🌹 “ഇന്നത്തെ ചിന്താവിഷയം” 🌹 – 2024 | നവംബർ 12 | ചൊവ്വ ✍ പ്രൊഫസ്സർ എ.വി. ഇട്ടി മാവേലിക്കര

യഥാർത്ഥ ഗുരുവിനെ കണ്ടെത്താൻ ആകട്ടെ.
————————————————————————

അത്ഭുത സിദ്ധികളുള്ള ഗുരുവിനെ തേടി നടക്കുകയായിരുന്ന ഒരാൾ ഒരു ആശ്രമത്തിലെത്തി, അവിടത്തെ ഗുരുവിനോട് , തന്നെയും ഒരു ശിഷ്യനാക്കണ
മെന്ന് അഭ്യർത്ഥിച്ചു. അയാളുടെ അനുസരണ ശീലം പരീക്ഷിക്കാൻ തീരുമാനിച്ച ഗുരു, മുതലകൾ നിറഞ്ഞ കുളം മുറിച്ചു നീന്തി അക്കരയെത്തിയാൽ അയാളെ ശിഷ്യനാക്കാം എന്നു സമ്മതിച്ചു. ‘ഗുരു രക്ഷിക്കട്ടെ’ എന്നുരുവിട്ടു കൊണ്ട് എല്ലാവരേയും അത്ഭുതപ്പെടുത്തി, അയാൾ മുതലക്കുളം നീന്തി അക്കരെയെത്തി. തനിക്ക് ഇത്രയും ശക്തിയുണ്ടല്ലോ എന്നു കരുതിയ ഗുരു, ‘ഞാനാണു രക്ഷകൻ’ എന്നു പറഞ്ഞു കൊണ്ട് കുളത്തിലേക്കു്ക്ക് എടുത്തു ചാടി. നിമിഷങ്ങൾക്കകം മുതലകൾ അദ്ദേഹത്തെ വകവരുത്തി.

താൻ ആരുമല്ല എന്ന തിരിച്ചറിവുള്ളവർക്കു മാത്രമാണു യഥാർത്ഥ ഗുരുവാകാനാകുക. സ്വാർത്ഥതയുടെയും, അഹംഭാവത്തിൻ്റെയും എല്ലാ ഉടയാടകളും അഴിച്ചുവയ്ക്കുന്നവർക്കു മാത്രമേ വഴികാട്ടികളാകാനാകൂ. ഇരുളകറ്റാൻ ഇറങ്ങിത്തിരിക്കുന്നവരുടെ ഉള്ളിൽ തീർച്ചയായും വെളിച്ചമുണ്ടായിരിക്കണം. അതിനെ മറയ്ക്കുവാനോ, അണയ്ക്കുവാനോ, ആരാലുമാകില്ല.

ചെറുകാറ്റടിക്കുമ്പോൾത്തന്നെ അണഞ്ഞുപോകുന്ന കൈവിളക്കുകളെ ആശ്രയിക്കുവാൻ ആരുമുണ്ടാകില്ല. സ്വയം പ്രകാശിക്കുവാൻ ശേഷിയില്ലാത്തതെല്ലാം, കുറച്ചു കഴിയുമ്പോൾ താനേ അണഞ്ഞു പോകും. ശരിയായ ഗുരുക്കളുള്ളവർക്ക് തെറ്റായ വഴികളിൽ സഞ്ചരിക്കുവാനാവില്ല. സംശയാതീതമായ അനുസരണം പ്രഖ്യാപിക്കുന്നവർക്കു മാത്രമേ അസാധാരണമായ ഫലങ്ങൾ ഉളവാക്കാനാകൂ.

യഥാർത്ഥ ഗുരുക്കന്മാരുള്ളവർക്ക്, അനുയാത്രയ്ക്ക് വേറേ ഗുരുക്കളെ തേടി അലയേണ്ടി വരില്ല. അവർ തന്നെയായിരിക്കും, വഴിയും വഴികാട്ടികളും.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര