📱വാർത്തകൾ ഒറ്റനോട്ടത്തിൽ📱 – 2025 | മെയ് 20 | ചൊവ്വ ✍ കപിൽ ശങ്കർ

കെഎസ്ഇബിയുടെ ഇലക്ട്രിക് വാഹന ചാര്‍ജ്ജിംഗ് സ്റ്റേഷനുകളില്‍ പുതുക്കിയ നിരക്കുകള്‍ പ്രാബല്യത്തില്‍ വന്നു. സംസ്ഥാന ഇലക്ട്രിസിറ്റി റെഗുലേറ്ററി കമ്മീഷന്റെ 05.12.2024-ലെ താരിഫ് ഉത്തരവും കേന്ദ്ര വൈദ്യുതി മന്ത്രാലയത്തിന്റെ നിര്‍ദ്ദേശങ്ങളും അനുസരിച്ചുള്ള നിരക്കുകളാണ് വെള്ളിയാഴ്ച രാവിലെ ഒമ്പതു മുതല്‍ പ്രാബല്യത്തില്‍ വന്നത്. സൗരോര്‍ജ്ജം ലഭ്യമായ പകല്‍ സമയത്ത് വൈദ്യുത വാഹന ചാര്‍ജ്ജിംഗ് പ്രോത്സാഹിപ്പിച്ച് വൈകുന്നേരത്തെ അമിത ഉപയോഗം തടയിടുകയെന്ന ലക്ഷ്യത്തോടെയാണ് പുതിയ നിരക്ക് നടപ്പാക്കിയത്.

കേരളത്തില്‍ കേന്ദ്ര കാലാവസ്ഥ വകുപ്പ് അതിശക്ത മഴ മുന്നറിയിപ്പ് പുറപ്പെടുവിച്ചു. കാലവര്‍ഷത്തോടനുബന്ധിച്ച് ഇന്നലെ മുതല്‍ 3 ദിവസത്തേക്കാണ് നിലവില്‍ അതിശക്ത മഴ മുന്നറിയിപ്പ്. മധ്യ പടിഞ്ഞാറന്‍ ബംഗാള്‍ ഉള്‍ക്കടലിനും തെക്കു പടിഞ്ഞാറന്‍ ഉള്‍ക്കടലിനും മുകളിലായി ചക്രവാതച്ചുഴി രൂപപ്പെട്ടുകഴിഞ്ഞു. ഇതിന്റെ ഭാഗമായി വിവിധ ജില്ലകളില്‍ കേന്ദ്ര കാലാവസ്ഥാ വകുപ്പ് അതിശക്ത മഴ മുന്നറിയിപ്പായ ഓറഞ്ച് അലര്‍ട്ട് പ്രഖ്യാപിച്ചിട്ടുണ്ട്.

സംസ്ഥാനത്ത് മഴ കനക്കുന്നു. നാല് ജില്ലകളില്‍ റെഡ് അലര്‍ട്ട്. കോഴിക്കോട്, വയനാട്, കണ്ണൂര്‍, കാസര്‍കോട് ജില്ലകളിലാണ് റെഡ് അലര്‍ട്ട് പ്രഖ്യാപിച്ചത്. തൃശ്ശൂര്‍, പാലക്കാട്, മലപ്പുറം എന്നീ മൂന്ന് ജില്ലകളില്‍ ഓറഞ്ച് അലര്‍ട്ടും പ്രഖ്യാപിച്ചു. വടക്കന്‍ കേരളത്തില്‍ മഴ അതിശക്തമായിയിരിക്കുകയാണ്. കനത്ത ജാഗ്രത വേണമെന്ന് കാലാവസ്ഥാ നിരീക്ഷണകേന്ദ്രം അറിയിച്ചു. ഇടിയോടും കാറ്റോടും കൂടിയ ശക്തമായ മഴയ്ക്കാണ് സാധ്യത.

എറണാകുളം തിരുവാങ്കുളത്ത് നിന്ന് കാണാതായ കല്യാണി എന്ന 3 വയസുകാരിയെ മരിച്ച നിലയില്‍ കണ്ടെത്തി. മൃതദേഹം മണിക്കൂറുകള്‍ നീണ്ട തെരച്ചിലിന് ഒടുവില്‍ ചാലക്കുടി പുഴയില്‍ നിന്നാണ് കണ്ടെത്തിയത്. അംഗനവാടിയില്‍ നിന്ന് അമ്മ വിളിച്ചുകൊണ്ടുവരുന്നതിനിടെ കാണാതായ കല്യാണിയുടെ മൃതദേഹമാണ് കണ്ടെത്തിയത്. കുട്ടിയെ ഉപേക്ഷിച്ചതാണെന്നതടക്കമുള്ള പരസ്പര വിരുദ്ധമായ മൊഴികളാണ് അമ്മ സന്ധ്യ തുടക്കത്തില്‍ നല്‍കിയിരുന്നത്. അമ്മയ്ക്ക് മാനസിക വെല്ലുവിളികളുണ്ടെന്ന സൂചനയാണ് ബന്ധുക്കളും നല്‍കുന്നത്. മൂഴിക്കുളം പാലത്തിന് മധ്യ ഭാഗത്ത് വച്ച് കുഞ്ഞിനെ ഉപേക്ഷിച്ചുവെന്നാണ് അമ്മ പൊലീസിനോട് വിശദമായ ചോദ്യം ചെയ്യലില്‍ പ്രതികരിച്ചത്.

എറണാകുളം മൂഴിക്കുളത്ത് മൂന്നു വയസുകാരി കല്യാണിയെ പുഴയില്‍ എറിഞ്ഞു കൊന്നത് താനാണെന്ന് അമ്മ സന്ധ്യ സമ്മതിച്ചെന്ന് പൊലീസ്. എന്തിനു കൊന്നു എന്ന ചോദ്യത്തിന് ‘ഞാന്‍ കൊന്നു ‘ എന്ന് ഭാവഭേദം ഇല്ലാതെ മറുപടി നല്‍കിയെന്നും സന്ധ്യയുടെ മാനസിക നില പരിശോധിക്കുമെന്നും പൊലീസ് അറിയിച്ചു. മാനസികാരോഗ്യ വിദഗ്ധന്‍ സ്റ്റേഷനില്‍ എത്തി സന്ധ്യയെ പരിശോധിക്കും. സന്ധ്യയ്ക്ക് മാനസിക പ്രശ്നമില്ലെന്നും മുന്‍പും കുട്ടിയെ ഉപദ്രവിച്ചിട്ടുണ്ടെന്നും കുട്ടിയുടെ അച്ഛന്‍ സുഭാഷ് പറഞ്ഞു.

സംസ്ഥാന സെക്രട്ടേറിയറ്റിന് മുന്നില്‍ തുടരുന്ന ആശാ വര്‍ക്കര്‍മാരുടെ സമരം ഇന്ന് നൂറാം ദിനത്തിലേക്കും കേരളമാകെ സഞ്ചരിച്ചുള്ള രാപ്പകല്‍ സമരയാത്ര പതിനാറാം ദിവസത്തിലേക്കും കടന്നു. പിണറായി സര്‍ക്കാര്‍ അഞ്ചാം വര്‍ഷത്തിലേക്ക് കടക്കുന്ന ദിവസമാണ് ആശമാരുടെ സമരം നൂറ് നാള്‍ പിന്നിടുന്നത്. മന്ത്രിതലത്തില്‍ നടത്തിയ ചര്‍ച്ചയെ തുടര്‍ന്ന് ആവശ്യങ്ങള്‍ പഠിക്കാന്‍ സമിതിയെ വച്ചെങ്കിലും നൂറ് രൂപയെങ്കിലും കൂട്ടാതെ സമരം അവസാനിപ്പിക്കില്ലെന്ന തീരുമാനത്തിലാണ് സമരക്കാര്‍.

മലപ്പുറം കൂരിയാട് നിര്‍മ്മാണത്തിലിരിക്കുന്ന ദേശീയ പാത തകര്‍ന്ന് അഞ്ചുപേര്‍ക്ക് പരിക്കേറ്റു. ദേശീയ പാതയുടെ സംരക്ഷണ ഭിത്തി ഇടിഞ്ഞ് താഴേക്ക് വീഴുകയായിരുന്നു. മണ്ണും കോണ്‍ഗ്രീറ്റ് കട്ടയും വന്ന് വീണ് സര്‍വ്വീസ് റോഡും ഇടിഞ്ഞു താഴ്ന്നു. സര്‍വ്വീസ് റോഡിലൂടെ പോകുകയായിരുന്ന രണ്ടു കാറുകള്‍ അപകടത്തില്‍ പെട്ടു. ഈ കാറിലെ യാത്രക്കാര്‍ക്കാണ് പരിക്കേറ്റത്. അശാസ്ത്രീയമായ നിര്‍മ്മാണമാണ് ദേശീയപാത തകരാന്‍ കാരണമെന്ന് ആരോപിച്ച് നാട്ടുകാര്‍ പ്രതിഷേധിച്ചു. അപകടത്തെ തുടര്‍ന്ന് മലപ്പുറം ജില്ലാ കളക്ടര്‍ ഇന്ന് യോഗം വിളിച്ചു ചേര്‍ത്തിട്ടുണ്ട്.

ഹയര്‍ സെക്കണ്ടറി അധ്യാപക ട്രാന്‍സ്ഫറുമായി ബന്ധപ്പെട്ട കേരള അഡ്മിനിസ്‌ട്രേറ്റീവ് ട്രിബ്യൂണലിന്റെ വിധി സ്റ്റേ ചെയ്ത ഹൈക്കോടതി ഉത്തരവിനെ സ്വാഗതം ചെയ്യുന്നുവെന്ന് പൊതു വിദ്യാഭ്യാസവകുപ്പ് മന്ത്രി വി ശിവന്‍കുട്ടി. സര്‍ക്കാര്‍ ഹയര്‍ സെക്കണ്ടറി സ്‌കൂള്‍ അധ്യാപകരുടെ 2025-26 ലെ ജനറല്‍ ട്രാന്‍സ്ഫര്‍ അടുത്ത അധ്യയനവര്‍ഷം ആരംഭിക്കുന്നതിന് മുമ്പ് പൂര്‍ത്തിയാക്കാനുള്ള എല്ലാ നടപടികളും സര്‍ക്കാര്‍ സ്വീകരിച്ചുകൊണ്ടിരിക്കുകയാണെന്ന് മന്ത്രി വ്യക്തമാക്കി.

ശബരിമല ദര്‍ശനം കഴിഞ്ഞ് മലയിറങ്ങി വന്ന തീര്‍ഥാടക ഷോക്കേറ്റ് മരിച്ചു. തെലങ്കാന മഹബുബ്നഗര്‍ ഗോപാല്‍പേട്ട മണ്ഡല്‍ സ്വദേശിനി സ്വദേശി ഭരതമ്മ (60) ആണ് മരിച്ചത്. ദര്‍ശനം കഴിഞ്ഞ് മടങ്ങവേ നീലിമലയില്‍ വെച്ചാണ് അപകടം സംഭവിച്ചത്.

ചെയ്യാത്ത തെറ്റ് താനെന്തിന് ഏല്‍ക്കണമെന്ന് അഭിഭാഷകയെ മര്‍ദിച്ച കേസിലെ പ്രതി അഡ്വക്കേറ്റ് ബെയ്ലിന്‍ ദാസ് മാധ്യമങ്ങളോട്. താനൊരു വക്കീലാണെന്നും കോടതിയെ അനുസരിക്കണമെന്നും ബെയ്ലിന്‍ ദാസ് പറഞ്ഞു. കോടതിയുടെ പരിഗണനയില്‍ ഉള്ള വിഷയമാണ്. അതുകൊണ്ട് എങ്ങനെ നില്‍ക്കണം എന്ന് തനിക്ക് അറിയാം. താന്‍ അത്തരത്തില്‍ ഒന്നും ചെയ്തിട്ടില്ലെന്നും എന്നാണെങ്കിലും സത്യം തെളിയുമെന്നും ബെയ്ലിന്‍ ദാസ് പറഞ്ഞു.

പാകിസ്ഥാനിലെ അണക്കെട്ട് നിര്‍മാണം വേഗത്തിലാക്കുമെന്ന പ്രഖ്യാപനവുമായി ചൈന. പഹല്‍ഗാം ഭീകരാക്രമണത്തിന് പിന്നാലെ ഇന്ത്യ സിന്ധു നദീജല കരാര്‍ മരവിപ്പിച്ച സാഹചര്യത്തിലാണിത്. ഖൈബര്‍ പക്തൂന്‍ഖ്വയില്‍ മൊഹ്‌മന്ത് എന്ന അണക്കെട്ടിന്റെ നിര്‍മാണം വേഗത്തിലാക്കാന്‍ ചൈന തീരുമാനിച്ചതായി ചൈനയുടെ സ്റ്റേറ്റ് ബ്രോഡ്കാസ്റ്റര്‍ ചൈന സെന്‍ട്രല്‍ ടെലിവിഷന്‍ റിപ്പോര്‍ട്ട് ചെയ്തു.

ലോകമെമ്പാടുമുള്ള അഭയാര്‍ത്ഥികള്‍ക്ക് അഭയം നല്‍കാന്‍ കഴിയുന്ന ഒരു ധര്‍മ്മശാലയല്ല ഇന്ത്യയെന്ന് സുപ്രീം കോടതി. ശ്രീലങ്കന്‍ പൗരന്റെ അഭയാര്‍ത്ഥി അപേക്ഷ നിരസിച്ചാണ് സുപ്രീം കോടതിയുടെ പരാമര്‍ശം. എല്‍ടിടിഇ ബന്ധം ആരോപിച്ച് 2015ല്‍ അറസ്റ്റിലായ ശ്രീലങ്കന്‍ പൗരന്റെ ഹര്‍ജി പരിഗണിക്കവെയാണ് സുപ്രീം കോടതിയുടെ പരാമര്‍ശം.

കോഴിക്കോട് പുതിയ സ്റ്റാന്‍ഡിലെ തീപ്പിടുത്തത്തില്‍ അന്വേഷണം തുടങ്ങി പൊലീസ്. കോര്‍പറേഷന്‍ കെട്ടിടത്തിലെ വീഴ്ചകള്‍ പരിശോധിക്കുമെന്നും ഉദ്യോഗസ്ഥര്‍ക്ക് പങ്കുണ്ടെങ്കില്‍ നടപടിയെടുക്കുമെന്നും മേയര്‍ വ്യക്തമാക്കി. കെട്ടിട നിര്‍മ്മാണത്തിലെ അശാസ്ത്രീയതയ്ക്കും നിയമ ലംഘനനത്തിനും കോര്‍പറേഷന്‍ ഭരണ സമിതിയാണ് ഉത്തരവാദികളെന്നാണ് പ്രതിപക്ഷ ആരോപണം. ടെക്സ്റ്റൈല്‍സ് ഉടമയും മുന്‍ ബിസിനസ് പങ്കാളിയും തമ്മിലുള്ള തര്‍ക്കമാണോ തീപിടുത്തതിന് പിന്നില്‍ എന്നതും അന്വേഷിക്കുന്നുണ്ട്.

തൃശ്ശൂര്‍ പൂരത്തിന്റെ നടത്തിപ്പുമായി ബന്ധപ്പെട്ട് സംസ്ഥാന സര്‍ക്കാര്‍ മാര്‍ഗനിര്‍ദ്ദേശങ്ങള്‍ പുറപ്പെടുവിച്ചു. വിവിധ വകുപ്പുകള്‍ സ്വീകരിക്കേണ്ട മാര്‍ഗ്ഗനിര്‍ദ്ദേശമാണ് ചീഫ് സെക്രട്ടറി ഡോ.ജയതിലക് സര്‍ക്കുലറായി പുറത്തിറക്കിയത്. തൃശ്ശൂര്‍ പൂരം നടത്തിപ്പിന് പൊതു മാര്‍ഗ്ഗനിര്‍ദേശം ഇല്ലാത്തതിനാലാണ് പുതിയ സര്‍ക്കുലറെന്നും വിശദീകരണത്തില്‍ പറയുന്നു.

പ്രായപൂര്‍ത്തിയാവാത്ത നാല് കുട്ടികള്‍ ഒരു സ്‌കൂട്ടറില്‍ പോകവേ ഗതാഗത മന്ത്രി കെ ബി ഗണേഷ് കുമാറിന്റെ മുന്നില്‍പ്പെട്ടതോടെ വാഹന ഉടമയുടെ ലൈസന്‍സ് റദ്ദാക്കാന്‍ മന്ത്രി നിര്‍ദേശം നല്‍കി. പത്തനാപുരത്ത് കുടുംബശ്രീയുടെ വാര്‍ഷികാഘോഷം ഉദ്ഘാടനം ചെയ്യാന്‍ എത്തിയതായിരുന്നു മന്ത്രി ഗണേഷ് കുമാര്‍.

സ്വര്‍ണ്ണമാല മോഷ്ടിച്ചെന്നാരോപിച്ച് വീട്ടുകാര്‍ നല്‍കിയ പരാതിയില്‍ വീട്ടുജോലിക്കാരിയായ ദലിത് സ്ത്രീയെ 20 മണിക്കൂര്‍ പൊലീസ് മാനസികമായി പീഡിപ്പിച്ചെന്ന പരാതിയെ കുറിച്ച് ഡിവൈഎസ്പിയോ അസി. കമ്മീഷണര്‍ റാങ്കില്‍ കുറയാത്ത പൊലീസുദ്യോഗസ്ഥനോ അന്വേഷിക്കണമെന്ന് മനുഷ്യാവകാശ കമ്മീഷന്‍ ഉത്തരവ്.തിരുവനന്തപുരം ജില്ലയ്ക്ക് പുറത്ത് ജോലി ചെയ്യുന്ന ഉദ്യോഗസ്ഥന് അന്വേഷണം ഏല്‍പ്പിക്കണമെന്നും ചെയര്‍പേഴ്സണ്‍ ജസ്റ്റിസ് അലക്സാണ്ടര്‍ തോമസ് ഉത്തരവിട്ടു.

തെറ്റായ പ്രവണത ആരുടെ ഭാഗത്തുനിന്നുണ്ടായാലും വെച്ചുപൊറുപ്പിക്കില്ലെന്ന് സിപിഎം സംസ്ഥാന സെക്രട്ടറി എം.വി.ഗോവിന്ദന്‍. പേരൂര്‍ക്കടയില്‍ ഇല്ലാത്ത മോഷണക്കുറ്റം ചുമത്തി പൊലീസ് സ്റ്റേഷനില്‍ ദളിത് സ്ത്രീയെ മാനസികമായി പീഡിപ്പിച്ച സംഭവത്തിലായിരുന്നു എംവി ഗോവിന്ദന്റെ പ്രതികരണം. അത്തരക്കാര്‍ക്ക് എതിരെ പാര്‍ട്ടിയും സര്‍ക്കാരും കടുത്ത നടപടി സ്വീകരിക്കുമെന്നും പ്രതിപക്ഷം ആയുധമാക്കുന്നത് സ്വാഭാവികമാണെന്നും എംവി ഗോവിന്ദന്‍ പറഞ്ഞു.

വിദേശ രാജ്യങ്ങളുമായി ബന്ധപ്പെടാനുളള ഉന്നത പദവി കേന്ദ്രസര്‍ക്കാരില്‍ നിന്ന് ശശി തരൂരിന് കിട്ടിയേക്കുമെന്ന അഭ്യൂഹം ശക്തമാകുന്നു. നരേന്ദ്ര മോദി നേരിട്ട് തരൂരുമായി ഇക്കാര്യം സംസാരിച്ചു എന്നാണ് സൂചനകള്‍. അതേസമയം തരൂരിന് പാര്‍ട്ടി നല്‍കിയ പദവികള്‍ തിരിച്ചെടുക്കണമെന്ന ആവശ്യം കോണ്‍ഗ്രസില്‍ ശക്തമായി. വിവാദങ്ങളോട് പ്രതികരിക്കാനില്ലെന്ന് വിദേശകാര്യ സ്റ്റാന്റിംഗ് കമ്മിറ്റി യോഗത്തിന് പാര്‍ലമെന്റിലെത്തിയ തരൂര്‍ മാധ്യമങ്ങളോട് പറഞ്ഞു.

ശശി തരൂരിനെ എംപിയാക്കാന്‍ കഠിനാധ്വാനം ചെയ്തത് പാവപ്പെട്ട ജനങ്ങളാണെന്ന് യുഡിഎഫ് കണ്‍വീനര്‍ അടൂര്‍ പ്രകാശ്. സ്ഥാനമാനങ്ങള്‍ ലഭിക്കുമ്പോള്‍ സ്വന്തം പാര്‍ട്ടിയെ കൂടി ശശി തരൂര്‍ ശ്രദ്ധിക്കണം. പാര്‍ട്ടിയുടെ നിയന്ത്രണത്തിലാകാന്‍ ശശി തരൂര്‍ തയ്യാറാകണം. പാര്‍ട്ടി വലയത്തിന് പുറത്തേക്ക് ശശി തരൂര്‍ പോകരുതെന്നാണ് അഭിപ്രായം. വലയത്തിനു പുറത്തു പോയി പ്രവര്‍ത്തിക്കുമ്പോള്‍ പല അഭിപ്രായങ്ങള്‍ വരും. ശശി തരൂര്‍ വിവാദത്തില്‍ ഒരു ക്ഷീണവും കോണ്‍ഗ്രസിനില്ലെന്നും അദ്ദേഹം പറഞ്ഞു.

ഇഡി ഉദ്യോഗസ്ഥന്‍ മുഖ്യപ്രതിയായ കൈക്കൂലി കേസില്‍ വിശദീകരണവുമായി എന്‍ഫോഴ്‌സ്‌മെന്റ് ഡയറക്ടറേറ്റ്. വ്യവസായി അനീഷ് ബാബു ഉന്നയിക്കുന്ന ആരോപണം അടിസ്ഥാനരഹിതമാണെന്നും അനീഷിനെതിരെ അഞ്ച് ക്രൈംബ്രാഞ്ച് കേസുകളുണ്ടെന്നും ഏത് അന്വേഷണത്തെയും സ്വാഗതം ചെയ്യുന്നുവെന്നും ഇഡി വ്യക്തമാക്കി. ഇഡി അസിസ്റ്റന്റ് ഡയറക്ടറായ ശേഖര്‍ കുമാര്‍ മുഖ്യപ്രതിയായ കേസില്‍ മറ്റ് മൂന്നുപേരെ അറസ്റ്റുചെയ്ത് നടപടിക്രമങ്ങളുമായി വിജിലന്‍സ് മുന്നോട്ടുപോകുന്ന ഘട്ടത്തിലാണ് ഇഡിയുടെ പുതിയ വിശദീകരണം.

മനുഷ്യ-പാമ്പ് സംഘര്‍ഷങ്ങള്‍ റിപ്പോര്‍ട്ട് ചെയ്യാനും ജീവന്‍ സംരക്ഷിക്കാനുമുള്ള ആധുനിക മാര്‍ഗമായ സര്‍പ്പ ആപ്പ് വനം വകുപ്പിന്റെ സ്റ്റാളില്‍ . പാമ്പുകടിയേറ്റുള്ള മരണങ്ങള്‍ തടയുന്നതിനായി വനം വകുപ്പ് ആവിഷ്‌കരിച്ച സംവിധാനമാണിത്. ആപ്പ് പ്രവര്‍ത്തനം തുടങ്ങി നാല് വര്‍ഷം കഴിയുമ്പോള്‍ പാമ്പുകടി കാരണമുള്ള മരണങ്ങള്‍ നാലില്‍ ഒന്നായി കുറക്കാന്‍ സാധിച്ചിട്ടുണ്ട്. മേളയില്‍ വരുന്ന പൊതുജനങ്ങള്‍ക്ക് സര്‍പ്പ ആപ്പിന്റെ പരിശീലനം ഉദ്യോഗസ്ഥര്‍ നല്‍കും.

ആന്ധ്രപ്രദേശില്‍ വീടിന് മുന്നിലുള്ള റോഡരികില്‍ നിര്‍ത്തിയിട്ടിരുന്ന കാറിനുളളില്‍ അബദ്ധത്തില്‍ കുടുങ്ങിയ നാലു കുട്ടികള്‍ക്ക് ദാരുണാന്ത്യം. വിജയനഗരം ജില്ലയില്‍ ഞായറാഴ്ച വൈകിട്ടോടെയാണ് ദാരുണ സംഭവം നടന്നത്. ഉദയ് (8), ചാരുമതി (8), കരിഷ്മ (6), മാനസ്വി (6) എന്നിവരാണ് മരിച്ചത്.

ബാങ്കില്‍ ഉപഭോക്താക്കള്‍ പണയം വെച്ചിരുന്ന 3.6 കിലോഗ്രാം സ്വര്‍ണം തട്ടിയെടുത്ത ബാങ്ക് ജീവനക്കാരന്‍ അറസ്റ്റില്‍. ഈ സ്വര്‍ണം ആരുമറിയാതെ എടുത്ത് കൊണ്ടുപോയി മറ്റ് ചില ബാങ്കുകളിലും ധനകാര്യ സ്ഥാപനങ്ങളിലും പണയം വെച്ച് ഇയാള്‍ 1.8 കോടി രൂപ വാങ്ങി. ഏറെ നാള്‍ കഴിഞ്ഞാണ് ബാങ്ക് അധികൃതര്‍ ഇത് കണ്ടെത്തി പരാതി നല്‍കിയതും ജീവനക്കാരന്‍ അറസ്റ്റിലായതും. ബംഗളുരു ദേവനഗരെയിലെ സ്വകാര്യ ബാങ്ക് ശാഖയിലാണ് സംഭവം. ബാങ്കില്‍ ഗോള്‍ഡ് ലോണ്‍ ഓഫീസറായി ഇക്കഴിഞ്ഞ ഒക്ടോബര്‍ മാസം മുതല്‍ ജോലി ചെയ്യന്ന ടി.പി സഞ്ജയ് (33) ആണ് പിടിയിലായത്. ഇതിനൊക്കെ പുറമെ താന്‍ ജോലി ചെയ്യുന്ന ബാങ്കില്‍ 2.7 കിലോ മുക്കുപണ്ടം പണയം വെച്ച് ഇയാള്‍ കോടികള്‍ തട്ടുകയും ചെയ്തിട്ടുണ്ട്. ഇങ്ങനെ സമ്പാദിച്ച പണമെല്ലാം ഇയാള്‍ ചെലവഴിച്ചത് ഓണ്‍ലൈന്‍ ചൂതാട്ടത്തിനും ആഡംബര ജീവിതത്തിനുമാണെന്ന് റിപ്പോര്‍ട്ടുകള്‍.

ഓപ്പറേഷന്‍ സിന്ദൂറുമായി ബന്ധപ്പെട്ട സംഭവവികാസങ്ങള്‍ക്കിടെ വിദേശകാര്യ സെക്രട്ടറി വിക്രം മിസ്രിക്കും കുടുംബത്തിനുമെതിരെ നടന്ന സൈബര്‍ അധിക്ഷേപത്തില്‍ പാര്‍ലമെന്ററി സമിതി പ്രതിഷേധിച്ചു. ശശി തരൂര്‍ അധ്യക്ഷനായ വിദേശകാര്യ പാര്‍ലമെന്ററി സമിതിയുടെ ഇന്നലെ ചേര്‍ന്ന യോഗമാണ് പ്രതിഷേധം അറിയിച്ചത്. ഇന്ത്യയുടെ സൈനിക നീക്കങ്ങള്‍ സംബന്ധിച്ച് മികച്ച നിലയിലാണ് വിദേശകാര്യ സെക്രട്ടറി വിശദീകരിച്ചതെന്ന് ശശി തരൂര്‍ ചൂണ്ടിക്കാട്ടി.

പാകിസ്ഥാന് വേണ്ടി ചാര പ്രവര്‍ത്തി നടത്തിയ ഒരാളെ കൂടി ഹരിയാനയില്‍ നിന്ന് പൊലീസ് പിടികൂടി. നൂഹ് സ്വദേശി മുഹമ്മദ് താരിഫ് ആണ് പിടിയിലായത്. സൈനിക പ്രവര്‍ത്തനങ്ങളെ കുറിച്ചുള്ള ഇന്റലിജന്‍സ് വിവരങ്ങള്‍ പാക്കിസ്ഥാന് ചോര്‍ത്തി നല്‍കിയെന്നാണ് ഇയാള്‍ക്കെതിരെയുള്ള ആരോപണം.പാകിസ്ഥാന് വേണ്ടി വടക്കേ ഇന്ത്യ കേന്ദ്രീകരിച്ച് പ്രവര്‍ത്തിച്ചിരുന്ന വന്‍ ചാരശൃംഖലയാണ് കഴിഞ്ഞ ദിവസങ്ങളില്‍ സുരക്ഷാ സേന തകര്‍ത്തത്. രണ്ട് സ്ത്രീകളും ഒരു യൂട്യൂബറും ഉള്‍പ്പെടെ കുറഞ്ഞത് 12 പേരെയെങ്കിലും പഞ്ചാബ്, ഹരിയാന, ഉത്തര്‍പ്രദേശ് സംസ്ഥാനങ്ങളില്‍ നിന്ന് ചാരവൃത്തിക്കും സൈനിക രഹസ്യങ്ങള്‍ ചോര്‍ത്തിയതിനും സുരക്ഷാ ഏജന്‍സികള്‍ അറസ്റ്റ് ചെയ്തു.

ചൈനീസ് സന്ദര്‍ശനത്തിന് എത്തിയ പാകിസ്ഥാന്‍ ഉപപ്രധാനമന്ത്രിയും വിദേശകാര്യ മന്ത്രിയുമായ ഇഷാഖ് ദാറിന് ചൈന ഔദ്യോഗിക സ്വീകരണമൊരുക്കാതിരുന്നത് അന്താരാഷ്ട്ര തലത്തില്‍ ചര്‍ച്ചയാവുന്നു. പാകിസ്ഥാനെ നാണം കെടുത്തുന്ന നിലപാടാണ് ചൈന സ്വീകരിച്ചതെന്ന് പരക്കെ അഭിപ്രായമുയര്‍ന്നിട്ടുണ്ട്. ‘ഉറച്ച ബന്ധമുള്ള സഹോദരന്‍’ എന്ന് പാകിസ്ഥാന്‍ എപ്പോഴും വിശേഷിപ്പിക്കാറുള്ള ചൈനയില്‍ നിന്നുണ്ടായ ഇത്തരമൊരു സമീപനം ഇരു രാജ്യങ്ങളും തമ്മിലുള്ള ബന്ധത്തിന്റെ നിലവാരത്തെക്കുറിച്ച് പുതിയ ഊഹാപോഹങ്ങള്‍ക്ക് വഴിവെച്ചിരിക്കുകയാണ്.

സിംഗപ്പൂരിലും ഹോങ്കോങ്ങിലും കോവിഡ് പടരുന്നുവെന്ന റിപ്പോര്‍ട്ടിന് പിന്നാലെ ഇന്ത്യയിലെ സാഹചര്യം വിലയിരുത്താന്‍ കേന്ദ്ര ആരോഗ്യ മന്ത്രാലയത്തിന് കീഴിലുള്ള വിവിധ ഏജന്‍സികളുടെ യോഗം ചേര്‍ന്നു.നിലവില്‍ സ്ഥിതി നിയന്ത്രണ വിധേയമെന്നാണ് വിലയിരുത്തല്‍.നിലവില്‍ രാജ്യത്തെ ആക്ടീവ് കേസുകള്‍ 257 മാത്രമാണ്.കേസുകളില്‍ ഭൂരിഭാഗവും നേരിയ രോഗ ലക്ഷണങ്ങള്‍ മാത്രമാണെന്നും ആശുപത്രിയില്‍ പ്രവേശിപ്പിക്കേണ്ട ആവശ്യമില്ലെന്നുമാണ് വിലയിരുത്തല്‍.

ഐപിഎല്ലില്‍ നിന്ന് ലക്‌നൗ സൂപ്പര്‍ ജയന്റ്‌സ് പുറത്തായി. സണ്‍റൈസേഴ്‌സ് ഹൈദരാബാദിനോട് ഇന്നലെ നടന്ന കടുത്ത പോരാട്ടത്തില്‍ ആറ് വിക്കറ്റിന് തോറ്റതോടെയാണ് ലക്‌നൗ പ്ലേ ഓഫ് കാണാതെ മടങ്ങുന്നത്. ടോസ് നഷ്ടപ്പെട്ട് ബാറ്റിംഗിനിറങ്ങിയ ലക്നൗ 65 റണ്‍സെടുത്ത മിച്ചല്‍ മാര്‍ഷിന്റേയും 61 റണ്‍സെടുത്ത എയ്ഡന്‍ മാര്‍ക്രത്തിന്റേയും മികവില്‍ 7 വിക്കറ്റ് നഷ്ടത്തില്‍ 205 റണ്‍സെടുത്തു. കൂറ്റന്‍ വിജയലക്ഷ്യം പിന്തുടര്‍ന്ന ഹൈദരാബാദ് 20 പന്തില്‍ 59 റണ്‍സെടുത്ത അഭിഷേക് ശര്‍മയുടെ മികവില്‍ 18.2 ഓവറില്‍ നാല് വിക്കറ്റ് നഷ്ടത്തില്‍ ലക്ഷ്യം മറികടന്നു.

ഇന്ദ്രജിത്ത് സുകുമാരന്‍, അനശ്വര രാജന്‍ എന്നിവരെ പ്രധാന കഥാപാത്രങ്ങളാക്കി ദീപു കരുണാകരന്‍ സംവിധാനം ചെയ്യുന്ന പുതിയ ചിത്രം മിസ്റ്റര്‍ ആന്‍ഡ് മിസിസ് ബാച്ച്‌ലര്‍ ട്രെയിലര്‍ എത്തി. കല്യാണ വേഷത്തില്‍ ഒളിച്ചോടുന്ന പെണ്‍കുട്ടിയായി അനശ്വര രാജന്‍ എത്തുന്നു. ചിത്രം മേയ് 23 ന് തിയറ്ററുകളില്‍ എത്തും. ഹൈലൈന്‍ പിക്ചേഴ്സിന്റെ ബാനറില്‍ പ്രകാശ് ഹൈലൈന്‍ നിര്‍മിക്കുന്ന ചിത്രത്തിന്റെ തിരക്കഥ ഒരുക്കുന്നത് അര്‍ജുന്‍ ടി സത്യന്‍ ആണ്. ഡയാന ഹമീദ്, റോസിന്‍ ജോളി, ബൈജു പപ്പന്‍, രാഹുല്‍ മാധവ്, സോഹന്‍ സീനുലാല്‍, മനോഹരി ജോയ്, ജിബിന്‍ ഗോപിനാഥ്, ലയ സിംപ്സണ്‍ എന്നിവരാണ് ചിത്രത്തിലെ മറ്റു പ്രധാന വേഷങ്ങളിലെത്തുന്നത് . എക്സിക്യൂട്ടീവ് പ്രൊഡ്യൂസര്‍ ബാബു ആര്‍, ഛായാഗ്രാഹണം പ്രദീപ് നായര്‍, എഡിറ്റര്‍ സോബിന്‍ കെ. സോമന്‍, ടീസര്‍ കട്ട് സോനു ആര്‍, സംഗീതവും പശ്ചാത്തല സംഗീതവും പി.എസ്. ജയഹരി.

വന്‍ വിജയം കരസ്ഥമാക്കിയ റോജ എന്ന ചിത്രം റിലീസ് ചെയ്ത് 35 വര്‍ഷങ്ങള്‍ക്കു ശേഷം മണിരത്‌നം തന്റെ ചിത്രത്തിലെ പ്രേക്ഷകര്‍ ഏറ്റെടുത്ത ഗാനത്തിന്റെ പേരില്‍ ഇറങ്ങാന്‍ പോകുന്ന മലയാള ചിത്രത്തിന്റെ ഫസ്റ്റ് ലുക്ക് പോസ്റ്റര്‍ റിലീസ് ചെയ്തു. മധുബാല – ഇന്ദ്രന്‍സ് കോമ്പോ ഒന്നിക്കുന്ന ചിത്രത്തിന്റെ പേര് ‘ചിന്ന ചിന്ന ആസൈ’ എന്നാണ്. മലയാളത്തില്‍ കുറെ വര്‍ഷക്കാലത്തെ ഇടവേളക്കു ശേഷമാണ് ശക്തമായ കേന്ദ്ര കഥാപാത്രത്തില്‍ മധുബാല അഭിനയിക്കുന്നത്. പൂര്‍ണ്ണമായും വാരണാസിയില്‍ ചിത്രീകരണം പൂര്‍ത്തിയായ ചിത്രം ബാബുജി പ്രൊഡക്ഷന്‍സിന്റെ ബാനറില്‍ അഭിജിത് ബാബുജിയാണ് ചിത്രത്തിന്റെ നിര്‍മ്മാണം നിര്‍വഹിക്കുന്നത്. ഏറെ ശ്രദ്ധ നേടിയ ഹ്രസ്വചിത്രം ‘എന്റെ നാരായണിക്ക്’ ശേഷം വര്‍ഷാ വാസുദേവ് ആണ് ചിന്ന ചിന്ന ആസൈയുടെ രചനയും സംവിധാനവും നിര്‍വഹിക്കുന്നത്. ഗോവിന്ദ് വസന്തയാണ് ചിത്രത്തിന്റെ സംഗീത സംവിധാനം നിര്‍വഹിക്കുന്നത്.

ഗുരുജിയുടെ വാക്കുകൾ (15)

നമ്മുടെ മനസ്സ് എപ്പോഴും ദുഖകരമായ അനുഭവങ്ങളിലേക്ക് തിരിച്ചു പോകുന്നു. ജീവിതം ഒരു മലകയറ്റം പോലെയാണ്. ദുഖകരമായ ഓര്‍മ്മകള്‍ കൂടെ കൊണ്ടു പോകുമ്പോള്‍ ചുമലിലെ ഭാരം കൂടുകയും മുന്നോട്ടുള്ള യാത്ര കഠിനമാകുകയും ചെയ്യുന്നു. യാതൊരു ഉപകാരവും ഇല്ലാത്ത പാഴ് വസ്തുക്കള്‍ ചുമന്നു കൊണ്ടു പോകുന്നതു പോലെയാണ് നാം ഭൂതകാലത്തിലെ സുഖകരമല്ലാത്ത ഓര്‍മ്മകളെ കൂടെ കൊണ്ടു പോകുന്നത്. എവിടെ വച്ച് ഈ ഭാരം ഉപേക്ഷിക്കാന്‍ കഴിയുന്നുവോ അപ്പോള്‍ മാത്രമേ ജീവിതത്തില്‍ ശാന്തിയും സമാധാനവും സന്തോഷവും നിറയുകയുള്ളൂ. ഉള്‍ക്കൊള്ളേണ്ടവയെ ഉള്‍ക്കൊണ്ട് അനാവശ്യമായ ഓര്‍മ്മകളെ ഉപേക്ഷിക്കുമ്പോള്‍ മനസ്സ് സ്വതന്ത്ര്യമാകുകയും ജീവിതം ആനന്ദപൂര്‍ണ്ണമാകുകയും ചെയ്യുന്നു.

വാർത്തകൾ ഒറ്റനോട്ടത്തിൽ – 2025 | മെയ് 20 | ചൊവ്വ കപിൽ ശങ്കർ

ഗുരുജിയുടെ വാക്കുകൾ (15)

തയ്യാറാക്കിയത്:
കപിൽ ശങ്കർ

വാർത്തകൾ ഒറ്റനോട്ടത്തിൽ – 2025 | ജൂൺ 23 | തിങ്കൾ കപിൽ ശങ്കർ

മിഷിഗൺ പള്ളിയിലെ ആരാധനയ്ക്കിടെ വെടിവെപ്പ് ഒരാൾക്ക് പരിക്ക്, ആയുധധാരി വെടിയേറ്റ് മരിച്ചു

മെസ്ക്വിറ്റ്, I-35-ൽ പോലീസ് പിന്തുടരുന്നതിനിടെ വെടിവയ്പ്പ് നടത്തിയ പ്രതി ആത്മഹത്യ ചെയ്തു

LEAVE A REPLY Cancel reply

Most Popular

ചിന്താ പ്രഭാതം – 2025 | ജൂൺ 24 | ചൊവ്വ ബേബി മാത്യു അടിമാലി

“ഇന്നത്തെ ചിന്താവിഷയം” – 2025 | ജൂൺ 24 | ചൊവ്വ പ്രൊഫസ്സർ എ.വി. ഇട്ടി മാവേലിക്കര

മലയാളി മനസ്സ് — ആരോഗ്യ വീഥി – 2025 | ജൂൺ 24 | ചൊവ്വ തയ്യാറാക്കിയത്: ആസിഫ അഫ്രോസ്, ബാംഗ്ലൂർ

കുട്ടീസ് കോർണർ (എൺപതാം വാരം) അവതരണം: സൈമ ശങ്കർ, മൈസൂർ

Recent Comments

EDITOR PICKS

ചിന്താ പ്രഭാതം – 2025 | ജൂൺ 24 | ചൊവ്വ ബേബി മാത്യു അടിമാലി

“ഇന്നത്തെ ചിന്താവിഷയം” – 2025 | ജൂൺ 24 | ചൊവ്വ പ്രൊഫസ്സർ എ.വി. ഇട്ടി മാവേലിക്കര

മലയാളി മനസ്സ് — ആരോഗ്യ വീഥി – 2025 | ജൂൺ 24 | ചൊവ്വ തയ്യാറാക്കിയത്: ആസിഫ അഫ്രോസ്, ബാംഗ്ലൂർ

POPULAR POSTS

ലഹരിക്കേസിൽ തമിഴ് നടൻ ശ്രീകാന്ത് അറസ്റ്റിൽ

ഉത്തര്‍പ്രദേശിൽ സ്ത്രീധന പീഡനത്തെ തുടര്‍ന്ന് നാല് വയസുള്ള കുഞ്ഞിനെ കൊലപ്പെടുത്തി അമ്മ ആത്മഹത്യ ചെയ്തു

അഹമ്മദാബാദ് വിമാന ദുരന്തത്തില്‍ മരിച്ച മലയാളി നഴ്‌സ് രഞ്ജിതയുടെ മൃതദേഹം തിരിച്ചറിഞ്ഞു

POPULAR CATEGORY

ABOUT US

FOLLOW US

വാർത്തകൾ ഒറ്റനോട്ടത്തിൽ – 2025 | മെയ് 20 | ചൊവ്വ കപിൽ ശങ്കർ

ഗുരുജിയുടെ വാക്കുകൾ (15)

തയ്യാറാക്കിയത്: കപിൽ ശങ്കർ

LEAVE A REPLY Cancel reply

Most Popular

Recent Comments

EDITOR PICKS

POPULAR POSTS

POPULAR CATEGORY

ABOUT US

FOLLOW US

തയ്യാറാക്കിയത്:
കപിൽ ശങ്കർ