🌹 “ഇന്നത്തെ ചിന്താവിഷയം” 🌹 – 2024 | ഓഗസ്റ്റ് | 04 | ഞായർ ✍ പ്രൊഫസ്സർ എ.വി. ഇട്ടി മാവേലിക്കര

എപ്പോഴും സമനില കാത്തു സൂക്ഷിക്കാൻ ആകട്ടെ
——————————————————————————-

ഒരെലി വില കൂടിയ ഒരു രത്നം കൊത്തിവിഴുങ്ങി. ഉടൻ തന്നെ രത്നത്തിൻ്റെ ഉടമ, ഒരു എലിപിടുത്തക്കാരനെ വിളിച്ചു വരുത്തി. അയാൾ എത്തിയപ്പോൾ വീടാകെ എലികൾ. എന്നാൽ, ഒരെലി മാത്രം മറ്റുള്ളവയിൽ നിന്നു മാറി ഒറ്റയ്ക്കിരിക്കുന്നു. അയാൾ അതിനെ പിടിച്ചു കൊന്നു. ഭാഗ്യം പോലെ രത്നം അതിൻ്റെ വയറ്റിൽത്തന്നെ ഉണ്ടായിരുന്നു. അപ്പോൾ ഉടമസ്ഥൻ ചോദിച്ചു: “ആ എലി തന്നെയാണ് രന്തം വിഴുങ്ങിയതെന്ന് നിങ്ങൾ എങ്ങനെയറിഞ്ഞു?” എലിപിടുത്തക്കാരൻ പറഞ്ഞു: “സമ്പത്തു കിട്ടിയാൽ വിഡ്ഢികൾ ആരേയും കൂടെക്കൂട്ടില്ല! അവർക്ക് സമനില തെറ്റും”.

ഒപ്പം നിൽക്കാൻ ശേഷിയില്ലാത്തവരേയും, ഒന്നിച്ചു നടക്കാൻ ത്രാണിയില്ലാത്തവരേയും ചേർത്തുനിർത്താൻ കഴിയുന്നവരാണു മഹാത്മാക്കൾ. ഒറ്റയ്ക്കു നിൽക്കാൻ ശേഷിയുണ്ടായിട്ടും, ഒന്നിച്ചു നിൽക്കാൻ മനസ്സു കാണിക്കുന്നവർ മഹാനുഭാവർ.
ഒന്നുമില്ലാത്തപ്പോഴുള്ള പെരുമാറ്റത്തിനു നിവൃത്തികേടിൻ്റെ പിൻബലമുണ്ട് . എല്ലാമുള്ളപ്പോഴുള്ള ഇടപെടലിന് വ്യക്തി വൈശിഷ്ടത്തിൻ്റെ പിന്തുണയും.

നേട്ടങ്ങൾ, സ്വപ്ന യാത്രകൾക്കുള്ള കരുതൽ ധനം മാത്രമല്ല; പിന്നിട്ട വഴികളെക്കുറിച്ചുള്ള ഓർമപ്പെടുത്തൽ കൂടിയാകണം. സഞ്ചരിച്ച വഴികൾ ഓർത്തിരിക്കണം. എന്നെങ്കിലും തിരിച്ചു നടക്കേണ്ടി വന്നാൽ, പരിഭ്രാന്തി കുറയ്ക്കാനതു സഹായിക്കും.

അപ്രതീക്ഷിത നേട്ടങ്ങളിലെ അന്ധാളിപ്പ് പലരേയും അവരവരല്ലാതാക്കും. തോൽക്കാതെ ജയിക്കുന്നവർക്ക് വിജയം ആസ്വദിക്കാനാവണമെന്നില്ല. പരാജയങ്ങളിലൂടെ കടന്നു വന്നവർക്ക് തങ്ങൾ സ്വായത്തമാക്കിയ ഉൾക്കരുത്തും ഉൾബലവും, വിജയാഹ്ലാദങ്ങൾക്കിടയിലും സമനില നിലനിർത്താൻ സഹായകരമായിരിക്കും. വിജയത്തിലും തോൽവിയിലും, സമനില കാത്തു സൂക്ഷിക്കാൻ കഴിയുന്നവരാണ് യഥാർത്ഥ വിജയികൾ.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര