

ഇതു കേട്ടറിഞ്ഞ ഒരു യുവാവ് അവരുടെ വാർഷീക സമ്മേളനത്തിനെത്തി. തൊണ്ണൂറു കഴിഞ്ഞവർ പോലും, ചുറുചുറുക്കോടെ നടക്കുന്നതു കണ്ട് അയാൾ അത്ഭുതപ്പെട്ടു. കുറച്ചു കഴിഞ്ഞപ്പോൾ പ്രധാന ഗുരു എത്തി . അൻപതു വയസ്സിൽ താഴെ മാത്രമേ പ്രായം തോന്നുമായിരുന്നുള്ളു. കൂടെ നിന്നവർ യുവാവിനോടു പറഞ്ഞു: “അദ്ദേഹത്തിനു് നൂറ്റമ്പതു വയസ്സുണ്ട്!”

വിരുന്നിൻ്റെ സമയത്ത് ഗുരുവിൻ്റെ മുമ്പിൽ നിരത്തിയ വിഭവങ്ങൾ കണ്ട് യുവാവ് വീണ്ടും അത്ഭുതപ്പെട്ടു. പൊരിച്ച മാംസവും, മദ്യവും, സിഗരറ്റുമെല്ലാം അതിൽ ഉൾപ്പെട്ടിരുന്നു. ശിഷ്യരിൽ ഒരാൾ അയാളോടു പറഞ്ഞു: “ഗുരുവിന് എല്ലാം അനുവദനീയമാണ്. അദ്ദേഹം പ്രലോഭനങ്ങളെ എല്ലാം അതിജീവിച്ച ആളാണ്”. രണ്ടു പഴങ്ങൾ മാത്രം കഴിച്ചു്, ഗുരു തിരിച്ചു പോകുമ്പോൾ, യുവാവു വീണ്ടും അത്ഭുതപ്പെട്ടു.

നിഷേധിക്കപ്പെട്ടതിനോടുള്ള അഭിനിവേശമാണ് പ്രലോഭനത്തിൻ്റെ മുഖ്യ കാരണം. നിരന്തരം ലഭിച്ചുകൊണ്ടിരിക്കുന്നതിനോടുള്ള അവജ്ഞയാണ് നിരാകരണത്തിന് മുഖാന്തരം. ആകർഷണങ്ങളെ അടുത്തറിഞ്ഞുള്ള അകൽച്ചയാണ് അതിജീവനം സാദ്ധ്യമാക്കുന്നത്.

നിരോധിക്കപ്പെട്ട വസ്തുക്കളുടെ വശ്യതയേക്കാൾ, അവ നിരോധിക്കപ്പെട്ടതാണ് എന്ന വസ്തുതയാണ് അവയെ ആകർഷകമാക്കുന്നത്. ആകർഷണം ശക്തിപ്പെടുത്താനുള്ള എളുപ്പ മാർഗം, ആകർഷിക്കപ്പെടേണ്ടതിനെ നിരോധിക്കുക, എന്നതാണ്.

ഒന്നിനോടുള്ള വൈമുഖ്യം, അവയിൽ നിന്നുള്ള നോട്ടങ്ങളെ കണ്ടുകൊണ്ടു മാത്ര
മാകരുത്. എന്തിനോടെങ്കിലുമുള്ള വിവുഖതയും താൽപര്യവും രൂപപ്പെടേണ്ടത് ജീവിത നിലപാടുകളുടെയും, കാഴ്ചപ്പാടുകളുടെയും അടിസ്ഥാനത്തിലാകണം. ഒരാളുടെ ഇഷ്ടങ്ങളും അനിഷ്ടങ്ങളും കൂട്ടിച്ചേർത്തു വായിക്കുമ്പോഴാണ് അയാളെക്കുറിച്ചുള്ള നിർവചനം പൂർത്തിയാകുന്നത്.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര