🌹 “ഇന്നത്തെ ചിന്താവിഷയം” 🌹 – 2024 | ഓഗസ്റ്റ് | 08 | വ്യാഴം ✍ പ്രൊഫസ്സർ എ.വി. ഇട്ടി മാവേലിക്കര

വൈശിഷ്ട്യമാർന്ന മനസ്സിൻ്റെ ഉടമകൾ ആകാം
———————————————————————–

ഒരു ഭക്തൻ്റ നിരന്തരമായ പ്രാർത്ഥന ഇതായിരുന്നു: “ദൈവമേ, എനിക്കു മറ്റൊരനുഗ്രഹവും വേണ്ട. എൻ്റെ വേദനകൾ എടുത്ത് മറ്റാർക്കെങ്കിലും കൊടുക്കണമെ ”
ഒരുനാൾ ദൈവം അയാൾക്കു പ്രത്യക്ഷപ്പെട്ടു പറഞ്ഞു: “മകനെ, നിൻ്റെ വേദനയെല്ലാം ഒരു ഭാണ്ഡത്തിലാക്കി, നാളെ ദേവാലയത്തിൽ വരിക”.

പിറ്റേന്നു രാവിലെ തന്നെ, അയാൾ തൻ്റെ വേദനകളുടെ ഭാണ്ഡവുമായി ദേവാലയത്തിലെത്തി. ചുറ്റും നോക്കിയപ്പോൾ, തൻ്റേതിനേക്കാൾ വലിയ ഭാണ്ഡക്കെട്ടുകളുമായി ഒട്ടേറെപ്പേർ. എല്ലാവരും അയാളേപ്പോലെ തങ്ങളുടെ വേദനകളുടെ ഭാണ്ഡക്കെട്ടുകളുമായി ദേവാലയത്തിൽ എത്തിയവരായിരുന്നു.

വന്ന എല്ലാവരും അവരുടെ ഭാണ്ഡക്കെട്ടുകൾ ദേവാലയത്തിൻ്റെ നടുത്തളത്തളത്തിൽ വയ്ക്കാൻ ദൈവം ആവശ്യപ്പെട്ടു. മറ്റുള്ളവരുടെ കെട്ടുകൾ കണ്ട ഭക്തൻ ഇളിഭ്യനായി. തൻ്റേതാണ് ഏറ്റവും ചെറിയ കെട്ട് . “ഇനി ഓരോരുത്തർക്കും വേണ്ട കെട്ടെടുത്തു കൊണ്ടു പോകാം”, ദൈവം നിർദ്ദേശിച്ചു. ഭക്തൻ, മറ്റാരും തൻ്റെ കെട്ടെടുക്കുന്നതിനു മുൻപു തന്നെ അതുമെടുത്തുകൊണ്ട് ഓടി.

സൗഭാഗ്യങ്ങളോടു വളരെ വേഗം സമരസപ്പെടുകയും, വേദനകളാട് അതിലും വേഗത്തിൽ വിരക്തി കാണിക്കുകയും ചെയ്യുമ്പോഴാണ് ജീവിതത്തിൻ്റെ സന്തുലിതാവസ്ഥ നഷ്ടമാകുന്നത്. സ്വന്തം കഷ്ടതകളേക്കാൾ, അപരൻ്റെ സൗഭാഗ്യങ്ങളാണ് പലരുടെയും വേദനകൾക്കു കാരണം. സ്വന്തം ദു:ഖങ്ങൾ ഇല്ലാതാക്കുന്നതിനേക്കാൾ, അവ മറ്റുള്ളവർക്കു കൈമാറ്റം ചെയ്യുന്നതിൽ സന്തോഷം കണ്ടെത്താൻ ശ്രമിക്കുന്നവരുടെ വേദനകൾ, വിട്ടുമാറാത്ത വ്യാധിയായി മാറുകയാകും ചെയ്യുക.

എൻ്റെ ക്ലേശങ്ങൾ എല്ലാവർക്കും നൽകണമെ എന്ന പ്രാർത്ഥന, പ്രാർത്ഥിക്കുന്നവൻ്റെ മനസ്സിൻ്റെ വൈകല്യമാണു വെളിവാക്കുന്നത. എൻ്റെ വേദനകൾ എൻ്റേതു മാത്രമാക്കണമേയെന്ന പ്രാർത്ഥന, അതു പ്രാർത്ഥിക്കുന്നവൻ്റെ മനസ്സിൻ്റെ വൈശിഷ്ട്യവും. വൈശിഷ്ട്യമാർന്ന മനസ്സിൻ്റെ ഉടമകളാകാൻ ആകട്ടെ നമുക്ക് !

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര