കോട്ടയം: കേരളത്തിലെ പുതിയ ലുലു മാൾ കോട്ടയത്ത് പ്രവർത്തനം ആരംഭിച്ചു. സംസ്ഥാനത്തെ ലുലു ഗ്രൂപ്പിന്‍റെ അഞ്ചാമത്തെ ഷോപ്പിങ് മാൾ ആണ് കോട്ടയം മണിപ്പുഴയിൽ തുറന്നത്. മന്ത്രി വിഎൻ വാസവൻ ലുലു മാൾ ഉദ്ഘാടനം ചെയ്തു. ഇന്ന് വൈകീട്ട് നാല് മണി മുതൽ പൊതുജനങ്ങൾക്കു മാളിലേക്ക് പ്രവേശനമുണ്ട്.
കോട്ടയത്തിന്‍റെ ചരിത്രത്തിലെ നാഴികക്കല്ലാണ് ലുലു മാൾ ഉദ്ഘാടനമെന്ന് ലുലു ഗ്രൂപ്പ് എക്സിക്യുട്ടീവ് ഡയറക്ടർ എംഎ അഷ്റഫ് അലി പറഞ്ഞു. കോട്ടയത്തിനു വേണ്ടി ലുലു ഗ്രൂപ്പിന്‍റെ ക്രിസ്മസ് സമ്മാനമാണിതെന്നാണ് ലുലു ഗ്രൂപ്പ് ചെയർമാൻ എംഎ യൂസഫലി ചടങ്ങിൽ പറഞ്ഞത്. കേരളത്തിൽ പുതിയ പദ്ധതികൾ വരണമെന്നും അദ്ദേഹം ആവശ്യപ്പെട്ടു.
കമ്പനിക്ക് വേണ്ടിയോ എനിക്ക് വേണ്ടിയോ നിയമവിരുദ്ധമായി പണം സമ്പാദിക്കരുത്. സർക്കാരിനെയോ കസ്റ്റമറിനെയോ കമ്പനിയെയോ പറ്റിച്ചു പണമുണ്ടാക്കരുത്. ഗുണനിലവാരം ഉള്ള സാധനങ്ങൾ മാത്രമേ കൊടുക്കാൻ പാടുള്ളുവെന്നാണ് താൻ ജീവനക്കാരോട് പറയാറുള്ളതെന്നും യൂസഫലി പറഞ്ഞു. 2000 പേർ കോട്ടയം മാളിൽ നേരിട്ടും പരോക്ഷമായും ജോലി ചെയ്യുന്നുണ്ടെന്നും അദ്ദേഹം വ്യക്തമാക്കി.
23,000ല്‍ ഏറെപ്പേർ ഇന്ത്യയിൽ ലുലു ഗ്രൂപ്പിനായി ജോലി ചെയ്യുന്നുണ്ട്. ഫുഡ് പ്രോസസിങ് യൂണിറ്റുകളിലൂടെ ഗുണനിലവാരമുള്ള ഭക്ഷണം കൊടുക്കാൻ ഞങ്ങൾ ബാധ്യസ്ഥരാണ്. കോട്ടയത്ത് അതായിരിക്കും ഞങ്ങളുടെ മുഖമുദ്രയെന്നും യൂസഫലി പറഞ്ഞു.
ജനങ്ങൾക്കു വേണ്ടി ഞങ്ങൾ തുറന്നുകൊടുക്കുന്ന ഈ സംരംഭം പണം സമ്പാദിക്കാൻ വേണ്ടിയുള്ള ഒരു ഹൈപ്പർ മാർക്കറ്റ് അല്ല. പണം സമ്പാദിക്കാൻ വേറെയും മാർഗങ്ങൾ ഉണ്ട്. ഇത് കോട്ടയത്തിനു വേണ്ടിയുള്ള ലുലു ഗ്രൂപ്പിന്‍റെ ക്രിസ്മസ് സമ്മാനമാണ്.
കേരളത്തെ വളർത്താൻ രാഷ്ട്രീയക്കാർ, മാധ്യമങ്ങൾ, ബിസിനസുകാർ എല്ലാവരും ഒരുമിച്ചു നിൽക്കണം. യൂട്യൂബർമാർ പലതും നശിപ്പിക്കാൻ വേണ്ടിയാണു ശ്രമിക്കുന്നത്. നമ്മളെ ആട്ടിപ്പായിക്കാൻ ചില വ്ലോഗർമാർ ഉണ്ട്. അവരെ വിശ്വസിക്കാനും ചിലരുണ്ട്. അവരാരും ഈ നാടിനു വേണ്ടി ഒരു സംഭാവനയും ചെയ്യാതെ നാട്ടിലെ പലതും നശിപ്പിക്കാനാണു നിലനിൽക്കുന്നതെന്നും യൂസഫലി പറഞ്ഞു.
അക്ഷരനഗരിക്ക് ഇത് ആഹ്ലാദത്തിന്‍റെയും അഭിമാനത്തിന്‍റെയും നിമിഷമാണെന്നും അതിന് യൂസഫലിക്ക് നന്ദി രേഖപ്പെടുത്തുന്നുവെന്നുമാണ് മാളിന്‍റെ ഉദ്ഘാടനം നിർവഹിച്ച മന്ത്രി വിഎൻ വാസവൻ പറഞ്ഞത്. നമ്മുടെ രാജ്യം ലോകത്തിനു സംഭാവന ചെയ്ത ബിസിനസ് ചക്രവർത്തി ആണ് അദ്ദേഹം. ലോകം ശ്രദ്ധിക്കുന്ന ഇന്ത്യക്കാരനായ ബിസിനസുകാരൻ. ഗുണമേന്മ, സർവീസ്, വിലക്കുറവ് എന്നിവ അദ്ദേഹം അക്ഷരനഗരിക്കു പ്രദാനം ചെയ്തെന്നും മന്ത്രി കൂട്ടിച്ചേർത്തു.
ലുലു ഗ്രൂപ്പിന്‍റെ യാത്രയെ സംബന്ധിച്ച വിഡിയോയും വേദിയിൽ പ്രദർശിപ്പിച്ചു. ആഗോളതലത്തിൽ 25 രാജ്യങ്ങളിലായി, 276 അധികം ഹൈപ്പർമാർക്കറ്റുകളാണ് ലുലുവിന് ഉള്ളത്. 73,000ത്തിലധികം ജീവനക്കാർ ഇവിടങ്ങളിൽ ജോലി ചെയ്യുന്നുണ്ടെന്നും അതിൽ പകുതിയിലേറെയും മലയാളികളാണെന്നും വീഡിയോയിൽ വ്യക്തമാക്കുന്നു. അഹമ്മദാബാദ്, ചെന്നൈ, ഗുരുഗ്രാം, തിരൂർ, പെരിന്തൽമണ്ണ എന്നിവിടങ്ങളിൽ പുതിയ മാളുകൾ നിർമാണത്തിലാണ്.
